自組11人墨西哥18天遊 (Part 2)

 自組11人墨西哥18天遊 (Part 1) :

http://chuchu-hung.blogspot.com/2018/12/1118-part-1.html

 

9/11/2018
D10 – Merida 梅里達 > Uxmal烏斯馬爾>
Kabah卡巴> Caves of Loltun羅屯洞穴
HOTEL: Gran Real Yucatan (3*)

今日首個景點, 烏斯馬爾嘅入口

第一眼被吸引嘅係巫師金字塔, 因為佢外形有別所有金字塔嘛!
(個名好有趣, 梗係有段故呢!)係呀!一陣講, 講下厘個古城先。

烏斯馬爾喺公元500年係尤卡坦西部最大城邦, 全盛時期曾與奇琴依察結盟,
雄霸瑪雅北部; 即使16世紀西人入侵, 烏斯馬爾仍有人居住,
但西人就無喺度建設啦! 後來當然被廢棄啦!
正中斜面係樓梯黎架!

烏斯馬爾的古瑪雅語中, 意指三次建造, 被認定為瑪雅建築中普克風格嘅代表。據維基資料: 『一般來說是在老神廟的上面建造新神廟，
但這裡新神廟早在老神廟上方正中偏右，以保存西側的老神廟。』
上面嘅尖頂洞, 可能係第II或III神殿入口。

可惜我地上唔到去參觀呢! 從資料說明中, 厘度嘅多座神廟,
主要集中喺塔嘅2/3高度以上。(你講咩? 我都唔明)
按維基資料, 座金字塔嘅結構係咁嘅!

現場圖片, 雖然影嘅角度有少少偏差, 大概都可對比到啦!

厘座金字塔非常吸引, 所以環繞一周; 厘個唔知會唔會係 I 神廟嘅入口呢?

再睇下佢背面同另一個側面, 除左樓梯, 全屬圓角建築。

喺背面階梯嘅側面同頂上嘅神廟, 砌滿羽蛇神頭像。

(餵! 睇完啦! 你未講故仔呀!)
巫師金字塔的傳說：從前有個巫師老太太，她無小孩，有日執到隻蛋，
孵出個矮人，佢將矮人視如己出撫養…有一日，老太太叫兒子向國王挑戰，
國王出左幾道難題，矮人喺老太太幫助下都達成任務;
國王嬲了! 要矮人喺一夜間起座全城最高嘅建築，否則殺左佢;
老太太叫兒子唔使怕，先睡一覺。結果一座城中最高嘅金字塔就憑空出現;
所以厘座金字塔又稱為「巫師金字塔」。
喺巫師金字塔後面, 係一座鳥之四合院。

因為厘座建築牆外有D貌似鸚鵡嘅鳥

內庭園嘅柱廊

導遊話厘D係佢地嘅房間

石頭喺修建之前經核對編碼

之後我地再行去修女四合院, 已經想像到當年建築嘅精細。

厘間金字頂, 屋唔似屋, 但似乎有來/去水設備, 係咩呢?

幾乎所有角位都拼砌左羽蛇神面譜

凸出黎成個鈎嘅係羽蛇神個鼻, 好易認啫!

外牆圖案精美外, 仲有鳥形雕塑。

入到去內庭院, 圍住嘅三堵牆嘅圖案都唔同

厘堵牆最靚

羽蛇神面譜見多啦! 厘度嘅雕刻裏面, 有條生動嘅蛇, 蛇身仲繞左去左邊添!

至於厘舊石, 上面一格格, 睇唔出係字 / 畫,
又特別起個頂保護, 當然係珍寶啦!
(咁即係咩呀?) 唔知係咩喎!最好有師兄師姐賜教啦!

厘個城雖然已被廢棄, 但人棄我取, 搞錯, 係人棄鬣蜥取先啱,
尤卡坦嘅古城遺址, 多數住左好多新住客。

(咩新住客呀! 我地喺尤卡坦分分鐘耐過墨西哥人架! 咪阻住我開餐, 唔該借借啦!)

唔好意思, 我地繼續欣賞修女四合院嘅精美建築。

走LU! 我地穿過厘個門口離開。

繼續前行, 我地經過一個球賽場, 據資料, 到目前為止, 古城中只發現厘個球場。

賽場左右高牆上有一石球圈, 將實心橡膠球投入洞算贏,
但不能用手踫腳踢, 只能用膝蓋、大腿、肩和肘部觸球。

當時嘅球賽並非單純運動,  而係祭禮, 勝隊嘅隊長得到榮耀, 會割左頭臚作獻祭, 亦有一說係輸隊隊長頭臚作獻祭, 名乎其實嘅一賽定生死。

咦! 有個窿被圍住喎! 原來係個井, 應該係厘度嘅主要食水來源啦!

跟住再到大金字塔, 叫得大金字塔, 當然比巫師金字塔更大啦!
上去都幾要腳力架! 又無得扶喎! 如果腳力唔夠嘅長者千萬要量力而為,
因為一跌到底, 好危險架!

頂上建築精美, 即使幾級樓梯嘅建築都好考究。

牆上石砌嘅圖案

厘個欄住嘅空間,

除左牆上有石砌圖案,下面仲有個羽蛇神面譜

上到塔頂, 可以眺望整個古城, 包括剛才睇過嘅巫師金字塔、鳥之四合...... 。

從大金字塔眺望到總督宮殿 , 我估係當時酋長之類卦!

落番地面

繼續參觀總督宮殿, 厘度主要作觀星用途, 以推測雨季來臨。
前面係雙頭美洲虎, 估計祭祠時用作安放獻祭者的心臟(活人獻祭)

總督宮殿外觀

近屋頂有好多橫向排列嘅圓形石雕, 全部係海龜, 所以稱海龜屋。

墓地嘅部份建築

再見啦! 巫師金字塔!

離開前仲有個大圓形, 其實一入黎就應該見到, 只因俾金字塔吸引左啫!
佢係個蓄水池, 而家當然廢棄左啦!

當年係咁用嘅!

