豬熊足印: 自組11人墨西哥18天遊 (Part 1)

總結今次行程,墨國蘊藏豐富嘅人文景觀資源,如果喜歡歷史、古蹟同博物館的,包你樂而忘返,否則會覺得行程較單調啦!
但如果喜歡同陽光玩遊戲嘅朋友,去坎昆較適合,(陽光海灘唔使去咁遠呀!)
嘩! 話哂果度都叫做係加勒比海嘛!

不過,據觀察,墨西哥城嘅治安並無傳聞中咁可怕,亦唔落後(旅遊區),
如果只玩旅遊區,唔夜遊的話,問題不大;而尤卡坦予人感覺就更安全啦!
另外,遊墨國仲有可愛處,食住消費選擇好多,公交同門票都唔貴,
無論包團豪遊或個人窮遊都有市場,我地所到之處,亞洲人不多。

講番今次墨國行程先,要多謝小鄧自組11人團,香港時間10/11-27/11,共18日,實際落地16日,由當地mextrottxx.com旅行社接待,以3、4星酒店為主,因小鄧每次組團都係豐儉由人,除包早餐外,各自搵食,所以餐費各有不同囉!(機票$9415+團費$16200+小費$1000+加遊+膳食), 每人約HKD30K↑,個人覺得平靚正啦! (睇下住宿行程先再講啦!)

10/11/2018
10:00-15:10(NH812 航程4:10) 16:40-13:55(NH180 航程12:15)
D1-arrival to Mexico City, transfer to the hotel (20-30 mins).
HOTEL: Hampton Inn& Suites, Mexico City (4*)

11/11/2018
D2- Mexico City > Pyramids Teotihuacán 特奧蒂瓦坎金字塔>
Basílicade Guadalupe瓜達盧佩大教堂(TepeyacHill)
HOTEL: HamptonInn & Suites, Mexico City (4*)

12/11/2018
D3-Mexico City > Popocateptl national park波波卡特佩特國家公園>Cholula喬盧拉
HOTEL: Villas Arqueologicas, Cholula (3*+)

13/11/2018
D4–Cholula喬盧拉>Tepozotlán迪坡斯特蘭>
Tula圖拉鎮 (圖拉考古博物館 )>
Queretaro克雷塔羅
HOTEL:Hidalgo, Quinta Allende, Queretaro (3*)

14/11/2018
D5-Queretaro克雷塔羅(中央廣場,Acueductode Querétaro 水道橋)>
SanMiguel de Allende 聖米格爾德阿連德(市內遊)>Guanajuato瓜納華托

HOTEL: Posada Santa Fe, Guanajuato (3*+)

15/11/2018
D6 – Guanajuato 瓜納華托 > Museo de las Momias 木乃伊博物館

皮畢拉山 > Museo de Sitio Mina Valenciana 巴倫西阿納礦洞 >
museo del purgatorio guanajuato虐囚博物館 >
Templo de San Cayetano Confesor > 瓜納華托市內遊 >
皮畢拉山俯瞰夜景
HOTEL: Posada Santa Fe, Guanajuato(3*+)

16/11/2018
D7 - Guanajuato 瓜納華托> Morelia莫雷利亞(市內遊)>

Zitacuaro錫塔夸羅
HOTEL: Maria Fernanda Inn, Zitacuaro (3*+)

17/11/2018
D8 - Santuarios de la Mariposa Monarca帝王蝶保護區

(步行2小時)
HOTEL: Maria Fernanda Inn, Zitacuaro (3*+)

18/11/2018
D9 – Zitacuaro > Mexico City (Flight) >
Merida 梅里達(Monumento a la patria祖國紀念碑)
(40 2520 14:05-15:50)
HOTEL: Gran Real Yucatan (3*)

19/11/2018
D10 – Merida 梅里達 > Uxmal烏斯馬爾 > Kabah卡巴>
Caves of Loltun羅屯洞穴
HOTEL: Gran Real Yucatan (3*)

20/11/2018
D11 - Merida 梅里達 > Ria Lagartos生物保護區 >
Las Coloradas粉紅湖 >
Selva Maya Hacienda Restaurant 瑪雅叢林莊園餐廳 >
X'keken & Samula Cenote 天然井 > Valladolid巴利亞多利德

HOTEL: Meson del Marques, Valladolid (4*)

21/11/2018
D12 - Valladolid巴利亞多利德 > Chichen Itza奇琴伊察>

Cenote Ik Kil益吉天然井 > Ek Balam古城 > Valladolid
HOTEL: Meson del Marques, Valladolid (4*)

22/11/2018
D13 - Valladolid > Tulum圖盧姆 > Beach Tulum > Cancún坎昆
HOTEL: Emporio Hotel & Suites Cancun (4*)

23/11/2018
D14 – Beach Cancun (El Rey 雷伊遺址, Downtown, 坎昆瑪雅文化博物館)
HOTEL: Emporio Hotel & Suites Cancun (4*)

24/11/2018
D15 - Fight Cancún to Mexico City (40 2315  10:50-12:25)>
City Tour (憲法廣場, 國家宮, 大教堂, 藝術宮...)
HOTEL: Historico Central Hotel (3*+ )

25/11/2018
D16 - Mexico City Tour
(Ciudad Universitaria墨西哥國立自治大學 , Xochimilco霍奇米爾科 , 人類學博物館 )

26/11 01:00-27/11 06:35 (NH179 航程14:35)
27/11    09:50-14:05  (NH809 航程5:15) 抵港

我地今次行程主要分為兩部份, 首8日以墨西哥城為中心, 由東南向西北繞個圈返回墨城; 次部份從墨城飛梅里達, 玩尤卡坦6日; 至於細遊墨城就留到最後2日啦!
以下係Part1路線圖(D1-D8) :

介紹左咁多, 出發啦! 嗱! 出發前先聲明下, 此行側重人文景觀, 咪鬧我悶親大家呀!

一落機，導遊已經喺機場接我地啦！厘架就係我地坐嘅車。

座位幾舒服

我地住嘅酒店行去憲法廣場只需幾分鐘（翌晨影嘅）

今日係周末，原來墨人周末係咁熱鬧嘅(導遊話逢周末都係咁架)，無相機，用手機好過無吖！

我地住廣場附近, 咁嘅場面, 只要小心D, 趁下熱鬧都唔驚啦 ! 沿途行返酒店都好熱鬧.

見唔見連食肆窗門/天台都企滿人趁熱鬧呀!

D1 完

又出發啦!
11/11/2018
D2 - Hotel > Pyramids Teotihuacán 特奧蒂瓦坎金字塔>
Basílica de Guadalupe瓜達盧佩大教堂(Tepeyac Hill)
HOTEL: Hampton Inn & Suites, Mexico City (4*)

之前提過, 此行係文化古蹟為主, 資料性嘅野, 講都講唔完,
我怕悶走哂D朋友呀! 想知多D, 勞煩各位google下啦!
特奧蒂瓦坎距墨西哥城一小時車程, 景區達83平方公里, 屬墨國重點古蹟, 雖只開放十分一, 除非你花一日時間,否則無可能行哂, 主要參觀高64米嘅太陽金字塔, 46米高嘅月亮金字塔同羽蛇神廟。
當阿茲特克人發現Teotihuacán之後, 只知佢係納瓦特語, 意思係"眾神之地", 係當時非常繁華嘅城邦, 有近三萬人口, 特奧蒂瓦坎文明同瑪雅文明時期相約(公元前200)嘅古印第安文明。
(仲講! 出發未呀?)

