繼續南美五國32天記遊D21-D32
11/3 D21
BA ferry 0900 > Uruguay Colonia > BA
BA - Hotel Dazzler Polo
A團嘅見聞終於講完啦！而家開始B團嘅十天自由行，雖說自由行，
不過小鄧全程都安排得好妥當，唔使撲交通，幾舒服嘅！
今日我地暫別阿根廷嘅布市，早上乘船往烏拉圭世遺古城Colonia遊覽,黃昏返回布市, 清早從酒店出發坐的士到碼頭。
我地網上預訂一天遊嘅套餐
黎到碼頭只要拎張訂單排隊換取車船票等，
票上有齊護照號、姓名同出生日期。
阿根廷嘅布市與烏拉圭嘅Colonia，兩國之間係實行一地兩檢，非常方便。
搞掂就上船LU！
艘船有幾層，無劃位，隨便坐，
有D窗邊走廊設置好多沙化座椅添！
免稅品商店
快餐店當然不缺啦！
兌換店都有埋
不過厘D Special Class似乎唔受歡迎
船泊嘅港口（D玻璃窗好濛，無計啦
）
我地艘船同後面果艘一模一樣
附近亦有貨運碼頭
到啦！到啦！
咁就到左烏拉圭LU！
因為上船前喺布市已辦左烏拉圭嘅入境手續，所以到步就可以直接遊玩啦！
當然亦可以黎到先訂酒店 / 一天遊嘅！
（咁咪嘥時間囉
）唓！有突發黎遊覽架嘛！
因為我地預訂好哂，可以憑票上車LU！咦！咁多架，邊架係呀？
對下張行程簡介，梗係紅色果架啦！
簡介內有齊十個停靠站同時間，每半小時一班（好似唔係咁準時喎
）。
地圖上有旅遊點同停靠站位置
上車LU！
汽車沿海邊行駛
到 Plaza de toros Real（鬥牛場）時，
司機俾十分鐘乘客落車影相，厘座1910年嘅鬥牛場已被棄置，
而家只係個景點，不過唔入得呢！
附近有騎馬場，亦有遊客選擇騎單車暢遊Colonia 。
我地一直搭到第九個站，然後向南徒步漫遊返落古城嘅重要部份，
當然唔想行都得，一天遊嘅車票係無限次使用嘅！
厘度頗多渡假酒店
沿途所見
消防局內嘅消防車顏色好搶眼
好多街道都種左高大而整齊嘅樹木，即使陽光猛烈，遊客都可享林蔭道上 .
繼續前行，經過旅遊中心。
黎到Portón de Campo古城入口，
雖所餘無幾，但主要嘅城門、城牆、護城河都清晰可見，地上有世遺標誌。
城牆所用石塊好特別（唔知算唔算頁岩呢
）
好多人走上城牆邊，登高望遠嘛！
嘩！旁邊嘅燈塔擠滿人，都係等少D人先上囉！
見到厘種植物（松蘿/空氣草），就知厘度嘅空氣非常好。
都係午膳時候，茶座餐廳開始旺起黎。
我地沿街道邊行邊影去指定餐廳（包餐包交通一天遊）
厘度嘅瓷磚街道牌
走喺古城嘅街道上，非常舒服。
街道牆壁上，不時出現精美嘅瓷磚地圖/街道牌
黎到餐廳啦！咦！個名有D似咋！係影樓黎架！
哦！原來餐廳就喺旁邊。
開放式廚房，可以睇到用柴火燒烤。
又係雞、牛、豬任選，分量好足夠，包沙律、主菜、飲品同甜品。
去洗手間時經過餐廳嘅後面建築，原來裏面比想像中大好多，屬古舊建築，感覺唔錯。
食飽繼續遊古城
Iglesia Matriz係厘度嘅主教堂，雙塔好醒目，離遠就望到。
整座教堂屬簡樸建築，唔算好大，其實現場所見，相信厘度嘅人口唔多，足夠應用囉！
之後，我地參觀Plaza de Armas武器廣場遺跡，而家只剩牆腳或些少基座。
喺一幅牆上有瓷磚地圖
遺跡上舖設棧道俾遊客參觀
好可愛嘅一對小寶貝
見燈塔無乜人，我地準備登塔LU！
燈塔旁嘅紀念碑
為方便遊客，厘度嘅大部份景點都收多種貨幣，有D博物館仲收埋美元添！
入口好細
地面層陳列左昔日用過嘅航道指示燈
梯間狹窄，人多時採人流管制，老人家上落要小心。
燈塔上眺望
可見古城街道及遠處嘅碼頭
遠望燈塔，飯後人流開始多啦！
Museo Regional地區博物館
繼續閒逛，周圍頗多舊石牆嘅建築。
厘度裏面係Casa del Virrey酒店
又係一座古舊建築，瓷磚地圖上著明1762年。
裏面用作Museo del Azulejo，我地諗住去海岸觀景台搏影日落，唔入去LU！
途經所見，主要都係供遊客遊玩嘅設施，但保留得幾完善。
沿海岸線而行
日落無機囉！可見遠處落緊大雨。
執番張少少晚霞啦！
係時候慢步踱返碼頭，途經由風車塔改建嘅El Torreon Restaurant 。
遊艇碼頭
厘條內街牆上多塗鴉，有D係商舖廣告。
 厘間連破舊汽車都出埋  將古城景點共融一體  雖然我地坐船時都幾多乘客，但古城夠大， 遊逛時，街道真係無乜人，只係重要景點多少少人咋！    厘個就係Day tour bus嘅停靠站牌  佢地自己揸車黎，好開心嘅聚會，仲鬼咁熱情同我地打招呼添！  （喂！乜古城無野賣嘅咩？ ）唔係，不過真係唔算多，可能旺季會多D地攤添！求祈交下功課咁啦！同秘魯、阿根廷嘅紀念品差不多。（唔同喎！厘度貴D架！ ）  厘套食具係擺地攤嘅！  夠鐘去碼頭搭船返布市啦！上船前當然要辦過關手續啦！ 又係一地兩檢，厘度仲盞鬼，一排兩個玻璃窗口，一個烏拉圭，一個阿根廷， 兩國關員一邊做野，一邊傾偈  ，世界大同，係咁就好囉！ D21 完 |
|
|
|
12/3 D22
BA > 15:45 LA4024 > 17:35 Argentina Iguazu
Iguazu - Cabanas El Pindo (自煮)
今日全無遊覽，主要係飛去 Iguazu （Argentina），
早上食完早餐，又未夠鐘出發，於是四圍踱囉！
厘度嘅休憩空間嘅坐椅好cute
對面馬路有座頗具規模嘅清真寺，諗住入去參觀下啦！點知無開放。
有兩座宣禮塔
沿街道上，可見好多塗鴉。
我地仲參與左當地嘅馬拉松賽跑（負責打氣都算啦
）
因為團友們都晏食早餐，大家都唔餓，
求祈搵個地方坐下食D野，然後坐的士去機場。
