大年初七，正值人日，亦係內地新春免收公路費
嘅最後一日（其實之前都無諗到），去程就慳左
成兩百幾蚊公路費啦！
話明去尋花問樓，當然唔少得花開富貴啦！
此行嘅位置較散，又要多謝小鄧包架友情車
兼踱行程啦！本以為新春節日，旅費一定漲價，
點知好食好住，三天行都係每人¥1050啫！抵玩！
當然要交代下行程啦！
D1 福田→梅州→興寧→花螺墩→濁水村
D2 梅州市→玉水古村→櫻花谷→仁厚溫公祠
...→白宮新聯村
D3 梅州市→僑鄉村→南華又盧→洋樓→磐安樓
梅州係客家之鄉，亦係客家菜之鄉，目前梅州仍保存
超過兩萬座圍屋，想知客家人南遷歷史，圍屋由來，
網上資料多的是，我唔敢喺度拋書包啦！
但我放咁多相上黎，當然唔係因為影得靚啦！
而係想同大家分享下梅州有大量靚圍屋值得參觀，
影下相嘅，今次睇嘅其中包括十大古民居，
尤其是客家圍村民都非常熱情，唔厭我地打擾，
邀請我地登堂入室，在此向當日被我地打擾過嘅
邀請我地登堂入室，在此向當日被我地打擾過嘅
圍村村民講聲: 多謝！
D1 福田 > 梅州 > 興寧 > 花螺墩 > 濁水村
.
言歸正傳，我地一行七人08：00由福田出發，
12：30到達梅州嘅興寧縣花螺墩
(興寧縣寧新街道辦大圳村花螺墩)，
先搵間餐廳食午飯（其實餐廳唔多），
我地去左農家樂。
喺樓梯底呢兩埕係自釀嘅糯米酒
環境唔錯，前面有農田又有魚塘添！
黎到客家之鄉，食嘅當然係地道客家菜啦！
枱上個玻璃壺係薑絲熱黃酒，估唔到咁可口，
以後餐餐幾乎必叫啦！
餐廳門前種嘅荷蘭豆
飯後先參觀長興圍，一般圍龍屋得一兩條圍龍，
而長興圍就多達六條，係興寧市最大同最典型
嘅圍龍屋啦！黎到長興圍，當然唔少得影下圍
前嘅水塘啦！
多數具規模嘅圍屋，屋前都有個半圓水塘，
咁係因風水而建，水為陰，屋為陽，我唔識風水，
剩係睇景都夠靚啦！
跟住入村行下
睇地下就知春節幾熱鬧啦！
可以睇到弧形建築嘅圍龍設計
有人住嘅房屋都保存得好好，有D仲粉飾一新添！
有D保持舊有風味
呢幾戶可能少返黎，門前野草叢生囉！
因年代久遠，呢兩間已被棄置，連圍牆都完全倒塌。
有D只剩圍牆同度門
跟住我地行最後嘅一圍，最後頭一定係弧形嘅圍龍，
圍龍前一般係個高台，叫花頭(多謝應SIR教路)，
用黎晒穀或晾晒，但呢度係平地，我估會好用D，
晒穀之外，仲可以做活動空間囉！
呢條圍村好大，環境優美，除左屋前嘅半月塘，旁邊仲有魚塘。
仲設有游步道指引遊客觀光，但唔商業化喎！
路過魚塘見D鴨好靚
隻火雞仲展哂翅添！又幾靚仔喎！
一小時後到興寧嘅濁水村，厘度都有好多圍屋，
但村民以種李居多，所以合時李花正好盛放，
大家影個不亦樂乎。
今日陽光普照，游下水真係優哉悠哉。
我又學人影番幾張李花先
原本天氣報告顯示我地厘三日都係陰雨，
全因隊中無貴人，結果天氣絕佳，幸運呀！
四處都係大小圍屋，真係無法記住邊間打邊間。
有D係新建嘅，風味當然無咁好啦！
黎到塊屋前空地，有班小朋友喺度玩，
好羨慕佢地有咁嘅環境。
唔覺又17：00啦！先去酒店攞房。
今晚晚餐到梅州好出名嘅萬秋樓，厘座圍龍屋由
廈萬秋先生喺1930年所建，2003年賣俾台商，
改建成而家嘅圍龍食府，但名稱仍叫萬秋樓。
我黎過三次，發覺裝飾不時有小改動，
今次又多左D客家文化嘅小知識，
可惜擺嘅位置唔好，唔方便睇呢！
裏裏外外周圍影下
成班人等食前，個個埋頭玩手機，證明個個年青囉！
食嘅當然係客家菜啦！但奇怪當晚竟然無米飯招待
（唔通春節迫客人食餸飽黎揾多D），
不過埋單唔算好貴，盛惠480人仔，
食飽飽大家返酒店休息LU！
D1 完
D2 梅州市 > 玉水古村 > 櫻花谷 >
仁厚溫公祠 > 白宮新聯村
.