離開Uxmal烏斯馬爾後, 唔到30分鐘車程, 我地黎到Kabah卡巴,
仍屬瑪雅時期普克風格嘅建築, 踏入第一眼係一個敞大嘅廣場。

首先注意嘅係兩層高嘅宮殿

外表睇黎好有層次感, 但裏面可觀性已所餘無幾。

從梯階頂俯瞰, 下面一格格嘅係居住嘅房屋。

另一邊, 喺Godz Poop面具神殿前面, 有個蓄水池, 佢嘅結構同Uxmal嘅一樣。

喺面具神殿前嘅廣場地上, 排滿有待復修嘅殘件。

原本面具神殿外牆舖砌左250個羽蛇神面譜, 可想像幾美麗壯觀。
係咪好熟口面呢? 係呀! 同剛參觀完嘅修女四合院嘅拼砌幾乎一樣。

每個面譜清楚睇到圓形眼球, 彎鈎嘅鼻因為太突出,
好多都斷左,  仲有長形大口上長著牙齒。

穿過厘堵牆又係另一光景

厘度門嘅一對四組石刻, 係瑪雅時期嘅戰士。

牆上除左刻有漂亮圖案外, 兩座雕像肯定唔會被忽視啦!

左邊嘅較完整, 睇左好耐, 先睇出原來頭上戴有美洲虎頭飾,
係喎! 見D印第安人都有咁嘅打扮喎!

導遊話係一男一女, 雖然其一無左個頭, 我橫睇掂睇, 兩個都似男人囉!

從Godz Poop面具神殿俯瞰周圍

今日雖然行走於林區, 其實路況一D都唔差,
厘D路喺高空下望, 應該難以察覺到。

午餐後, 唔使一小時, 已到達 Loltun Caves 羅屯洞穴。

入口附近嘅瑪雅石雕

進入洞穴, 必需由導賞員帶領, 而且洞內又濕又暗, 你睇導賞員揹住個大電筒就知啦!

洞穴入口, 佢話牆上有瑪雅人刻嘅壁畫, 我眼力差,
望極都唔見, 風吹雨打日曬, 有都好模糊啦!

洞穴內無乜人為加工, 屬原汁原味, 據講厘度曾住過幾千瑪雅人喎!

中間石上嘅掌印屬數千年前瑪雅人留下(好似好假喎!)

整體黎講, 洞穴好大, 保存得唔錯, 由於省電, 每到之處,
亮燈時間有限, 所以唔可以落後得太耐。

又係上千年嘅研磨工具

洞內黑暗, 時間上無可能用腳架, 只能將ISO提高, 所以未必影得清。

洞內四通八達, 住一千幾百人都係可以嘅! 導賞員話最高峰住過六千人架!

見唔見中間個小丘?

小丘頂上名乎其實有個石"頭", 據講係時人作祭祠用嘅!

洞內層層深入, 感覺幾似建築物, 入完一進, 又深入第二、三進。

洞內嘅石鐘乳比石筍發達

地上嘅係水流痕跡, 話就話水過留痕啫! 唔知要幾多千萬年先留到啦!
不過咁踩法, 睇怕唔使好多年會無哂囉!

可以見到某D洞頂透光 (即係穿左窿囉!)

係呀! 厘個真係大窿啦! D樹仲可以伸展出去哂太陽, 透透氣添!

厘隻貓頭鷹睇怕守洞都守左唔過億都有千萬年啦!
(搞乜前面又有咁大嘅樹根呀?)

聰明! 前面又有大窿, 另一棵樹伸D根落黎飲水囉!
你知墨西哥水源幾缺乏架啦!

好有原始自然美!

我地由梯級離開

出口唔係剛才入洞嘅地方

再見啦!

D10   完




 

 

20/11/2018 

D11 - Merida 梅里達 >  Ria Lagartos自然保護區 >
Las Coloradas粉紅湖 >
Selva Maya Hacienda Restaurant 瑪雅叢林莊園餐廳 >
X'keken Cenote & Samula Cenote 天然井 >
Valladolid巴利亞多利德 >
HOTEL: Meson del Marques, Valladolid (4*)


今早我地會去坐船遊覽自然保護區,

出發2.5小時後抵達 Ria Lagartos嘅碼頭。

買左船票後分坐兩船

喺厘度見得較多嘅係鵜鶘, 俗稱塘鵝。

我地坐厘種船

唔知係咪我地黎得唔係時候, 動物似乎唔算多。

紅樹林

有少許雀鳥

沿河前進

又係塘鵝

經過一簡陋嘅碼頭, 竟然有條鱷魚喺度曬太陽,
船家一D都唔怕, 仲將船駛到鬼咁埋, 對正個鱷魚頭,
一啖噬埋黎點算! 你都咪話唔驚。

似乎厘個水域有多條大鱷, 厘條游到好埋, 嘩! 咁近!
唔知係咪餵慣定見慣, 直情游埋船邊,

船家唔驚,仲好似同佢地好FAN, 捉佢條尾同佢玩。

大鱷: (哼! 你班都唔係人黎嘅! 連我都唔驚, 唔玩啦!)

大概行左半小時, 將到橋時,

船家叫我地準備買票, 條手帶就係門票

又可以繼續前進LU! 行船途中, 經常見塘鵝飛翔,
海鷗可以用麵包引佢地飛埋黎, 我諗塘鵝唔得啦!
(重本D, 用魚一定得。)

遠處好似白沙灘嘅岸邊

有D遊客上左岸

跟住, 遠處有群火烈鳥(紅鶴), 船家會慢駛俾大家影相。

終於上岸欣賞到粉紅湖啦! 吓! 隔咁遠嘅?

其實細心睇, 外邊嘅湖水都有些少粉紅色嘅!

PO幾張全景睇下, 最粉紅嘅湖似係圍起來,
唔知係咪故意等D嗜鹽藻類集中繁殖, 令果部份特別深色呢?

喺岸邊有D白色嘅泡泡

回程時, 船速快好多, 船家攞隻海鱟(音猴)出黎, 諗住我地會好驚喜,
佢唔知我地來自海島地方, 反應一般, 哈! 唔好意思, 令佢失望啦!

話咁快就返到碼頭

1.5小時之後, 導遊帶我地去午餐,
Selva Maya Hacienda Restaurant 瑪雅叢林莊園餐廳,
餐廳以手帶認證

入門已見有土著角式打扮, 供遊客影相。

環境好正

餐費唔貴, 每位150Ps 約HKD63, 菜式幾豐富。

莊園內有私人天然水井, 餐後我地入內參觀,
從洞頂外邊向內拍嘅!

沿梯級而下, 其實我地都可以游水嘅! 只要租儲物箱就可以啦!