布市國際機場
厘間Hard Rock Cafe仲有埋服裝店
唔使兩個鐘就到伊瓜蘇（Cataratas International Airport），
天氣認真馬馬，好在聽日先有行程啫！
機場唔大，等埋行理就走得。
我地住嘅Guesthouse，屋主派左兩架車黎接我地，其中一架係的士，原來佢閒時仲揸埋的士添！
沿途所見
經過公路繳費站，較簡陋，只係間木屋，有個人出黎收錢。
經過嘅地方，充滿田園氣息。
我地就係坐厘兩架車，喺附近超市買D食材就直接到Guesthouse啦！
小鄧先到reception辦手續
整個小木屋區都被樹木包圍，環境唔錯，空氣清新。
我地六個人，分住兩間，每間下層客飯廳，上層兩個睡房，足夠六人居住。
大家都肚餓，嗱嗱淋煮左通粉填肚。
廿幾日未飲過老火湯，幾大都煲番煲蘋果瘦肉湯潤下先！正！
D22 完
13/3 D23
Iguasu Fall Agentina
全天阿根廷伊瓜蘇大瀑布
Iguazu - Cabanas El Pindo (自煮)
尋日算係六人組整休一天，今日繼續行程，因為尋晚食剩好多飯，
於是今早食白粥，炒兩個小菜餸粥（弊在無影相呢）,
全日將會喺景區內遊玩，所以帶備法飽三文治充飢（厘樣有影喎 ）。
當人人到戶外享受青草綠樹嘅清新空氣
小鄧就喺度專心做功課（辛苦哂！）
尋日已經同屋主約好兩部車，送我地到伊瓜蘇景區，唔使一小時已經到達景區入口。
當然要買門票啦！門票包埋小火車 , 因為厘張相係走嘅時候補影，所以咪無飛賣囉！
伊瓜蘇瀑布出名多蚊，唔記得帶蚊怕水，黎到門口買都得。（我地好好彩，無乜蚊叮
）
世界三大瀑布之一嘅伊瓜蘇大瀑布，跨越阿根廷同巴西兩國，
其中80％左右屬阿根廷境內，其餘位於巴西境內。
進入景區LU！厘間屋仔有地圖提供俾遊客，景區咁大，梗要攞番張啦！
旁邊都有展示景區地圖
入口距離瀑布好遠，要坐小火車嘅！
途經Estación Cataratas，係往上下路觀瀑布嘅起點，可以喺度隨意上落車。
我地先直往總站，欣賞著名嘅＜魔鬼咽喉＞。
咦！好靚嘅雀鳥
後來落車再見時，睇哂全相，原來佢係南美先見到嘅絨冠藍鴉，被列入
《世界自然保護聯盟》，打雀人仕封佢為世界二十大最美鳥類羽冠之一。
嘩！唔係咁好彩呀！又見到隻88蝴蝶，佢好細隻，
如果唔係團友睇到，我一定錯過啫！
由小火車站到＜魔鬼咽喉＞仲要行十幾分鐘棧道，
棧道架設喺河灘上，風景都唔錯。
沿途間中仲有長鼻浣熊作伴添！厘D浣熊完全唔怕人，
大概分黑同棕色，景區內四處都有佢地蹤影。
不過亦四處貼有告示，警告唔好太接近D浣熊，否則。。。咪會咁囉！
棧道地面舖鐵網，可直視到底。
繼續前行
前面所見唔係噴泉，係瀑布水花，未到已經可以想像有幾澎湃啦！
無乜睇頭咋喎！
係囉！厘個角度真係好一般啦！
繼續前去觀景台就唔同睇法
我地由旗杆方向進入
呢！前面橫向嘅觀景台就對正＜魔鬼咽喉＞。
水勢好大，直墮斷谷，既似漏斗，又似咽喉，其實我地都欣賞左一段時間，
不過下午再黎時，光線較好，有彩虹添！下晝再影過！
走LU！回望觀景台。
帶黎嘅乾糧晨早就消化左LU！我地到快餐廳休息下，食D野，再繼續。
休息係為左繼續行程（你話啫！實有得行架嗱？
）咪係囉！下路部份全部封閉
，出發前睇過，都知有封閉情況，但見仲大水過今日嘅都無問題，今日有D唔好彩囉！
無得選擇，只有上路可行。
同樣沿棧道而行，遠眺多條瀑布，頗為壯觀 , 見唔見右邊中間呀？
我地就係去果個觀景台啦！梗係啦！話哂厘個瀑布由270條瀑布組成！
有網友比較過世界三大瀑布，以伊瓜蘇瀑布最可觀，最有立體感！
越黎越接近觀景台
觀景台架喺瀑布頂
所謂上路，即係俯瞰角度；下路可仰望瀑布兼行瀑布洗浴禮，可惜今日只能俯瞰下咋！
光線啱啱好，有彩虹。
從厘個角度可以睇到下路嘅棧道，遠處仲有隻觀光筏添！
棧道對面嘅觀景台應該係俗稱嘅淋浴台，今日濕都唔濕下，竟然封閉左！
繼續前行到盡頭
水勢磅礡
厘塊長滿植物嘅石頭，似足醒獅。
走LU！回望觀景台。
作伴嘅當然仲有佢啦！有黑有棕色
橋底仲有一大群，一家大小。
出返去有座燈塔
本來預時間行下路，約左車又未夠鐘，
而家改為再搭火車去多次＜魔鬼咽喉＞囉！
見唔見支旗頂上高空有架直升機？
係觀光直升機，可載遊客俯覽整個伊瓜蘇瀑布（包括阿根廷及巴西境），
機上遊客當然欣賞緊＜魔鬼咽喉＞囉！
又返黎觀景台，比早上更多人
可能下晝先有彩虹啦！睇黎，阿根廷厘邊，下午欣賞比早上好喎！
等小火車之際（半小時一班），竟見道軌旁有大量蝴蝶。
其實除左隻88之外，我地仲見到好多可愛嘅蝴蝶，
可惜我係低手，俾著打蝶高手，實影到手軟啫！
繼續賞蝶
真係走LU！
厘間店門前有隻佢型mate杯，裏面嘅當然百花齊放，咩款都有啦！
雖然無緣一睹下路風景，不過對陽光普照嘅天氣仲係好感恩嘅！
結束一日愉快行程，返去煮飯LU！
D23 完
14/3 D24
Agentina > Hito Tres Fronteras （三國交界處）>
Jardin de los Picaflores （蜂鳥園）> Brazil Iguazu >
Parque das Aves (鳥園)
Brazil Iguazu - Pousada Guata Pora
早上食完自煮嘅早餐，收拾行理由屋主車我地去兩個景點，
再送埋我地跨境，到巴西嘅住宿酒店。
無焗爐、多士爐，唯有用煲烤麵飽啦！
出發LU！
我地由住宿處到Hito Tres Fronteras（三國交界處觀景台）只需十零廿分鐘車程。
厘度係三條河流嘅交匯點：Iguazu River ，Parana River，Monday River .