到啦到啦!
整個景區有五個入口, 我地由中間進入, 沿路小販開始擺買。

首先接觸嘅係羽蛇神廟, 前面階梯形嘅係祭台, 後面嘅金字塔先係神廟所在。

羽蛇神係古代中美洲嘅重要神祇, 主宰晴雨晨星、文化、法律，又施予人類玉米，仲代表生死，係祭司嘅保護神。

羽蛇神廟可以近觀, 石刻圖案係景區中最細緻嘅, 包括方形同蛇頭面譜嘅頭像, 四邊共有366個, 但禁止攀爬。

我地爬上去嘅係祭台部分

導遊向我地展視原來嘅羽蛇神廟

在祭台高處下望

祭台下嘅古蹟(有時間可以進入嘅)

路邊攤嘅黑曜石製品, 真唔真就唔知啦!

跟住導遊叫我地唔好行, 車我地去近太陽金字塔嘅入口, 再由停車場步去, 太陽、月亮金字塔都係必遊嘅, 梗係多人啦!

金字塔旁嘅步道, 64米高, 慢慢爬啦!

中間部份小平台會舖成咁, 當然係唔想遊人踏上啦!

未上到頂,已經清楚睇到塔前嘅廣場, 打橫貫穿景區嘅係亡靈大道, 對面進入亡靈大道嘅路, 係其中一個入口。

似唔似步行街呀?

其實樓梯又斜又直, 都幾危險架! 所以大部份人都由中間扶手上落。

到頂啦!

可以睇到亡靈大道嘅盡頭係月亮金字塔。

繼續前行, 差不多到月亮金字塔前, 有座農神神廟。

而家只剩低一幅美洲虎嘅壁畫, 色彩仍鮮艷。

喺亡靈大道兩旁有好多稍低嘅梯形建築, 佢地都係神廟, 多數可以上, 有D就禁上。
如果細心欣賞, 發覺佢地將大石與小石舖出美麗花紋。

繼續前行

咦! 佢地全部著白衫, 好似對住舊石祈禱咁喎! (舊石梗有來頭啦!

)
原來係水神Chalchiuhtlicue嘅雕像, 因日久風化, 已經面目全非啦!

月亮金字塔前舉行祭禮嘅平台

我地上嘅月亮金字塔, 同樣係祭台部份, 後面好似山丘嘅先係金字塔頂。

在祭台頂下望, 一共有兩個方形平台, 近嘅係舉行祭禮嘅地方; 遠處而平嘅旁邊, 就係水神雕像所在; 極目左邊山丘, 就係剛爬過嘅太陽金字塔。整個古城, 以月亮廣場最宏大, 係當時人們舉行活動嘅主要場所。

月亮廣場兩旁共有12座神廟祭台, 而家睇黎係平頂, 原有頂上建有神廟嘅。

落返月亮廣場, 西面仲有個羽蛇神宮(白柱之處)。

羽蛇神宮入口處

高處看遺蹟及部份遺蹟, 部份牆上仍留有鮮艷壁畫, 因趕住入去, 無影啦!

厘度係宗教領袖同顯貴住嘅地方，係古城中保存最完好最多嘅壁畫，至今仍色彩鮮豔。據講羽蛇神宮嘅天井同房間嘅建築, 無論係顏色或格局, 都代表著特奧蒂瓦坎時代嘅風格。

由於柱上刻有展翅嘅聖鳥，十足美麗嘅蝴蝶飛舞，所以又叫蝴蝶宮。

整個遺址高處部份屬後建嘅羽蛇神宮(蝴蝶宮), 低層仲有早期建嘅美洲虎宮,
可惜夠鐘集合, 我地仲要跑番去月亮廣場, 望住條樓梯都唯有講拜拜啦!

參觀完特奧蒂瓦坎(唉!個名總係記唔住), 導遊帶我地食午餐, 厘度都有推銷下土特產,
厘棵係龍舌蘭其中一品種, 墨西哥嘅龍舌蘭酒當然馳名世界啦!
原來厘種龍舌蘭嘅芯,比線仲柔勒, 插喺葉上, 白色絲狀嘅就係啦!

棵植物嘅芯好似竹筍, 一層包一層, 每層嘅內膜可以輕易剝離, 以為又濕又易爛,
原來摸落好舒服乾爽, 成塊布咁, 可以做紙, 呢! 筒內捲成尖形, 白色嘅就係啦!

至於用餐消費, 大概每人HKD70 -100左右

餐廳仲提供免費墨國服飾俾食客影相

午餐後, 我地黎到異常熱鬧兼大開眼界嘅Basílica de Guadalupe瓜達盧佩大教堂,
佢位於Tepeyac山上, 一進入教堂範圍, 已經被現場聲勢震攝住,
咁大! 由邊度睇起呢? 又唔知夠唔夠時間喎!好! 先由廣場講起。
教堂入口處

進入教堂區後嘅廣場全景 (哎! 興奮得濟, 只影左一邊添!)

入口處嘅鐘樓, 上面中間嘅鐘鈴能奏出音樂, 鐘樓下牆上刻有瑪雅年曆。

廣場上最引人注目嘅有三座大型教堂(實際有五座加山上一座) , 左邊係安提瓜教堂, 右邊係方濟會女修道院。

安提瓜教堂內部

幅畫下兩個好似門嘅空間原來係告解室, 又幾新鮮喎!

方濟會女修道院內部比較簡單

留意下, 兩座教堂之間嘅建築物因為地陷而傾斜

, 其實安提瓜教堂內都能感到傾斜。

所以後來興建厘座帳蓬形教堂作主教堂, 內部一陣再睇。

先睇下最吸睛嘅印第安人, 佢地著哂傳統服, 盛裝黎做崇拜,
仲高舉聖母像添! 咁嘅場面, 真係令我感到納悶, 乜土著同天主教咁密切咩!
即時諗到fusion菜。厘樣當然有典故囉! 又慢慢再介紹啦!

大批印第安人隨著音樂, 捧住聖母像魚貫進入主教堂;
剩係厘D場面同人物, 足夠令我D隊友神魂顛倒, 影個不亦樂乎!

雖然我都有跟入教堂, 但人地係個嚴肅儀式, 唔方便亂咁闖, 只好喺外圍影下就算啦! (主教堂內部)

旁邊仲放左多個花牌, 真係有D似我地嘅天后誕。

雖然土著們好多入左主教堂, 但廣場上一D都唔寂寞, 好似開嘉年華咁。
佢地圍哂圈, 邊跳舞邊奏樂, 又似作法, 睇黎別具特色。

厘檔直情開喺度做生意, 收錢俾人影相。(餵!你檔野好似點當D喎)

唔講真係唔知, 你估全球最大嘅天主教國家係邊度吖嗱?

嗱! 我都係google番黎架咋! 錯左咪鬧呀! 竟然喺南美洲度!

第一係巴西, 第二係墨西哥! (真估佢唔到

) 而厘座教堂係繼梵蒂岡之後,
最多信徒敬拜嘅! 每年達到1200萬人次。(咁乜解究D印第安人多得咁誇呀?