餐廳距離X'keken Cenote 天然井只需3分鐘,
景區內分別有X'keken 同 Samula兩個水井。

厘次無咁好彩, 天色好黑, 似要落大雨LU! 地上間中舖有馬雅圖案。

瑪雅人嘅年曆

細心睇厘個, 我估係個祭師將人頭奉獻俾神祇啦!

我地先入Samula 水井

厘個角度, 頂上個窿呈月形; 通常沿井邊水面都環有繩索,
亦有兩、三條橫跨水面, 方便泳客休息。

X'keken距離Samula有一段路, 行到半路真係落大雨添!

天然井入口

厘個洞比餐廳同Samula嘅都要大

洞頂頗多鐘乳石

亦有樹根從洞頂伸展落黎

整張全景

由景點到酒店, 只需十零分鐘車就到。

酒店餐廳

花園泳池

我地嘅房間

出去搵食, 順便視察環境,
酒店正門

酒店旁係市集, 最入面右邊有檔中菜, 價錢OK!

今晚食完飯休息, 聽晚再慢慢行。

D 11   完

 

 

 

21/11/2018
D12 - Valladolid巴利亞多利德 > Chichen Itza奇琴伊察>
Cenote Ik Kil益吉天然井 > Ek Balam古城 > Valladolid
HOTEL: Meson del Marques, Valladolid (4*)

出發LU! 隔離嘅市集我估要九點零十點先開啦!

咦! 一早出門就通街警察? 好在無塞車啫!

D小販準備開檔賣早餐

個多小時後, 我地黎到奇琴依察, 猶卡坦瑪雅語意思即「在伊薩的水井口」。

售票處

早就知厘個景點最具人氣, 好在唔係旺季啫!

景區內紀念品攤檔開始營業

世界文化遺產及受保護文化遺產標誌

奇琴依察係瑪雅文化明嘅代表, 又被評為世界新七大奇蹟之一,
城邦內嘅建設都保存得好好。
Templo de Kukulcán庫庫爾坎金字塔, 四邊中間各有階梯

頂上神廟只有正面有三個入口, 階梯底亦只有正面先有羽蛇神頭。

其餘只得一個入口

以前可以上嘅, 但因有遊客摔倒喪命, 之後就禁止上去啦!

門頂上好似係羽蛇神面譜

厘邊有待復修

厘邊樓梯開始崩壞

奇琴依察被評為世界新七大奇蹟, 除左宏偉嘅建築,
仲係建築同天文結合, 將概念化為現像, 喺春分同秋分嘅日夜平分點,
因日照做成移動嘅影, 被瑪雅人認定果刻就係羽蛇神降臨啦!
(有無得睇先?)
借張維基照片睇下囉! 光影連接羽蛇神頭部,
隨住光影移動, 成條會郁嘅蛇咁。(維基照片)

想知現場聲勢, 介紹條片啦! 

https://www.youtube.com/watch?v=uZTFcvnfMpU
夜晚嘅聲光show都可以體會到羽蛇神降臨架! (維基照片)

Templo de los Jaguares y Escudos美洲虎和盾牌神殿

柱上仍有清晰嘅雕刻

裏面有個美洲虎王座

喺神廟背後嘅高牆有個石圈, 厘度係奇琴依察嘅球場, 之前已提過球賽性質, 唔講LU!

整個球埸, 係我地睇過之中最大嘅!

球場另一邊中央又有座神廟

兩堵高牆腳下斜面刻滿浮雕

最矚目係高牆後面, 一堵長長嘅矮牆/平台,
上刻滿人頭, 即時聯想球隊隊長獻人頭嘅習俗。

驚心嘅係資料話厘度係唯一以縱向穿過頭骨, 一般嘅係橫向穿過頭骨,

唔通瑪雅人係將獻祭嘅頭穿成一串串! 厘張相特別清楚啦!

喺圍住嘅草地上, 放左好多古蹟殘件。

厘座殿前有數之不盡嘅柱, 又叫千柱廊; 佢係武士神廟, 殿前正中嘅屬方形柱,

殿嘅右邊全部圓柱

可惜唔准上, 我地只能仰望到咁多咋!

原來頂上中央有座查克莫Chacmool, 而且曲尺形嘅並非簡單石柱,
似係兩條羽蛇神雕像。(維基照片)

武士神廟全景

柱廊延伸到好遠, 厘邊係市集嘅一部份, 可以想像當時嘅繁華景象。

十點零鐘, 幾乎所有攤檔開哂, 品種多到眼花, 厘幅係瑪雅年曆。

厘檔我睇住佢全人手製作添!

雪櫃貼點少得

厘座唔知係咩?

El Osario 奧薩里奧金字塔保存得好好

每邊梯階底都有羽蛇嘅頭, 條舌仲伸到落地。

19世紀曾在頂上12米深地方, 發現好多人骨同珠寶, 考古學家估計並非墓塚。

座塔遠睇好似好簡單, 近睇清楚, 好多精美石雕架!

佢頂上嘅廟, 仲留有整堵牆角, 而家放喺階梯前。

Venus Platform維納斯平台

跟住我地黎到天文台

厘座橢圓形建築又叫蝸牛, 主要係觀天文現象、季節時差、春分晝夜平分點......

另一角度嘅天文台, 我諗上面仲有野睇, 可惜唔上得呢!

Edificio de los Monjas修女廟興建得非常宏偉, 中間又係長闊又陡峭嘅階梯。

修女廟旁有具Chenes風格嘅教堂

牆上浮雕非常細緻, 正中仲有幅神祇嘅浮雕。

教堂旁邊嘅一座同樣精彩, 雖然下半幅牆只剩牆磚, 可以想像當年風釆啦!

話明係Casa Colorada紅屋, 以前當然係紅色為主啦!

台基採用圓角嘅長方形

紅屋隔離係座殘破嘅Casa del Venado 鹿屋

又一堆遺址, 可能過多N年後, 又可以重見佢地嘅真貌啦!
因為我睇番N年前嘅遊記, 遺蹟比現時殘破好多。

Casa de los Metates 磨石之家, 可能係當時嘅食物製作或磨坊之類。

影漏左, 唔知厘座係咩平台

墓葬的平台而家只剩平台

兜左個圈, 原來有個開口, 可以睇到下面有空間嘅!

原本個樣係有頂嘅!