我地身處嘅觀景台屬阿根廷境內。
對面有座圓形建築嘅一方係巴拉圭嘅 Presidente Franco（弗朗哥總統城）
另一方嘅陸地屬巴西
係度見厘位帶團導遊手持Mate杯（秘魯最常見），再加個熱水壺，幾悠然自得呀！
欣賞完＜三界＞，十零分鐘車程，又到左蜂鳥園。
據知，香港無蜂鳥，類似嘅都只係太陽鳥啫！今次係我首次接觸蜂鳥咋！
園主親自出迎打點，和藹可親。
入到去，原來場地好細，係一個私人小花園，光線仲偏暗。
滿園掛滿盛滿糖水嘅誘蜂器。
園主會定時加糖水入誘蜂鳥器，保持糧倉＜常滿＞。
團友們當然為打雀而黎
不過，亦有遊客不為影雀而黎，只係靜靜坐喺度欣賞，令人感覺平靜舒暢。
嗱！D蜂鳥咁鬼細隻，又飛得奇快，肯定難到我啦！
但唔掂都要放幾張上黎交功課架！
名乎其實嘅誘蜂器，你睇引左幾多蜜蜂飛黎！
厘度嘅蜂鳥真係又多又活潑，其實當中有隻長燕尾嘅蜂鳥，
我影極都無張清楚 , 咪就係大門口果隻囉！（唔使講，考試肥佬啦
)團友們滿載而歸，好滿意喎！
原來自家院子可以咁樣引黎咁多蜂鳥，仲做埋生意添！好諗頭！
欣賞盡興，影得痛快，汽車已經喺門口等我地，
蜂鳥園距離巴西邊境只需幾分鐘車程。
到達巴西邊境
落車蓋印，走得。
邊境附近兌定D巴西錢，1BRL約=2.5HKD
屋主好好人，先車我地去超市，再送我地到酒店，非常體貼，超讚！
我地入住嘅類似渡假村
估唔到厘度會見到金銀花
餐廳兼做埋大堂，入住需先填寫個人資料。
厘套茶具裝飾好別緻
牆上掛左出售嘅紀念品
我地租住兩個單位，每間住三人，雖然只有一房，但廳連房可住5人，空間寬敞。
初時以為可以煮食，原來只係個小水吧，唯有將買黎嘅食材送哂俾員工，我地光顧餐廳嘅自助晚餐啦！
洗手間仲正，大玻璃窗外係個種滿植物嘅小院，好有大自然感覺，客人肯定舒暢啦！
因Parque das Aves (鳥園)只距離我地酒店十分鐘腳程，入房整頓好哂，
大家安步當車，沿馬路行去鳥園，始終係遊客區，路旁有唔少商品店擺攤。
色彩鮮艷嘅大毛巾
路旁嘅芒果樹果實纍纍
直升機觀伊瓜蘇瀑布嘅廣告牌，有興趣不妨試試。
厘檔擺賣吊椅、吊床。
話咁快就黎到景區入口
當然要買門票啦！
入園映入眼簾嘅係眾多嘅火烈鳥（紅鶴）
仲有冠鶴同不知名嘅大型鳥類，佢地都係被散養，同遊客都幾親近。
厘D冠鶴咪睇佢咁靚又可愛，有攻擊性架！
厘個範圍嘅鳥，全部都養喺籠內。
Hi ! 你個髮型好cool喎！啱啱電架？
造物主真係幾偏心，大咀犀鳥，三歲至八十都喜歡佢嘅！
鳥籠內設自助餐枱，24小時不停供應。
跟住經過爬蟲類區
厘條鬣蜥同大莽蛇個竇有燈照住，豪宅呀！
之後，我地行入個＜人鳥同籠＞區
一抬頭，數唔盡嘅金剛鸚鵡，色彩繽紛。
乜唔係話鳥類係色盲嘅咩？佢地絕多同色嘅組成一雙一對個喎！
喂！你準備表演變臉呀？個面譜畫得幾正喎！
仲有個蝴蝶區，厘度D蝴蝶唔多怕人。
仲飲食無休添！
間中都見有蜂鳥飛黎飛去
之後，我地再到另一鳥區。
厘D較兇嘅係籠中鳥
厘隻彩色punk頭鳥（我作野咋）好有性格，完全唔啋人
不過飼養員一行埋去，佢嗱嗱淋走埋籠邊，即是無野食，都識＜嗲＞佢，
飼養員一走，佢即走喎！哼！
仲有厘D籠中鳥
無意中見對情侶係咁喺地上收集彩羽，係喎！點解我咁死蠢，
佢地手上嘅羽毛真係幾靚架！可惜我發覺得太遲了！
部份犀鳥可以隨便走動，親親人類。
話時話，個大籠內的確物種豐富，不過溫度偏高，我個拍檔就捱唔住高溫，
嘈住要撤退，所以好多都無影到啦！
出去經過紀念品商店，當然唔少得各式鳥類手工藝品啦！
仲有非洲造型靚女
鳥園出口
返去酒店餐廳食晚餐LU！雖然種類唔算多，
勝在質素唔錯，食物新鮮熱辣，仲包埋咖啡同茶。
D24 完
15/3 D25
Iguazu Falls Brazil
Brazil Iguazu - Pousada Guata Pora
多數人用兩日走哂阿根廷＆巴西兩邊嘅伊瓜蘇瀑布，而我地就用四日，
去埋阿根廷嘅蜂鳥園同巴西嘅鳥園，可以慢慢欣賞兩邊瀑布，啱哂我地厘班慢活群體。
早上先到餐廳嘆早餐
新鮮熱辣嘅多士
最欣賞南美嘅果汁，諗起都流口水。
再漫步十零分鐘到伊瓜蘇瀑布景區入口，今日打算喺度一整日架啦！
黎到都未開始售票
一睇有咁多個售票窗同排隊上車嘅鐵馬，就知人群會擠擁。
除左人手售票，周圍仲有自助售票機
小鄧醒呀！唔等售票窗開始，嗱嗱淋喺自助售票機買定飛先。
門票包區間巴士，分時段同組別上車，我地當然係Group1，搭正九點就入得。
可以排隊LU！
人潮湧現，好彩小鄧快一步自助購票，而家連自助都要排隊啦！
景區內嘅區間巴士，全部印有南美可愛嘅雀鳥造型，色彩奪目。