酒店早餐
08：00出發到玉水古村(梅江區城北鎮)
此村不少以種李為生，所以四處李花盛放，
加上青山腳下嘅圍屋，已收割嘅禾田，景觀非常怡人。
只要睇下屋前嘅春聯，就知住戶係務農為生，且以此為傲添！
一般嘅屋邊前後，都會種些少菜蔬自用。
部份圍屋依山而建，好多屋前無開半月塘。
厘間睇怕歷史悠久啦！
後有靠山，前面李花環繞，仲有大片農田在望，你話幾正呢！
個風景咁靚，如果可以上高處睇下就好啦！
哈哈！我倆真幸運，獲熱情村民邀請入屋飲茶，
茶就免啦！如果可以上天台就好啦！
屋主二話不說就帶我地上天台
果然靚好多，成幅畫一樣。
仲清楚睇到圍屋嘅格局
據屋主講，厘度主要以種李為生，無咁受天氣影響，
玉水村每年收獲幾百萬斤棗李，仲叫我地遲D去食李喎！
打搞完興華樓，又周圍行下囉！厘度嘅圍屋幾乎間間都起左個名。
除左影屋，咁靚嘅李花，當然唔放過啦！
沿村路而行
有熱情村民介紹我地去睇古榕，厘度共有兩棵古榕，
我地去左山上果棵，地上置有神位朝拜古榕。
從山上下望玉水村，沿路離開仍經唔少圍屋。
厘間有半月塘
兩位村民正在收蔬菜，個水塘用黎灌溉農田。
沿途都有李花
亦種好多柚子，佢地叫做金柚，係著名土產。
厘度下面有一間馬蹄形同方形嘅圍屋，正！
兩種都係典型客家圍屋，可惜搵唔到個靚位！
之後，又到城北鎮札上村黃沙坑水庫旁嘅櫻花谷，只見入口好多內地人，
所謂櫻花谷，其實係兒童樂園加個櫻花園，因為提供部份免費遊戲設施，
所以要收30大洋門票，我地係大朋友，唔啱玩，
於是大家影下門前嘅櫻花同鴨仔就走啦！
盛放嘅櫻花
今日早D食午餐，見公路旁有餐廳，入去LU！味道幾好，價錢公道。
有幾樣值得介紹，厘煲係熱嘅薑絲糯米酒，香醇味美。
厘碟係陳醋花生，我唔知係咪固定嘅小食（無理由小鄧會點厘味做餸卦）
食剩厘兩條類似春卷嘅係麵包卷甜芋泥，幾香口。
仲有厘碟無骨鴨掌，超勁嘅WASABI，保證上腦。
飯後，途中又落車睇下D圍村。
厘間木子金柚好大間，有速遞服務，剩係話＜有仔＞已經大把鄉里啱聽啦！
醒目！相信梅州嘅柚子佢賣唔少啦！
又見一間靚圍龍，於是入去打個招呼，可惜踫釘，屋主比較冷淡，
唯有上高位影下全景啦！
半小時後，抵丙村仁厚温公祠 。
入口完全無人，厘個大夫第係皇帝賜匾，裏面仲有三塊皇帝賜匾，
入去參觀下囉！
條村有500年歷史，有四進三堂八橫三圍，共390間房，四周打理得好乾淨。
最後圍有傳統高台形式嘅花頭，上面種左兩棵450年嘅古蘇鐵。
花頭保持原來石砌模樣
整條村有三條圍龍
500年古井
諗住出番去影兩個進士文櫆匾，點知突然殺出個人，
追住我地話要俾20蚊門票，我地都睇完咁濟（以為無需門票），
梗係唔俾啦！只好出番去囉！
原來有個牌寫住門票收費嘅！以我地睇咁多圍屋，