集合時間, 我地原路出番去, 林䕃兩旁嘅攤檔齊開。

橫掂等隊友, 周圍影下。

十分鐘之後,  我地黎到Cenote Ik Kil益吉水井連午餐,

剩係入口嘅接待, 裝束同笑容都抵讚啦! 厘度嘅門票都係手帶, 不過忘記影囉!

入門已經見到隻好受遊客歡迎嘅雄鷹, 仲有幾個印第安打扮嘅人。

紀念品商店同小食吧一應俱全

我地先參觀水井, 剩係喺上面望落去已經夠吸引啦!

黎到當然要入洞內感受下,

階梯中段有個窗可以上下眺望

繼續落到底, 樓梯非常濕滑, 走路要特別小心。

井內特意加建石級作跳水台

亦可以利用木梯落水

D水非常凍, 落水就咪搞我, 都係睇人享受好啦!

雖然無膽落水, 不過真係幾羨慕D健將可以喺咁靚嘅環境暢泳架!
難怪墨西哥嘅天然水井世界聞名囉!

厘度唔係兩張相, 而係洞頂垂落黎嘅植物好似幅簾, 錯覺將水井一分為二。
一鼓作氣, 跳囉!

參觀完, 食飯LU!

飯後個多小時車程, 到左藏喺密林中瑪雅時期嘅Ek Balam古城。
古城入口

沿林間小路進入, 兩旁有紀念品攤檔, 由於人流唔多, 睇黎生意馬馬啦!

左邊係入口拱門, 右邊 Oval Palace係總督府

Oval Palace

我估厘個係固定度門嘅石墩

厘座係結構對稱嘅建築

厘個景區好多遺蹟可以上, 當然要上高位俯瞰一下啦!

斜面牆身只用石頭堆砌, 角度好劃一, 遠睇完全唔似用不規則嘅石頭砌成。

部份石刻有上蓋保護, 不過已經非常模糊啦!

又經過好幾個遺蹟

睇左咁多個古城, 厘度一睇就知係球場, 高牆上兩個環就無左啦!

黎到厘度最吸睛當然係大金字塔El Trono神廟啦! 條梯又直又闊,
有32米高, 上落時一定要小心, 否則一跌可能會到底。

金字塔嘅基座非常寬大, 達160米長, 5張相駁埋都未影得哂!

長階梯中間, 有橫向平台, 建有上蓋, 展覽左新修嘅石刻浮雕。

2010年修繕嘅瑪雅象形文字蛇頭

古蹟仍在修建中, 一排小型神廟

神廟上半部牆身, 有幾尊有翼嘅瑪雅戰士。( 即係識飛啦! )

仲有D人形簡單雕塑

小神廟台階上嘅平台, 打造成長滿牙齒嘅口, 估佢係羽蛇神嘅口。

仲有個無頭神像

從頂上俯瞰

大金字塔頂嘅背後

可以俯覽四周瑪雅遺蹟, 中間圓形應該係水井

今日陽光普照, 空氣清新, 一望無際都係叢林, 其實喺飛機下望都差不多,
只見叢林, 連河流都無, 尤卡坦嘅水都係喺地下流動嘅!

今日時間差不多啦! 返酒店LU!

稍事休息, 趁天未黑, 出去四圍踱下。

我地酒店附近就係Francisco Canton Rosado Park, 公園無乜特別

厘度由女交警指揮交通

四周食肆同古舊建築不缺

繞過公園就係大教堂, 有入去, 但無影相

教堂後半部

街道行人唔多

厘座叫鹿屋, 係私人民族藝術院。

咦! 博物館! 免費嘅, 有開放, 入去八下囉!

展品唔算多

佢仲有個內庭院, 幾精繳。

我地再沿街漫遊, 偏靜, 當中唔少民宿同酒店。

繞左個圈, 最後返酒店旁邊嘅市集, 買外賣中餐返房食。

D12 完


 

 

 

22/11/2018
D13 - Valladolid >Coba 科巴 > Tulum圖盧姆 >
Beach Tulum > Cancún坎昆
HOTEL: Emporio Hotel & Suites Cancun (4*)


出發去首個景點Coba古城, 似乎Valladolid巴利亞多利德嘅市民較早起,
八點啫! 市集都幾熱鬧啦!

經過一個小廣場,  已經跳緊排排舞LU! 好健康喎!

穿越林間嘅路況仍然非常好

進入景區停車場

彩色果排應該係旅遊車啦! 有好多一天團會黎。

咁高嘅塔, 做瞭望塔都得啦!

售票處

中南美地方都流行捕夢網,
印第安人認為佢可以驅除惡夢, 仲帶黎好夢添!

景區入口

入口旁著住制服, 頸項掛左個牌嘅係景區導遊, 佢地坐喺度等生意!

進入景區, 我地先向Grupo Coba。

厘座藏喺叢林中嘅係La Iglesia金字塔

整座金字塔嘅特色, 係先利用階梯起左個高台, 再喺高台上建金字塔。

塔基旁嘅厘個窿可以睇到階梯下保留空間通過

金字塔禁止攀爬

金字塔前, 以茅草蓋頂嘅係刻有瑪雅曆法嘅石碑。

我地喺尤卡坦咁多日, 所到嘅景區, 只要有密林,
就見到大大小小嘅空氣草, 有時仲掉到地上添!

厘D石刻, 年代久遠, 已經好模糊啦!

Coba嘅球場較細, 地上有兩個石刻

一個係被斬首嘅球隊隊長

另一個係被割落黎嘅首級

一號建築群嘅範圍好大, 遺蹟非常多。

又一首級, 睇落似新修嘅!

厘兩塊石刻較清晰

跟住, 我地再喺林中慢步約半小時,

如果唔想行,可以租單車, 或者顧觀光三輪車, 當然要付出代價啦!

厘個蜘蛛網織到咁多層, 撞埋去仲走得甩咩! 證明佢地嘅生活無人為騷擾啦!

終於到Nohoch Mul Pyramid大金字塔

42米高, 爬上爬落, 除左要小心外, 仲係要小心呀!

未到頂已可俯瞰下面嘅林區, 要影相都坐定定先慢慢影, 安全D嘛!

終於到頂啦!

頂上只有間黑麻麻嘅房, 有鐵網嘅門關住, 只可外觀, 據說係作儀式用嘅。

Nohoch Mul Pyramid大金字塔嘅石階較殘破, 落去時唔少人係坐住落, 安全第一嘛!

亦有人選擇行旁邊, 跌親都唔會連累人, 亦唔會做骨排, 但旺季睇怕無乜位置啦!