終於可以上車LU！我地選擇上層。
其實沿途有好幾個停靠站，厘度係其中之一。
途經景區內唯一嘅五星級酒店Belmond Hotel das Cataratas，
咦！遇上 full moon，如果可以自行入去瀑布區，咪慳番full moon tour囉！
（如果得的話，房價貴D都有得諗喎！）
景區導覽圖
我地喺尾二個站落車沿山路行入去 , 沿途欣賞阿根廷同巴西兩邊景色
我認得座塔呀！果度係阿根廷上路入口。
未入到去，已經咁壯觀，如果睇完裏面先出黎睇，感覺就無咁靚囉！
而且喺度行入去，睇景之餘，一陣喺總站搭車，方便好多。
玩沖瀑布就係坐厘D船啦！
從相片睇，好似唔係好大水，何以有彩虹呢？其實水花濺到好高好遠，太陽一照，呵呵。。。
沿山路而行，途中有兩個觀景台（如果無記錯的話）。
觀景台真係一個勝一個
由厘度望過去，瀑布中間嘅棧道，好似游龍戲水。
要行到主瀑布群，都有一段路架！
不過觀景影相，忙個不了，唔覺唔覺，過埋厘段，已到棧道口。
話時話，我地喺阿根廷欣賞左伊瓜蘇，雖然下路封左，我地睇唔到，但論氣勢磅礡，角度多樣化，都係巴西厘邊莫屬囉！
難怪連美國第一夫人埃莉諾·羅斯福黎到伊瓜蘇，都慨嘆起黎：可憐嘅尼亞加拉瀑布啊！
（咪住！尼亞加拉瀑布已經係世界三大之一囉喎
）咁咪係囉！一來伊瓜蘇係今日唯一景點，二來實在太靚啦！所以咪鬧我用伊瓜蘇瀑布洗版啦！
棧道建喺頂層瀑布之下，可仰視及平視四周。
進入棧道，開始對主瀑布全視線接觸，果種洶湧澎湃，
真係非相機、錄像能全接收，更非筆墨可形容。（你C啫！
）
從厘兩張相，可以睇到棧道同時係觀景台，整條棧道能多角度感受瀑布。
霓同虹一齊睇哂
最接近嘅地方，好難先唔整濕鏡頭。
之後，原路離開棧道，改到多層觀景台。
呢！我地去瀑布左邊，有支旗嘅地方。
從主瀑布邊進入
觀景台共分四層，可從不同高低角度欣賞，左邊入去可乘電梯上頂層 ,
不但有聲、形、勢，仲俾你變成落湯雞，都算切身感受啦卦！
從地面層觀瀑
第二層觀景台及外望景觀
第三層及頂上兩層觀景台地面鐵板呈疏間，可直望地下層，認真畏高嘅朋友，可能有D驚。
頂層觀景台及外望景觀
真係畏高嘅朋友，可以沿邊行，睇唔到下面，感覺無咁驚。
厘個時候，棧道盡頭擠得水洩不通。
頂層觀景台外牆加建安全網，以策安全。
喺度仲可以望到觀光船碼頭
峽谷上嘅瀑布群
第三層可以遠眺阿根廷果邊嘅魔鬼咽喉，不過接近平視角度，只睇到濺起嘅水霧。
頂層就唔同，睇到咽喉部份，不過幾遠下。
厘度D蝴蝶真係幾喜歡親近人類
行到又渴又餓，頂層有快餐店
不過進食時要小心放好食物，小鄧就係放底杯汽水解背囊，
即時就俾隻長鼻浣熊打翻仲飲埋添！D浣熊真係好鍾意人類嘅食物喎！
（常客黎架啦！兼且老實不客氣囉！
）
落番地面層，當然唔少得紀念品商店啦！D mate杯好雅緻喎！
）
當我地坐番車出售票大堂，梗係無人啦！都就關閉囉！
喺大堂有間旅遊活動公司，想玩咩！喺度報名得啦！
我估厘度係停機坪，坐直升機觀瀑唔知係咪喺度坐呢？
唔止南美嘅鳥同蝶色彩斑斕，D吊床吊椅一樣多彩多姿。
我地經過教堂行返酒店，晚餐都係返酒店餐廳食啦！
D25 完
16/3 D26
Iguazu > 14:06 JJ3838 > Rio 16:55
Rio – Hotel Windsor Leme
今日係非常hea嘅一日，喺酒店嘆完早餐，執下野，之後就請酒店幫我地叫車去機場。
今日主要由伊瓜蘇搭機去里約，因為酒店嘅無敵景觀，唔使出去，喺酒店影下相就算啦！
通常搭機坐窗口的話，我都喜歡睇下野嘅！差不多抵達，唔知可唔可以睇到條跨海大橋呢？
果然無失望，厘條President Costa e Silva Bridge（里約至尼泰羅伊大橋），全長14公里，喺1985年前，仲係世界最長的橋，而家係南半球最長嘅混凝土大橋。
本來希望可以喺空中影番張糖麵包山同耶穌山，可惜我眼拙，睇唔到，到跑道先見到。
唔講咁多，坐車到酒店攞房先！房間好大好舒適。
個景觀點好都好唔過上天台架啦！我地當然唔會錯過啦！
酒店天台唔止係好正嘅觀景台，仲有空中泳池添！
唔喜歡游海灘嘅，可以喺度玩水，一邊欣賞四周美景。
由酒店外望，剩係海灘前嘅行人路面，D圖案已經夠殺食啦！
左邊厘座山頂有個卡西亞公爵堡，可以觀景，不過要行半個鐘上山啫！
沙灘前嘅露天茶座
何況厘個仲係世界聞名嘅Copacabana beach。
不過似乎幾大浪
天台嘅另一邊對住貧民窟
亦都可以遠眺耶穌山
Copacabana beach長達四公里
雖然我地睇唔到日落，但睇住百鳥歸巢都唔錯吖！
夜色開始降臨，沙灘靜好多，但馬路上嘅汽車仍絡繹不絕。