)
咁就要由廣場上厘座最唔起眼嘅小教堂講起啦!

1531年, 厘間小屋住左位印第安農夫胡安迭哥, 佢喺山上親歷聖母顯靈,
報告主教, 但主教唔信喎! 12月12日, 聖母再次喺胡安面前顯靈,
叫胡安摘左地上玫瑰花放落斗蓬, 攞去獻俾主教, 當主教見到時,
斗蓬上出現聖母像, 厘次主教相信啦! 於是喺聖母首次顯靈嘅山上興建左座教堂,
所以12月12日被教堂訂為聖母節。
睇番間小教堂吖! 原本係胡安迭哥嘅住所, 早已改建成教堂, 裏面陳設簡樸,

祭壇上嘅聖母像同其他五座嘅唔同, 頭戴光環嘅就係胡安迭哥, 佢嘅斗蓬胸前呈現聖母像; 另外, 右邊黃色斗蓬胸前呈現聖母像嘅雕像, 亦係胡安迭哥, 佢死後埋葬喺度, 亦因此事而封聖, 成為世上首位封聖嘅印第安人, 知道厘個故事後, 就明點解各地嘅印第安人都擁黎瓜達盧佩聖母大教堂朝聖啦!

出番廣場, 可以睇到, 厘邊都有唔少印第安人

喺聖水教堂前(後面似皇冠果座), 就係聖母顯靈紀念銅像。

跟住, 我地沿路上山, 經過聖水教堂。

整座教堂呈圓形建築, 環繞教堂外地面, 透過鐵網可以睇到地陷情況。

教堂入口有一口水井, 傳說聖水可治病, 唔少信徒千里而來就為左聖水。

教堂內兩個圓頂都仿水流式樣設計

堂內嘅坐椅同祭壇都呈圓形設計

參觀完五座教堂, 當然要上山睇下聖母顯靈之地啦!
上山樓梯裝煌得好靚

中間仲有個觀景台, 可以俯瞰整個瓜達盧佩聖母大教堂。

咦! 搞咩山上有帆船嘅? 原來就連需要出海工作嘅信徒,
都深信佢地同樣受聖母保佑, 咪喺度整隻帆船囉!

厘度售賣嘅聖母像, 全係顯靈時嘅模樣, 且價廉物美。

厘度係點蠋杯, 且設計精美。

厘度原本只有山上厘座教堂, 後來因為地陷, 再喺山下興建安提瓜教堂,
後來安提瓜教堂亦下陷, 且黎崇拜嘅人越黎越多, 於是興建現代化嘅帳蓬式主教堂,
可容納更多信徒, 據講而家件斗蓬亦藏喺主教堂內, 可惜我無緣一睹呢!
厘座就係聖母顯靈地嘅Camille del Cerrito教堂, 始建於1666年, 由當時信徒眾籌建成。

入口門上掛有聖母畫像

教堂兩側牆上繪滿壁畫, 反光太勁, 好過無得睇啦!

參觀完落山, 途經所見。

厘檔又係收費拍照, 準備得認真D。

參觀完瓜達盧佩聖母大教堂已經時近黃昏, 導遊送我地返酒店,
大家都行到攰, 就喺酒店斜對面嘅平民自助餐廳解決晚餐,
厘餐我倆加埋都係HKD50左右, 所以話遊墨國可以豐儉由人囉!
跟住再齊齊去影下夜景, 今晚係周日, 無周末咁熱鬧啦!
國家宮

大教堂

政府機關

憲法廣場

D2 完

12/11/2018
D3 - Hotel > Popocateptl national park波波卡特佩特國家公園 >

Cholula喬盧拉
HOTEL: Villas Arqueologicas, Cholula (3*+), Cholula

今日嘅行程真係要講運氣, 我地會去睇波波活火山,
但要天朗氣清先有得傾, 幸好嘅係我地去完20日後先爆,
否則去唔到之餘,連空氣都差好多。
經過2小時車程, 黎到波波卡特佩特國家公園嘅遊客中心。
一邊天氣咁

另一邊好似有希望喎! 咁即係點呀? 五五波呀?

上到黎囉! 行啦!

天色真係唔係幾就喎!

算啦! 當行下山囉! (4000米架!

) 好在多植物兼比較平坦, 唔算辛苦。

沿途唔少野菌, 有D喺陽光下仲閃閃生輝, 成朵金菇咁。

其實我地仲要行多幾個山頭, 去到好多發射塔果度。

因為仲有個景點, 雲量咁多, 大家決定放棄啦!

回程途中, 喺山路旁小店食Tacos。

等食期間, 小鄧好搞笑地話佢都識整taco喎!

仲晒佢整得好成功添!

我地大概每人食左三件, 連飲品, 13人食左1000PS, 約HKD450。
(方唔係計埋小鄧D學費同場租咩!

)

食飽飽, 雖然個天氣唔就, 都搏影番張靚相啦!
呢!咪就係想搵個位影厘張相囉! 活火山背景嘅教堂, 係咪好正呢?(麻麻地啫

)
厘張甩哂色咋!

你睇喬盧拉旅遊局網上宣傳封面吖! 真係好正架!

http://beta.visitmexico.com/zh/historic-center-cholula-puebla-mexico

唉! 話左今日唔就架啦! 你睇! 爆胎添!

希望好快搞掂啦!

結果搞左個幾鐘, 橫掂無時間囉! 梗係等司機換埋條新胎先啦!

仲有好多日要玩嘛! 點知又要等條新胎送黎, 終於搞到六點幾。

哈哈! 我地好有耐性同禮貌咁等, 真係好心有好報,
無左個火山教堂, 喺路邊執番張黃昏中的波波火山, 都算有安慰獎啦!

見唔見呀? 山頂嘅唔係雲, 係火山噴嘅煙黎架!

旁邊嘅晚霞移過隔離咪正哂囉!

(乜你咁鬼貪心架!

)

今晚住宿嘅酒店, 正門對正建喺金字塔頂上嘅濟世聖母教堂
(La Lglesia de Nuestra Senora de Los Remedios)

酒店陳設頗有特色

因為四周荒蕪, 我地喺酒店餐廳晚餐, 咁靚位置, 當然出去影番張教堂夜景啦!

早抖LU!

D3 完

13/11/2018
D4 – Cholula喬盧拉 > Tepozotlán迪坡斯特蘭 (總督國家博物館) >
Tula圖拉鎮 (圖拉考古博物館 ) > Queretaro克雷塔羅
HOTEL: Hidalgo, Quinta Allende, Queretaro (3*)

因為想影夜景, 尋晚飯後問酒店, 對面教堂幾點鐘熄燈, 佢地答話到天光喎!
清晨時分, 果然仲著緊燈。

大家步行十零分鐘就上到教堂。

日出前到達教堂, 不過雲量太多啦!

雖然係咁, 夜色中嘅教堂都幾靚吖!

厘度可以俯瞰整個喬盧拉, 可惜雲太多, 睇唔到波波火山添!

中間果座係加百利女修道院, 似乎係市內佔地數一數二嘅建築物。

厘個城市色彩好豐富

一天光哂LU! 欣賞下喬盧拉全市都唔錯吖!