厘個珍而重之咁, 唔止有蓋, 仲四周圍哂鐵絲網, 當然非常珍貴啦!

就係厘塊埃斯特拉與科巴的瑪雅銘文

走LU! 我地仲要行半個鐘先出番去。

約一小時車程, 我地黎到 Tulum, 佢係瑪雅文明嘅防禦城市，亦係科巴嘅主要港口, 屬瑪雅文明最後建造嘅城市之一， 所以保存較好,
整個城市建築喺面臨加勒比海嘅懸崖之上, 景色絕美。
墨西哥人真係勁愛唱歌同扮野

厘個景區有頗多長鼻浣熊

買左門票

入去LU!

原來先要熱身, 爬條長梯級。

厘度嘅鬣蜥可以話無處不在, 而且唔係好怕人, 佢地食齋嘅, 唔好搞佢地就無事架啦!

厘個係當時嘅入口

大把瑪雅建築遺蹟呈現眼前

藍天白雲, 綠草如茵, 清風送爽, 豁然開朗, 感覺係眼前一亮;
雖然影唔哂, 貼張駁相, 感受下啦!

中間高高果座係政府機構

係咩建築, 請自己睇啦! 我盡量將說明貼埋上黎。

圖盧姆遺址開揚廣闊, 好處係容易知道自己身在何處。

雖然唔算宏偉, 係宮殿嘅一部份。

咦! 下面果座好似幾正喎!

雖然望落幾扎實, 畢竟太老啦! 要用柺杖撐住下囉!

不過牆上嘅倒立人像石刻仲清晰可見

又周圍踱下, 景色係咪好正呢!

厘座唔使介紹都知係神廟

門頂上倒立嘅神明, 喺Coba個大金塔頂上間屋見過, 都係刻喺門頂。

厘座風神廟, 建築喺懸崖頂, 遠遠就見到。

整體係咪堡壘連寺廟就唔知啦!

厘度咁多鬣蜥, 幫佢地黎個寫真呢!

喺古城遺址, 仲有觀景台眺望加勒比海同俯瞰沙灘。

厘度又換個角度睇

都唔少人喜歡陽光海灘多過遺蹟喎!
唔怪之得見D一天團導遊話: 游水嘅自己落去, 睇古蹟嘅跟佢行啦!

咁似椰棗嘅?

景區內都有觀光車, 都幾大架, 可想而知旺季嘅人潮啦!

有埋公眾WIFI, 好周到喎!

導遊俾我地嘅時間係連午餐自己搞掂, 我地唔夠時間, 只可去Subway啦!
景區附近係個小市集廣場

Chacmool查克莫雕像, 呢! 就係將奉獻者嘅心臟放喺佢胸前囉!

餐廳門前嘅擺設

當然唔少得紀念品店舖啦! 夠鐘返酒店LU!

今晚住嘅Resort環境一流, 厘條手帶係入住同食早餐嘅識認。

我地房間露台外望

其實全團房間嘅View都係咁上下, 遠處就係加勒比海, 無敵呀!

仲見有人玩降落傘

泳池有水吧, 飲野談天游水曬太陽, 各適其式。

酒店一角

房間內部

影埋晚霞去食晚飯LU!

我地訂房無包餐, 酒店自助晚餐要自費, 菜式豐富, 幾抵食!
連加一330Ps, 約HKD137。

D13  完



 

 

23/11/2018D14 –  Cancun
(El Rey 雷伊遺址, Downtown, 坎昆瑪雅文化博物館)
HOTEL: Emporio Hotel & Suites Cancun (4*)


05:45雖然天邊泛紅光, 但泳池同路燈仍著。

無錯過日出, 可惜水平線上多雲呢!

哈哈! 雖然多雲, 都叫做睇到日出啦!
不過唔係水平線升上黎囉!

唔係呀! 六點咁早就玩滑翔傘? 哦! 尋日預約今早欣賞日出。

今日全天自由活動, 我倆早起睇完日出, 落去嘆番個慢活早餐先。

心目中已經安排好全日節目, 餐後安步當車晨運往El Rey 遺址。

厘座酒店成隻展翅雄鷹咁款

隣近嘅水上樂園

陽光、空氣、綠蔭、沙灘同海洋, 都令人心曠神怡。

街上無乜人, 不過無恐懼感喎!

沿途有巴士站, 遊客亦可以坐R1/R2巴士到達(最前嘅係巴士站)。

行下睇下, 好快就到啦!

我倆係第一批入場遊客, 任影唔嬲, 但不准航拍。

我認得你呀!金黃色椰青, 樹身矮好多, 叫做King Coconut。

古城唔算大, 草木打理得好好, 遺址大多保持原狀, 入場費港幣廿蚊, 抵睇!

El Rey 雷伊遺址屬瑪雅文明早期嘅古典期,
距今1500年, 係當時加勒比海嘅重要港口。

多柱型寺廟, 1975年發掘時, 發現一位高階層人物嘅骸骨同貴重陪葬品(曾有王族居住)。

其他遺蹟

金字塔頂可能有座神廟

除左遺蹟, 景區內仲住左一批住客。

無事就咪揩埋D石度, 佢地嘅保護色好好, 壓親佢更嚇親自己就唔好啦!

哈!厘隻白鷺梗係摩錯地方, 厘度最多俾你搵到蟲仔咋喎!

我地離開時, 先有三五位遊客進場。

厘D唔知咩果呢? 似乎D雀都唔多吼喎!

離開El Rey 遺址, 我地上左架R1巴士出downtown, 忘記影相, 借網照介紹一下。(照片來自網上)。

巴士上只有幾位乘客, 車速頗快。

從酒店區到downtown途中

厘度有jungle tour嘅旅遊公司

繼續車外景觀

高級海鮮餐廳當然不缺, 不過千祈唔好同香港嘅海鮮餐比較喎!

途經市集, shopping mall , 酒吧街......, 係越夜越熱鬧 。

Terramar Plaza

經過厘個碼頭, 睇黎係玩水上活動嘅熱點, 之前有好奇海底博物館,
上網睇過, 玩概念多, 都係唔啱玩。

Plaza de La Reforma

我地只靠GPS, 睇住google出到downtown 近ADO就落車,
雖然跟團, 八下機場入黎嘅巴士站環境都好嘛!
落車後見條天橋棧鬼, 上去LU!  