耶穌山上嘅標誌著左燈，實唔會認錯啦！
由我地個角度望去，耶穌彷彿關顧住貧民窟內每個人。
酒店天台都唔寂寞，咁靚嘅夜景，有位索女做前景，當然吸引啦！
後來發覺原來耶穌像會轉色架！
我地懶出外搵食，就地晚餐，不過已經玩到剩番我地一枱客，食完都係返房早抖啦！
D26 完
17/3 D27
Rio > 耶穌山(Christ the Redeemer) > 糖麵包山(Sugarloaf Mountain)
Rio – Hotel Windsor Leme
今日早餐非常豐富
仲有即製奄列
最喜歡就係南美嘅水果同果汁，真材實料。
喺大堂等候期間，隨手拎起本雜誌，原來佢地對針炙都有需求嘅！
由我地酒店步行去 Praca de Lido 嘅耶穌山專線車站，只雖十分鐘左右，同時係售票處。
當然有人手同自助兩種售票啦！
出發LU！
D麵包專線就泊喺外面。
坐到個窗口位，可以影下相，有玻璃窗隔住，當然唔會好，就住睇啦！
巴西人熱愛牆上塗鴉真係有D瘋狂，無論架車去到邊，多少都會有佢地嘅蹤影，包括球星，總之題材廣泛。
厘條天橋頂都塗埋鴉就正囉！
厘座教堂就影唔到，倒影有趣，照殺！
今日係當地星期五，而家大概係上午九點，經過嘅街道都顯得好靜，即便市集亦如是。
巴士站
厘座建築又窄又長，沿斜路而建。
山路較窄，馬路兩旁牆壁滿是塗鴉，莫講話影啦！睇都睇唔切。
到啦！
廣場上仲有座頗大嘅紀念品中心。
上山嘅班車好密，疏導遊客速度幾快。
一落車，個俯瞰里約嘅景已經好正。
你咪以為落車就到，仲要爬梯級架！不過一路行都有觀景台，影下行下，唔覺辛苦。
右邊頭像係Heitor da Silva Costa係耶穌像嘅工程師 ,
左邊嘅係 cardeal dom sebastiao leme，係佢建議建耶穌像作里約地標。
繼續上，又一無敵觀景台，俯覽全里約。
南美最長跨海大橋
我地就係由厘條樓梯上黎
市區街道水靜鵝飛，厘度就擠得水洩不通，咁多燈，全都係照射住耶穌像。
喺觀景台尖端對住嘅就係糖麵包山
厘隻大蛤蟆就係糖麵包山，點睇都唔似麵包啫！
（咁係你同佢地文化不同啫！睇下以下網上資料啦！死蠢！
）糖麵包山之所以名為糖麵包山，傳說早期先民依它的形狀, 猶如麵包，
發音近似葡文中的糖麵包（pao de acucar），再加上山的外形 , 又使葡萄牙人想起老家用來把糖製成圓錐形方糖一種土製模具，所以就叫它糖麵包山。
上到耶穌像厘度，有兩層觀景台，下層觀景台有人影耶穌像，
有人影里約景，亦有人影糖麵包山，總之各有各精彩啦！
再上一層樓，同耶穌更接近啦！厘座耶穌立像有30米高，連基座有成38米。
猛男，你喺度撈咩呀？（廢話，梗係同耶穌自拍合照啦！低炒先顯得神嘅偉大嘛！
）
靚女：我就喜歡耶穌平易近人D嘅！
我練sit up成個月，就係為左黎影靚相咋！
原來景區好體貼，準備左好多地蓆俾遊客（小心俾人踩呀），
要讚下嘅！雖然人山人海，但遊客都好有禮地輪流，亦會小心唔踩到人。
耶穌像嘅基座其實係內有乾坤
原來係中空嘅，裏面係個小教堂。
咦！唔知咩樹呢？
果實好大個
走LU！我地要落番去下面，好多綠色遮果度係茶座。
唔喜歡室外，茶座亦有室內嘅！
排隊坐專車落山
其實都係原路返回，同樣坐左邊，回頭睇嘅唔同左，中午嘅街道依然好靜。
睇到建築外嘅重重鐵欄，可想治安程度，作為遊客，不由得出街時心起防範，事事小心為上。
繼續塗鴉
火箭型教堂
返到酒店，梳洗過就出去，厘區食肆林立，平貴都有，豐儉由人，我地6人喺露天茶座餐廳用餐。
午餐後，返酒店休息下先，因為準備上糖麵包山影日夜景，三點半先出發都未遲。
又出發LU！我地分兩部的士到景區入口，當然要買票先啦！
我地六人嘅門票，分別有厘兩種印刷。
有票在手，去搭吊車LU！
吊車分兩段，先到第一個山峰，再轉乘另一吊車上第二個山峰 , 吊車每次可以乘廿、卅人。
從吊車回望車站
車站附近環境
到左第一個山峰，小廣場上陳列左兩架用過嘅舊款吊車。
厘度係坐觀光直升機嘅
山峰上仲有餐廳，建築富時代感。
門前有雪糕飲品販賣車
哈！有間拖鞋店，行到對鞋爛左都唔怕，即買即著。
（咁甩拖呢）咪喺度買番囉！
喺山峰上，四周都係觀景台，隨便望出去，都係矚目靚景。
其實遇上日曬雨淋，厘度都有D地方藏身嘅！
喺厘個山峰行左個圈，又去搭吊車，上更高嘅山峰LU！
我地向前面嘅山峰進發
喺吊車回望頭先遊覽過嘅山峰
到啦！步出觀景台。
景觀同剛才山峰差不多，當然厘度高D、開闊D。
厘個山頂仲多商店，且有貴價精品出售添！
厘幅牆畫，小朋友一定喜歡。
厘個係返落第一個山峰嘅吊車站
厘度亦有茶座
唔係呀！行山來往兩峰之間 ?