公園內嘅運動設施幾充足喎! 厘個小鎮嘅人應該幾注重健康,
因為我地一路上見居民跑步晨運啦!

呢! 最近紅色果座就係我地住嘅酒店啦!

教堂內唔准影相, 唯有喺外面影啦!

教堂圓頂嘅馬塞克同鐘樓

無日出, 無火山, 無朝霞, 走LU!

厘張海報就貼喺樓梯口之蔴!

教堂有兩條樓梯, 左右成弧形圍住山丘(其實係金字塔), 一路上風景都好靚。

喺山腳有鐵絲網圍住嘅地方, 其實係金字塔嘅一部份。

唔講都唔知, 原來教堂係建築喺目前世上體積最大嘅金字塔上, (乜唔係埃及咩?)考古學家估計佢喺公元前300年時, 居民用作祭祠羽蛇神嘅,
後來因日久荒廢, 野草叢生, 加上16世紀初, 西班牙人入侵, 進行大屠殺,
就更加無人知座山係金字塔啦!
山丘頂踞高臨下風景優美, 最啱起教堂啦! 直至19世紀先被人發現。
目前只開放金字塔旁地面嘅小部份

拜拜LU! 再睇清楚厘座隱藏喺植被下, 世上體積最大嘅金字塔。(世界最高仍是埃及胡夫金字塔)

早餐後, 離開喬盧拉向Tepozotlán迪坡斯特蘭進發, 沿途多見農田,

仙人掌田

遠處仲見有座頗長嘅水道橋添!

厘D花園枱椅好精緻呀!

約三小時車程, 我地終於黎到Tepozotlán 迪坡斯特蘭,

教堂前嘅廣場

除左途經厘個小鎮, 主要係參觀Museo Nacional del Virreinato
(總督府國家博物館) 同教堂。

教堂嘅山門石刻好精美

博物館門票有多款設計, 我地12張, 張張不同。(乜導遊都要票架?

)

部份建築

外園入口前豎立一巨型骷髏 (周圍都見啦:

)

博物館入口立有世遺標誌說明:
Camino Real de Tierra Adentro被稱為銀色路線，
係指從墨西哥城至德克薩斯州和美國新墨西哥州嘅2600KM，
主要運輸墨西哥的銀及從歐洲進口的汞，路線亦促進西班牙同印第安人之間嘅宗教同文化。
其中1400KM路段，包括55個遺址同五個世遺，厘間博物館連教堂就係其中之一。

一進入內庭園, 就有兩個圓拱水井口,

其實佢地係儲水同供水系統嘅一部份, 門口有說明。

厘度整個地底係儲水庫, 雨水經收集後, 由牆邊嘅方形管道直接流到地面集水口(好似渠口嘅方形窿), 用時就在兩個井口打水。

我地要喺走廊等館內導賞員帶領先可進入, 牆上又係聖母顯靈嘅畫像。

梗係啦! 館內從文化、軍事到科學都有珍藏。

頭盔黎架!

參觀完博物館, 導賞員又帶我地穿過度門, 以為係另一展廳,

大家入到去都睇到嘩嘩聲!

係金到燦眼嘅巴洛克式教堂

嘩! 厘D雕刻, 唔知要幾多年先可以完成呢?

雖然教堂唔算大, 絕對稱得上金璧輝煌啦!

跟住, 導賞員又上二樓, 走廊牆上嘅繪花都被小心保留, 所以咪揩埋去呀!

二樓佈置同樣精美

同時保存部份原有壁畫, 色彩鮮明。

厘度可以俯覽教堂

教堂頂上嘅圖案同徽號

仲可以水平角度欣賞高位嘅雕刻

厘座風琴睇怕都有相當歷史

二樓亦有展館

墨西哥境內各種族人

厘D木柱雕刻, 同教堂上部份雕刻一模一樣。

樂譜唔用豆豉, 用旗仔個喎!

厘D瓷器咁親切嘅! 直覺上覺得係來自中國囉!

厘幾套唔似係中國個喎!

貝殼鑲坎嘅家具同畫作

牆上聖母聖嬰壁畫

我地從厘度門離開，整條走廊同門邊都有色調柔和嘅壁畫。

出門後, 我地以為遇上人家拍婚照添! 咦! 無新郎嘅?

經導遊解釋, 原來墨西哥女孩成年禮時, 流行拍成年照,
表示佢地大個女啦! 少女仲好搞笑地托住個胸俾我地睇添!

今日嘅午餐, 導遊話帶我地去食Tacos, 佢話厘間非常好食, 好受歡迎喎!

睇下有咁多人幫襯就知係好野啦!

而且價錢平宜(唓! 你識睇咩?

) 我識睇數目字吖嘛!

枱面基本有厘三種辣椒醬,

D配菜就唔知係另外叫,還是跟餐嘅, 因為全部都係導遊幫我地叫嘅。

每款11個, 每人試一個, 大概每人食左三、四款啦! 又真係幾好食!
厘餐13人, 食到捧住個肚, 連飲品先600PS, 約HKD250, 你話係咪可豐可儉吖!

食完上車, 話飯氣攻心啫! 我都無食飯, 唔眼訓咪影下野囉!
厘區嘅街道牌美觀而統一, 以瓷磚燒製。

到左公路收費站, 有荷槍保安不停巡邏於行車線之間, 且神情同動作都表現得好專業同警覺。

我地黎到Museo Jorge R. Acosta 圖拉考古博物館,
(乜咁有歷史性嘅遺跡竟用人名命名嘅?)

因為佢對阿科斯塔考古研究有大貢獻囉!

圖拉曾經係托爾特克嘅統治中心，後被阿茲特克人征服。

進入圖拉考古博物館會經過滿種仙人掌嘅公園

有D仙人掌被人刻名留念

景區導覽地圖

離遠就望到晨星廟啦! 晨星即金星，是羽蛇神的化身。

我地先經過一個有蓋嘅展覽場, 裏面有多座浮雕牆,
可以睇到最右邊蛇咬骷髏。

左邊嘅蛇咬人? 還是羽蛇神個頭係長成咁呢?

右上嘅係美洲虎

朝著金字塔行, 越黎越多殘柱, 有圓有方。

喺金字塔樓梯前兩側, 各有一尊查克莫Chacmool,

佢象徵戰死嘅勇士, 亦像徵現實同超自然嘅交匯點;
時人係用活人作獻祭, 祭司將活人嘅心藏用刀挖出,
放喺查克莫嘅胸前舉行祭禮, 以便同神衹溝通,
簡單而言, 查克莫就係人神之間嘅靈媒體。

雖然落緊雨, 又濕又凍, 都要爬上金字塔架!

金字塔平台上除左幾條殘柱, 主要係厘四尊武士石像, 據講其中兩尊係仿製, 真品藏於博物館。
石像手持武器, 著嘅鞋係露腳指嘅!

背後揹盾牌?

兩截殘柱上有精美圖案

高處下望金字塔前嘅列柱

由高處下望, 可以俯瞰整個被火毀嘅皇宮遺址, 而家只殘留基座同石柱。

參觀完圖拉考古博物館, 我地就驅車返酒店, 今晚住厘間 , 我估係歷史建築卦!