主要大路

入去ADO八下囉! 厘度有直車來往坎昆機場, 又有長途往梅里達等城市。

迴旋處有座墨西哥歷史紀念碑

如果要玩尤卡坦嘅一兩天團, 不妨住downtown, 報團同集合都方便。

如果由酒店區坐R1去downtown, 最方便嘅超市係Chedraui, 裏面有Food Court。

好可愛嘅Fuente del Ceviche 橘子汁噴泉

食飽行下行下, 我地又去左Walmart, 感覺雖大,
同Chedraui差不多, 但位置較僻。(無影相)
行到攰, 巴士站就喺Walmart門口, 坐R2返酒店休息下先,

佢地嘅巴士行得快又停得快, 見遊客一打鐘就停(都唔知係咪巴士站)。

咦! 執房嘅員工好有心思, 同尋日舖法唔同左喎!

雖然時值正午, 由露台望向海灘, 仍有唔少人玩降落傘。

將兩張相放大, 與泰國玩嘅唔同, 兩種都係坐, 一種似有坐椅。

另一種坐喺條闊帶上

經常有連群結隊嘅塘鵝飛過, 坐喺露台欣賞, 畫面好有動感。

好多亞洲人千方百計做防晒, 但老外偏喜同陽光玩遊戲, 望近D, 不乏游水曬太陽嘅泳客。

一把年紀, 返房坐下, 又訓番個鐘, 再出動囉! (去游水呀?)
係去博物館呀! 就喺酒店前面, 我倆點會錯過呢!
坎昆瑪雅文化博物館

又係每張門票有不同圖案

入門即見碑刻同七彩斑爛嘅恐龍, 睇黎係吸引小朋友多D。

其實, 厘座博物館除左樓上展品, 地面花園(樹林更貼切)
隱藏左San Miguelito遺址, 我地先由地面層參觀。

雖然外面陽光猛烈, 但林間仍顯較陰暗。

好硬嘅, 似靈芝多過野菌。

遺址都有說明

林間仲有個鹹水井, 無個牌都唔發覺, 不過屬近代嘅井。

同其他古城遺址一樣, 都住左好多小住客, 同遊客都能和平共處。

遺址以白碎石舖砌小路作指引, 只要沿小路行, 包你睇哂, 點知遇上欄路蜥,
餵! 唔該俾條路行下啦! 佢死守唔讓路,唯有小心跨過去囉! 嗱!咪咬我呀!

睇咩呀? 原來係壁畫, 可惜我眼力唔夠, 搵唔到。

間中見樹上有蟻巢

最後, 參觀南面建築群同梯形金字塔, 地面層嘅遺址就算結束啦!

跟住上二樓參觀瑪雅文物展, 玻璃門上係瑪雅神祇,眼大高鈎鼻, 個子小係瑪雅人嘅特徵。

展品算豐富, 我大鄉里, 首次親自欣賞到瑪雅文物,
覺得好新鮮, 但因為展品勁反光, 相片唔太理想。

展品以陶器為主, 多以動物、人/神面譜作藍本。

咁似唐朝陶俑嘅!

似可加熱嘅盛器

官方網頁就係show厘個彩陶罐

厘兩塊骨上有刻紋, 我諗類似我國嘅甲骨文。

展廳內仲有少量骨製、玉石同金屬製嘅飾物。

已絕種嘅劍齒虎

大型展品

當然仲有好多展品無法全Po上黎(想悶死人咩!) 除左展品,
場中仲有大電視詳細介紹各個著名遺址嘅歷史文化同建築。

走LU! 去到博物館出口, 好搞笑地, 竟然有職員問攞貼士。

返到酒店, 無理由住兩晚都唔行下個沙灘架!
酒店前嘅沙灘被視為酒店嘅私家沙灘, 憑房卡可以免費使用設施。

按摩服務當然要付費啦!

掛紅旗都咁多人落水

其實個灘太大浪, 根本唔好游, 仍不斷有人玩降落傘, 我地都係返酒店游下水好啦!

影埋日落又落餐廳食晚餐, 好充實嘅一日又結束LU!

可以睇到機場控制塔

D14   完

24/11/2018
D15 - Fight Cancún to Mexico City (40 2315  10:50-12:25) >
City Tour (憲法廣場, 國家宮, 大教堂, 藝術宮...) >
HOTEL: Historico Central Hotel (3*+ )


專誠早起, 乜水平線上又咁多雲架!

早起嘅鳥有得食

睇唔到水平線上的日出, 影番張加勒比海嘅朝霞作道別啦!

早餐後出機場, 返回墨西哥城候機時間好鬆動, 周圍行下睇下。

到達墨西哥城, 又遇上示威, 哈! 出動咁多警察,
示威者唔係要為自己爭取, 只為反對買賣動物。

厘D家居用品店賣嘅多屬中國貨

厘幾間舖全部賣單車, 咦! 成行成市喎!

市中心日頭幾乎都塞車

今日周末, 通街都係人。

導遊帶我地去食左D有形無神嘅日式拉麵

食完步行作city tour, 墨西哥城歷史中心, 早喺16世紀阿茲特克時期
己經係世界最大城市之一, 1987年被列為世界文化遺產。
我地先去行唐人街

$15係指當地錢, 約HKD6.5, 有咁多款包。

佢地整嘅飽多彩多式

地攤賣嘅以中國貨為主

跟住去國家宮, 繼續睇住人群喺度鑽。

又遇上示威隊伍, 爭取咩就唔知啦!

真係有D唔適應, 同坎昆嘅寧靜有好大反差。

經過大教堂, 附近梗有D印第安打扮嘅人, 為人祈福作法嘅地攤。

厘位表演者流口水D喎! 搵個音樂箱搞搞下就想賺錢。

大教堂入口, 但我地先去國家宮, 都係世遺嘅一部份。

當日無影國家宮外觀, 只好Po張夜景出黎,  牆邊嘅鐵欄係排隊入場嘅。

中間有燈嘅地方, 懸掛住Dolores鐘。

右邊嘅鐵欄,  就係俾遊客排隊入國家宮嘅!
雖然係周末, 都無乜人排隊。

入國家宮係免費嘅, 但要放抵護照換領入場許可, 收護照嘅地方有D簡陋。

張證要掛喺頸上

國家宮部份地下, 都屬被保護嘅遺蹟。

裏面同外面真係兩個世界, 國家宮內水靜鵝飛。

皇家禮拜堂

進入主建築嘅中庭, 中央有八角形噴泉。

好有氣勢嘅階梯, 牆上壁畫內容豐富

主要以墨國近代史為題嘅壁畫

上到二樓, 無論係門框或牆飾嘅石雕都細緻豪華。

壁畫以古典時期嘅歷史為主

導遊仲喺樓梯口講解, 我見第一度門開左, 入去LU!

嘩! 展品較坎昆瑪雅文化博物館更豐富同精緻, 且網上較少人入黎,
唔通不常開放嘅! 因為自己賣甩隊友鼠左入黎, 唔敢停太耐, 只能速覽。

好大型嘅兩個彩陶器

仲有非常多展品, 當然不能盡錄啦!

好少見古時嘅金屬兵器

皇室用首飾, 厘度嘅展品, 比人類博物館嘅精美

皇宮採用嘅頂部建築模型及圖解

以為行完, 按指引由另一度門離開, 噢! 清雅嘅有個透光上蓋嘅內庭。

厘兩座雕像唔知代表咩! 只覺係一男一女。
弊啦! 按指引都唔知會行左去邊, 萬一要隊友搵我地就唔好啦!

好彩, 原來最終出番去二樓, 又入另一展廳, 較現代嘅! 內容一般。

拿拿淋又換個廳, 1829年至1872年宮內議會廳

議會廳前嘅展廳, 好在我倆速覽完, 走囉!

國家宮花園亦有部份遺蹟

繼續參觀墨西哥城

導遊透過城市模型介紹整個墨西哥城

因為時間不足, 我倆只能偷空溜到阿茲特克時期嘅
大神廟遺址外八下, 遺址內設木棧道供遊客參觀。

阿茲特克大神廟, 當然不缺羽蛇神雕像, 隨便都搵到幾個。

甚至活靈活現嘅羽蛇神都有

以遺址開放咁多俾路人睇, 好唔錯啦!

梗要遮緊D啦!

大神廟遺址博物館入口, 可惜無時間, 否則入去參觀下。

跟住去大教堂, 見到D印第安人又係天主教徒, 墨國天主教真係別樹一幟。
厘個扮頭戴美洲虎果位神祇

直情成組人擺檔咁

大教堂及入口

厘座風琴年代久遠吧!

通向主祭壇嘅通道, 兩旁欄杆上立有拎住火把嘅雕像。

厘支似巨筆嘅係顯示平水, 證明教堂地面傾斜。

厘個櫃成幅牆咁大

教堂嘅拱頂較簡樸

另外仲有個小教堂, 不過要購票, 15Ps /人 。

堂內金碧輝煌, 分為前後兩部份, 後半不能進, 只能站在欄外欣賞。

壁畫描繒細膩

左下小孩手持紙上嘅名, 係畫家名字(非簽名)。

離開教堂, 再次融入憲法廣場。
厘D樓上餐廳最受歡迎嘅位置當然係向街嘅露台位啦!

憲法廣場嘅政府大樓

去到邊都見到擦鞋檔

前面嘅係Templo Expiatorio Nacional San Felipe de Jesús,
後面果座係Mirador Torre Latino 拉丁美洲人塔

Templo de San Francisco

周末市中心人流不絕

Mirador Torre Latino 拉丁美洲人塔

Palacio de Bellas Artes美術宮

美術宮前嘅飛馬戰神

廣場上仲有座布藝嘅高球選手

美術宮大堂

參觀完美術宮, 我地仲兜去美術宮後面睇下。

相片較遠果座係郵政局, 可惜關左門, 不過我地透過鐵閘都影到些少同大家分享。

郵局外牆有精美磚雕

古式門手挽

內部保留西班牙風格

喺舊城區轉左近三小時

途經好多香水店, 而且生意好好

返酒店囉! 今晚仍住舊城區。

返黎墨西哥城, 意味著行程已到尾聲, 唔出去睇夜景就告別, 唔係呀!

拉丁美洲人塔

美術宮

 

原來美術宮後面夜晚變身市集, 好熱鬧, 裏面係條長街,
兩旁都係攤檔, 貨品琳瑯滿目, 為左唔好咁矚目, 無影太多相囉!

喺市集對面, 又有間劇院, 不過外型普通。

食完飯, 我見沿途都好熱鬧, 外遊緊記時刻警惕係必需嘅,
但見咁多市民扶老攜幼夜遊, 我倆就逛夜少少囉!

餐廳嘅歌手唔止服務座上顧客, 仲為街上行人獻唱,
動人嘅歌聲令街上行人駐足, 個個抬頭欣賞,唱畢仲有唔少掌聲,
當然無小費啦! 你可以話係餐廳老板嘅宣傳手法囉!

聽完歌, 途中又見座大廈電樓梯人來人往, 咩地方呢?
原來樓上有幾間Disco, 不過客人不限於年青一派喎!
雖然唔見耆英, 中年男女都唔少架!

到酒店啦! 酒店夜色。

D15  完
 

 

 



25/11/2018
D16 - Mexico City Tour
(Xochimilco霍奇米爾科 , Ciudad Universitaria墨西哥國立自治大學 ,
人類學博物館 )

行程到此, 已近尾聲, 今夜我地要告別墨國啦!
雖然係咁, 但行程仍豐富。
今日特別早出發, 導遊話晏左人多會塞船, 所以行車途中, 街上幾乎無行人。

我地8:15到 Xochimilco霍奇米爾科, 連洗手間都未開, 始終食完早餐,
又有一段時間留喺艇上, 唯有等洗手間開門啦!

霍奇米爾科係阿茲特克時期嘅水上村落, 當時水道長達750公里,
幸運地喺西人入侵後保留有五分一面積, 霍奇米爾科亦被列為世界文化遺產,
當然, 現時所見已成為旅遊區, 原汁原味都要靠想像力啦!

景區導覽圖

西英日行程及收費, 一目了然, 我地選擇2小時遊程, 長程嘅有D選擇艇上用餐。

仲未有遊客到, 船伕努力清理大量嘅水浮蓮, 以免阻礙航道。

終於上船啦! 因為早出發, 只有我地一隻艇, 水平如鏡, 的確舒服。

話口未完, 使唔使咁嚇人呀!
(餵! 係你地怕死咋! 人地係示死如歸, 平常心架!)