整個螺旋形都係觀景台
雖然雲層厚，無落日，又無火燒雲，好在仍有少少晚霞。
Copacabana beach
耶穌山左邊好似風起雲湧咁
天色開始暗淡，燈光亦逐漸點燃起。
開始有萬家燈火之感
其實山頂上有好多人等緊影夜景嘅！
耶穌山嘅燈都清晰可見，里約嘅夜色絕對璀璨。
左邊嘅長灘就係世界聞名嘅Copacabana beach，同香港唔同，佢地嘅沙灘夜晚燈火通明。
影夠，走LU！
今晚我地試左酒店附近嘅平民自助餐，喺里約有多間厘類連鎖店，食物按每公斤計算。
（好呀！攞多食唔哂都係嘥自己錢啫！
）
D 27 完
18/3 D28
Rio > Rocinha Favela(貧民窟) ＞ Copacabano
Rio – Hotel Windsor Leme
我地房間景觀唔錯，對沙灘，可惜今日天氣馬馬，陰天間中有雨，雖然係周末，沙灘都無乜人。
早餐後，我地乖乖坐喺酒店大堂，等候旅行團專車黎接我地出發；
一直都聽聞巴西貧民窟係罪犯嘅天堂，單係里約就有幾百座，大都依山而建，而且色彩斑爛，我地將會去里約最大嘅Rocinha貧民窟，真係有D緊張，
之前巴西奧運時，就有外國球員誤闖入貧民窟而被槍指嚇 ;
上月亦有英國家庭自駕誤闖貧民窟，司機（母親）身中兩槍，
所以千祈咪自行入去，一定要跟團，安全至上嘛！
大概卅分鐘，我地就到 Rocinha Favela，
其實對上年紀嘅香港草根階層黎講，巴西嘅貧民窟除左多左D斑爛嘅塗鴉之外，生活模式同上世紀，六、七十年代嘅木屋區差不多，還幸佢地嘅住屋大多有水箱，而香港當年嘅木屋區，好多仲要擔水上山；不過，能夠見識巴西貧民窟，仍然非常值得嘅！
（咪講廢話啦！好心急呀！
）係嘅！ 出發LU！我地喺大街落車，由小巷進入 , 其實同以前鯉魚門或九龍城寨嘅街道相近。
之後，我地開始上山。
兩旁仍有不少店舖
當然牆上少不了色彩鮮豔嘅塗鴉
行左一輪，導遊帶我地入左座建築。
穿過民居再上天台
啊！原來可以俯瞰整個 Rocinha Favela 。
清楚睇到有馬路通往山上，然後再步行落貧民窟。
黃色果座唔知係咪學校呢？咁都唔算太差，比起我小時候嘅天台學校實在好太多啦！
厘D藍色嘅膠桶係大廈水箱
一陣我地參觀完，會行番出去條公路度，呢！圓拱形果度係條天橋。
俯瞰完整個貧民窟，我地落樓繼續行程，同所有發展中國家一樣，頭頂滿是亂七八糟嘅電線。
我地叫做沿大街而行，橫邊間中會出現狹窄又陡峭嘅梯級，大D嘅傢俱都無法通過架！
接住，導遊話請我地睇表演喎！厘個就係佢地嘅舞台，表演隊由兩大兩小組成，小孩負責跳舞，大人負責打＜鼓＞。
（咁看台呢？
）當然有啦！幾親民呀！佢地表演完，我地位小鄧即時技癢，借左佢地個＜鼓＞打起中國醒獅節奏 (可惜無影相呢)，哈！竟然有板有眼，為我地爭光之餘，仲彼此交流得好開心，好好氣氛添！
睇完表演，導遊又帶我地去High tea喎！（ 咁就係，你地都行到幾high嘅位置啦
）店員好殷勤咁將櫃內所有餅食放喺長枱上，每件大概5、6蚊左右。
之後行嘅一段路，唔知係咪厘區最靚嘅街道呢？我指D塗鴉呀！
繼續塗鴉
厘座估計係社區教會卦！
生活所需嘅小物品，都可以唔使落山，厘度都有。
跟住，導遊好嚴肅咁話：而家開始唔可以影相，
團友仲問使唔使收埋相機，原來只要關機就得啦！
我地見有拎長槍男子經過，有朋友話佢去時，遇上揸槍同拎手榴彈嘅人添！
過左一段路，開始落山，導遊話可以影相啦！
牆上塗鴉中，亦有D係廣告。
繼續落山
我地由厘條街離開貧民窟
出番大馬路有條天橋，我地因為要過對面上車，順便行上天橋影下相囉！
因為旅行團係包酒店接送，當然係返酒店啦！
下午自由活動，我倆食完午餐咪行沙灘囉！
沙灘旁嘅小食亭
可惜天陰有雨，沙灘無乜人，連地攤都少，
不過沙灘與行人路間有D收費堆沙檔，專供遊客影相，唯有影下啦！
我地足足行左兩小時先將沙灘由頭行到尾。
堆沙多以里約觀光點為題
D28 完
19/3 D29
Rio > 遊覽市中心
Rio – Hotel Windsor Leme
黎到厘日，南美之行已接近尾聲啦！
聽日下午就要離開里約，但我地仲未正式遊過舊城區，唯有今日完成行程啦！個環境真係強差人意，算係我地一個見識同經驗，亦係我倆經驗中嘅一次冒險行程。
（奉勸各位朋友，無必要就唔好喺里約嘅星期六、日/假期遊downtown啦！）
食完早餐，出發LU！我倆行十零分鐘到就近嘅Cardeal Arcoverde 地鐵站。
首要當然買車票啦！我倆買嘅係儲值票，R$10／張，票值都係十蚊，
每程4蚊，來回後剩2蚊，攞走張儲值票作留念，抵喎！
團友四人打的去，地鐵返，單程票設計靚D，但無得帶走。
同好多國家嘅地鐵結構差不多
厘個站就用較原始嘅設計，地道部份石牆不經粉飾，石質外露，感覺唔錯。
車箱亦大同小異
我倆喺 Estação Uruguaiana落車，里約嘅地鐵出入閘都要＜嘟＞飛。
一踏出舊城區，好似死城一樣
，雖然我倆旅遊經常會走遍僻地方 , 但感覺就怪怪地，哈哈！有D大冒險嘅味道。
既來之，則安之，小心D囉！
我地先黎到 Igreja de Nossa Senhora da Candelária (坎德拉里亞教堂)，咦！無入口嘅？
原來正門入口喺後面，前後兩個樣，唔知道以為係兩座教堂添！
教堂前有個廣場，中央係裸女（女神）噴泉。
厘對門好靚，見有D銅綠透出，唔知係咪銅鑄嘅呢/鐵鑄？
教堂前廳嘅木傢俬應該有相當歷史，但打理得好好。
放喺一旁嘅告解室
傢俱都咁靚，聖水池當然一樣精工啦！
俾教友坐嘅椅一D都唔馬虎，一樣豪華。
整座哥德式教堂當然唔簡單，石雕、木刻、都係精雕細琢。
天花畫、拱頂或玫瑰窗，無一不講究。
雖然整個舊城區死寂，但輕鐵照樣行走，當然乘客無幾啦！
厘條係大馬路，情況一樣死寂，唔同嘅係每個街口有三個著制服嘅人企喺度傾偈，見唔見到對面轉角位有三位仁兄，厘邊嘅下一個街口又有三位呀？
厘次係兩男一女，仲有架警車巡邏，我倆終於忍唔住，埋去答訕，
問下佢地係唔係警察啦！佢地全部係持槍定點守護嘅警察，仲叫我地小心D添！我地每經過D警察都有打招呼，佢地都係果句：你地要小心D。（咪成日嚇我啦！
）
好啦！繼續我地嘅大冒險啦！