內部及房間

D4 完

14/11/2018
D5 – Queretaro克雷塔羅(中央廣場,Acueducto de Querétaro 水道橋) >
San Miguel de Allende 聖米格爾德阿連德 (市內遊) >
Guanajuato瓜納華托
HOTEL: Posada Santa Fe, Guanajuato (3*+)

今日行程豐富, 連訪三個世遺古城;
早餐後出發, 克雷塔羅早上嘅市面顯得冷清。

厘度話哂都係個世遺古城, 雖然比起San Miguel 、 Guanajuato同
Morelia都無咁有睇頭, 無理由訓一晚就走架!
導遊先帶我地瞭解城鎮嘅地理環境, 位置就喺Community Garden嘅北門前面。(咁咪睇哂全市囉!

)

之後車向東行750米, 迴旋處有個蓄水庫Tank Querétaro,
從前, 長長嘅水道橋就係將水引到厘個蓄水庫內備用。

感覺墨人嘅一天生活開始得比較晏, 八點幾, 條街仲好靜。

接住, 當然去市中心嘅中央廣場啦! 因為仲早, 我地只係逛左個圈啫!

感覺墨國男仕特別注重皮鞋嘅整潔, 一早就有生意。(人地擦靚對鞋返工見客架嘛!

)

墨國喜歡用生鐵鑄嘅花園椅, 哈! 如果係HK, 實一夜無哂啫!

Templo de San Francisco, 始建於16世紀西班牙殖民時期。

旁邊有個印第安人銅像

黎克雷塔羅, 當然要參觀水道橋啦! 雖然佢不及莫雷利亞嘅, 仍然係必睇架!
到LU! 單車停泊處, 美觀過好多國家啦!

南美人愛好塗鴉, 墨國人都唔弱, 厘幅好掂啦!

行過斜對面就係水道橋, 73拱喎! 點都有些少睇頭嘅!

附近有個小廣場

牆上有水道橋紀念碑

近距離參觀後, 再驅車搵個觀景台, 希望可以欣賞全市啦!
墨國係天主教國家, 當然梗有座教堂喺左近啦!

可惜今日天陰, 俯瞰景麻麻地啫!

觀景台又太遠, 搵個近D嘅! 上車續行, 厘個位叫做好D啦!
喺山上嘅小屋, 屬平民住宅區。

山上一樣有社區教堂

克雷塔羅嘅73拱水道橋, 係將水輸往市中心。

中間方型紅頂果座Josefa Ortiz de Domínguez Auditorium, 係佢地嘅藝術表演中心。

整張全景, 可見水道橋貫穿市內, 直達市中心。

厘邊雖然都係山上住宅, 睇就知屬富人區。

另一角度俯覽全市

上車LU! 市內巴士站, 乜資料都無, 只有牌一個。

繼續向另一世遺城市San Miguel de Allende 聖米格爾德阿連德出發
市內街巷顯得古樸優雅同寧靜, 好舒服。

市內觀光巴士

全市最古老嘅油站

廣場上嘅紀念碑, 估佢係航海家哥倫布卦!

厘個鎮好多古老教堂(一陣再講)

牆上嘅蟾蜍裝飾幾中國化喎!

穿過嘅街巷都好吸引, 當中唔少民宿旅店同手工藝精品店。

導遊先帶我地去Mercado de Artesanías市集裏嘅洗手間,

順便逛市場,

墨西哥人對色彩真係非一般嘅愛好

導遊仲介紹大家試食一種牛油果, 左邊係仙人掌果。

本地市集外觀

Plaza de la Soledad

廣場上立有保祿二世像

San Miguel de Allende個名稱係由兩個人名組成,
Fray Juan de San Miguel係16世紀興建
Parroquia de San Miguel Arcángel教堂;
至於Allende係取名於獨立英雄Ignacio Allende, 由於城市嘅歷史同地理因素,
成為西班牙同印第安文化嘅熔爐, 仲良好保存到珍貴建築添!
中間哥德式嘅Parroquia de San Miguel Arcángel, 係此地嘅地標, 左邊隔離係
La Santa Escuela de Cristo, 右邊牆角有白色雕像嘅係歷史博物館。

喺大教堂街角立有銅像, 站立嘅就係建築厘座教堂嘅San Miguel啦!(城市名命之一人)

咁宏偉嘅建築,當然要入去參觀啦!
紅磚同磚雕組成幾個高聳華麗嘅尖塔

主教堂嘅拱頂無華麗嘅壁畫, 而係以紅磚砌出古樸原始, 別有風味。

佢左邊仲有座La Santa Escuela de Cristo教堂, 風格完全唔同。

舊城區嘅街巷與建築

路牌設計立體精美

間中仲會喺建築物間出現個小水池 (多數無水啦)

區內有唔少小旅館

Antiguo Convento De San Antonio教堂前面有個小廣場

外表咁吸引, 入去參觀囉!

剛出黎, 見遊客排隊上觀光巴士, 滿座添! (幾好生意喎!)

厘座凹形拱門嘅係Templo de Nuestra Señora de La Salud ,
佢隔離黃色果座係大學, 入左厘座先!

另一度門

教堂內唔算好大,

其實修院範圍頗大,

行出轉角, 又見軍車巡邏。

無論行到邊, 古雅建築觸目皆是。

遊客中心(前市政廳) , 亦係一座漂亮嘅歷史建築。

又一教堂, Temple of Nuns門前同樣豎有一式說明牌。

教堂內部

San Miguel de Allende部份街道成個山城咁

希望去個高位欣賞俯瞰景

途經嘅教堂已經無時間再入, 因為仲要返落去集合, 只好放棄觀景台啦!

除左荷槍實彈嘅軍車, 仲有騎警四處巡邏, 徵求同意下,
仲好友善停定俾我地影相添!

拜拜啦!

早知頭先唔使咁趕啦! 原來導遊會車我地去觀景台,

剛才嘅觀景台無咁理想, 再前D就好好多囉!

哈! 如果有陽光就正囉!

行車中, 習慣睇下影下; 名乎其實嘅鐵公雞, 一家五口, 點夠佢算呀!

厘間藝術館外觀幾正, 但位置偏僻呢!

就到LU! 途經所見。

之前睇資料, 都知瓜納華托係個隧道之城, 無諗到喺隧道落車,
好彩酒店有人安排拎大行理啫!

我地住喺瓜納華托聯合廣場, 出入夜遊都非常方便。
酒店門前街道及入口

地面層有前台、餐廳同房間。

我地住得高D, 要上樓梯, 好有中世紀復古風格, 爬樓梯都算享受啦!

厘座雕塑好似訴說緊西班牙人曾如何殘殺印第安人

房門嘅鎖同閂, 都係我兒時熟識嘅。

房內兩張加大雙人床, 床頭燈係腳踏衣車頭改裝, 房間佈置非常舒適別緻。

趁時間尚早, 周圍行下先! 步行一分鐘就到Teatro Juarez ,

隔離係前修道院博物館, 無開放。

瓜城除處處古建築外, 傍晚開始, 就有好多中世紀打扮嘅表演者聚集, 且越夜越熱鬧。

有唔少行車嘅隧道出入口

最矚目嘅教堂Parroquia de Basílica Colegiata de Nuestra Señora

六點幾仲有唔少人, 入去LU! (乜你咁鍾意入教堂架? 唔悶咩!