岸邊或水面, 間中有水鳥出現。

除左花艇, 亦有其他方式嘅划艇, 心想, 完全無污染, 真理想,
而且駛過時較平靜, 水面好快回復鏡般清明。

買樓將未裝修嘅叫清水房, 咁厘隻就係清水艇啦!

又黎! 見到咁嘅裝飾, 已經見怪不怪。

艇家仲要駛埋個有女鬼迎賓嘅島度!

除左女鬼, 仲有三隻狗, 佢地一見有人黎, 直情好輕奮。

Hi ! 你好嗎?

咦! 島上完全無人, 有個洗手間方便遊客, 當然要付費啦!

島上仲有流動洗手間, 人多時可以做多D生意嘛!

終於遇上另一艘艇

其實撐花艇唔易, 艇家用長竹竿插入河床用力推, 隻艇自然前進。
前面艇家睇黎只有15、6歲, 唔知係咪唔夠力, 被河床汙泥啜住竹竿,
甩左手, 隻船又駛前左, 要我地艇家幫佢執番支竹。

又見白鷺

岸邊有好多座墳喎! 問導遊, 原來係假嘅, 又係裝飾。

原河道返回, 又見面啦!

我地遇見嘅絕多人手撐船

清到連電線倒影都睇到

除左厘隻艇, 真掃興, 搞亂一池清水。

岸邊仲種有曼陀蘿

厘個岸上應該係個渡假村

返到碼頭開始塞船啦!

我地離開時, 區內食肆坐左唔少遊客啦!

之後, 我地去到墨西哥國立自治大學

大學嘅建築外形特別, 細心欣賞,
外牆嘅馬塞克描繪左好多墨西哥歷史故事。

真係好喜歡厘座建築

我地有入大學圖書館, 除左禁拍攝, 同現代一般圖書館無乜分別。

參觀完上番車, 經過Estadio Olímpico Universitario 大學奧運體育場,
正在舉行賽事, 嘩! 乜咁大陣仗呀! 幾乎整個運動場都有警察駐守。

仲出埋騎警添!

下一個景點亦係我最期待嘅, 人人都對墨西哥嘅人類學博物館讚口不絕, 梗要親身睇下啦!導遊先帶我地到附近廣場, 欣賞古民族Danza de los Voladores宗教祈福表演。

傳說當時五位年青人目的係為民求雨解旱憂
而家一位喺地面吹奏

四位喺高桿上

倒吊旋轉而下

細心睇, 四位旋轉中嘅青年, 有一位係邊轉邊吹奏嘅!

呵呵! 大家都欣賞得高興, 係時候到我地高興下啦!

地面出現兩三位表演者四出收小費, 順便賣紀念品。

睇完表演, 過對面參觀博物館啦! 雖然時間有D趕, 我倆好貪婪地叫做行哂。
要強調嘅, 厘所博物館係我參觀過嘅最精彩之一, 大滿足!

厘座傘形雕塑, 刻嘅唔少同瑪雅文明有關。

墨西哥人民歷史樹, 我喺國家宮見過。

全部用細小彩珠舖砌嘅立體馬賽克, 唯肖唯妙, 花唔少心血呀!
雖然南美都好常見, 無厘D咁精工啊!

用彩繩舖砌成嘅同樣精彩

仲有宗教上嘅演變與融合

墨人嘅生活點滴

民間嘅殯葬方式

修長形狀嘅獨木船

已絕種嘅長毛象骸骨, 只能透過地上膠板欣賞啦!

各種古典陶器陶俑

陶樂器

當中精品會特別推介

複制羽蛇神廟原來面貌及色彩

大型展品

部份展廳牆壁複制瑪雅或阿茲特克時代嘅濕壁畫

不同手法表達近似嘅人神

原有嘅神廟或宮殿, 多係色彩繽紛。

厘座我認得, 係特奧蒂瓦坎遺跡內嘅蝴蝶宮, 當然厘座更清晰啦!

瑪雅時期嘅建築方法之一

厘對武士像腳都咁高, 整個雕像咪高過層樓囉!

查克莫chacmool

球場及各款球環

嘩! 厘個球重4-6公斤, 簡直可以掟死人啦!

D陶罐已經做得頗精緻

各種神祇/人物造型

有無留意瑪雅文明除少量黃金製品, 甚少金屬製品,
主要係瑪雅地區甚少金屬礦藏, 瑪雅人甚至唔認識咩係金屬,
但運用石頭嘅技藝就非常高超。

古典時期嘅皇家首飾

咦!厘條一節節嘅, 水管黎喎!

平民甚至有豎井形式嘅葬法。

厘D墓室咁豪華, 有華麗嘅濕壁畫, 又有大量陪葬品,
仲有神祇守護, 階級自然非比尋常啦!

帕克爾國王終於683年，享年80歲, 下面嘅係放遺體嘅石棺。

上面係重五噸嘅棺蓋(無乜特別啫!)
厘張現場影嘅無咁清楚, 但清楚睇到國王嘅人像雕刻。

借用網照, 將棺蓋圖旋轉90度後, 唔知係巧合定真實,  
部份考古學家形容為國王正駕駛太空船而轟動全球。(網上照片)

金屬神像

男女陶俑

房屋陶俑

厘個玉石面罩似我國嘅金縷玉衣

似煙斗 (咁早期就有?) 太急, 無影說明, 我吹水話係可以移動嘅燭台。
(雖然佢更似煙斗)

以骨制飾物

按時期, 厘個時期嘅飾物已較精細美觀。

境內嘅各種寶石

瑪雅時期階級劃分, 最頂嘅當然係最高領袖, 擁權力同財富, 可以睇到次級係祭師之類。

以下展品更大型, 屬戶外展品。

厘座尖頂嘅房間, 其實我地喺唔少遺跡都見過,
而家將色彩嘅部份填補番。

夠鐘走LU! (得咁多?)當然仲有好大量啦!

行車經過墨西哥獨立紀念碑

墨西哥總統貝尼托華雷斯紀念碑

時間太早, 諗住去拉丁美洲人塔觀賞日夜景啦! 點知排左一輪隊,
佢話觀光塔上唔准影相喎! 咁上去做咩呀!

結果去唐人街食晚餐, 反正凌晨機, 唔趕, 結果D餸等極未到,
食完飯去機場, 時間剛好, 旅程就此順利結束及返港。

D16  完

26/11    

D17- 01:00-27/11 06:35   (NH179 航程14:35)

27/11

D18- 09:50-14:05  (NH809 航程5:15) 抵港