佢收費太貴啦！唔值得去了！
坐車離開丙村往白宮新聯村
半小時就到左中西合璧嘅聯芳樓（1931年）
整座建築屬西洋風格，整體分三部分，因為係民宅，雖然遇上屋主，
但無被邀入屋，亦唔方便開聲啦！
據入過去嘅團友講，裏面陳設全用中式，無外觀咁特別。
喺聯芳樓對面，有農田，亦有圍屋同半月塘。
厘個行程，主要係睇客家圍屋，好應該睇埋客家博物館，
總結下對客家圍屋嘅印象。
博物館入口
地下入口大堂，天花飾有客家圍龍。
客家地理風貌
客家民族風貌
圍屋常見雕刻細緻嘅樑架
圍龍屋模型（大劉屋）
客家圍屋嘅五種類型
常用嘅雕飾
博物館嘅園林佔地好廣
博物館背後嘅園林有一排玉蘭花盛放
近入口處嘅大學校長館，展示一眾知名嘅梅州藉校長，
主要係展館都係客家民居設計，另外仲有展示革亥革命
梅州藉將軍嘅將軍館，可惜唔夠時間啦！
今晚晚飯步行去酒店附近，味道一般，唔算地道，
仲有隻橡皮雞考大家牙力添！是晚繼續住宿同一家酒店。
.
D2 完
D3 梅州市>橋鄉村>南華又盧>洋樓>磐安圍
今早喺酒店食完早餐，出發到南口鎮的僑鄉村，
厘個500年村落，而家仲保存31座具規模嘅典型客家圍屋，
我地先參觀十廳九井嘅南華又廬（1904），未到入口，
先經過一幅盛開嘅炮仗花牆。
先黎兩張又廬嘅全景，外表睇似一間屋，其實屋主因有八子，
所以分八廳八井，自成一角，連埋上、中二堂，中央天井，
就有十廳九井，形成屋中有屋嘅格局。
又廬非常抵睇，門票¥5，仲有精美嘅單張簡介。
一入門口，已被精美樑架吸引。
穿過前廳
進入中央天井，左邊嘅亭與欄板間係水池，相信可以養魚種荷花。
廳與天井間有度照壁
登樓可睇到地板係新嘅（舊有嘅都唔安全啦）
簷邊嘅瓦當裝飾仲保存完好
可以想像全盛時華麗嘅雕樑畫棟
厘間角樓已經要用木撐住，以防倒塌，
窗口除左通風，應該仲有防禦作用。
兩座屋間有架空通廊
每個天井嘅設計都係一絲不苟
厘種窗花喺客家圍屋好常見
唔同嘅區間，樑上牆上嘅雕飾都唔同，設計盡顯心思。
各個房間已經失修破落
厘度係舊有嘅廚房
屋內都咁講究，外牆當然唔馬虎啦！
經過另一個廳出去
又廬屋前雖然無半月塘，但有個好大嘅空地可以作活動場所。
跟住再行去僑鄉村嘅另一客家圍屋(1927)，厘座用左西洋建築風格，
所以俗稱＜洋樓＞，可惜閉門不能入，外觀都唔錯架。
可見陽台欄杆、門框同屋簷嘅支撐都好講究。
由門縫睇入去天井，都係西式建築。
洋樓前有大片田陌
經過幾座圍屋
繩貽樓
又入去厘座行下
花頭曾舖水泥，日久失修又露番原有嘅石砌建材，都係石砌嘅靚D，
不過可能較難打理，搞到生哂草。
出番去行下，厘個牌寫住毅成公家塾，但我地無去到。
對面座德馨堂（1905），百多年啦！
厘座明顯粉飾過，前面個塘好肆正，入去睇下囉！
花頭蓋上水泥
明顯全村都重新舖上水泥，無左古樸味道，但的確打理得乾淨企理。
厘個圍都唔細喎！
入去睇下囉！
哂豆腐乾
好活嘅一條村
滎陽堂嘅正門
村內有幾口井
諗住上山高位影下圍龍啦！
點知俾D樹遮哂，最多影到咁啫，於是返落山啦！
不得了，落到黎見到長者團友，古稀之年，竟然上得仲高過我地
（白色果點就係啦），小心呀！佩服佩服！
見到圍屋斜對面有間三層樓，去問下屋主，
俾唔俾我地上天台影過黎先得！哈哈！
都話梅州圍村人好客熱情架啦！
雖然唔係好正面，但俾村民嘅熱情所感動！
清楚睇到最後排嘅圍龍高於前排嘅屋（咪睇堆垃圾啦）
玩夠睇夠傾夠，走LU！
僑鄉村嘅導覽圖
係時候食午飯啦！又係去到邊就食到邊，厘間農家菜味道一般。
今次嘅米酒一大煲，但帶酸，無之前果D咁香甜味美。
飯後到著名嘅磐安圍參觀，剩睇屋前嘅半月塘都夠靚。
(興寧葉塘鎮河西村)
入大廳，第一眼睇嘅一定係精工樑架。
每房人嘅廚房都喺厘條巷內
門上嘅橫柵係實木做，好重！
入到最尾嘅花頭，高台以青磚砌成（估計係舊有嘅）。
花頭嘅手工精細，上下線條流暢對應。
俾張全景大家睇下係咪好正吖（唔係我張相，係個建築呀）！
出番黎屋後，圍牆內以前養馬，而家養家禽。
門兩邊嘅方形石柱間有空隙，可以望入去。
見唔見牆上有孔呀！係槍孔箭孔，作防衛用。
高而尖頂果座係角樓，都係防衛之用，喺外面睇，
窗口應該係後期開嘅，以前估計只有箭孔卦！
二樓有張床，唔知係雜物定居住用啦！
本來準備離開，點知村大姐（其實係長輩婆婆）邀請我地入貴賓房開眼界
(佢話VIP先入得)，驟眼睇無咩特別。
原來乾坤喺兩邊，左右有四幅木雕，非常精細，上面嘅動物栩栩如生。
厘間屋咁大，剩係天井都有21個，點行得哂喎！
真係走啦！話走，當然係指上車返香港啦！以前聽人講＜談春運色變＞，
今次係我首次嘗到春運嘅滋味，去程見對頭行車線塞足四、五十公里有多，
我地仲笑D人為慳路費，迫埋最後限期返深圳，嗚嗚！原來地球係圓嘅！
終到我地嘗苦果，初九，要俾路費架！由兩點半出發，到十點半先到福田，
好險！跑入門口即關閘，趕及尾班車，此生第一次，刺激！但唔想再試啦！
溫馨提示：
....
（一）我們在遊記內參觀的圍屋，除仁厚溫公祠
和南華又廬需購門票外，全屬普通民居（免費），
因此，村民有權謝絕參觀的！
.
（二）磐安圍在門前出告示＜謝絕參觀＞的
（曾有遊客偷竊），我們是以禮貌加誠意，
外加團中有村民故友，才獲邀參觀。
.
（三）一般圍村民都很純樸熱情，只要禮貌溝通，
多能獲邀參觀，但勿過度打擾，更別做破壞行為，
這才能讓後來者繼續享拍攝旅遊樂。
.
.
全程完滿結束
.
多謝上過黎嘅朋友們支持！
沒有留言:
張貼留言