)
雖然我唔係基督徒, 但唔少教堂係藝術品般, 值得細賞。

見唔見呀? 有兩位中世紀穿著嘅表演者坐喺度休息!
行下行下, 到纜車站, 今日攰啦! 聽晚先上。

隧道內

plaza la paz

Iglesia De La Compañía en Puebl被認定為中美洲最美教堂之一

教堂嘅主祭壇正在維修

封左正門入口, 暫時用住先。

又一個廣場

又一劇院

瓜鎮予人感覺幾安全, 雖然入夜, 到處都係遊客同食肆,
我倆求祈搵間Pizza店醫肚。

厘種只供行人用嘅隧道入口, 太夜啦! 聽朝先試。

又一教堂, 入去打個轉, 無人!

瓜鎮雖無San Miguel de Allende咁多教堂, 但裝飾較豪華。

見到厘兩個雕塑, 厘度梗係唐吉訶德博物館啦!

由天光到萬家燈火, 景觀完全兩樣。
plaza la paz

以為瓜達華托大學唔著燈添! 原來佢相對遲亮燈。

瓜達華托大學嘅藝術中心門頂上嘅異形雕塑有D嚇人

夜色中嘅Iglesia De La Compañía en Puebl(中美洲最美教堂之一)

沿途夜景

劇院門口階梯仲坐左唔少人, 又有街頭表演者。

修道院博物館門口, 直情成隊中世紀樂隊喺度表演。

返到酒店條街嘅茶座仲好熱鬧

又攰又夜, 都係返酒店休息LU!
酒店天台開放嘅, 上去八下囉! 天台景觀一流, 可惜射燈太多呢!

D5 完

15/11/2018
D6 – Guanajuato 瓜納華托 > Museo de las Momias 木乃伊博物館 >
皮畢拉山 > Museo de Sitio Mina Valenciana巴倫西阿納礦洞 >
museo del purgatorio guanajuato虐囚博物館 >
Templo de San Cayetano Confesor > 瓜納華托市內遊 >
皮畢拉山俯瞰夜景
HOTEL: Posada Santa Fe, Guanajuato (3*+), Guanajuato

早上七點, 出去行下, 咁早? 劇院門前已經有表演者自彈自唱, (有聽眾咩!)

我係音樂白癡啫! 晨早有知音架!

今日行程可以用刺激震撼黎形容

, 咪話無做預警呀! 受唔到刺激嘅,
略過就好啦!

以中國人嘅概念, 晨早參觀木乃伊, 真係大吉,
不過隊友們都比較豁達, 無乜所謂。

一講到木乃伊, 首先聯想嘅應該係埃及啦!
厘座博物館嘅規模, 雖然同埃及嘅無得比, 但震撼性絕對超越哂啦!
而且同埃及木乃伊處理手法不同, 我稱佢地為乾屍。(又話震撼? 有得睇未呀?)

*****警告: 以下相片會令人不安*****

一早黎到 Museo de las Momias 木乃伊博物館, 因為之前做左功課,
有哂心理準備, 能以平常心參觀同拍照, 好佩服墨人對死亡能坦然面對。

雖然影左好多, 為左減少不安, 只Po幾張代表性嘅!
館內資料照片

目前世上保存最完好嘅木乃伊

最新發現的(2000年)

懷孕六個月嘅母親身故, 救出嬰孩, 可惜同時不治。

當然仲有過百具啦!

出門圖示, 除供遊客睇, 唔知係咪仲方便其他"人" 呢?

夠膽又唔避忌嘅, 黎張合照如何? (無人幫襯

)

走LU!

跟住坐車上去皮畢拉山欣賞瓜市全景

! 乜由博物館跟到黎呀!

唔使再介紹啦卦! 尋晚已經行過下, 晏D我地作市內遊再介紹啦!

不愧有彩色之城嘅美譽

左邊有間餐廳, 可以享美食+美景, 正!

話明係皮畢拉山, 梗要有座皮畢拉紀念碑啦!
皮畢拉(El Pípila）係一位礦工。

厘座紀念碑嘅英雄故事, 要同山下方形果座石頭堡壘相連結黎睇嘅!
話說墨西哥獨立戰爭期間，西班牙人將大量墨西哥嘅白銀同財富收喺穀倉（石頭堡壘），而倉庫唯一的弱點係木門。
皮畢拉喺同夥協助下, 揹住石板作保護，奮勇以焦油放火燒木門，
義軍隨即湧入穀倉，纖滅西班牙士兵，暫時守衛左瓜納華托。
可惜義軍仍不敵西班牙人, 結果革命領袖Hidalgo伊達爾戈、Allende阿連德、Aldama阿爾達馬、Jimenez西門尼斯等被斬首,
首級分別被掛喺穀倉四個角示眾, 後來遺體髒於獨立紀念碑下。

墨西哥產銀, 曾佔世界產量嘅16%, 於是,
我地黎到著名嘅Museo de Sitio Mina Valenciana巴倫西阿納銀礦洞 ,
經過西班牙人掠奪性開採, 目前已經被廢棄, 成為博物館啦!
售票處

入礦洞前當然唔少得導賞員啦!

厘位曾係經驗豐富嘅礦工, 而家轉職導賞員囉!

先睇下模型

厘個就係我地要睇嘅!

講解完一輪 (嗱!一定要跟住我, 仲要揸實條繩, 小心地滑.......)

入礦洞啦!

礦工嘅工作與環境

導賞員以西班牙話介紹

又用電筒照射, 俾我地睇到閃閃發光嘅礦銀。

厘架就係載礦石推出洞嘅軌道車, 佢話當年係人手推嘅。

*****警告: 以下照片會令人不安*****

跟住, 我地行去附近嘅museo del purgatorio guanajuato虐囚博物館,

睇木乃伊我可以坦然, 但厘度比地獄更可怕, 歷史有時真係幾殘酷。

當然, 有D一睇就明。

但有D聽講解時都戥印第安人心酸, 不禁會問, 人心真可以如此殘忍咩?

手搞緊果部唔係織布機, 係將囚犯嘅腸從肚一路搞出黎致死。

以為厘座係斷頭台啫! 點知西班牙人竟諗到將刀吊住, 好似鐘擺咁,
喺犯人條頸上來回咁𠝹, 咦! 唔想睇啦!

去教堂洗滌下心靈先, 教堂前廣場

Templo de San Cayetano Confesor就係另一座被譽為中美洲最美嘅教堂

教堂內部及圓頂

教堂另一度門

返酒店時, 我地都係喺隧道內落車。

隊友話想食燒雞, 要求導遊帶我地去, 經過Plaza la Paz,

再到plaza de los angeles, 燒雞店就喺廣場附近。

La Carreta燒雞店

正對面都係燒雞店, 不過係KFC啫!

瓜納華托嘅巴士

城市設計似足西班牙, 街巷間經常僻有小廣場。

燒雞店附近厘間咖啡店好出名

瓜納華托大學

佢嘅藝術中心, 裏面剛進行緊活動, 唔阻人啦!