因為環境唔安全，只用機仔作實錄，將就住睇啦！仲有呀！當我地一個影相時，一個要把風，睇下附近有無人埋身嘛！否則即閃到安全地方（係咪好刺激呢？感覺上教堂較安全。
） , 經過教堂，無入去。
因為目標係對面嘅Travessa do Comércio (貿易巷)，現今睇黎無乜特別，
18世紀時，拱門係座天橋，連接左右兩邊建築，前面建築係後期加建嘅！
Arco de Teles拱門，昔日嘅天橋底。
沿住小巷進入，全係古舊建築，路面舖鵝卵石。
Travessa do Comércio 外嘅茶座只有空桌椅
我地又到左旁邊嘅 Praça XV[Quinze] de Novembro(11月15日廣場)，16世紀時，厘度曾經係修道院，1808年葡萄牙皇室因被法國入侵避難到此，
後來成為葡王約翰六世（Dom João）的皇室宮殿。
Statue General Osorio (奧索里奧將軍) 騎馬像
厘座皇宮舊址Centro Cultural Paço Imperial ，目前係文化中心。
喺 Praça XV[Quinze] 有座 Chafariz do Mestre Valentim(情人節噴泉)
昔日皇宮嘅場面係咁嘅（網上照片），同而家分別好大。
再向海邊前行，又一騎馬像，就係當年逃亡至此嘅葡王Statue D.João VI (約翰六世)。
騎馬像左邊有好大嘅建築，Tribunal de Justiça Centro Administrativo （里約嘅法院行政中心）。
近海邊，又係廣場繁華地（平日），當然有D茶座、碼頭同輕鐵站啦！不過今日就。。。
自助售票機孤零零無人問津啦！
喺海邊，可見對岸停泊左多隻軍艦同軍用快艇。
繼續沿海邊南行，厘個小廣場上嘅遊客中心，直情無人當值添！
不過小冊子仲係可以自助取閱嘅！
背後嘅建築雖然已改為商業用途，我諗以前都屬於皇室建築卦！
其實廣場四周建有好多歷史性嘅建築物，其中唔少係博物館，可惜好多都無開，雖然官網話周日有開放，仲話免費添！所以喜歡遊博物館嘅朋友，唔好選周末、日啦！
Museu da Justiça - Centro Cultural do Poder Judiciário（司法學院 - 司法文化中心）
厘座 Escola da Magistratura do Estado do Rio de Janeiro
（里約熱內盧州司法學院），當然唔開放啦！
轉角有三座立像
Museu Naval（海軍博物館）
街上豎立Praça XV廣場嘅導覽地圖
當我地行去 Assembleia Legislativa do Estado （國家立法議會），經過好多棵咁有趣嘅樹，D花好靚，果實好大，我覺得佢地開花結果時好有霸氣，真係要請教大家佢地嘅名堂啦！
Assembleia Legislativa do Estado （國家立法議會）正在維修
旁邊係Igreja São José（聖若瑟教堂）剛散彌撒
坦白講，咁嘅環境，無論影相或遊覽，少不免步步為營，
想影張好D嘅都唔敢花時間，係咁易逛下算啦！
速逛15號廣場後
，先經過Igreja Nossa Senhora do Monte do Carmo，因為幾乎每間教堂都有彌撒，所以只能影下外觀。
街道上，除左清潔工人同警察，遊人就寥寥可數。
還好見佢地穿梭，安心少少。
哈！原來聞名嘅 Confeitaria Colombo(哥倫布咖啡館)位於條小街巷。
店舖旁牆上有牌匾介紹咖啡館嘅歷史
大廈建築保養得非常好
走LU！繼續行去Real Gabinete Portugués de Lectura（皇家葡萄牙語閱讀室），條街真係靜到無朋友。
皇家葡萄牙語閱讀室係19世紀修建，除葡國外，係全世界擁最多葡語書藉嘅圖書館，可惜又係閉館，聽日上機前再黎過啦！
咁靜，都係出番大街穩陣D，
咦！有個廣場喎！係Praça Tiradentes ，
厘次咪話鬼影都無隻啦！騎樓底咪瞓左好幾個露宿者囉！
厘條大街 (AV. Passos) 平時好旺，假日就咁嘅款。
厘座孔雀開屏樓（我作野咋
），其實叫Espaço Franklin （富蘭克林空間）係個活動場所，好多婚禮或節日活動，都會租用厘度舉行。
Catedral Presbiteriana 長老會大教堂外面已經好吸引，可惜裏面又係舉行彌撒，當然唔可以影相啦！（如果係散彌撒嘅時間，街上應該多D人）
都算係咁囉！留番個靚位俾你坐。
周圍都咁靜，都係疊埋心水去D遊客必到嘅景點啦！
先行去Catedral Metropolitana de São 里約大教堂，
厘座圓錐形教堂係旅行團必去嘅！我地離遠就望到啦！
喺里約 , 行人通道、公園牆壁當然要有塗鴉先似樣啦！
黎到門口，已經有好幾架旅遊車停泊。
門口對面有座德蘭修女像
教堂入口，還好 , 無做彌撒。
成個上午，厘度算多人囉！厘次可以慢慢欣賞，影下相，又可以放心坐耐D休息下。（其實我地只去過一間酒店嘅洗手間同喺大堂休息咋！街上嘅茶座都唔多敢坐，怕引人注意嘛！
）
之後出番大街，沿馬路到 Theatro Municipal（市立劇院）。
但側門被流浪漢佔據哂
前面係Praça Alagoas（阿拉戈亞廣場），有座紀念碑。
喺劇院對面仲有座 Museu Nacional de Belas Artes(國立美術館)，
我地去到時未夠鐘開放，算啦！
繼續行，經過 Câmara Municipal （市政廳）
旁邊黃色果座建築，樓下餐廳 Restaurant Amarelinho 網評好似幾受歡迎
（今日都係水靜鵝飛）。
終於到附近嘅 Cultural Justiça Federal（聯邦司法文化中心）
第一眼吸引人嘅係大堂正中嘅樓梯，好有氣派，而且有開放果度好嘛！
牆上嘅藝術畫作
二樓有個模擬法庭 ，好歐洲式嘅建築。
另一房間陳列男女法官嘅服飾
上到三樓，仍有展品，不過我蠢，睇唔明係乜囉！
厘座係巴西國立圖書館，正在維修，係一座華麗嘅歷史建築，聽朝再黎過。
兜左個圈，又開始去番幾個旅遊必到嘅景點，沿途唔少得路旁嘅塗鴉。
厘座兩層橫跨喺市中心嘅Carioca Aqueduct – Lapa (拉帕水道橋)
係葡葡牙殖民時代將 Carioca River嘅水輸往市中心，有二百六十幾年歷史.