基本上, 導遊帶我地去嘅, 尋日我倆已經行過,
只欠The Alley Of The Kiss接吻巷啫!
又見D表演者喺街上。

轉入街口已見掛滿七彩旗, 佢地嘅紙雕彩旗題材多以動植物或骷髏為主。

厘度就係接吻巷, 剛好有班中學生由老師帶領參觀, 佢地好開放,
應該係情侶+同學身份, 佢地比起故事男女主角幸福得多啦!
唔使偷偷摸摸, 更唔使為情付出生命, 傳說喺度接吻嘅情侶可以永遠喺埋一齊。

(你都無講故仔

) 咪係墨西哥嘅羅密歐與朱麗葉囉!
不過改名為Don Luis & Dona Carmen之麻。

窄巷梯級可以通往隔離街, 唔使兜斜路先上到去囉!

厘度都有匯豐銀行

古城街巷

行左成日, 返酒店小休後, 再行去搭纜車上山欣賞夜景;
但為安全計唔好太夜上, 更唔好太夜走, 走剩自己始終唔安全囉!
我地由劇院與修院之間前行

上行纜車站

下行纜車站, 山上車站大D靚D。

由黃昏至晚上都好多人(纜車開到21:00)

纜車站就喺劇院後面, 屋頂有幾座雕像, 粉紅色半圓形下面。

早少少上黎, 陽光會靚D 。

睇黎, 餐廳生意馬馬, 唔通收得好貴?

部份建築開始亮燈

開始萬家燈火, 搞乜瓜大仲唔著燈嘅!

我地就住喺彎位(聯合廣場)中間果座酒店咋!

嘩! 瓜大要遲半個鐘先著燈架!

雖然先七點幾, 都要返落去食飯啦! 始終安全為上,
唔好等人走哂, 自己落單就風險高D啦!

D6 完

16/11/2018
D7 - Guanajuato 瓜納華托 > Morelia莫雷利亞 (市內遊)> Zitacuaro錫塔夸羅
HOTEL: Maria Fernanda Inn, Zitacuaro (3*+)

告別瓜市, 真有D不捨! 早餐前出外走走, 相對其他城市, 街道上算多人啦!

佢地嘅紙雕式樣, 有D係骷髏。

好鍾意厘種石牆

趁有時間, 落隧道行下囉!

早上嘅隧道一D都唔靜, 巴士站已排人龍

車輛來往不絕

哈! 此鎮早晨原來係地下活動頻繁D架!
家長送小朋友返學

又一尊唐吉訶德像

厘條街直望山頂就係皮畢拉像

尋晚經過厘條行人隧道口唔敢落

而家可以落去啦! 轉角位較暗, 相信居民較少用厘個出入口,
不過落到去又非常開闊。

陽光正好照住劇院頂嘅繆斯女神

咦! 隔離修道院開左門喎!

入去參觀下, 只開放教堂部份。

返去食早餐LU! 未有得食?

上天台告別下先。
天台有個水池仔 (浸腳池咋卦

)

清楚睇到上皮畢拉山嘅纜車軌

兩位隊友嘅房間, 佢地就正啦! 可以獨享天台美景。

前往另一世遺古城Morelia莫雷利亞; 沿途見到水道橋, 車速快,係影到咁多咋!

沿途經過兩大湖泊, 係墨西哥行程中較少嘅景觀。

湖泊上不時有大群水鳥飛翔, 但無乜見船隻喎!

咦! D屋好似被水淹左呀!

跟住係大片牧場, 真係水草牛羊皆肥美。

又見湖泊, 好自然嘅風光。

其實我地所到之處, 無論係高速或市內公路, 都建設得非常好。

兩個多小時後, 到左Morelia莫雷利亞, 我地喺武器廣場附近落車。

市內食店

穿過街道

先到州政府宮參觀, 部份正在維修,

牆上滿是壁畫, 題材多與民生及革命歷史有關。

可以睇到大教堂鐘樓

由於時間不足, 而莫雷利亞係個可觀嘅世遺城市, 於是又放飯兩個半鐘,
攞住地圖, 各自發揮啦! 地圖上嘅建議旅遊景點共12個,
最後嘅水道橋, 導遊會車我地去。

我倆由大教堂開始參觀, 左邊白衣人群正準備舉行喪禮,
與一般天主教徒穿黑衣的風俗有D唔同。

哥德式教堂內部宏偉華麗, 係本市最大嘅教堂。

教堂對面舊式建築 (廢話, 全市那埋都係舊建築啦!

) 咁又係!

市內觀光車

街上世遺標記

前墨西哥總統華雷斯像

的確, 厘座古城保育得好好。

武器廣場

繼續西行

雖然唔屬地圖推介嘅歷史建築, 厘所大學肯定係古老建築啦!

裏面係方正嘅羅馬式建築, 環境幽美寧靜。

最後仲有個庭院

如果唔跟地圖搵, 真會睇漏由修道院改建成嘅圖書館。

華麗嘅公共圖書館Biblioteca Pública 。

佢旁邊仲有座方尖碑, 俾棵樹遮左, 遠D都發覺唔到。

厘度係墨西哥第三大古藉圖書館, 擁有七本驚世珍本。

借書或睇書嘅人唔多, 我觀察到佢地好隨便, 喺度飲食添!

哈哈! 斷估果七本珍藏唔會隨便放喺度卦!

圖書館唔算大, 但典雅, 唔打擾, 影幾張相即閃。

好有趣嘅大門旁加小門

喺外面睇得清楚D, 兩扇大窗其實係教堂門改裝, 增加透光度, 旁邊加開度細門。

接住再按地圖走, 咁大座建築, 仲唔係佢?

排隊買飛?

肯定係厘座前皇宮Palacio Clavijero, 而家係文化中心。

另外一度門又有小學生排隊, 參觀卦, 我地時間唔夠, 經過睇下算啦!

Palacio Clavijero嘅鐘樓

遠睇座圖書館，係人都估係教堂啦！

繼續喺古街中穿梭

離遠見座教堂, 原來地圖中有圖無名, 唔知係咪名單之列, 橫掂黎到, 行多幾步睇埋佢囉!
Templo de la Merced

中午時間, 教堂都無乜人, 鐘意點影都得。

市內公車

又黎到水道橋其中一段, 之前喺克雷塔羅睇嘅水道橋只有73拱,
而厘道嘅水道橋喺16世紀時有253拱 (而家剩番無幾多囉!),
不過想像都知有幾宏偉啦!

兩位坐喺水道橋上開餐休息, 現代少女加古老建築, 好浪漫嘅畫面。

厘條街, 尤如露天藝術館

厘條街絕對吸睛啦!

厘座亦係地圖推介嘅Jardin Templo y Conservatoio de las Rosas

地上沿途有指示, 但我地好遲先發覺。

Don Vasco de Quiroga係16世紀做福當地人民嘅主教

仲有東面幾個, 試下搵唔搵到先! 就算喺市內隨便行下都已經好正啦!

穿過幾條街, 又見大教堂啦!

黎到Templo y Ex Convento del Carmen

室外有蓋部份可作延伸為教堂

Plaza del Carmen成長方形, 頭尾立有兩座塑像, 其實喺厘度, 已經遙望到 Templo de San José

16世紀, 西班牙首位總督門多薩立像。

此城只要肯四圍踱, 處處美景。

厘個牌唔知係咪話: 沿住方向睇到1974-1980年嘅建築呢?
google話上面寫嘅: 『第一階段文化之家』

哈! 墨人對骷髏的愛好真到極點。

Templo de San José及 San José Garden

Templo de San Francisco

Templo Las Monjas

基本上, 雖然我倆跑哂旅遊局推介嘅景點, 亦只能速遊,
要參觀埋博物館, 點都要一日時間啦!