喺水道橋南端山上有座Convento Santa Teresa（聖杜麗莎修道院），
周日又係唔開放，唯有等聽朝囉！
由厘度同時見到圓椎形嘅里約大教堂
水道橋南端嘅斜路，本來可以通往 Escadaria Selaron(藝術台階)，
但現場所見太靜啦！我倆情願兜遠D由大馬路去。
沿大街已見有D人（算多啦）向同一方向走，唔使諗，跟住行實啱啦！
（其實咁嘅環境都唔係好敢經常攞手機出黎睇地圖）
經過 Lampadário da Lapa 廣場
見人群轉入條街，牆上嘅塗鴉更見精彩，係厘度啦！
牆上殖民時代嘅黃色軌道車，即使我想睇都係緣慳一面啦！
整條街巷嘅一邊牆壁，滿是塗鴉。
厘間精品店肯定吸睛指數極高啦！
終於黎到聞名嘅 Escadaria Selaron(藝術台階)，智利藝術家 Jorge Selarón 1990 年開始鋪設厘條由磁磚組成嘅 250 級彩色階梯。
睇到厘張相，咪以為無人喎！
實際係好多遊客黎參觀架！平日可想而知有幾擠擁啦！
今日整個行程，厘度算係最有生氣架啦！有無留意，真係無乜人拎大機架！
有D民居嘅外牆成為藝術品嘅一部份
厘部份尚未完成
亦有部份民居雖然位於階梯上，外牆仍係空白嘅！
厘度嘅瓷磚，據講多數係人們捐贈嘅，所以五花八門，
乜題材都有，鋪砌內容經過精心安排，令人大開眼界。
繼續欣賞有趣瓷磚
厘三幅用瓷磚碎片整合而成，真係好神似呀！不過點解紅種人多對角喎！
階梯頂下望
橫掂時間尚早，反正都要坐地鐵返酒店，黃色軌道車無開啫，不如去Estação Carioca do Bonde踫下運氣，睇下見唔見到架殖民時代嘅軌道車啦！
要上去車站先睇到，無計！
網上照片
走LU！途中經過 Praça Mahatma Gandhi（聖雄甘地廣場），
本來仲有個好大嘅甘地像喺街角，不過咁靜，唔搵啦！
網上照片（甘地像背後就係廣場噴泉）
obelisco da avenida rio branco （布蘭科大道方尖碑）
係由一位建築商送俾里約嘅禮物，遠處嘅係糖麵包山。
D29 完
20/3 D30
Rio > 續遊市中心 >14:50 > Sao Paulo 16:05
Sao Paulo 20:55 > Dallas 05:20 (21/3)
Dallas 10:35 (21/3)
21/3 D31 Flight
22/3 D32 Arrive HK 16:30
今日14:50要坐機開始回程啦！所以里約市區遊已到全程尾聲，幸好下午機，
尋日無開放而我地又想去嘅，今早僥倖可以補遊番；且尋日小鄧已得到Windsor集團市中心嘅其中一間酒店同意，免費寄存行理，慳唔少時間，真係要俾個讚小鄧！
早餐後，我地分乘兩部的士，將行理寄存喺downtown嘅Windsor Asturias Hotel，保安仲好心地提醒我地，唔好攞手機出黎（又係厘句 ）。
首先步行到 Real Gabinete Portugués de Lectura皇家葡萄牙語閱讀室
（尋日照片，所以關門）
先經兩度拱門（免費開放）
嘩！有35萬冊書呀！唔知哈里波特內嘅圖書館係咪用佢做藍本呢？
每張書枱中央有立板分隔，保持私人空間。
每層嘅護欄都精雕細琢
有部份書籍放喺保護箱內
厘座花塔內嘅書籍應該係鎮館之寶啦卦！因為反光得緊要，就住睇啦！
連個counter應該都有相當歷史啦！
雖然角度有D怪，都叫做睇到全館嘅大概建築吖！
屋頂彩窗美觀又透光
尋日經過 Igreja Nossa Senhora do Monte do Carmo 教堂，舉行緊彌撒，
今早可以隨意參觀拍攝啦！
牆上嘅石雕木刻都非常精緻
祭壇就唔使講啦！
入口頂上層仲有古老管風琴
教堂內嘅另一小教堂
去飲咖啡LU！尋日去到 Confeitaria Colombo (哥倫布咖啡館) 都無開，
而家正好入去飲杯咖啡，食件餅。
由門口望入去
由裏面望番出去，視覺上都差不多，四周鑲滿鏡，增大視覺空間。
通過二樓天井直望彩窗
點心款式好多，主要甜點，當然有三文治、熱狗之類啦！
幾乎所有櫃門都係玻璃嘅！玲瓏剔透，典雅美觀。
除左喺度飲咖啡，仲有紀念品出售。
趁食物未到，即管踫運氣，要求服務員俾我地上二樓影張相，
點知佢地好好人，仲唔使我地行樓梯，坐個古董電梯添！
電梯門似舊公屋嘅鐵閘咁（我小時香港都有好多咁嘅電梯）。
二樓屬用餐場所，厘個時候未有客，工作人員只埋頭擺位。
二樓下望
整張上下睇齊嘅，場地幾有氣派架！
我地五人都食葡撻，點知中伏，埋單時我地嘅幽默團友，
笑笑口咁對位職員用廣東話講：你地D葡撻好難食呀！
點知個店員以為讚佢地，鬼咁開心咁款。
咖啡OK嘅！
小鄧醒呀！佢話厘件OK喎！
臨走前去洗手間，順便影埋隔離D坐位，我諗旺市時，厘邊都坐滿啦！當然無正廳嘅門面咁豪華啦！
飲完咖啡仲有大把時間，可以步行到Downtown嘅最高位，
參觀18世紀建造嘅Convento Santa Teresa（聖杜麗莎修道院）
唔記得入內係咪需要登記
厘幅瓷磚好古舊，應該係原物。
教堂入口
入口頂上有個小閣樓
唔知厘D牆壁係維修緊，還是原來就係咁。
從剩餘嘅破瓷磚可見當年牆上鋪左美麗瓷磚畫
教堂內
堂內祭壇
教堂旁有個客廳
可見天花應該係原來建築，保存得好好。
臨走前喺平台影番張俯瞰圖
南美之行最後一個景點係維修中嘅國立圖書館
就近地鐵出口
以為無得入架啦！比預料中還好，可以參觀大堂，唔錯，華麗堂煌 ! 靚！
屋頂嘅玻璃彩窗
離開時經過視聽室
南美之行真要結束啦！去酒店攞番行理，打的到機場。
機場無乜特別，周圍遊蕩，厘幾張椅用水晶膠方式鑲嵌，且價錢唔貴。
卡板除運貨用途外，原來做梳化更可愛。
再見啦！糖麵包山、跨海大橋。
仲有長長嘅里約沙灘，最底果個就係世界聞名嘅 Copacabana beach。
唔使兩小時，我地就降落 Sao Paulo，再轉機到Dallas。
由Dallas 返港途中，經俄羅斯上空時，如果天氣良好，
千萬唔好錯過欣賞窗下冰封嘅海洋同河流、連綿雪峰，甚至雪原，
估唔到旅程嘅壓軸，竟然係無邊際雪景，非常壯觀。
無論22/32日嘅A/B團，都非常順利流暢
，大感恩！
亦藉此代表A＆B團友 , 對小鄧表示謝意，辛苦哂！
D30 完
D31 飛行中
D32 旅程完滿結束，平安抵港！
沒有留言:
張貼留言