Plaza Valladolid 正舉行市集活動

夠鐘集合, 無時間搵食, 唯有幫襯喺市集嘅熱狗啦! 98Ps/隻, (咁貴!

)
咪係囉!麥記成個餐都係五十零, 鬼叫自己逛哂D時間咩!

Jardin de Capuchinas

之後到水道橋同Fuente de las Taracas廣場,
亦係地圖上推介嘅最後一景點。

厘座巨龍雖長1.7公里, 拱孔達到253個, 可惜只保存部份完整遺跡,
剩番嘅只屬遺址! 否則, 有個觀景台欣賞下巨龍風采, 而家只好靠想像啦!

三少女高舉嘅係種植成果

再見啦! Morelia莫雷利亞

往酒店途經美景, 順便落車鬆下, 見山景幾靚。

為左睇帝王蝶大遷徙, 今晚住Zitacuaro 錫塔夸羅小鎮,
到達時雖未到七點, 條街已靜到無朋友。

酒店外觀

房間內部

附近有檔熱氣騰騰嘅食肆, 團友興奮地想像係湯麵, 呵呵!

又係Tacos, 無選擇, 照食啦!

D7 完

17/11/2018
D8 - Santuarios de la Mariposa Monarca帝王蝶保護區(步行2小時)
HOTEL: Maria Fernanda Inn, Zitacuaro (3*+)

今日係我渴望已久嘅行程, 為左方便欣賞帝王蝶大遷徙, 長途拔涉仍值得,
由酒店出發, 小鎮嘅早上當然更寧靜啦!

只需一小時就到Santuarios de la Mariposa Monarca帝王蝶保護區

好多人喎!

仲有樂隊添!

當然, 居民都牽馬出黎搵番畢啦!

墨國家長對觀蝶活動有佢地嘅一套, 小朋友有各種扮相, 目的係融入大自然。
大鳥, 你係隻雞? 鴨? (唓! 你理得我係咩吖! 靚唔靚? 可唔可愛先?

靚!!

好可愛呀!

(咁咪得囉!

)

費事啋你啦!

你塗黑個鼻, 又畫左幾撇貓鬚, 肯定唔係隻大鳥啦! 係咩呢?

哈! 美女蝴蝶與野獸相約黎觀蝶, 梗係啦! 有美蝶帶路方便好多嘛!

厘隻肥嘟嘟嘅小蝴蝶, 我鍾意呀!

要賞蝶, 仲要係大量果隻, 點可以咁易欣賞到呀! 最少都要行入林區啦!

厘條路同兩旁店舖, 好明顯係新建架啦!

中途仲有食肆添!

我地先睇下有咩食, 預備中午時幫襯嘛!

埋邊就係佢地嘅廚房啦!

路邊攤亦陸逐開檔, 為吸睛, 檔主都著得較鮮艷奪目。

除左地攤, 亦有店舖, 都以賣紀念品、土產為主。

(好野! 到啦! )講得無錯, 係到啦。。。景區入口。

售票處、旅遊中心、小賣等。

入閘後繼續行啦!老友!

睇現場, 好多段路都用繩欄住分左右, 每年二月佢地會舉辦蝴蝶節應該喺旺季,
人多時分開上落, 方便疏道同免生意外。

嗱! 厘度唔止多蝴蝶, 仲有蟒蛇架!小心D呀!

繼續行

嘩! 蝴蝶呀! (少見多怪, 得果幾隻, 未見過咩! )
咁我地目的唔係睇蝴蝶咩?(係睇大遷徙, 唔係小遷徙呀!)

導遊真有愛心, 見全團退休人仕, 好心買定三支竹俾團友用,
豬熊有自知之明, 手杖護膝齊備, 唔好意思, 幫佢唔到, 導遊就慘囉!
一個人拎三枝, 好彩一位隊友幫佢拎左枝啫!

咦! 咁多馬嘅? 係呀! 唔想行可以騎馬架! (幾錢呀?) 睇怕係海鮮價卦!
當日有六位隊友騎上去, 好似係150Ps, 約HDK60啦!

豬熊繼續努力前行, 開始見頗多蝴蝶喺樹頂上飛,
感覺上D蝴蝶飛得比正常高。

講番D蝴蝶吖! 佢地叫做帝王蝶, 唔係美洲獨有,
不過唔係所有帝王蝶都有遷徙特質, 厘度嘅就屬於遷徙嘅帝王蝶。
(餵! 你唔係想放條纏腳布上黎呀!) 當然唔係啦! 想知多D, 請自己google下啦!
https://zh.wikipedia.org/wiki/君主斑蝶
講到影蝴蝶遷徙都係首次, 前一日試過支300可以瞄到樹頂, 以為OK啦! 黎到先知D樹好高, 支鏡越遠越好! 無帶支600上山, 失敗!

(死蠢!

)
開始路邊都有D

唉!去到盡都係咁咋! 密集嘅蝶群又厘喺暗處喎! 器材C, 技術又C, 無計!

呢! 其實黑麻麻一舊舊嘅係大堆蝴蝶擠埋一齊取暖, 重到樹枝向下墜。

借張大師級網照會清楚D (網上照片)

漫天飛舞嘅帝王蝶

好似倒瀉喺樹上咁

嘩! 到左蝴蝶節高峰期場面咪好震撼囉! 梗係啦! 數以百萬計嘅蝴蝶,
由南加州飛越四千幾公里黎到墨西哥中西部,
用四代嘅生命黎完成一個遷徙循環, 絕對係大自然嘅奇蹟啦!
更奇嘅佢地嘅生命周期會因應出生季節而改變,
由一、兩個月至七、八個月不等。(又會差咁多嘅

)

本地人都一樣喜愛觀蝶

喺墨西哥境內共有八個帝王蝶遷徙落腳點, 由11-3月開放俾遊客欣賞嘅只有兩個, 除左厘度, 仲有北些少嘅Angangueo的Sierra Chincua。(咁點分雌雄?)
雌蝶的翅脈更為深色(維基資料及照片)

雄蝶的後翅中央有一斑點可以釋放信息素; 雄蝶較雌蝶為大。(維基資料及照片)

呵呵! 我影厘隻係雄性嘅!

餵!你唔係帝王蝶喎! 知唔知你誤闖地盤呀?

咦! 又見馬隊! 係呀! 佢地睇下有無客落山吖嘛!

唔知係乜? 迷你金字塔?

行左幾個鐘頭山, 又喺山上玩左幾個鐘, 返酒店LU!咦!
唔通John Lennon 買左厘條街? 亦或此鎮人民愛佢愛到搵條街以佢命名?

沿途靜嚶嚶

返到酒店條街都係一樣!

D8 完

18/11/2018
D9 – Zitacuaro錫塔夸羅 > Mexico City墨西哥城
(Flight (40 2520 14:05-15:50)) >
Merida梅里達(Monumento a la patria祖國紀念碑)
HOTEL: Gran Real Yucatan (3*)

未來六日我地會玩尤卡坦半島, 行程地圖如下: