此行因私務，未能喺最理想嘅日子出發，如果喺九月尾至十月尾就最理想啦！當然 行程又唔會咁樣編排，始終有D景點，十月開始己經去唔到(例如太行山大峽谷)，同時因為我地已經第三次遊山西，所以好多熱點都唔去(例如雲崗石窟、懸空寺。。。)，如果係初遊山西，厘個行程就有好多不足之處啦！
話明窮遊，當然以公交為主，先講今次嘅大交通，除左來回飛機外，首選火車（無搭過高鐵），其次係長途巴，小交通就依靠公車。
至於消費，因為只有我倆，亦唔費神記帳，總支出連機票，
應在10000HKD/人以下。
以下係28天嘅行程，聽起黎好似時間好長，其實要漫遊，都係唔多夠。
22/10 D2 五台山兩天遊
23/10 D3 五台山
24/10 D4 太原 ~ 崛圍山
25/10 D4 太原 ~ 龍山石窟
26/10 D6 太原 ~ (K865; 07:50-09:42)介休 ~ 綿山
27/10 D7 綿山風景區
28/10 D8 綿山風景區 ~ 介休
29/10 D9 介休 ~ 張壁古堡 ~ 祆神樓 ~ 后土廟
30/10 D10 介休 ~ 王家大院
31/10 D11 介休~(2463; 6:35-8:49)臨汾 ~ 堯廟汽車站 ~吉縣 ~ 壺口
1/11 D12 壺口瀑布（上午山西，下午陝西）
2/11 D13 壺口 ~ 臨汾
3/11 D14 臨汾 ~ 古城公園-鐵佛寺 ~ 鼓楼~堯廟博物館
4/11 D15 臨汾(1096; 10:07-12:31) ~ 平遙 ~ 平遙古城
5/11 D16 平遙古城
6/11 D17 平遙古城 ~ 太原~ 迎澤公園(晉商博物館)
7/11 D18 太原 ~ 山西博物館 ~ 汾河公園
8/11 D19 蒙山大佛 ~ 晋祠公园
9/11 D20 晋祠 ~ 太原(K604 ;19:35-05:37) ~ 北京
10/11 D21 北京 ~ (K7711 ;07:56-12:31 ) 承德
11/11 D22 承德 ~ 避暑山庄
12/11 D23 普陀宗乘之廟 ~ 須彌福壽之廟 ~ 普寧寺+普佑寺
13/11 D24 承德 ~ (K7718 , 07:41-13:11)北京 ~ 景山公園
14/11 D25 北京 ~ 清東陵
15/11 D26 故宮-北京(K601,22:17-08:22) ~ 太原
16/11 D27 太原 ~ 土堂村大佛 ~ 竇大夫祠 ~ 烈石寒泉 ~ 柳巷夜遊
17/11 D28 唱經樓 ~ 文瀛公園 ~ 深圳 ~ 香港
前言
八月見香港航空去山西太原有平機票，來回先1.8K，超抵！
咪計劃走一轉山西囉！點知決定訂機票時，網上預訂只做到十月尾，打電話去問，又話十一月唔開囉喎！唉！既然鐵定心去，去程＄1160，唯有照殺！慢慢再睇回程啦！結果有日吼到東航<¥600飛深圳咁抵，唔使諗啦！香港航空之後又開售11月機票，真係俾佢玩死！
以下係28天嘅行程，聽起黎好似時間好長，其實要漫遊，都係唔多夠。
好！入正題，出發LU！
21/10 D1
香港(HX346; 12:20-15:10) ~ 武宿機場 ~ 中城賓館 ~ 太原市內遊
下午三點零鐘到達山西太原武宿機場，我地訂左火車站對面嘅中城賓館，一出機場，諗住實見到巴士站啦！點知只見每位30蚊到市中心嘅豪華巴士（兩個人坐的士都夠囉！）機場只有兩三條巴士線，我地搭201路到火車站（總站）。點知厘度嘅巴士站好吊詭，無任何記認，就喺機場面對嘅停車場內，有個寫住＜4＞嘅牌，當地人叫做4號閘口喎！（唔好搵啦！最快捷就係問下停車場嘅工人），呢！就喺厘個花槽附近（張相唔知係咪刪左，搵唔到）。
到總站落車（又話係火車站嘅，點解係橫街，唔見火車站喎！），左望右望，終於見到火車站，因為搵到火車站，對面就係中城賓館，好易搵。
我地嘅房間面向火車站
之後當然出去醫下肚先啦！黎山西最想食嘅係麵，求祈搵間店試下，果然唔錯。
醫飽肚，跟住去旁邊嘅超市買張公交IC卡，太原嘅公交卡好抵用，30押金（可退），可三人共用，最盞係半價吖嘛！仲唔使成日撲零錢投幣，方便！
行下超市，到火車站行下，又去搵下聽朝清早去五台山嘅集合點，唔覺己經天黑啦！原來我地住嘅酒店，夜景都唔錯。
房間外望嘅火車站夜景
22/10 D2&3
五台山兩天遊
見網上有五台山嘅兩天團，全包都係238人仔，仲包食住（當然唔好要求高啦），唔好諗啦！跟住行咪得囉！
先將大行理寄存喺酒店，揹個背囊 , 清早到電力大廈（酒店步行約5分鐘），全車坐滿，老遠就設售票閘口，
全車人落車憑票入閘，再上返車，
到步已中午，入房擺底野，食埋午飯就開展遊覽啦！（房間OK，膳食就因人而異，我倆無問題，飽肚就得。）
首次踏足五台山係廿幾年前，當時感覺係渺無人煙，只有簡樸古舊嘅寺廟，如今當然商業化得多，但亦方便左遊客。
山西境內所有正規旅行團都劃一用厘款車
原本五台山景區內，遊客要坐車，只許乘坐專屬區間車，50／人，但因今年初被投訴，四月開始所有區間車停駛，無車坐，點算？我地每人20，由旅巴司機代勞。
停泊嘅區間車不下兩百架
原本嘅區間車站，車去站空，咪等啦！
車站路線
雖然我無信仰，不過五台山保存好多完整古寺廟，剩睇氣勢，我認為勝過普陀同青城啦！
先遊廣化寺
繼而到菩薩頂
108級樓梯，直達寺門。
居高臨下，景緻一流。
厘三座分別係康熙、乾隆、嘉慶嘅御碑, 傳說 : 因菩薩覺得嘉慶是乾隆嘅仔，係康熙嘅曾孫，佢嘅御碑竟然高過先辈，於是踼佢一脚，咪留底個腳印囉(左一)！
（唔知係咪想踢斷一截呢？
更重要係忘記左當年有無厘個腳印添
） 
跟住再參觀殊像寺
上左照壁後，門前嘅香爐以古式樓閣造型，係五台山最大嘅鐵鑄香爐。
淡季旅遊，好處係唔多人 , 雖然大旅巴全車坐滿，不過兩天團嘅就得十零人啫！
最後到五台山歷史悠久嘅顯通寺
廟宇甚具規模，由厘度遠眺上望嘅係菩薩頂（係咪有蓬萊之感呢）。
再穿過無量殿
頂上嘅銅殿係中國保存最好嘅銅殿之一，當年黎嘅時候係黑棕色，而家就金碧輝煌啦！
顯通寺門前嘅鐘樓喺樓台上伸出條長廊，優美具特色，同時可以俯瞰山下。
走LU！
沿斜路落到下面，又有另一座羅（目候）寺，睇黎亦經過新修。
遊完四座寺，已經到晚飯時候，坐車返旅店食飯LU！膳食都係菜多肉少，主食有饅頭同米飯。
上午到步時匆忙無影到賓館外觀，而家補番。
D2 完
23/10 D3
五台山D2～ 五爺廟 ～ 黛螺頂～ 醋坊～ 太原
清晨5:15就齊集出發步行到五爺廟，話係要空肚祭神祈福喎！
嚴格嘅應該齋戒沐浴再去。
途中美景
大概行十零分鐘就到，咦！唔係去五爺廟咩！原來先帶團友請已開光嘅香，
不過D香奇貴，一扎最平三百，有團友豪付六百，甚至九百請一扎香
（點解團費咁平，明啦！），不過我都要講句公道話，導遊真係無迫我買喎！
（因為只有2pair唔買嘛
）祭品店
請完香再步往五爺廟
五爺廟外嘅香火
入到去，厘座就係主殿，廣濟龍王廟啦！（排隊？）係呀！要排隊架！
裏面唔大，我都係入去順人流行返出黎。
主殿對面係戲台（山西大寺廟嘅格局多數係咁）
主殿右側建有座稍大閣樓，地面層放有多座石碑。
其實五爺廟無乜特別，吸引我嘅反而係廟外嘅公園，晨霧縈繞，
尤其菩薩頂，更感超凡。
因為導遊只負責帶去，團友要自行返旅館食早餐，於是我倆又周圍游蕩下囉！
經過廣仁寺，記憶中N年前廣仁寺同隔離嘅白塔寺相連，而家分隔左啦！
附近仲商業化左好多添！
我地沿河而行，經過善財洞（未開）。
上大螺頂嘅索道（50蚊來回）
兩百幾部區間車泊哂喺度
厘條大街上集中好多食肆同賓館，不愁搵食，我地就住福緣閣賓館。
途經仲有流動洗手間
返賓館食過早餐（南瓜小米粥、饅頭、雞蛋同鹹菜），八點又出發步行去黛螺頂。
碑上寫著＜大智路＞，指嘅就係向上嘅1080級石級，慢慢行啦！
（有無方法唔行？）可以，俾50蚊坐索道來回囉！
我地窮遊嘅，梗係行行重行行啦！但你睇好多人為求誠心，
堅持三步一跪叩咁到頂（加油呀）。
俯瞰下望，導遊話厘座廣仁寺係五台山最大嘅，不過唔開放。
上左唔係好耐，經過一座寺。
厘個時候，最需要嘅係向上心
，繼續加油！
唉！大霧成咁，我又唔係為拜佛，只想欣賞靚景啫！心裏掙扎住，
同唯一團友講：白行喎！不如唔好上囉！點知團友腳痛都堅持，無奈死跟啦！
行下行下，好似有望喎！
向上心都唔係好積極，仍繼續上；突然見好多人望轉頭舉相機，
不過誠心善信無受影響，仍專心跪叩上山。
哈哈！我地當然唔執輸啦！原來雲霧漸散，美景初現，仲有陽光添！
此刻真係好靚
終於到達黛螺頂，入寺要俾20。
從黛螺頂俯瞰五台山
好快就一天都光哂
某山頂台上嘅寺廟
小狗頸上纏嘅係五色經幡
我地沿石級落山，一般團友多從後山繞道沿斜路落山。
天色越黎越晴朗
山上纏著五色經幡
導遊都係帶到大智路上山處，團友自行返回賓館食午飯，當然亦可以自行外出用餐啦！
仲有大把時間，陽光普照，我地慢慢踱返去。
午飯後，坐車返太原參觀最後景點 ~ 醋坊，仲俾我地入存醋嘅房內兜左個圈，
從來唔知道濃烈醋味係咁難受
，簡直可以令人塞息，有哮喘千祈咪試呀！
最後，仲趕得切返酒店餐廳歎番個半價(住客25蚊)自助晚餐添！
雖然唔算豪華，但頗為豐富，熱葷連冷盤足有廿幾款，仲有粥麵飯多款，
加埋甜品水果，包埋酒類汽水，真係抵到無朋友，遇上星期日，菜式仲豐富D添！
D3 完
遊玩太原溫馨提示：
此等資料對背包客而言屬低B級，前輩們萬勿見笑，
目的是供初試玩者多一份參考而已。
~ 山西各地均無地鐵，公交主要依賴火車及巴士，市內巴士票一般由￥2至數元不等，
除太原外，其他地方公交IC卡均沒折扣，且因遊玩日數不長，故只作投幣乘車。
~ 太原公交IC卡：太原持公交IC卡乘巴士劃一半價 , 可三人共用一張，
各大华联超市及指定公交點憑證件發售 , 押金￥30 , 可退（可能有折舊）,
每次充值最低费用￥20 , 退卡點共5處，請參考以下照片。
（即場拍下，雖然好難睇，好過無啦！）
參考連結:
http://tieba.baidu.com/p/769122015 http://bus.dongganchaoren.com/news/2995
~ 太原武宿機場共有五條巴士線，分別是：
機場巴士1號(￥16)、機場巴士2號(￥30)、機場巴士3號(￥13)、
機場巴士4號(￥25)、201路(￥2)。
~ 公交遊走，少不了巴士線路查詢，較詳細的算是8684.cn，
但山西各地的巴士路線及站名（尤其是站名），準確度約80％左右，
通常我會配合百度地圖嘅乘車資料作參考，
遇有疑難，最好問當地人，各位朋友執生啦！
參考連結: http://taiyuan.8684.cn/x_65cb3093
~ 山西高鐵站大多遠離市中心，交通不便，若能忍受擠迫之苦，
火車接駁巴士最為理想，若想舒適點，也可選乘長途巴，
我們此行在山西境內（綿山除外）的住宿點，
全在火車站附近，因有四通八達的巴士線路供選擇，方便出遊。
~ 太原長途巴站共有5個 :分别为省长途汽车站、客运东站、客运西站、
建南汽车站以及迎宾汽车站。省长途汽车站位于火车站附近，迎泽大街72号。
~ 山西的酒店價格較浮動，淡旺季可能相差很多，尤其是綿山及平遙古城。
~ 山西有不少壯麗的自然景觀，有的交通不便，可考慮參加旅遊集散中心的本地遊，
線路多樣，有的甚至比公交成本更平宜，即日報翌日團也可成行。
太原旅遊集散中心：山西省太原市迎泽大街五十号（太原汽車站側）
~ 本地團差不多都在迎澤大街的幾座重點建築前集合上車，
可考慮選此住宿，無需清早趕巴士了。
~ 山西的出租車經常唔打錶，多是議價的（當然係海鮮價啦）。
24/10 D4
太原~崛圍山
今次行程，對我倆嘅體力肯定係考驗，如果細心睇下我地嘅行程，會發覺由D3-D8都要行山
（搞乜編成咁呀？又做乜咁博呢？）
主因當然係遲左兩個禮拜出發啦！（無計，瑣事纏身囉）
其次係想睇秋景嘛！希望趕到一兩個景點都好吖！
第三、本已知綿山無秋景啦！但又要趕喺29/10前到景區，因為綿山1/11開始進入淡季，
雖然門票平D，但區間車停駛，咁就好唔方便啦！
喺厘三大條件下，平時少行山嘅倆老，唯有帶定舒筋活絡油舒緩下囉！
原計劃係去太行山大峽谷兩天嘅，點知入冬無團，集散中心話結冰危險，唯有改去崛圍山啦！
吹完水，再講下太原巴士以火車站為站名嘅車，必須睇清括號後面嘅名，
列如（華苑賓館）（國防賓館）（北倉大廈）（汽車站南門）等，實際位置唔係火車站，
而係附註嘅賓館/大廈門口，只係厘D地點好近火車站啫！
寫咁多，怕悶親大家，不如上幾張崛圍山嘅相醒醒神先再講啦！
我倆到附近（華苑賓館）門口搭615路，本應轉12支到呼延村招呼站落車就最近嘅！
點知架12支塞滿人，再睇站牌，835都可以，不過一個係招呼站，一個係呼延村站，
就係無呼延村招呼站(玩野呀
)，好少理，上車先算！好彩問下當地人，原來要喺招呼站落車，當日係周末，前面年青人嘅裝扮一定係去行山，
再睇埋GPS，實無錯啦！點知由落車行到崛圍山景區口都要35分鐘，
途經12支巴士站，相信行少20分鐘啦！
我地搭835落車向車頭方向直行，見到呼延村牌坊就轉入
直行至有岔路，依紅葉山莊指示方向前行（左邊），直走到崛圍生態園及公廁
（如果公廁人多，行上D有個俾五毫子嘅唔使排隊）。
厘座水道橋（我估咋）好完整，好正！
細心睇下，D人多過旺角，皆因崛圍山交通方便，距太原市西北只有24公里，
景區又大又靚，最重要係免費嘛！朋友們厘個時候去，千祈唔好揀周六、日呀！
雖然今日天陰，但景色真係好靚，如果陽光普照就好啦！
從山上下望蓄水池（嘻！又係斷估）
除左天陰，山西嘅空氣真係差，成日沙塵滾滾，能見度低，不過比起N年前，家家燒煤，空氣係黃色嘅時候好多啦！
附近停車場泊滿車
山頂上有始建於宋代嘅舍利塔
唔少扶老攜幼嘅家庭，黎享受郊遊樂。
到頂啦！環繞頂上嘅小小空間，都被小販佔據，因為只有厘度有飲有食，
所以人頭湧湧，我地兜左個圈就即走。
雖然我地遲左一星期，不過仍有遍山紅葉。（一個星期前咪好勁囉）
野生山楂一蚊袋，雖然細粒，好甜，團友一路行，一路食，都唔知幾滋味。
厘種果子叫沙棘，見人用黎浸酒。
通往山頂嘅路停滿黑車兜客落山
山頂上嘅多福寺（￥15），始建於唐代，由於喺五台山睇左好多佛寺，今日行山算啦！
除左多福寺，途中仲有兩座洞窟廟宇。（免費）
我地沿另一條路落山，沿途景色絕美。
厘個時候開始落微雨，仲有隊單車隊極速下山。
單車隊極速落斜轉彎，喺途人中穿插，睇到心驚膽顫。
雨勢漸大，眨下眼，山上遊客少左八乘（撤退得咁快嘅
）。
我地仍堅持步落山，雨景中嘅絢麗，一樣咁誘人（人少D，仲好啦！）
嗱！唔止我地行得開心，你睇佢地，直情開心到飛起啦！
（影得好痛快呢！等我幫你補番張啦！）
今早厘個上山位人山人海，而家已經16點啦！遊人只集中喺山腳入口。
行足一日，我地都走LU！
D4 完
25/10 D5 太原~龍山石窟
見網上話去龍山石窟交通偏遠，經實地試過，絕無難度，
且唔怕俾黑車宰割，大家可以放心去。
清晨食完早餐，出發到火車站（北倉大廈）搭308巴士，到西鎮站落車，向車尾行約百多米。
見有＜龍山風景區＞嘅石牌坊就轉入沿路上。
其實公路上亦有指示路牌
網上教路話經過龍山滑雪場，我仲以為具規模嘅活動場所，
原來只係幾隻字寫喺幅牆度，但唔見滑雪場。
繼續前行，（喂！行左定行右呀？）睇到左邊路牌嗎？
咪寫住龍山風景區囉！跟住行就無錯啦！
我懶行去右邊影啦！睇唔睇到？右邊係間水泥廠入口，如果行錯，去到水泥廠門口，
你都會返轉頭入左邊條路啦！（咪玩啦！腳骨力係要黎行山架嘛！
）沿路上山，個心十五十六，一路上都唔見有人，今日係禮拜喎！
同崛圍山嘅人流有天壤之別呀！
開始見山邊有紅葉，掂啦！仲趕得切有靚景，無白來，雖然落住微雨，
個心都唔知幾雀躍呀！（之前怕無景睇囉）
嘩！使唔使咁靚呀！仲未入景區喎！
得一條路，厘埋眼直上就係啦！
厘個龍山農家樂人去樓空，淡季就係咁！
厘個窯洞可能門口賣飲品小食，而家都係無人。
終於到左龍門景區嘅停車場同售票處（入左景區先記得影相）（￥20）
一條路入丁香谷，2000米長嘅山谷，佈滿丁香花，春夏可以黎賞花啦！
龍山導覽圖
此山石窟屬道教，當然唔少得供番座老子（三清尊神之一嘅太上老君）。
厘條石階就係欣賞丁香嘅＜觀溝＞
嘩！原來厘度不比崛圍山遜色，矚目所及嘅山頭，全佈滿色彩斑爛嘅紅黃綠，
顏色多變，最衰今日無陽光啦！
山頂建有道觀
最高處為玉皇大殿
背山景色優美
廟前有觀景台
唔夠高？可以再上一層樓。
對面山巔有座亭，一陣行去。
而家先去參觀石窟
唉！又係遇上一邊維修，果邊應該有個較大洞窟可以進入嘅！
有幾個睇下，好過無啦！不過上高位小心D。
佛像保存得算唔錯
由厘邊俯瞰周圍山頭，無不絢麗，陽光普照下應該有驚艷。
厘度仲設有遊樂場，照顧埋小朋友添！
360度遠眺，比崛圍山更壯觀。
難得有咁清幽嘅環境，繼續向第二個山頭進發。
到頂啦！
望番轉頭
開始沿路落山
無論行到邊，都係滿目紅葉，滿山秋色，秋冬出行就算落雨，
都唔會好大，所以無阻我地欣賞美景。
返到落黎，走LU！又漫遊一日，爽！
D5 完
太原崛圍山及龍山石窟資料：
～崛圍山全天免費開放
～乘12支路較近，在呼延村招呼站落，約步行15分鐘到景區；
乘835、826、833路在招呼站落，約步行35分鐘到景區。
（詳細路徑圖文請參考56#）
～龍山石窟開放時間為08:00-17:00，成人門票￥20，六十歲以上半票。
～乘308、310路，在西鎮站下車，步往景區約30分鐘。
（詳細路徑圖文請參考64#&65#）
** 因山西各地巴士站名時有變動，網上站名經常與實際不符，
以上站名請自行現場核對清楚方好。
26/10 D6
太原~(K865; 07:50-09:42)介休~綿山(古藤谷~水濤溝)
今早要暫別太原，坐火車南下晉中嘅介休市啦！
因為一個月前已經喺網上訂好火車票，第一日到太原已經將太原出發嘅火車票攞哂，
食完早餐，可以輕鬆拉行理過對面搭07:50班火車。
十點未夠就到步啦！出介休火車站左側約百零米有公車站（千祈咪以為係大巴呀），
分別有去張壁、王家大院、綿山。。。等，綿山每小時一班，車程約30分鐘。
公車會在綿山入口前兩百米停站（就係厘個超市招牌旁邊）
落車就望到綿山景區入口，好方便。
綿山入口居高臨下
正中係介子推像
入口好有氣勢
個人認為綿山值得推薦，景區佔地40平方公里 , 屬5A級景點，
無諗過大得黎咁多野睇，我地住兩晚，細遊哂所有景點，真係行到腳軟呀！
建議要細遊嘅朋友，最好住三晚比較輕鬆。
綿山嘅旅遊服務屬中央管理(有D似烏鎮)，所有住宿交通，都在大堂統一辨理，
之前諗住喺網上預訂酒店，原來旺季必須透過電話聯絡再交款預訂，
淡季直情唔做，打電話去問，左推右搪，打完幾通電話，
答案係:你到嘅日子好多酒店停業，要walk in，(最平標房幾錢一晚?) ( ￥380)，
算啦！反正要walk in，去到再算啦！
大堂都有氣勢喎！可想而知旺季時嘅虛冚。（不過此刻客人得我倆）
先到旅遊柜位訂房（請問臥龍賓館標房最平宜多少？）（￥280）
（有沒有其他賓館平一點的？）（最平宜啦！）（那我多住一晚，能平一點嗎？）（￥260）
呵呵！得米！成交！
服務員寫左張紙俾我，叫我去交錢同買門票。
佢話喺度住門票半價(￥110)，老少劃一，跟住講左一大堆數目，包括保險、
區間車(￥50任坐)，共付￥520/2人（唔理啦！佢話幾多咪幾多囉！反正黎到啦）
原來厘度係用儲值卡，先付押金，所有食住消費，全部用卡，
厘張就係5日有效嘅門票兼電子錢包啦！每人一張，離開時對數退餘款。
（俾得5日你，可想而知景區有幾大啦）
厘個寄存服務係方便玩一天嘅遊客（見網上好多本地一天遊架）
搞掂哂，去搭區間車囉！
乘區間車閘口
首程由大門到第一個景點＜龍頭寺＞有成六公里嘅山路，司機叫我地落車再轉車。
跟住都係坐厘類車到臥龍賓館
我地住嘅酒店位於中心地帶
去到攞房，再俾多￥400/2晚押金，連剛才付嘅￥520，兩卡內面值共920。
面對朱家凹景區，環境同位置都唔錯。
酒店屬井形設計
天井透光之餘，仲將外面嘅山景引入。
唉！真失敗，無影到房間添！OK嘅！唔算細，掛三星，當二星啦！
（當然有更豪華嘅四星酒店，不過又係當三星好啦）
放低行理，食過自備燒雞同即食麵（睇網友話厘度淡季難搵食）, 出酒店門口搭車到最尾嘅景點＜水濤溝＞，水濤仙谷賓館門前係車站。
先經古藤谷
然後直入水濤溝
水濤溝好長，本來幽谷景色唔錯，但人做景過多,反覺畫蛇添足！
厘個位旺季坐喺度用自己相機影相都收5蚊，而家無人，請隨便坐！
今早落過雪，雖然陽光普照，但照唔到谷內，而家仲有D雪。
我地沿溪谷前行（又包場，部份酒店梗要停業啦！）
水濤溝沿溝深入到水簾洞，沿途都有景觀，我地來回用左四小時。
中途仲有個戲台，唔知旺季係咪有表演呢？
間中亦有山峰之類景觀介紹
溝中間歇築棧道架於溝上
經常見左右兩邊有棧道，估計係旺季時規定一出一入，以策安全。
因為係早上落嘅雪，越深入，地上嘅雪反映無乜人入過黎。
終於到水簾洞啦！
原路步出返回水濤溝站，車站後有上介公嶺嘅纜車（來回￥50），左後有條石階通碑林。
上碑林石階
厘度嘅碑刻非常多，肯定睇到書法友唔捨得走啦！
碑林長階延續上山
隱約可見，厘度嘅秋色應該幾靚，可惜我地遲左。
跟住落返去搭車返酒店，原來已經係尾班車（就算無車都可以行返酒店）,
返到朱家凹站，覺得沿途風景好靚，沿車路周圍行下，欣賞山峽景色。
整張全景，左邊果條係車路。
厘條好似掛喺懸崖嘅長廊，就係我地酒店嘅部份建築，遇雨雪或怕凍可以到長廊欣賞峽谷。
喺綿山，無論你住邊間酒店，都可以望到不同角度嘅山崖峽谷，氣勢萬千。
睇唔到落日，不過山峽間嘅餘輝仲係唔錯嘅！
D6 完
27/10 D7
綿山風景區(栖賢谷～雲峰寺～正果寺～靈應塔～龍頭寺～蜂房泉～大羅宮)
今早看天氣晴朗，應該係遊山玩水嘅好日子，一於介紹個刺激精彩景點俾大家。
食完早餐，帶少少糧水就輕裝出發，反正景區內好方便，中午可以返酒店休息同食午餐。
一出酒店望向山谷，仲以為雲霧低降谷中。
沿路前行，原來係前面餐廳<邀月樓>起嘅炊煙。
行到望峰閣前嘅車站，諗住搭車去今日首個景點＜栖賢谷＞啦！點知等左大半個鐘都無車，
問下D員工，原來今早司機罷駛（唔係呀）
無法啦！唯有處之泰然行去景點囉！好在沿途景色優美壯麗由厘度望上去，覺得似蓮中塔。（晏D我地會上去）
經過正果寺，要上山架！
如果唔行都得，俾錢搭電梯啦！
厘個金碧輝煌嘅門面係電梯入口 , 過門不入 ? 我地梗係搭11號啦！
繼續前行，陽光洒落山谷，漂亮壯觀。
厘個栖賢谷雖然風景唔算特別，但國內好多年青人，就係衝著厘個景點黎綿山嘅！
我倆雖然唔年青，不過都想黎見識下。
（無乜特別啫！）仲未到，繼續上啦！
再上！
到啦！厘度除左係賞景之地，仲係耍樂、尋刺激嘅開心地，旺季要排隊架！
厘塊大石頂上固定有兩條大鐵鍊俾遊客攀爬上去。（無難度）
石塊頂上崖壁嵌有鐵鍊同鐵板，考下你膽量啦！
（個人幾討厭厘D鎖，既唔環保，仲會因負重做成破壞）
我只能小試一小段就放棄
，始終安全第一嘛！（建議景區加條安全繩，遊客就可以玩得開心又放心啦！）
不過老伴就覺得好好玩，係要上去。你咪以為行隔離條鐵鍊木梯安全呀！
除左一定濕身外，平衡力同手腳力都要好，真係搖到暈架！
上面有個龍洞裝飾（真係好高，小心呀）
照老伴講，裏面還可深入，步道依然係鐵板棧道同鐵鍊木梯，都幾危險，
入左去一陣就番出黎（始終無人照應，唔安全）。
在無人幫手下，要在十秒內完成一定距離嘅自拍，對我地都唔係咁容易架！
從上下望
龍洞要爬竹梯上，無乜特別。
經龍洞轉入谷中
試行木橋，始終搖晃不定，影張相震哂！中段會落水濕腳架！
棧道及木橋蜿蜒深入，通道始終維持住一邊鐵板棧道，一邊鐵鍊木橋。
唔知有幾遠
，完全無人，太危險，走LU！
玩完歷險，又步行到雲峰寺。（其實沿途峽谷風光好靚）
基本上，如果怕上山太辛苦，雲峰寺亦有電梯可乘。（當然要俾錢啦）
電梯後嘅建築，係四星嘅雲峰墅苑，相片右邊係餐廳（停業），只售小食飲品同方便麵。
我地當然唔會搭電梯，窮遊就梗係11號啦！
厘座懸空建築上面掛滿風鈴
下望停左業嘅餐廳
沿棧道到雲峰寺，雖然我唔係黎拜佛，但感覺齋睇綿山建築都嘆為觀止。
部份寺廟建於天然山洞
五龍殿
洞內下望寺廟
感覺綿山景區好似個中國懇空建築嘅博物館
綿山多數景點，都以五語解說，分別有中、英、俄、韓、日。
此空王真身殿有1400年歷史，始建於唐代，中間係空王嘅真身佛像。
（經確認，綿山最少有真身佛像15座）
明王殿嘅雕刻非常精工
厘氹水叫轉運池，睇怕要到旺季先轉運啦！
繼續前行（無欄就真係唔敢行呀）
前面厘條之字懸梯好壯觀，睇落好險，人多得唔得架！（錯覺）
加埋個影，好正！
望落去幾有氣勢！有畏高嘅可能唔敢行。
其實之字梯係好寬闊穩陣嘅石階，好安全。
除左下望，遠眺山脈同峽谷一樣咁靚。
雲峰墅苑已經喺腳下啦！
終於到頂啦！
返落黎棧道，繞山而行，向正果寺進發。
厘座塔嘅遠景，我第一眼嘅想像係＜蓮花托塔＞
（白癡，似城牆上嘅塔就真啦！）
穿過上方院度門，沿棧道行。
有介紹
門口寫住＜千年古剎＞
崖上嘅騰雲龍雕
先到正果寺，據講，正果寺內存13座包骨真身像。（無影到）
從靈應塔回望正果寺
靈應塔底層（層數是外七內九）
往上木樓梯（每層風格如一）
頂層陽台
沿山路返落地面，見有幾條大鐵鍊（大概三對）可攀上山，咁樣玩野，我地就玩唔起啦！
又回到雲峰墅苑，搭車返酒店充電抖下先。
午休後再度出發到距入口首個景點＜龍頭寺＞，由厘度上龍脊嶺。
如果唔想行，俾60蚊搭索道就上到去，前面打橫果座就係售票處。
（唔使錢？）咁就跟我地行上去啦！
繼續行，都係石階。
此高處下望，視野算唔錯啦！（山西空氣差，經常灰濛濛，望唔遠）
可以遠眺晉中平原
阡陌梯田盡在眼底
上面有些少景點，唔算吸引。
厘個唐營有無都算啦！
介子推母子像（有關綿山與介子推嘅典故，寫完綿山，喺溫馨提示再提供資料）
走囉！繼續步向蜂房泉，厘個紙板交通警型唔型呀？（搭車睇到影唔到厘D景）
到左蜂房泉（個泉呢？）周圍望都睇唔到厘個景點主體喺邊喎！
哦！原來就係岩壁上十多個球體，佢地表面係苔蘚，有少量水流釋出，
據介紹，厘個景觀全國罕見嘅！
最右邊岩壁上係蜂房泉主要嘅分佈點。
好喜歡綿山嘅懸空建築，有D已經二千年歷史，尤其是繞彎前突出嘅山門，特別有氣勢。
跟住再步往大羅宮（區間車罷完工，有車坐啦！)
嘻嘻！不過我地都無坐，真係好享受峽谷風光。
大羅宮嘅標誌性電梯好觸目，大紅色，係全景區最平嘅電梯；
我地先入地面層嘅殿（巨樹根後）。
綿山係融佛道於一山嘅景區，大羅宮屬道教，我對寺廟內容無研究，只覺此殿好玩，洞頂有石鐘乳（假多真少），且滴水，佛像旁有石筍，地上灌水，人行樁上，如走水上梅花樁。
旺季時，遊客要在此排隊上去大羅宮，有時排個幾鐘。
我地由鐵欄旁嘅樓梯上（又話電梯抵搭
由下上望
登上D，可見整個大羅宮依崖壁而建。
逐層而上，景觀當然有變。
到達大羅宮 , 入口走廊置有多隻巨型銅鑄祥鶴。
牆上仲有＜大道無名，長養萬物；上極無上，天中之天＞嘅橫匾
第一層陽台嘅龍柱雕頗有氣勢，同時亦可攬景。
厘D係價值連城嘅真品佛像，從其他殿集中喺大羅宮展覽。
(相信旺季莫講影相，連欣賞都可能未必睇得清楚)
厘層再上就係頂層嘅藏書閣
從高處下望
旁邊相連嘅棧道
時近黃昏，落返去搭車到朱家凹（返酒店）。
區間車可到每個景區，共分10站（其實仲有個天橋站，
喺大羅宮同一斗泉之間），每間酒店前都有車站。
據講朱元璋父親曾在朱家凹修練，因為喺酒店對面，所以留到最後先玩，
跟住可以退房坐車到旅遊中心離開啦！
厘個時候景點內嘅殿已經關門，我地上去只為觀景。
從上下望，清楚睇到臥龍賓館建於崖邊，仲有個透光天井上蓋。
中間平台上嘅如意左右各有神獸，上層左右嘅亭係鐘鼓樓。
再上係佛殿（聽日臨走前再黎睇過）
由此遠眺集賢居及山谷氣勢。 
最後由厘條石階返落黎 
16點後通常只有住客留低，17點後條山路無車行，咁靚嘅環境，
我地真係唔想返入房，情願周圍踱下。
咦！日落喎！可惜空氣較差，能見度低。（睇唔到喎
吓！拉近D啦！睇到未，天色灰濛，係咁上下架啦！
D7 完
28/10 D8
綿山風景區（一斗泉～天橋～朱家凹）~介休
今日預算16點前離開，之前喺介休仲問定個的士司機攞電話，萬一玩晏左搭唔到公車，
都可以call車嘛！（好似尾班係18：00）我地仲講好價，￥40+￥10包車接返介休火車站添！
（佢話要收多十蚊空返，合理嘅！）
言歸正傳，因為淡季只有一間餐廳營業，如果唔係，山谷嘅炊煙應該更靚。
我地尚欠三個景點未玩，出發啦！坐車去一斗泉。
厘間就係我見唯一營業嘅餐廳＜邀月樓＞，每朝八點同中午就有團喺門口等候。
一斗泉同天橋好接近 ( 由一斗泉都望到過去)
沿石階上，按指示去搵一斗泉囉！
點知兜黎兜去都搵唔到，太早又無人可問，不過風景好正，
算！暫時放棄，先沿棧道打橫行去天橋景區。
天橋下嘅寺廟，見唔見中間藏左條巨蛇？
喺山上嘅棧道，無論企喺邊，都可以睇到好靚嘅山景。
我地而家身處天橋上
相片正中嘅石柱其實係電梯，怕行嘅可以坐電梯，當然又
懸空長廊係天橋嘅一部份，到底長廊裏面係咩呢？
雖然全部門都開得，但只開頭尾兩扇啫！
一入去就見有個落下層嘅入口 , 係落去點化洞嘅！
直去整條長廊有好多神像同幾座香案
神壇嘅外邊係觀景長廊，上下視野都非常好，所以話唔拜神，齋睇景都吸引。
呢！天橋向下突出嘅長方建築就係點化洞，由厘度睇到，無論你由車路或天橋，
都能夠通去一斗泉果邊。
因為厘個時候，陽光照遍整個天橋景區，所以不得不先落返地面，影番張天橋全景。
仲有個一斗泉未搵到，時間尚早，我地唔甘心，返上去，
誓要見佢盧山真面，厘個時候有工作人員可問啦！
我地之前兩次經過厘個牌（寫住一斗泉），諗住應該喺旁邊架啦！
搵極都唔見，原來係由厘兩座碑與山石之間條罅隙行入去（堵牆轉角）。
原來因為維修改建，而家個一斗泉隱居左，你睇下。
唔睇猶可，一睇真係哭笑不得，得一斗水（氹），厘次明白撲水難點解啦！
還左心願，搭車返朱家凹，陽光普照，影張全景，我地有再上去D殿度（尋晚關哂門），
都係一般神像，唔上相啦！
跟住返去攞行理checkout，經＜大道之山＞牌坊往旅遊中心，
之前問過逢正點有車返介休，早D搭車出去辦退款手續。
我地行返落斜路，到超市門口等15：00果班車，順利返回介休站對面嘅格林豪泰快捷酒店。
D8 完
遊玩綿山景區資料：
外接交通
～綿山風景區屬介休市，最便捷的公交方法是乘火車到介休站（非高鐵），出站直行到大路的行人道轉左，前行百零米，見一小廣場上的公車站（像香港小巴），有介休往綿山公車（￥5），車程約半小時，每小時一班。（詳情圖文參考73#）
～在介休站出口左側，德克士旁的路邊，早上有綿山專車開出（參考75#綿山區間車大巴圖片），旺季每天從08：00-10：00左右，有兩至三班；淡季每天只有08：00左右一班。(￥10）
～萬一車剛開走，要等上一小時，可考慮乘計程車前往(大多不打錶的)，一般包車￥40，拼車每位￥10，當然得看節假等因素。據司機說，黃金周時，遊客不問價，拿著兩三百元擠上車的(呵呵！真不負＜黃金周＞之名了)。
景區內交通(區間車)
～景區內旺季區間車￥50／人（任搭），淡季（1/11-31/3）不提供區間車服務，無論淡旺季，自駕人仕汽車可直駛景區，私家車停泊費五十元（住宿期間）。若在淡季前往，又非自駕者，最好先打電話查詢，弄清楚交通安排。（對不起，這點我忘了問）
～綿山旅遊中心到首個景點＜龍頭寺＞，距離有好幾公里，此段難以步行外，其餘景區之間，可安步當車，沿途景色甚美。
～綿山景區非常大，即使不拜佛，其懸空建築多不勝數，猶如博物館，令人嘆為觀止，加上峽谷風光，值得住上兩三天，若要細遊影相，手持導覽地圖較好，每天只宜玩三至四個景點（視體力而定）。
～ 若想省住宿並速遊（比旅社細遊），可考慮住介休，08：00前抵綿山景區，遊玩景點乘電梯上，
步行觀景而下，並備乾糧，17：00前離開，返回介休。
～區內絕多景點有付費電梯或索道，方便遊客，大羅宮最平宜(￥5)，龍脊嶺及介公嶺索道最貴,來回￥60&￥50, 其餘約￥15單程。
門票及住宿
～若在景區內住宿，門票五天內有效，旺季￥220，淡季￥110（昨見官網為￥128）。
～淡季不受理任何網上預訂（包括門票、車票及住宿），遊客只能親臨辦理。
～區內賓館以望雲閣最平（床位80），其餘有兩間三星，四間四星，標間正常大概二百多至五百不等；個人認為需對酒店有降級的心理準備。
～ 此行所得經驗，住中心區域較穩妥（如臥龍賓館／雲峰墅苑），萬一遇上沒車可坐（旺季擠不上／遇上罷駛），都能走路到前後景點；若住頭尾，走到景點也已累死了！
～景區內所有消費，皆使用充值卡（包括門票），離開時到旅遊服務中心對數，辦理退款手續。
餐飲
～旺季供應充足，淡季提供正式用餐的只有極少數餐廳（我只見邀月樓一間），最好自備少許乾糧/即食麵之類。（景區內也有售，只是稍微貴點。）
～若未及補給，在介休公車站後方（火車出站後左邊），有一大型購物商場（鼎尚時代廣場），地庫是大型超市，有助補給。
官方資料
～綿山具歷史性，其典故值得了解，尤其有關介子推與寒食節（清明節）的故事。
～所有有關住宿（七間賓館）及景區內外交通、票務等，皆由綿山旅遊中心統一辦理。
以上兩點，可參考其官網資料，逐一細看。
http://www.cnsanjia.com/index/main
29/10 D9 介休 ~ 張壁古堡 ~ 祆神樓 ~ 后土廟
今早同樣到火車站旁嘅公車站（與往綿山一樣73#），不過係乘4路張壁線
（每卅分鐘一班）往張壁古堡，總站落車就係售票處，好方便。
而家新建嘅售票處旁，仲有大螢幕介紹張壁古堡嘅風光同古蹟。
張壁古堡地圖
關帝廟入口（軍事地道入口在廟內）
因為出口離開左關帝廟，所以先遊完關帝廟，最後再入地道。
放有好多歷史性嘅碑刻
其中一座建築僻為展廳
城牆上嘅魁星閣正在維修
從城牆下望
古軍事地道入口位於另一座建築內
地道內光線較暗，共分三層，有D仲未開放，宜帶備電筒 ; 實際環境無咁光，
但指示清晰，唔使擔心行錯路，不過淡季如果一個人行，細膽嘅可能驚驚地。
整個地道好好行，基本唔使低頭（特別高人例外），亦無需手杖
（我地習慣用，又可傍身）。
多數嘅窯會有註明，例如：指揮所
俘虜窯
將軍窯
厘個地方睇哂上下三層
個陷阱好有古裝武俠片feel
厘條地道，有另一地道監察住。
以樹木拱固地道壁
全部有指示，可以放心行。
厘個係出口之一，不過而家封左。
行上中層
從中層下望地道堡
厘D支路未開放，通通封住，所以唔怕行錯。
終於見到個牌，離出口不遠啦！
嘩！仲有水井添呀！真係可以長時間藏身囉！
個井而家仲有水架！
出到出口啦！應該係廚房嘅灶頭上。
出口好似好僻靜喎！
有哂閉路監察，仲寫住叫遊客小心言行舉止添！
出口係山腰嘅山路，都唔知身在何方！按地圖應該喺關帝廟嘅西北方。
唔使理，得一條路，沿山路落山就對啦！
以前厘度有食肆，環境仲幾好添！而家執左LU！
落左山沿路行入村
村內有荒廢舊屋，亦有新建村屋。
整條村比較維持古舊狀態
跟住去興隆寺
興隆寺前有個好特別嘅扇形明塘
目標到啦！就係興隆寺。
門前有寫住＜天上奎星，人間張壁＞對聯
厘個寺群建築好有層次感
我地自左邊梯級而上
從上下望村巷
真武殿
空王殿外厘兩座明代燒製嘅琉璃碑屬全國罕有，黎張壁，千祈咪錯過呀！
殿頂嘅各種琉璃雕刻，唯肖唯妙。
殿外還立有多座碑刻
幾座殿皆建於高處
部份正在維修
主殿對正嘅戲台
正好係柿熟季節，又大又紅。
二郎廟正維修,唔太特別，唔上相啦！
走LU！沿城牆離開
經過厘棵抱柳古槐樹掛滿紅
繼續沿城牆到停車場已經差不多兩點，我地漫遊左接近三小時
（來時向司機打聽班車時間，佢話遊一小時太足夠啦！），哈哈！結果我地玩左半日。
厘位師傅實在太體貼啦！將車泊喺樹下，乘客上車就唔使咁熱啦！
咪住，大群羊經過，梗要影埋先上車啦！
從張壁返回介休站只需半小時車程，附近食肆林立，求祈醫飽肚，
就步行廿分鐘去后土廟（在介休站北面，請參看溫馨提示138#），
估唔到厘廿蚊真係抵睇（諗住土地廟通常都較細架嘛）。
先黎到一個廣場，牌坊上寫住咩呢？睇唔明添！估佢係厚德載物卦，
不過留意下，厚字上下由后土組成，唔知有無估錯啦！
厘度係后土廟嘅側門
廣場上一景，都係后土廟嘅外牆。
后土廟前嘅五龍照壁
新修嘅正門
整座廟佔地九千多平方米，整個建築群好豐富多彩。首先入前庭，
一邊係進入內裏各殿，一邊係戲台。
剛好有人唱戲自娛
厘個前庭咁大，個台又長又大，相信可以舉行宗教活動。
跟住再入一進，無數過一共有幾多進，總之層層深入啦！
好熟識嘅土地公
關帝廟
裏面嘅神位屬窯洞設計
厘度仲有座碑亭
由門外直望，一進又一進。
三清樓建築好考究 
咁大型嘅廟群，當然唔少得座華麗嘅戲台啦！
頂上嘅琉璃雕刻梗要有睇頭啦！
唔止木雕細緻，兩旁嘅八字影壁後，仲巧妙咁藏左上台嘅石級。
前台中央仲有個凹位 , 係可供出入嘅門。
台低下層睇黎可以做後台裝置，牆壁既係支撐戲台，又可作間格，
啱哂大佬官裝身休息，非常寬敞。
古廟內梗盡量保留番D古樹啦！
再入一進，護法殿。
頂上嘅琉璃飾
黎到心臟地帶，后土大殿，
左右兩邊係三官祠同真武殿，裏面嘅神像雕塑應該好有歷史啦！
又入一進，過殿。
到最內嘅山門殿
因為只開放正門，所以要原路出去。
上埋正門旁嘅亭樓，下望內庭售票處，
外望五龍照壁
行番出去外面圍牆，所有門都唔開放。
我地參觀完后土廟，再往祆（音軒）神樓，先沿體育路直到順城路。
估計當地政府想將厘條街打造成文化旅遊街。
條街都幾長，但似乎成效馬馬，好多吉舖。
行到街尾，離遠就見到啦！
據講厘座祆神樓係全國唯一保存嘅祆教建築，（即拜火教，
睇黎祆神樓範圍唔係好大
廟前整個三賢廣場
廣場都幾大，右邊梯級上中央有琉璃牌坊同琉璃雕像，
左邊方形黑頂嘅現代建築係介休博物館，可惜我地無時間入去啦！
廣場附近亦有座城隍廟，不過無開放。
影完相返酒店，途經一所幼稚園，厘座前林宗書院係歷史建築，屬保護文物。
D9 完
D9各景點的溫馨提示
張壁古堡：
～火車站旁的公車站（與往綿山、王家大院同一公車站，請參閱73#），乘4路龍鳳張壁（龍鳳是指龍鳳鎮）總站即到售票處。
～張壁古堡門票￥60（去哪兒￥54）
～進關帝廟後，勿急著進地道，先遊關帝廟，再進地道，因出口在山腰，離開了關帝廟。
～地道高度可容一般人，故無需彎腰，有的地方較暗，帶備照明較穩妥（手機電筒功能也可），萬一地道內停電（會是全黑狀態），也能安全走出地道。
～遊畢關帝廟及地道，參觀興隆寺時仍需出示門票，需把門票存好。
后土廟及祆神樓：
～ 從介休火車站向北步行廿分鐘即到后土廟，門票￥20；
～ 遊畢從后土廟向東北步行約廿分鐘，經順城路（旅遊文化街）即到祆神樓（免費），若時間配合，可順道參觀三賢廣場上的介休博物館,（參閱137＃）附近還有城隍廟，也屬文物保護單位。
～ 介休火車站 > 后土廟 > 祆神樓步行路線圖
30/10 D10 介休 ~ 王家大院
今日行程好簡單，只遊王家大院，早餐後，又到介休火車站旁嘅公車站
搭11路到總站＜王家大院＞。
整理完王家大院嘅相，有時連自己都搞唔清邊間打邊間，整個景區有成四萬五千平方米，
百幾個院落，千幾間房，但實際佔地達25萬平方米，比紫禁城嘅19萬平方米仲要大，
有山西紫禁城，民間故宮之稱，所以有人話：王家歸來不看院！
王氏家族擁有咁龐大規模嘅大院（我嘅概念佢似座城多D），無辦法想像當時王氏嘅財富，
唔係富可敵國都差不多啦卦！
好！言歸正傳，咁大嘅景區，點寫好呢？唯有將我最欣賞嘅建築同雕刻
（亦係大院著名嘅），集中分享下啦！
反正今日預左全日，唔使急住入場(￥55)，先由外圍睇起，係喎！
唔記得講添！如果諗住行全日，最好自備乾糧啦！（零食泡麵汽水是有的）
城牆外圍
東西院間的連接天橋
700年歷史嘅文廟，售票處同入口都關左，正在維修。（又少一景點）
文廟嘅鯉躍龍門照壁細膩精緻
既然文廟入唔到，去孝義坊後面嘅王氏宗祠參觀，厘座祠係由孝義坊發展而成。（免費）
牌坊下嘅十隻石獅活潑生動
院落對正三間窯，同大院內嘅傳統建築差不多，雕刻唔算特出。
正中頂上有＜欽賜世襲恩騎尉＞匾
地下一旁放有碑刻
二樓係供奉祖先嘅神樓 
外面仲有戲台添！
跟住去到宗祠旁 , 成品字形嘅三度牌坊，
＜太僕坊＞＜純孝苦節坊＞同＜節孝遺芳坊＞
太僕坊屬嘉慶九年（1804）
其餘兩座都係雍正年間（1726）落成
喺太僕坊嘅後面仲有座戲台正在維修
睇完外圍，當然入去參觀由王靜升始建嘅王家大。。。大院啦！
我地由東院嘅高家崖大門入口
導覽圖 
入口上有閣樓，大門連接條石板窄長斜路，兩面高牆，已有易守難攻之勢。
我無法逐一介紹每個院落（根本記唔住
有D數開幾進，有D細D，其實每座每間嘅石雕、磚雕同木雕，都令人嘆為觀止，
即使漫遊一整日，仍感走馬看花，好彩嘅係無乜人，睇得舒服，亦慳時間等影相。
先睇樂善堂建築，其實每個細節嘅雕飾，都蘊含深意，厘D我就唔班門弄斧啦！
正房窯洞 
通二樓梯間入口
王氏先祖神樓 
從二樓外望 
由樂善堂可以直通凝瑞居
對厘部份有興趣的話，俾條link大家慢慢嗒真D啦！
http://you.big5.ctrip.com/travels/jiexiu2982/1833742.html
續往凝瑞居
通書齋嘅門都秀氣過人，使唔使咁靚呀！
厘個大院，大到連自己喺邊都唔清楚。
王家大院好重視土地祠，每座院落都唔少得，而且好講究添！
有心人要為王家大院做個土地祠相集，肯定題材充足，我係咁易都影唔少。
講時講，多數土地祠都安喺暗角或走廊位，係咪可以起埋照明作用呢？
厘個安喺灶旁，得一個。
厘度門兩旁安左一對土地祠
每座院落嘅土地祠都咁精緻，房屋嘅木刻更加精雕細琢啦！
唔係話厘幾間房屋特別精工，而係幾乎每間每戶都咁靚，只係求祈貼D出黎，況且，睇得興奮時，話之佢邊間打邊間吖！只係好貪心咁想睇多D，己經心想，今次未能細賞，下次一定要再黎過。
厘間睇怕係後期畫蛇添足卦！（如果估錯左就對唔住啦）反而唔討好囉！
雖然有D房做左商店，但為數唔多，整個景區安排得幾好，無喧賓奪主，既唔影響觀景，
亦無阻遊客影相參觀，OK嘅！
屋主人似乎要張視線高度嘅每寸建材都刻滿圖案，而且多數隱藏寓意。
坊柱下嘅門枕石一樣落足心思，除左鯉魚（年年有餘卦），仲有獅子。。。蟾蜍同其他吉祥獸。
睇完王家大院，先知原來從屋頂嘅鴟吻（龍的九子之一），可知屋主人係官商還是民商，王家大院嘅大小鴟吻，全部係開口嘅，即官商（為民開口）
照壁上嘅鴟吻，一樣係開口嘅！
除左石雕木刻，厘度嘅磚雕，一樣吸引遊人目光。
連對聯都係磚雕嘅！
厘個透光時，令人讚嘆啦卦！
屋前嘅栓馬柱石雕就唔使講啦！就算上馬石一樣無忽略，依然具欣賞價值。
突顯屋主人身份同地位嘅門當（門墩）就更加講究，況且，
清朝人民嘅門當，都有嚴格規定，唔可以亂黎嘅！
我無研究過，厘兩戶應該係文官卦！(方形)
厘三間係當武官嘅！（圓形抱鼓石）至於幾多品就留番俾大家研究啦！
連柱基石、石階兩旁嘅石雕，一樣咁誘人。
跟住，我地又沿斜路行去紅門堡，無乜人，係咪好正呢？
我地入左數十個大小院落，基本上通行無阻，高低角度隨你影。
每個院落都咁靚，相信花左唔少人力物力去維修。
院落建築層層疊疊，好立體，具層次感。
午後嘅王家大院，幾乎任我地行，經常入一個院落，都得我倆。
上城牆嘅石階都有石雕
無人！夢想下喺自已大院遊花園都得。
遠眺崇寧堡溫泉酒店
厘間酒店嘅入口喺另一邊
俯瞰紅門堡
整個城牆上得三幾個遊客。
城牆外簡樸民居
城牆內豪門大戶
童心园嘅扇形涼亭好別緻
王家大院距離紅崖峽谷只有3至4公里，喺厘度作招徠，醒目。
俯瞰文廟座塔
沿斜路返落紅門堡
每邊各有一口古井，一叫龍澤 , 一稱鳳泉。
厘座胡正先生嘅樹雕像別樹一格，我好欣賞。
馬道上厘兩支旗杆，無番咁上下官階都唔可以安喺門前架！
瞻月亭
參觀王家大院，由進門一刻到離開，個人覺得全無冷場，每有驚喜，
就算臨別走喺馬道上，無論係院落門戶，
或者木刻牌樓<垂花門>，都令人驚喜。
真係唔捨得走，出口係紅門堡，屬西院，留心睇下門內，都係一條窄長馬道，好有氣勢。
王家大院附近街道，食肆林立，唔憂搵唔到食啦！
D10 完
D10 王家大院溫馨提示
～到王家大院，個人認為最理想是先到介休住上兩天（太原可乘火車），反正介休有多個值得遊玩的景點，公交都集中在火車站旁，非常方便；當然從平遙古城乘專車，或太原乘長途巴到靈石也可。
～介休火車站旁的公車站分別有到綿山、張壁及王家大院的公交（參閱73＃），11路公車直達王家大院，每卅分鐘一班，車程約45分鐘。
～王家大院非常大，足可遊覽一天，也許是我失覺或淡季，景區沒見餐廳食肆之類，若是一整天遊，宜帶乾糧（零食泡麵飲品是有的），現場所見，團隊多集中在上午，午後團隊退去，大院非常清靜。
～除購票入景區內，大院外還有王氏宗祠和三座牌坊，屬免費參觀，另外還有靜升文廟（另付門票），可惜今次維修未能進。
31/10 D11
介休~(2463; 6:35-8:49)臨汾 ~ 堯廟汽車站 ~吉縣 ~ 壺口
今早清晨到介休火車站，搭乘06:35火車到臨汾，爬左文，發覺淡季去壺口交通較煩，
都係揀周末去好D！反正到臨汾先08:49，網上資料話堯廟汽車站14:30有直達壺口嘅長途巴，
先坐3/11路公車到堯廟汽車站睇睇。
原來堯廟汽車站無厘班車，只有到吉縣嘅（早有心理準備），剛好吉縣車就快開，
拿拿淋買票上車啦！網上話出門口搭,平十個大洋（我情願喺總站坐個靚位啦），
果然，三分一都無，一轉出汽車站門口第一個站，D乘客一湧而上，滿坐
（厘十蚊建議唔好慳啦）。
臨汾市容
大巴走高速到吉縣出口，車會停喺路邊，有人上車嗌：
去壺口拼車25蚊位 ; 但我地選擇去到吉縣。
之後發覺有少少嘥時間，吉縣較落後，人口少，喺巴士站門口，同對情侶拼車，
四人100蚊（早知喺高速出口落啦）; 不過亦有網友話喺高速出口等拼車，等唔到，
又無車去，結果一個人包車到壺口，仲貴。
講下D題外話，的士司機可能諗住做埋回頭生意，對我地講話個半鐘已足夠，包你叫悶；
我答佢已經訂左兩晚酒店，唔會走住，點知佢好肯定咁話：＜包你後悔＞。
（網上都好多人話一至個半鐘足矣）
13點到達壺口
當然先入棧啦！我地唔係住牌坊後面厘間，係佢後面果間。
我地住壺口瀑布大酒店
厘欄係所謂窯洞（除左唔使上樓梯，同我地D房無乜分別）
我地都係住番傳統嘅房
搞掂哂，出去周圍蕩下,預留半日係如果陽光普照就去陝西果邊，但如今陰天
（D相有D係第二日嘅，因為陽光好D），睇左天氣預報，聽日全日天晴，
都係留番聽日先入瀑布，無謂嘥門票嘛！
先由山西向壺口反方向去黃河大橋，睇下係咪通行無阻先。
其實由山西厘邊嘅售票處，去到陝西嘅售票處，唔係好遠啫！
（係售票處咋！距離景點仲有三公里有多架！）
橋頭入口旁有派出所
唔怪之得網上不斷有人問厘條橋通左未啦！原來2010年搞到而家。
現場所見，一般私家車都可以過，但中巴就未必啦！小型麵包車應該無問題，
我見一架類似香港小巴嘅就唔俾過。
黃河大橋上繼續前行
到達陝西啦！
厘邊橋頭一樣有個界碑，同樣寫住大橋維修，見唔見對面山腰寫住山西兩字呀？
路牌清晰，按指示前行。
我叫佢做人猿獅子山
厘度就係十里龍槽嘅一部份，地貌特別，個人覺得好讚！（點解有幾隻唔郁嘅船）
厘幾隻係挖沙船（諗起愚公移山），佢地要將河水不斷帶來嘅大量沙泥挖走，
保持河流暢通。（我諗順便可以採沙卦！）
其實行到黎厘度，都仲有三公里腳程架！所以唔行得嘅，一係就由陝西宜川到壺口，
一係就喺山西包車到陝西壺口，得幾公里，相信唔會貴。
（咁你又行
厘邊嘅牌坊前有石獅
過左望番轉頭
喺厘度望過山西，見到黃河壺口飯店，佢左邊紅頂嘅就係我地住嘅壺口瀑布大酒店。
陝西壺口收費，網購￥76，滿以為60歲以上半票，點知陝西厘邊65以下全票，
65以上免費，早知網購定啦！
兩省壺口導覽圖 
由陝西果邊嘅黃河大橋 , 向壺口瀑布反方向，行去孟門山只需十零分鐘。
黎到有D失望，當然唔會俾30蚊上島啦！
傳說孟門山係大禹為疏導洪水，用刀將佢劈成兩塊，
（係真唔係呀
孟門山主島末端，供有觀音立像面對另一島。
除左觀音像，主島中央仲有座大禹企喺靈龜上嘅雕像。
要上孟門山，需要買票過橋。
售票處及入口
當時所見，島上無遊客。
遊下遊下，都行左兩個幾鐘，去買生果囉！(我地唔係喺度買，不過都係類似嘅攤檔)
見小商店賣￥1／個，於是問老板，五蚊七個得唔得呀？（不行，要買就一袋，五塊。）
吓！
不愧是壺口蘋果，皮薄、爽、甜、脆，真係好食，加埋後來有位司機又送左四個大蘋果俾我地，
足足食左一個禮拜，仍然都咁好食，證明真係好新鮮啦！
慢慢行返酒店 , 休息一陣，去酒店餐廳食飯，價錢唔貴，兩小菜，一盤餃子
（住客送一個小菜），水準OK！都係八十蚊，分分鐘平過大排檔添！（右邊係餐廳）
D11 完
1/11 D12
壺口瀑布（上午山西，下午陝西）
今日天色非常好，整日都陽光普照，爬文後，知道上午到山西，下午到陝西係最理想嘅時間，
（落雨點睇呢
因為住喺景區口，可以慢慢行去售票廳，
售票廳左邊係區間車上落車站，舒適大巴，1/11剛好入淡季，20蚊來回，唔貴！
終於可以一睹世界唯一黃色瀑布嘅真面目啦！
景區入口(￥100+20區間車)
沿跨越河床嘅橋行到壺口瀑布（想唔到河床咁乾涸）
開工LU！男驢主打扮醒目，又唔介意上鏡，所以特別好生意。
厘位女驢主唔肯上鏡，生意就差DD，加油呀！
對面係陝西，好似艘船嘅建築叫觀瀑舫，據講每層有觀景台對住壺口瀑布，又位處景區內，
可以唔使等景區開放時間都欣賞到，可惜網上訂唔到房，打電話去又無人聽，作罷啦！
水底冒煙係壺口十景之一，一定睇到。
睇左一輪，太陽仲未照射到，落去龍洞Lu！
喺洞內係由下上望瀑布，洞內周圍滴水，好彩有備而來，
外套防水風褸啫（擔遮會俾人鬧架）！
洞壁上引用李白詩句＜黃河之水天上來＞
睇到未？就係等陽光出黎，只要有陽光，就一定有彩虹。
即是淡季，要無人，又無滴水嘅位置難求呀！可想旺季係咩情景啦！
龍洞外望
只要行前小小，就變成水簾後觀瀑（仲要濕身）。
水底冒煙加彩虹飛渡
因為時間充足，逗留喺龍洞大半個鐘先返上去，上午對岸陝西遊客不多。
由厘度睇，陝西觀景台較多角度。
唔止瀑布有可觀性，龍槽嘅地貌都值得欣賞。
入景區咁多個鐘，難免人有三急，洗手間喺入口嘅外面，向檢票員講聲就得，
去完咪走太快，洗手間喺個高位，可以俯瞰整個地形。
好大部份河床乾涸
上午山西厘邊順光
老兄，你玩咩？捉住彩虹？
只要有陽光，無論河岸觀景台亦或龍洞，都能睇見彩虹飛渡。
D團開始殺到，嘻嘻！全日最旺啦！所以睇得舒服。
走LU！返酒店食午飯，休息下，下午再出擊陝西壺口。
小休後，從酒店出發，經黃河大橋步向陝西壺口（路徑請參閱183＃）。
陝西壺口有兩個售票處，如果只想欣賞十里龍槽，可以喺售票廳旁前行，
三公里後仲有個售票處，到時先決定入唔入都未遲。
對岸係山西往壺口嘅步道，幾乎無人行，因買票時，售票員極力游說加買區間車票
（其實都抵坐嘅）,況且陝西厘邊無區間車。
前方係黃河大橋，我地就係經大橋過黎，右邊係往陝西壺口嘅車道。
且個人認為要欣賞十里龍槽，陝西一段較能接近觀賞，沿途又有圖文解說。
可以隨意走到河邊
去到接近處車道被截，需改道，遊人可繼續前行。
陝西壺口瀑布景區入口
入口內左旁係觀瀑舫，即係喺裏面住，可免票玩多日囉！
旺季咪使諗可以免費企喺度影相
因為係搵食專利位嘛！（淡季就隨便啦）
下午輪到厘邊順光，同樣可見水底冒煙加彩虹飛渡。
對岸嘅山西，人流減退。
厘邊嘅河床水量較多。
唔使問都知厘個係正位啦！不過被影嘅要濕身喎！（影靚相梗要犧牲啦）
無可否認，厘邊嘅低位無龍洞咁正，不過不另收費喎！
霓和虹都睇到
成凹字形嘅龍槽
厘度就係早上我地去山西壺口嘅龍洞，下午無哂人。
陝西厘邊可以欣賞到更多奇特地貌
容許走動嘅地方同角度更多
厘個無敵低位，夏天大水時可能被淹，未必落到去。
而家無大水，可以任行。
左邊嘅係陝西，右邊係山西，可見陝西嘅觀賞角度較多。
類似龍洞嘅水蝕洞 , 不過龍洞最靠近壺口，所以夏天雨後，經常被淹，落唔到去。
下午到陝西壺口嘅團較多，所以人潮一陣陣，厘團人黎遲左，無光！即係無彩虹囉！
近壺口嘅龍槽，兩邊都有小瀑布。
入口附近厘個石碑係團友必影，等極都有人，唯有借黎影埋啦！
走LU！沿十里龍槽向黃河大橋慢步返酒店，咁又玩左一整日，好滿足！
聽朝一早要返回臨汾繼續行程。
D12 完
2／11 D13 壺口～臨汾 ~ 古城公園 ~ 鐵佛寺
因為仲有今早嘅回程公交，所以寫埋D13嘅壺口回程先再寫壺口嘅溫馨提示。
問過酒店同當地人，都話每日只有一班車到吉縣，08：30有車，
我倆穩陣D，08：15喺酒店門口等，好彩早左，08：20班車就到。
其實車站喺個壺口瀑布石碑對面，張相嘅左邊，銀灰色車後嘅行人路上。
有趣嘅係司機好有人情味，未到酒店門口，已經不停響號，通知居民有巴士到，
我地係頭兩人上車，基本上伸手截車，司機都會停車上客，且沿途不斷響號作提示，
似乎居民同司機關係好熟識，聽到車聲就出黎搭車，厘種感覺好溫暖。
架巴士係咁嘅樣
今次幸運地去到吉縣(仲未到總站)，見大部份人落車，旁邊又有去臨汾嘅車
（我問過D車唔係行高速，耐好多架），於是問司機去臨汾喺邊度落車啦！
點知司機叫我倆跟住佢喎！咦！上架商務車呀！
走高速嘅長途巴都￥43啦！仲車到去火車站添！咁好人，俾左￥100，
佢好客氣咁送左四大個蘋果俾我地，估唔到離開壺口仲有段溫馨愉快嘅經歷，
多謝！今日遇貴人囉！
壺口溫馨提示：
～壺口自太原或臨汾，沒有直接交通（網上有資料說堯廟汽車站14：30是直車，
未知是否屬旺季班次），個人是在臨汾堯廟汽車站乘長途巴（班次較密，高速￥43）到吉縣，
再拼車往壺口（￥25）。
～拼車點可在高速出口路旁（有司機上車叫喊或請教司機），也可到吉縣總站門外找拼車，
一般包車￥100，四人拼車￥25/人。
～若打算即日來回，在臨汾火車站有不少一天團，人多的話，甚至可包車把兩省壺口都遊足了
（走高速約兩小時多一點）。
～若要漫遊孟門山，觀十里龍槽，不妨在壺口住上一兩晚
（但網上很多人說遊壺口一兩小時足矣，我被拼車師傅譏笑＜必定後悔＞）。
～黃河大橋暢通無阻，人或小車可通兩邊壺口，想省腳力，可在山西壺口叫車 ,
經黃河大橋到陝西沿十里龍槽走一段（近入口一段不准行車，請參閱201＃），
之後向前步往陝西壺口入口，順道欣賞十里龍槽，或包車直出車道往陝西壺口。
～進山西壺口的龍洞，最好穿防水外衣。
～遊兩省壺口，若遇天氣晴朗，上午遊山西，下午觀陝西，必能抓住彩虹（順光）。
～若季節適合，不要錯過壺口的蘋果啊！真的價廉物美。
～壺口返回吉縣的班車，每天只有08：30一班；（停車情況請參閱207#）
不過，在壺口鎮也有不少黑車可乘。
又返黎繼續D13嘅行程啦！
大好人師傅車我地到臨汾火車站
我地好容易就搵到酒店,放低行理就出去搵食。
（唉！又唔記得影間房，一般經濟型酒店房間，個人覺得都唔錯）
值得介紹嘅係京臨酒店樓下嘅羊肉湯，雖然我未幫襯過，人多捧場嘅就無錯架啦！
果然得！我見佢碗碗都要秤過，分量充足，味道鮮美，係此行食過最正嘅羊肉湯
（特別喜吃北方嘅羊肉湯）。
一碗肉雜湯加熱辣辣燒餅先￥19
新鮮出爐燒餅￥2/個
食飽先至中午，搭車去古城公園囉！臨汾巴士雖然無政府資助，不過都好抵搭，一般1-2蚊。
臨汾古城公園喺市區，係古城遺址，古城已蕩然無存，係個紀念公園，
內有收費嘅古民居景點。
古城面貌嘅幅參考照片
重建嘅部份古城樓
公園中心有座雕像，以獅、鼓為題。
一邊男，一邊女
四周有新修嘅城牆
雕像嘅另一方有座頗有氣勢嘅亭
屬正方雙簷嘅四角亭
公園內嘅古城大院屬博物館性質，需付費，因行程中睇好多古院，唔睇啦！
門口嘅栓馬柱
潮流雕塑，可謂新舊相融啦！
樓梯上去係銅鑄古城模型
厘座金頂寶塔我地一陣會去
古城公園部份景觀
遊完古城公園，跟住行去大雲寺（大佛寺），厘度原本係臨汾博物館，
而家門口嘅牌匾雖然都寫住＜臨汾博物館＞，但已經唔係果回事啦！
我地嘅目標係博物館後面唐朝嘅磚砌琉璃塔同大鐵佛頭
金頂寶塔保存得好好，頂層係八角形。
每層塔身有琉璃浮雕描繪佛教故事
塔低層入口有＜原頭佛祖＞橫匾
厘座巨型鐵鑄佛頭已經千幾年歷史
用個人做尺度下佛頭隻耳就估到有幾大啦！
時近黃昏，係時候返酒店啦！（未想食飯喎）周圍踱下，
咦！粥棚！（所見不少）係咩黎架！（出面咪寫住炒菜麵食囉）入去八左，
原來係快餐店，臨汾興叫粥棚嘅！有乜典故就唔知啦！
想買個連耳仔都保暖埋嘅口罩好耐，今晚終於俾我搵到。
中午嘅羊肉好回味，又入去LU！今次試山西片麵加羊湯，一樣咁正！
D13 完
3/11 D14 臨汾 ~堯廟博物館 ~ 鼓楼
到臨汾主要係去壺口，不過黎到囉！當然周圍行下啦！一於hea遊堯廟；
同去吉縣一樣，坐23／11路公交到堯廟汽車站，到左堯廟附近，
見有D建築被改成商業用途，仲有個遊樂場添！
附近嘅華門係2002年嘅新建景點，對我倆無乜吸引力，不過都影張相留念下啦！
厘座華表以華夏為題，長城作背景。
地上喺中國地圖，華表就豎其上。
黎到堯廟，門前地上以書本形式介紹廿四節氣。
每邊仲有太陽同月亮，以示陰陽合曆。
堯廟入口
入到去大道兩旁又有仿古文物介紹
厘座長廊內，牆上鑲有長300幾米嘅堯典壁。
千幾個名家寫嘅堯字壁
沿大道進入，仍有不少仿古文物介紹。
天下第一？睇下點！
都算大，不過北京嘅鼓樓上有好多個咁大喎！咁即係唔係天下第一啦！
其實黎堯廟，期望唔高，話哂平陽係4000年前，堯帝定都嘅地方，
被譽為華夏文化之始，主要係歷代國家級嘅祭祀場所，清代康熙、
光緒同慈禧就黎過厘度，咪參觀下囉！
先係虞舜殿
樣貌唔知有幾乘像真呢？不過都幾英武吖！
堯鐘樓
園內有唔少已經成熟山楂，不過好細粒，當然無摘啦！（愛護公物嘛）
堯廟範圍幾大，園內整潔深幽，加上淡季，行得好舒服。
雖說係堯廟，其實供奉左古三帝，虞舜殿之後係大禹殿。
塑像幾配合我小時讀書嘅大禹治水嘅形象喎！
有番咁上下歷史嘅景點，當然唔少得D古松老樹啦！
厘棵係1700歲嘅柏抱楸奇觀
堯井台
附近嘅民生雕塑
廣運殿係祭堯帝嘅殿
堯帝寢宮隱藏住佢同鹿仙女嘅浪漫婚姻
五鳳樓地面層四周放滿石碑同文物
上五鳳樓嘅入口石階
二樓目前展出清代皇帝玉璽照片，雖然係印刷品，但睇得輕鬆。
厘兩個有漢滿二文
厘個只有滿文
喺五鳳樓嘅陽台，仲可以俯瞰整個堯廟
又一棵古樹＜夜笑柏＞
厘座碑亭似係新修嘅
一場黎到臨汾，去睇下座落喺市中心嘅鐘樓囉！鐘樓被欄住不能上，只可以遠觀啫！
睇完鐘樓都差不多返酒店晚飯啦！厘晚就喺酒店閣樓食韓烤加一人一煱自助餐，
好似係50蚊位，好抵食。
鐵牛配長城嘅雕塑
D14 完
4/11 D15
臨汾(1096; 10:07-12:31) ~ 平遙 ~ 平遙古城
今早坐10：07火車到平遙站（唔係平遙古城站喎），輕鬆食完早餐先到臨汾火車站都未遲。
有一點要特別注意，如果搭火車到平遙古城，千萬咪去臨汾西搭高鐵到平遙古城站，
距離古城有七、八公里架！搭普通火車到平遙站落，叫車5-10蚊，行路都係十零分鐘咋！
（只睇站名好易中招）
12：31到平遙火車站
我地選擇北門入（行去西門亦可），由火車站行十零分鐘就到北門。
首先攞房放抵行理 , 酒店屬程家大宅改建，古色古香，兩張羅漢床，好有特色。
內院打理得幾乾淨整齊
門口嘅栓馬柱同登馬石都係新修嘅！
住近北門，一出去就係北城牆。
我地喺古城外醫肚兼熟習下周圍環境，跟住返入古城景點參觀。
平遙古城門票唔平 ,￥150（ 網購￥130），不過內容豐富，值得！六十歲以上仲免費，抵玩！
因為唔係中心區，古城內街道頗靜。
厘間當舖係唯一要另外付費嘅，門票包嘅21個景點都有排行啦！所以無入。
黎到平遙古城，首要梗係參觀下中國首家票號啦！
終於黎到聞名已久嘅日昌昇
唔敢太長氣，介紹些少佢地嘅架構啦！
整座建築有多進
先係廳堂同掌柜房
大掌柜房間
再入係文物展覽，日昌昇厘塊匯通天下橫匾，睇怕未黎過都聽過啦！
各分號嘅印章
銀票印模
厘D就係當時嘅存摺啦！咁輕巧，攜帶梗係安全好多啦！
有顏料生意唔做，轉行開票號，抵佢發囉！
咁具規模，無三位掌柜點打理得掂呀！
如果有興趣睇，博物館內對當時票號嘅運作結構都有詳細介紹。
運送車
當時手執牛耳嘅票號，建築當然有番咁上下豪華啦！
日昌昇出口
因為我倆中午先到，所以今日只參觀4間博物館，
再去嘅係日昌昇隔離嘅票號----＜蔚泰厚＞，原本賣燒餅嘅蔚泰厚，
見隔離豬籠入水，搵左日昌昇嘅二掌柜，改營票號，成為第二間票號。
無謀無智，點經營票號呀！
大掌柜房內嘅銀庫
連睇兩間票號博物館，可以加深認識。
側門嘅登馬石展現石雕藝術
古舊傢具保存得好好
馬吊呀！咦！隻數少好多喎！
建築格局似八陣圖
廚房
天井
平遙古城雖然大，不過周圍都有導覽圖，保證唔會迷路。
古城內經濟蓬勃，商貿發展遠至全國，梗要有配套運送金銀財寶到各地啦！
於是多間鏢局就應運而生 , 平遙古城有好幾間鏢局博物館
哈哈！諗起早年好多港人追看台劇＜保鏢＞，咪住。。。。
保鏢行業除左有人材管理，當然武器佔重囉！
厘D江湖黑語都幾有趣
典型嘅山西富戶建築，磚石木雕都咁出色。
鏢師行走江湖，日夜兼程，難免信鬼神之說，當然希望神靈庇佑啦！
天井空地亦作練武場所
已經四點幾，最後參觀＜蔚豐厚＞票號，佢係蔚泰厚嘅五間聯營票號之一，
之前睇左兩大票號，諗住唔仔細睇啦！點知厘度陳列左好多石雕同日用品文物。
大掌柜房
房門外有地下金庫
不過而家變哂人仔啦！睇下內地同胞幾富貴！
雖然厘度嘅石雕吸引，但睇完王家大院，已經無咁驚喜啦！
門前無論係登馬石，門頂木刻裝飾，亦或土地神龕都花盡心思。
已經五點，所有博物館都關門，我地都行得幾攰，番房休息下，順便沿途八下。
淡季連中心區西大街都無乜人，漫遊得好舒服。
途經所見
北城牆
返房歇陣，就係要感受下平遙夜景，順便食晚飯囉！我地住嘅客棧都著左燈，夜色更誘人。
古城內隨處可見嘅古宅民宿，不過有朋友竟然話好驚，唔敢住喎！
咁亦可以住喺城門附近嘅酒店，一樣好方便。
古城內食肆林立，豐儉由人，都幾多選擇。
已經關門嘅博物館
入夜後，酒吧相繼營業。
各種紀念品店
厘種非洲鼓店，店員即席敲鼓演奏，水準唔錯架！
古城仲聘有打更員，增添氣氛。
D15 完
5/11 D16 平遙古城
行平遙古城，如果喜歡參觀博物館嘅，可以話睇得過癮，但唔喜歡嘅，
就買個別門票好了（通票￥130）！我倆非常喜歡遊博物館，所以全日留喺古城內，
竟然行左四廟一教堂，八間博物館，馬家大院同城牆，真係少D腳力都唔掂，
不過你都可以坐車去部份景點嘅！希望今日行程無悶親大家啦！
早上喺民宿食完早餐外出
跟住就由遠而近，先到二郎廟，由於位處較偏，門口經常泊滿電瓶車，
想影張清境D嘅相，一早就得囉！
呂祖符碑刻當然係複製品
大殿對面係戲台
戲台兩側分別有鐘鼓樓
整座廟唔算大，一陣就行哂。
欄柵後面雖說係步行街區，但經常有電單車飛馳而過。
咦！有巡遊？表演隊伍過百人，都幾寵大喎！
好喜歡厘位婆婆嘅表演，夠專業，見到佢都感染到喜洋洋嘅氣氛。
奇怪，壓尾嘅竟然係個西部牛仔駕馬車。
隊伍遊行到厘間客棧就停哂落黎
好奇心驅使，跟入去八下囉！
咦！唔似表演喎！原來係迎親隊伍，黎真架！（嘩！好富貴啫）
新郎哥要抱得美人歸，少不了當眾宣讀愛的宣言啦！
吓！仲未算，又要唱歌，又要大叫我愛你。。。。仲要。。。
帥哥伴郎，咪掛住笑得架！幫口啦！
搞咁耐都未迎到親，帥哥新郎，辛苦啦！我走先，
趁D遊客湧哂黎，我地去遊景點先，你地加油啦！
兩頂花轎喺門口準備接新娘
你睇東大街幾清靜，多得新郎哥嘅迎親隊伍啦！
中國商會博物館
厘條八字樓梯背向門口，咁嘅建築，喺山西較少見。
鴉片戰爭之後，晉商與外國商人展開商業戰，中國最早期嘅商會由此誕生，
博物館主要介紹商會歷史與變遷。
屋樑做乜用水泥封到咁，失去原有味道啦！
原本屋樑可能好似咁
當然亦有山西嘅木石雕刻展品啦！
厘所博物館對我唔太吸引，行左陣就走，出黎見到隊花車車隊，仲以為只有中式花轎添！
（可能接送賓客用）
恭喜恭喜！終於贏得美人歸（表演者梗收人工又收利士啦）
我地參觀完一座廟，一間博物館，竟然無錯過喎！祝你地百年好合，連生貴子啦！
戥對新人高興完，又到華北第一鏢局參觀，其實同類博物館嘅展品都係差不多，
本住反正買左票，入去睇下有無驚喜囉！
大致都係介紹清代行鏢行業，鏢局結構。
通常鏢局都有個場地作練武
陳列左少量石雕
個人覺得佢地生活嘅禁忌、處世之道同習慣幾有趣，有D仲發人心省添！
鏢局因票號興起，部份財富流轉方便，同時清政府設立警察維持治安，
於是鏢局日漸式微，至清末亂世，財物人口大量流動，鏢局又蓬勃起黎。
鏢局都有嘅地下銀庫
跟住我地去到東大街尾嘅清虛觀，以為拜神地方，無乜野睇，點知又有些少驚喜喎！
一到門口，兩座巨大門神木雕像已經夠吸引。
之前喺二郎神廟都見過厘座呂祖符碑刻，不過厘座仍係複製品。
其實厘度無乜香火，係古文物嘅博物館，咪錯過呀！
平遙生活點滴
紗閣戲人係平遙嘅手工藝術，以木閣作迷你戲台，手工精緻製劇中人物黎表現戲中場面。
觀內仲保存著好多破損佛像，碑刻等。
放喺露天嘅亦唔少
窯洞內又有好多道教木雕神像，手工精細。
清虛觀位處東大街尾，當然近東面城牆啦！
本來諗住上城牆，可惜厘邊城牆入口關左。
續去城隍廟途中，經過間教堂，西方建築風格，外表好靚，但望下度門，
好似廢置左咁，試下推門啦！咦！入得喎！
裏面非常光猛，簡單整潔，即係仍運作啦！
教堂另一邊門緊閉
跟住又到城隍廟，因為同文廟都係位處東北角附近，所以門口經常泊滿電瓶車，
如果唔想行，可坐車代步，當然要自費啦。
一進入步道，有十二生肖石雕噴泉，應該係新修嘅！
獻殿旁有碑刻亭
對面係戲台同鐘鼓樓
另外仲有側門進入灶君殿
財神殿亦有戲台，建築更細緻。
頂上嘅木拱用作聚聲，有擴音作用。
供奉各式土地神嘅殿
展示山西木刻有幾精湛
厘條街夜晚幾旺，好多遊客黎按摩。
文廟外面有座九龍壁
位於古城東南角嘅文廟
要用馬或驢先推得郁嘅磨
厘個鰲頭，據講只有新科狀員先可以企喺宮前鰲頭上接榜，
你睇個熬頭得咁少位置，想唔獨佔鰲頭都唔得啦！
文廟內嘅敬一亭中置有巨鼎
厘D牌上名字，係山西平遙中榜嘅人。
尊經閣二樓供有魁星，佢口中含左張紙，唔知係咪中榜名單呢？
魁星樓眺望
落番去庭院度，有度龍門，中魁子孫喺敬一亭祭天後，到厘度就遇意登龍門啦！
龍門後面有個文天祥手書嘅魁字，不過少左撇嘅！
據講，平遙讀書人多，但無一中榜首，父老用心良苦，諗住待有子孫高中狀員先補上，
可惜到科舉結束，平遙人都未有中狀員嘅，厘撇可能係平遙人嘅遺憾囉！
大成殿、欞星門。。。等，都係文廟必具啦！
圍牆上刻有孔子生平嘅磚雕
離開文廟後，準備上城牆啦！因維修關係，只能喺東面上，正好順路，
不過城牆入口一定要經東南端嘅＜雲路老街＞進入。（旺季有東、南、西、北四個入口）
厘條係酒吧街，所以白天幾乎無人，夜晚應該熱鬧D。
搞笑版
走到盡頭就係上城牆嘅入口（需門票）
睇黎厘間星級民宿都無乜生意
維修關係，部份封閉，不過仍欣賞到重點景觀。
厘座城牆係中國保存最完好嘅四座古城之一，喺城牆上，
當然可以遠眺古城全貌，亦可觀城牆雄偉。
魁星樓
瓮城
城牆上敵樓好有氣勢，可惜天氣馬馬！
城牆上眺望古城民居
走LU！
整個古城有好多四合院民宿
跟住參觀首間票號＜日昌昇＞大掌柜雷履泰嘅故居
雷履泰嘅生活史
石梯嘅扶手同欄板都有精美石雕
鯉躍龍門
傳統山西嘅建築設計，即是土地神位都好重視。
跟住參觀附近嘅平遙縣衙
縣衙範圍好大，有多進，層層深入。
都係對牢獄有興趣D，入去LU！
枷鎖係必備啦！
厘對應該係腳鐐卦！
你咪以為有咁肆正嘅監倉呀！係快班房咋！
牆上展示緝捕文件、告示，甚至買賣地契都有。
押解犯人用嘅囚籠
刑具
咁啱有遊客扮野，唔客氣，影番張啦！
內院仲有棵古樹同水井
行番去南大街，經過百川通（晉商傢俬博物館）
因為之前參觀票號同鏢局，都有唔少古舊靚傢俬，以為有D好野睇啦！
點知。。。
睇左咁多，相信唔使講，大家都知中間玻璃蓋住嘅係地下金庫。
行過D又係鏢局博物館，雖然唔會有驚喜，入去兜個轉囉！
入口及出口
見到厘個，就知係地下金庫啦！（睇得多啦嘛）
走鏢禁忌，住店禁忌，各種走鏢規矩等，都係我此行嘅見聞。
出門續向東大街方向走，好快就到協同慶票號。
協同慶嘅建築與規模較日昌昇和蔚泰厚大，似乎保留原來建築部份較多。
金庫另有入口（左邊閘口）
金井即係地下金庫，不過厘個大好多。
基本係僻一層地庫作財物存儲
從厘張慈禧太后口喻，可知協同慶當時富可敵國。
厘度雖然有好多新修建築同裝飾，但票號嘅建築規模係平遙古城內首屈一指啦！
安全計，厘個金庫仲有條秘道供出入，方便運輸財物時避人耳目。
協同慶出口
行到東大街附近有天吉祥博物館，佢係古城唯一嘅跨國貿易公司，
經營洋貨，係長盛蔚舊址。
裏面嘅九龍壁係必睇嘅，雕工考究。
樓上有文物展品
厘座賀蘭橋有乜典故就唔知啦！，我覺得好一般囉！
我地喺北大街見馬家大院指示好幾次，但票底同古城內嘅導覽地圖都無厘個景點，
於是決定行哂通票包括嘅景點先，如果要另收費，睇下抵唔抵睇先入啦！
好彩我地堅持，否則就錯過厘個必遊景點啦！（事後返黎睇資料，
原來馬家大院喺2014年10月先對外開放，乜解究咁正嘅景點竟然無宣傳同指引，
現場所見，亦無團到。
見門樓咁有氣勢，感覺好有睇頭喎！
黎到馬家大院入口，見查票閘口，就知通票包埋，於是入去Lu！無諗過有驚喜。
景點出口
馬府係平遙四大家族之首，馬中選係當時舉人，馬府以馬字形作建築架構。
大院深入多進，幾多開我都唔識計啦！因為佢同一般肆正方形建築唔同，
且向高空發展，好有立體感。
之前我都話啦！山西富戶嘅土地神位，足可影個特輯，真係花心思架！
左右兩邊仲雕有福祿二字。
門前嘅牌樓精工雕琢
院內保存大量傢具文物
小姐房
厘個係女主人房
厘個水缸係咪原物就唔知，不過頂缸嘅石雕同缸配合得好靚。
磚木配嘅塔飾
影壁上磚雕
連廁所都有，唔使用木馬桶。
福字磚雕旁仲有堵門通去過廳
馬家私人金庫
厘度係上層，由此睇到馬府嘅立體建築好有層次感。
兩層高嘅門樓，好有氣勢。
厘個有D似戲台
俯瞰馬府入口
長廊可通門樓
厘座拱橋同四周範圍皆屬馬家所有
角位嘅涼亭可眺望得更遠
上層陽台嘅磚雕、梯間欄板，無不精細。
自＜城＞一角，厘條長廊可供護院巡邏，居高臨下，清楚監察馬府內外四周動靜。
作防禦之餘，亦不忘美化方面落工夫。
整座建築唔止供馬家人起居工作之用，喺後院仲有間私人拳館，
為馬家家業訓練武術專才，咁就不假外求啦！
好彩我地睇住時間遊覽，雖然匆忙，都叫做關門前參觀哂吖！
出到大街已經入黑兼毛毛細雨。
D16 完
6/11 D17
平遙古城(K7808;12:51-14:26)~ 太原~迎澤公園(晉商博物館)
因仲有少少景點未睇，早餐之後，花三小時走完就離開古城，
最初計劃搭長途巴返太原途中，喺喬家大院落車，玩完再搭車返太原，
但睇左王家大院同平遙古城，再睇喬家大院，可能都審美疲勞囉！
無謂嘥時間同靚景，留個藉口下次再黎山西嘛！
早晨古城無乜遊客，好喜歡厘度嘅四合院民宿，有平有貴，豐儉由人。
（咁多住宿，做乜要預訂喎！）咪就係囉！厘間都係百零蚊，最衰係內賓嘅，
無港人份，最怕拉住行理周圍搵房，時間係要黎旅遊架嘛！
見唔見呀！右上角有標誌指示去馬家大院，但導覽地圖就完全無，所以咪無人留意囉！
可能係淡季，好多食肆都唔做早餐。
晨雨清洗嘅古城街道
黎左兩日，厘座市樓都未認真參觀過。（做乜叫市樓呀？）
市樓兩邊存放好幾座碑刻，欄得緊密，想睇多D都唔得。
（介紹話附近仲有個井個喎！）呢！位置有D奇怪，個井喺間舖門口嘅梯上。
繼續喺咁清靜嘅街上行走，都幾舒服。
從來無去按摩，所以唔知收費合唔合理，唯有影俾大家睇啦！
其實我地只去剩報紙博物館啫！
較有趣嘅係厘把遮，其他嘅費事悶親大家啦！
經過路旁，見厘座石敢當，應該喺度過百年啦！辛苦哂！
其實我地由北門進入平遙古城，夜晚食飯出過西門，遊城牆上落都在東門，
餘下南門未遊，原來南門係最靚嘅，重點係宏偉壯觀，
無街檔雜物破壞景觀，仲有D遺跡睇下添！
直出南門間有鐵欄，應該係阻檔所有車輛出入（包括手推車）。
圍欄圍住兩條深坑係古車轍，可想而知當年平遙古城嘅經貿幾咁發達啦！
其實未出城門都有古車轍留下，不過無特別欄住啫！
出左南門，面對廣大嘅迎薰門廣場。
回望南門
城牆下展示部份文物，包括炮台。
咁大咁具規模嘅古城，當然有護城河啦！不過而家無水之麻！
雄偉嘅南城牆
喺迎薰廣場有條闊直大道，可通山西平遙城南堡村。
回望古城
時間差不多，返酒店執野前，發現地上有地圖，其他地方唔知係咪睇漏眼呢？
只喺度見過，影埋先！
走LU！可愛嘅程家大院，再見啦！
平遙古城資料:
～如乘火車到平遙古城，應在平遙站下車，即可步行十多分鐘往西門／北門，
也可乘車（￥5-￥10），平遙長途汽車站也是近在北門咫尺（如下圖），
但平遙古城站是高鐵站，距古城南門有7、8公里，必需打車。
（綠色圖釘位置即馬家大院所在）
～平遙古城門票掛￥150，網購￥130，六十歲以上免費。
～平遙古城相當大，細遊古城最好手持地圖，能有效及省時地按喜好遊覽。
（地圖￥5／張，售票處有售）
～票背面有列明包括19個景點，古城內很多地方都豎有導覽地圖（18個景點），
有的沒表列於地圖上，如馬家大院，有的又閉門維修，如古民居，
遊客只要看見電子檢票閘口，即表示該景點是通票囊括的。
～此行我們基本上參觀了所有景點，若只有一整天時間，可選以下較精華景點，
不過，仍是購通票化算，能住上兩至三晚，當然可逐一細遊了。
必遊景點（一天）：日昌昇票號、協同慶票號、匯武林鏢局、清虛觀、文廟、
城隍廟、城牆及南城門、馬家大院。
～平遙古城內可供住宿的四合院非常多，甚至有不少大院，
喜歡一嘗古建築的，住城內不失為好選擇（好多民宿都有免費火車站／
長途汽車站接送，包括我住果間）；但有朋友反覺有壓力，
在城外四周，特別是城門附近，也有不少酒店可供選擇。
～古城內外的食肆很多，山西特式食品更不缺，消費模式多樣，豐儉由人。
D17繼續出發啦！
我地行番去平遙站，搭12:51火車返太原，95分鐘後，又返到久違了嘅太原，
哈哈！真係有D返屋企嘅感覺，又住火車站對面嘅中城賓館，
我比較喜歡面對火車站，好有動態。
食過午餐後，去迎澤公園，目的係晉商博物館。（係囉！我倆都喜歡行博物館）
迎澤公園位處市中心，好多公車都經過。
湖中嘅電船仔都停業（淡得咁緊要，連本地人生意都無？）
整幅全景圖
公園幾大，剛好銀杏黃葉遍地。
真搞笑，公園只有博物館名稱，地圖上竟無顯示（應該被人破壞）。
黎到藏經樓，見咁多大姐喺度，咪問下博物館喺邊個方向囉！點知無個知道
（奇怪，佢地話係本地人喎）
終於我地兩傻摸到黎，佢前身係山西省嘅博物館，搬遷後，厘度改為晉商博物館，
黎山西，一定要認識晉商嘅！
館藏都幾豐富，無白行，我地參觀到最後先離開。
錢！錢錢！錢！
明清代鹽鐵酒都係專賣，要得官方許可經營，最發當然係鹽商啦！
厘張係鹽引，算係許可證啦！
圖解鹽商運作，亦係政府省運糧到邊疆嘅互動法，鹽商運糧到邊疆換取鹽，再運返各市鎮販賣。
我小時候，香港嘅藥材舖都用架！
我無參觀嘅大院，暫時喺度睇住先，下次再去。
仲有唔放上黎啦！費事悶親大家啦！
晉商全國有名，原始計算機（算盤）當然唔少得。
各票號嘅存摺
厘種中式信封，相信最少都洗行左兩百年，相信上年紀嘅都用過。
太原古城全貌
各種商業用嘅印模
右二個罐口設計好呀！容易倒出黎嘛！
咁多行業分行印章中，最喜歡厘個。
對住厘本以漢字嘅俄語注音，玩左好耐，諗起小時嘅通勝裏，教人讀英文嘅內容，
唔知而家D通勝仲有無呢？
明清代茶馬貿易非常鼎盛
厘D叫搭褳，係行走塞外運送者必備，用黎載物／載錢搭喺肩膀上。
咁大個駝鈴，真係戥D駱駝辛苦。
嘩！當時嘅針炙銀針咁粗又扁，一定好痛啫！
有厘對釘鞋，雪地都無有怕啦！
監照係當時捐監嘅憑照（入國子監梗要俾錢啦！不過懶係好聽叫捐囉）
契尾能該係官府對買主發嘅認可文契
又係剛睇得七七八八就夠鐘關門，趁完全無人，影番幾張周圍環境先。
厘度係出入口，兩旁分別有鐘鼓樓。
厘座係博物館嘅主樓，左右對稱，前面嘅牌坊雕工細膩。
從入口看整體建築
厘張係關左門嘅晉商博物館，其實設計都幾靚。
門前兩座鐵鑄柱飾（唔知叫咩）好有氣勢
公園四周都有巨大銀杏樹，遍地金黃。
行埋公園內嘅七孔橋，又夠鐘返酒店食晚飯LU！
落雨，大塞車添！好彩返得早。
D17 完
7/11 D18
太原 ~ 山西博物館 ~ 汾河公園
之前講過我倆都喜歡遊博物館，既然會一連三日留太原，
今日天色馬馬，最好參觀省博物館啦！
省博物館附近有座地質博物館，外表建築真係好吸引架！
18/5/2014年落成對外開放，只運作左一個月唔夠，10/6/2014就閉館，
我地行過都只能見到厘張通告貼喺門口啫！
山西省博物館形同方體升斗 , 個概念唔知同晉商有無關係呢？
厘幅浮雕唔知係咪治黃河圖呢？
博物館大堂及透光頂部
個人覺得展品唔差過北京首博，始終係華北地區重要地域，尤其係明清嘅經貿中心，
珍貴文物多不勝數，遠至夏商周亦好豐富。
為怕悶親無興趣行博物館嘅朋友，都係放些少相算啦！
厘個甗喺堯廟大道上見過
厘個名為染爐，我仲以為係染料加熱用黎染花紋喺布上，點知係加熱調味料要黎蘸食嘅！
厘盞燈睇落無乜特別，睇埋D字就知幾環保啦！
厘對耳環我而家睇起黎都好時尚喎！（咪笑我老套啦）
跟住參觀佛教展館
晉商係山西歷史寫下輝煌嘅一頁，博物館當然唔可以無佢地份啦！
不過展品似乎無晉商博物館咁詳細。
喺晉南發現嘅墓室磚雕
厘盞瓷掛燈好靚
細時讀書只知古時有貝幣，原來仲有金、銅貝幣添！
洪武（明初）金錠原來係咁嘅樣！
厘個鈔版距今800年，咁精細，驟眼睇，仲以為係年畫版模添！
石雕屋形龕（如果叫我估，我實話係墓啫！）
厘個琉璃鴟吻同倒模嘅就差得遠啦！你睇眼神同表情幾生動，雕刻同顏色多變。
今日天色唔好，但網上對汾河公園有好多推介，咪順便黎行下囉！
（如果時間緊逼嘅就可省啦）剛好有人放紙鳶，用嘅係大轆。
正值銀杏成熟季節
太原迎澤橋
汾河公園好長，環境OK，可能天色差，感覺無乜特別，散下步都幾舒服。
遠處紅色嘅係漪汾橋
嘩！冬泳？好凍呀！個泳池要付費嘅！
厘條龍算係汾河賣點（呆板D卦）
對面咪山西博物館囉！
我地沿汾河公園走，厘段算靚啦！搭車返酒店食晚飯LU！
D18 完
8/11 D19
蒙山大佛 ~ 晉祠公園
今日行程簡單，只係上下午各一個景點，不過就有D意外收獲囉！
行前睇資料，一般都只講蒙山大佛，甚少提及附近景觀，原來整個景區好大，
裏面有好幾個景點，需時半日。
早餐後，到火車站旁嘅北倉大廈前乘308/804路到羅城站，再轉58路到總站就係蒙山大佛景區，
好容易就喺對面搵到蒙山大佛景區入口嘅牌坊（當然未到啦）。
穿過牌坊進入一廣場
景點而家免費開放，從售票處2010年告示所見，以前蒙山大佛收費嘅（￥70/位）！
目前只收電瓶車來回￥12/位，其實路程頗長，收費合理。
電瓶車站及電瓶車
蒙山大佛導覽地圖
經過一段山路，電瓶車停觀音堂對面，我地準備先上大佛，後遊觀音堂。
（離大佛仲有好一段山路架！）
於是按指示沿路穿過寺底驛站 , 佈置帶有解放色彩。
厘段路都係一D食肆飯店，屬窯洞建築。
回望寺底驛站
繼續前行
按指示到寺底古窯洞
厘座古窯洞關左門，入唔到。
靜池景區風景唔錯
指示路牌
行行重行行，經過一祭壇，已經睇到蒙山大佛啦！我地沿右邊階梯直上。
上到去係一個廣場，不過大佛已清楚呈現眼前。
前面屋仔左邊係上行階梯所在
如果想再接近D，可由廣場左邊，上行階梯拾級而上上觀景台。
大佛漸近
原來大佛座下仲有好多龕，龕內有金剛像。
從大佛座下向下望
佛前祭壇
大佛旁嘅五龍洞
山頂上有黑車招遊客落山（因為當時落雨，落山收15蚊位）
有大佛，當然亦有廟，不過關左門。
相信旺季時，厘度擠滿遊客。
參觀後，我地沿斜路落下觀景台。
可見早一個月，蒙山大佛厘度嘅秋色應該都好靚。
大佛旁嘅係下行階梯，只能從上而下。（當然淡季無人理啦）
欣賞完咁宏偉嘅大佛（免費果度好吖嘛
雖然落住細雨，行起黎仍然好舒服，唔算凍。
厘個台橫跨山溪上，旺季應該係茶寮俾遊客飲茶歇息。
我地黎到塔林（佢寫住經塔），塔嘅款式多樣，有新有舊，有完好亦有殘破。
山中仲有座開化寺
鐵佛殿
從鐵佛殿下望
園內兩旁種滿桃花
之後，我地沿原路到觀音堂參觀。
觀音堂對面係電瓶車站，因為如果要坐車，
上黎時一定要買來回票，所以下行單程無人售票嘅！
當然亦有人唔坐車，徒步上落山嘅！
雖然落到停車場，但我地無出去，繼續喺山腳景區遊走。
厘座連理塔喺山上，但被帆布圍實，正在圍修。
蒙山景區牌坊，上山時坐車匆匆經過，影得唔好，而家補番。
青龍峁關左門，唔知係旺季先開，還是停業。
見唔見山上有條通道，就係青龍峁經營嘅滑道，此刻停左，
唔知旺季有無運作，全長唔短，應該好刺激喎！
山路旁係條小河
又見有座真武廟，入去八下囉！
由厘度望見條滑道好有氣勢，由山頂蜿蜒折落山腳，唔知幾錢一位呢？
返回58路公車總站，再轉308去晉祠行下。
因為蒙山大佛同晉祠順路，所以搭番58路到羅城站，再轉308到總站晉祠，
晉祠係後人為纪念周武王次子叔虞而建，能成為AAAA級景區，當然有欣賞價值啦！
但晉祠前廣大面積嘅公園滿佈假山石洞，碧水蓮池，亭台樓閣。。。
咁嘅美景，一樣唔能夠忽略喔！
因為晉祠已經跟團入過兩次，諗住慳番唔入啦！下午只遊晉祠公園（免費），
喺地圖上已知面積唔細嘅公園，但無諗過咁正囉！若有陽光仲正呀！
入門即見搶眼嘅巨型花鼎
厘張係第二日有陽光時影嘅，係咪靚好多呢？（搞乜又再去過？）
係囉！後來去到晉祠門口，發覺六十歲以上免費，唔好嘥嘛！第日咪遊晉祠囉！
嘻嘻！何況有張無敵公交卡，走多轉都無問題啦！
晉祠公園有多個人工湖，而且打理得好好，庭園設計得唔錯，好過花時間遊汾河公園。
以下嘅相唔係同一地方，我都分唔清邊個湖打邊個湖，總之公諸同好啦！
公園有頗多厘種樹，結埋紅果子都幾靚。
繼續前行
穿過唐宗遺風亭 , 厘組龍興晉陽銅像係遊人必到嘅！
睇下厘個公園導覽圖，晉祠都已經唔細，只佔頂上小長方形, 就知公園同佢嘅水面面積有幾大啦！
繼往前行，若漫遊厘個公園，喜歡影相嘅真係可以玩半日架！
因為N年前黎過晉祠，諗住一場黎到，到晉祠門口睇下有乜變化（當然係靚左啦），
順便影番張相留念嘛！
咦！黎一黎，執到喎！六十歲以上免費
今次一不做，二不休，聽朝黎掃哂全場，今晚抖足腳骨力。
晉祠門口有好多野導遊，見我倆傻下傻下，猛游說我地入場請佢做導遊，
我話得45分鐘關門囉喎！佢竟然話足夠啦！包我地睇得哂！
之後帶住開心心情（當正執到）繼續漫遊公園嘅另一邊。
叫得牡丹亭點可以無牡丹架！
呢！厘個咪係牡丹園囉！黎啱時間可以賞牡丹花。
陶然村係乜，關左門，唔知內裏係點，睇介紹啦！
繼續行另一邊（粗略可以話分左右兩邊），依然都係咁吸引遊人。
遊人都被晉祠吸引去，咁大咁靚嘅公園，竟然被人忽略，你話係咪要推一下吖！
因為一落車，我地就進入公園範圍，而家回程，
行下外圍到308巴士總站搭車返酒店（總站至總站）。
大街有公共單車停泊處，只要有IC卡，就可以租用。
今晚空氣特別清朗（好少見
D19 完
9/11 D20
晋祠 ~ 太原(K604 ;19:35-05:37) ~ 北京
因為晚上搭19:35火車到北京，所以離開酒店前checkout，將行理先存放酒店。
尋日到晉祠公園發現六十歲以上免費，所以今日再黎，主打係晉祠博物館啦！
其實巴士總站離晉祠仲有一公里多腳程（巴士站有好多黑車招客到晉祠，收5-10蚊），
但我倆一D都唔介意走過風光明媚嘅晉祠公園，何況今日仲咁好陽光添！
今日陽光普照，經過咁靚嘅景，咪影下囉！（無特意再走）
飛龍閣
行下散下步
好快就到晉祠
陽光下嘅銀杏樹，更顯金黃燦爛。
售票處
晉祠導覽圖
從導覽圖可見晉水繞祠，所以不缺小橋流水嘅景觀。
歷史悠久嘅祠，當然植有唔少老松古柏啦！
喜歡古物嘅朋友，晉祠算係個好地方，好多精工建築都保留得好好。
北宋樂伎塑像
對越牌坊
金人台，以前我黎嘅時候，可以行近觸摸到D鐵鑄像，而家欄住哂啦！
水鏡台始建於幾時都無從考究啦！估佢係明朝建築。
水鏡台嘅背面一樣有睇頭，感覺似面譜。（我捕捉光線唔好）
網上厘位朋友影嘅就好似啦！
會仙橋
先到獻殿，獻殿面對聖母殿，顧名思義係向聖母祭祀獻供嘅場所，佢獨特處係亭殿合一，
屬晉祠三大國寶建築之一。（邊三大呀
由獻殿開始，直行就睇哂厘三大國寶建築，過左獻殿，眼前嘅橋叫魚沼飛梁，橋後嘅係聖母殿。
橋下方沼係晉水第二泉源，飛梁係支撐十字橋嘅躉，用左34條柱作承托，整座橋形像大鵬展翅。
喺魚沼飛梁兩側仲有對鐵獅，千祈咪睇漏喎！（應該係一雌一雄啦）
欣賞完魚沼飛梁之後，就到聖母殿，行到厘度，聽到旁邊嘅導遊好搞笑咁話：
厘幾條龍係史上最早玩包剪揼嘅！（大家睇下啦）
廟旁廊內有多座碑刻
據講台駘治水比大禹仲早
跟住睇嘅係晉祠三絕之一：宋代侍女塑像
（三絕？又係乜呀？
相中左至右係魚沼飛梁、聖母殿、三千年嘅周柏，
前二者係晉祠三大國寶建築，後者係晉祠三絕之一。
訓低果棵就係三千歲嘅側柏（咁老，挨下都應該囉
厘個係泉眼，可見D水係咁湧出，佢係晉水源頭，三絕之一嘅難老泉。
難老泉亭
與難老亭相對嘅係善利泉
厘度嘅小橋流水同石舫，可以俾遊人親親難老泉水，當年嘅導遊仲話用厘度D水洗眼，
會令眼睛明亮D喎！（萬一有菌咪大劑）
落去親親難老泉水，佢嘅入口好鬼馬 , 就係厘個真趣亭啦！
其實以上景點，旅團必到 ; 跟住去D無乜人嘅景點，好多在維修，
或者唔太值得睇，無謂悶親大家啦！
厘個晉溪書院內嘅子喬祠，佢供奉嘅係周靈王嘅太子，
被封為王氏始祖，所以好多王氏遊客黎到尋根。
翰香館亦係無開放
厘座處於景區南端嘅奉聖殿
寺內兩側木欄柵內有好多刻滿字嘅方石柱，係1300多年前武則天下令刻嘅華嚴經。
道上兩旁植滿牡丹，喺度望到嘅塔唔屬於奉聖殿嘅！
要欣賞舍利塔，就要行番出去，到浮屠院內。
舍利生生塔
厘度D燈柱幾靚
我地由南門出口離開，入到去下生寺。
厘度嘅庭園又種好多牡丹，所以要賞牡丹，黎晉祠都係好選擇。
厘個係晉祠公園另外一個湖，同樣吸引。
晉祠公園咁靚，橫掂選擇步行，梗係沿公園步出好過行馬路啦！
出番去門口又經過座花鼎，搭車返酒店攞行理搭火車臥舖到北京。
D20 完
蒙山大佛景區、晉祠及晉祠公園溫馨提示：
～ 蒙山大佛景區乘58/58支路可達，若在火車站出發，
可乘308/804/856到羅城站轉58路到總站（蒙山大佛景區），
對面馬路即見蒙山聖境牌坊，非常好找。詳見273＃
～ 蒙山大佛景區免門票，建議乘電瓶車到景區（來回￥12/位），
即是電瓶車代步，遊人自觀音廟走到大佛，尚需半小時山路腳程，
沿途有清楚指示，景色優美。
～ 大佛有上下觀景台，下觀景台為廣場（仰望大佛），
面對大佛左邊有上行石階往上觀景台，之後在另一邊下行落山返回下觀景台。
～ 大佛景區很大，還有其他景點可供漫遊，以春秋景色最美，別錯過啊！
～ 若只看大佛，又想省腳力，上觀景台有黑車招客直接送到電瓶車站。
晉祠及晉祠公園
～ 公交308/804及856路均可達，此三路均在火車站附近開出，
308＆804都在北倉大廈前，856則在國防賓館前。
～ 乘公交到晉祠公園，進入大停車場後見晉祠勝景牌坊，即為晉祠公園入口；
還有一兩公里腳程穿過公園才到晉祠博物館。詳見278＃
～若時間充足，晉祠公園美景不容錯過，可作整天遊，半天遊公園（免費），半天遊晉祠。
～六十歲以上可免費遊晉祠。
～ 晉祠主要欣賞三絕：難老泉、周柏、宋代侍女塑像；
此外還有晉祠三大國寶古建築：獻殿、聖母廟、魚沼飛梁；
至於水鏡台和奉聖殿園內兩側，由武則天下令雕刻的華嚴經碑刻也不容錯過。
10/11 D21
北京 ~ (K7711 ;07:56-12:31 ) 承德
厘日我地主要係交通時間同hea下！訓左一晚火車，清晨抵北京。
搵地方食個早餐，跟住再搭火車中午抵承德，再轉公車到火神廟站去酒店攞房。
火神廟站面對火神廟環島（迴旋處），中央有座清康熙皇帝騎馬像。
我地住嘅酒店就係粉紅色矮果座。
雖然面對大街，但入口喺後背嘅橫街，厘間酒店真係要讚下，我第一次訂左酒店，
竟然通知我房價調整左，有水回喎！雖然區區30蚊，但欣賞佢老實囉！
放低行理，因為訓左一晚火車，再坐4小時火車到承德，今日唔去景點，
沖個涼就出去食番碗羊肉湯加羊夾膜，再周圍hea下，順便入超市買定乾糧，
聽日全日遊避暑山莊。
反正喺酒店斜對面，行十分鐘過去八下，因為時過中午，
無乜人入去LU ! 門口只有幾位野導遊兜客。
行過少少有座關帝廟（收費），我地行近D，門口員工即下來招呼，
因睇過網上有位仁兄被屈，都係影下門口算啦！
行到四點零鐘，喺碧峰酒店大門正對面，有座頗具規模嘅名都廣場（無影相），
地庫係大型超市，剛有燒雞出爐，於是買左燒雞、麵包、飲品，一於做聽日午餐。
補給完先攞上房，又再返商場5/F，有間集杰尚品韓烤自助餐，￥63/位，
地方同食物都唔錯，我地連食兩晚，超值！
11/11 D22
承德 ~ 避暑山庄
選擇住在火神廟站附近，係貪交通方便，到各個景區都有公車，步行幾分鐘就到避暑山莊，
已知淡季裏面無乜地方食野，所以準備埋乾糧，實行全天漫遊。
因為無內地身份證，無得網購避暑山莊聯票，現場亦無老人半價聯票，要每個景點獨立買，
厘個時候成人只可買三天有效嘅三聯票（避暑山庄+普宁寺+普陀宗乘之庙景区），
磬錘峰關閉唔開（旺季才有四聯票），所以我地只訂三晚酒店。
早餐後，08：30到入口，遊人非常少。
避暑山莊已為人熟識，希望佢嘅冬景無悶親大家啦！先遊博物館部份，其實博物館展品唔少，
但環境同燈光都唔太適合影相（反光太勁），無謂白費心機同時間，疊埋心水專心欣賞好過。
門上木刻好細緻
四知書屋中，最喜歡厘塊匾。
展室完全唔開燈，反光勁到影唔到相。
右邊係康熙畫像，左邊係乾隆騎馬畫像。
煙波致爽殿
慈禧生活品展室內
一人一鍋？
慈禧隻狗件衫，質料同繡工肯定唔係人人著得起啦！如果慈禧對國家嘅愛，
好似對狗咁，可能歷史會重寫啦！
厘塊海藏持輪匾同抱柱楹聯，係珠源寺僅餘嘅遺物 , 因為有座220噸嘅銅殿，
1944年被日寇拆走鑄武器，遺址位於避暑山莊內西邊山坡，現存紅色山門，
可惜我地去時西山封左。
部份玻璃展品
參觀完博物館，跟住就遊花園，避暑山莊由康熙時嘅36景，到乾隆擴建至72景，
現宮殿區佔地10公頃，8個小島加埋湖泊有43公頃，況且，園內景點分散，
真係漫漫遊花園至行得哂啦！（唓！咪又係皇家花園一類）係呀！
如果無興趣嘅，可以咁形容架！
幾位大叔喺度夾歌玩樂器
我地當然無仔細睇邊景打邊景啦！不過每一景都有豎碑介紹嘅 !
康熙36景之一＜萬壑松風＞
厘D湖中有島，島間有橋與堤相連接，加埋倒影，如幻似真，如果陽光普照就更誘人啦！
無論你攞邊一角，都係美圖。
厘位仁兄搵我地做模特兒影左好耐，等我都唔執輸，借番張先！
山莊嘅冬景，絕不遜色。
厘位有心人有創意呀！
避暑山莊咁大，當然地圖在手就可以得心應＜腳＞啦！所以喺入口就幫襯婆婆買左張地圖。
繼續遊花園，厘度嘅蓮塘雖然無花，睡蓮葉仲係舖滿湖面嘅！可以想像春夏應該仲靚。
殘荷匯映
亭台樓閣當然唔會少，豎碑介紹＜冷香亭＞，又係乾隆一景。
無論邊個角落，步步是景。
就算殘荷都咁殺食
回頭一望，又係另一景象。
老兄，裝咩呀！厘度本來係博物館，而家維修。
無野睇，走LU！
明顯係一個殿閣遺址
當然又係一景啦！（話之佢36定24吖！靚咪值得睇囉！
厘個滿頭包嘅雪人，睇黎有D惘然。
遊湖嘅船仔一律停哂，收費亭亦人去樓空。
軍人烈屬一律無優惠，最多唔使排隊啫！
雪人家族
見到此碑，即係又攞一景。
厘個雪人好型仔，感覺造型好配合明清時代。
厘條橋好靚
就算陰天，厘度D景都無得輸啦！
其實避暑山莊嘅雪景都唔錯吖！
咦！無理由仲有紅葉架！行去睇清楚先！
葉就落哂啦！係滿樹果子，有種繽紛感覺，D果子唔啱雀仔食？仲有咁多嘅！
厘條路舖砌得好靚，沿途都係秀麗風光。
睇見厘隻雪貓，連人都開朗D呀！
延薰山館，既係景，亦係博物館。
康熙像
繼續遊花園（乜睇黎睇去都咁上下架
（你厘張影乜鬼呀
厘座咪係磬錘峰（棒錘峰），如果買四聯票就會遊埋厘座山啦！
無人，都入去八下！
望番出馬路
入去煙雨樓嘅陽台外望
新修嘅煙雨樓，大門貼左封條。
遊覽車有運作嘅，只係好少人坐啫，間中都有一架經過。
好鍾意厘條路徑，喺度漫遊一日，對我地黎講一D都唔悶。
嘩！好勇呀！著成咁影婚紗相，新郎哥肉唔肉赤架？新娘又好似唔覺凍喎！
（人地熱情如火，怕咩呀！）
乾隆御制嘅碑刻，十全老人嘛！梗要歌頌下佢嘅功德啦！
御瓜圃，顧名思義係皇家嘅瓜果園，康熙圍獵時亦黎親摘瓜果，春耕時又黎喺百官前示範耕種。
（入關咁耐，要宣傳農業社會嘛！）
厘邊風光雖然無咁靚，一場黎到，咪蕩足一日囉！
估唔到又有新發現，厘度有個流杯亭，而家仲保持整個流水系統，只係冬天無水啫！
流杯亭前有個蓄水池
池水導管斜向亭內水道，再流出亭外，令酒杯不斷流動。
厘條湖邊棧道清幽（傻啦！邊度唔清幽呀！）
厘個牡丹園花季應該好靚
對面就係蒙古包渡假村（咁貴，設備又馬馬，淡季無乜人住囉！
跟住朝塔嘅方向而行，到左永佑寺。
寺內有三座御制碑刻，除左左右兩座外，塔前仲有座。
從塔基下望，可見有不少殿閣遺址。
八角形亭閣嘅塔基比較特別
山莊各處，包括博物館對防火功夫做得好嚴緊（應該嘅）
咦！有圍牆圍住嘅？入去睇下囉！
文津閣裏面有唔錯嘅假山湖景。
屋簷嘅水結哂冰
美景停不了，繼續前行，又係一景。
厘座芳園居係清皇室嘅倉庫，當年裏面一定存唔少珍寶啫！
厘度嘅樹（不知名）仲有樹葉，亦結唔少果子。
雙湖夾鏡又係美景
厘度叫芝徑雲堤
全日都係好靜態嘅湖景，突然有快艇劃破湖面，算係全日最動態囉！
行左整日，如果西山開放，應該要行到關門時間啦！今日都好盡興。
避暑山莊嘅溫馨提示留番遊完承德一次過再寫。
D22 完
12/11 D23
普陀宗乘之廟 ~ 須彌福壽之廟 ~ 普寧寺+普佑寺
黎到承德，除左遊避暑山莊外，當然要參觀埋附近寺廟啦！佢地合共被評為世遺，
所以購買聯票抵D，包括三兩座廟嘅！
因清朝由官方（理藩院）管理嘅四十座寺廟，其中八座喺承德，所以稱為外八廟。
外八廟：包括溥仁寺、溥善寺（已不存）、普寧寺、安遠廟、普陀宗乘之庙、殊像寺、
須彌福壽之廟，廣缘寺。
早餐後喺火神廟站搭118路，因為順路，不如搭多一個站，去殊像寺參觀啦（聯票唔包）！
殊像寺（外八廟之一）
睇落係新修嘅，但無開放，老兄，裝都無用啦！走罷啦！
（唔甘心呀！行個圈睇下，入口會唔會喺橫邊／後面啦！）
其實圍牆唔高，甚至可以眺望高位嘅寺內建築。
兜左一輪，無計。
有幸入到去嘅網友有福啦！（以前開放嘅）
唉！白行
望番轉頭，呢！圍牆圍住嘅，都係殊像寺範圍。
兩站之間唔遠，我地慢慢行，唔使十分鐘就到有小布達拉宮之稱嘅普陀宗乘之廟。
入門係座碑亭，淡季梗遇上維修，不過無影響。
皇家寺廟當然有三幾座御制碑刻啦！厘D碑全係方柱體，每面分別以漢、滿、蒙、藏文字雕刻。
五塔門，門前放嘅唔係石獅，而係石象。
琉璃牌坊好有氣勢，且非常精美，嗯！用番漢式嘅石獅喎！
.
回望牌坊
唔知係舍利塔還是係經塔，總之就係塔囉！
厘個殿自成一角，裏面展出佛像唐卡之類。 
.
繼續向上前行
有D拉薩布達拉宮嘅風格，當然無咁宏偉壯觀啦！白色部份稱大白台。
防火用嘅鐵海（佢地咁有錢，乜唔係銅嘅咩！）
大紅台當然係整座廟嘅靈魂啦！中間一行塔形佛龕浮雕。
厘度係較高位置，可以俯瞰全廟，亦可眺望對面山嘅避暑山莊。
大紅台前嘅廣場，立有經輪同經幡。
裏面係藏傳佛廟設計，井形建築，中間仲有座殿閣，可以睇到頂上有建築。
中間係萬法歸一殿
藏傳佛教嘅吉祥八寶
兩側各有紫檀木塔
木塔直達上層，喺上層只能隔著玻璃觀看。
御座樓
頂層嘅權衡三界亭
頂層有職員嚴密監察遊客舉動
群樓頂四通八達
從大白台頂遠眺避暑山莊
普陀宗乘之廟嘅圓形碉樓
萬法歸一殿下層屋頂嘅琉璃神獸
寺廟群樓
慈航普渡亭
萬法歸一殿頂
眺望須彌福壽寺及附近
圍牆上嘅琉璃吉祥八寶雖然係新修，可見原建築嘅精心設計。
群樓中的展室及迴廊
.
.
原路離開
普陀宗乘之廟又係同須彌福壽之廟相距一站，於是我地就沿馬路而行，幾分鐘就到啦！
須彌福壽之廟係六世班禪從西藏到賀乾隆七十大壽，
厘座廟就係乾隆仿西藏扎什倫布寺起俾六世班禪嘅！
因為聯票無寫包括此廟，諗住買票啦！兩傻忽發奇想，不如博懵問下包唔包先買飛啦！
哈哈！檢票員竟然話包喎！兩傻又當賺到啦！
入門迎來可愛雪人，我諗係員工悶到嘔自娛嘅傑作，唔錯喎！
又係一座碑樓，唔使諗裏面梗係座御制碑刻啦！
厘座琉璃牌坊前又係一對石象
過左牌坊已經係大紅台（主體）
其實整座大紅台嘅建築同普陀宗乘之廟極相似 
同樣成井字形，分東南西北殿，不過入口喺南殿，裏面有佛教展品。
中央有座妙高壯嚴殿，厘座殿頂非常精美，欣賞殿頂，就要上四周殿頂先睇到啦！
妙高壯嚴殿係六世班禪講經嘅地方
厘座廟係仿西藏扎什倫布寺起嘅！
行完地面層建築，轉遊院落＜萬花仲院＞，外表睇黎屬白台區域。
厘座琉璃萬壽塔嘅外形係咪好熟口面呢？（似避暑山莊內永佑寺嘅塔囉）
不過厘座精美好多，塔嘅基座有好多佛教浮雕。
跟住上樓群頂層，厘度保養功夫做得較好，整個頂層只能在木棧道行走。
妙高壯嚴殿頂嘅精美設計，喺度就一覽無遺啦！
我喜歡下邊嘅長鼻鴟吻，上邊條龍似餓瘦嘅狗，唔夠氣勢。（唔識野就咪亂噏啦！
普陀宗乘之廟與須彌福壽之廟相近，座向又相同，梗可以遠眺磬錘峰啦！
群樓頂嘅雙羊同遠處嘅琉璃萬壽塔
東南西北樓頂層相通，可遠眺四望。
遠眺普陀宗乘之廟
同樣可眺望避暑山莊
厘條路都幾似扎什倫布寺內嘅路
走LU！搵食醫肚，再去普寧寺。
由須彌福壽之廟去普寧寺需轉車，我地搭118路回頭到興隆街站轉6／6路區間
到普寧寺下，中途喺興隆街站醫肚。
普寧寺入口
旁邊有條普寧街，係賣紀念品嘅露天市場，亦係普寧寺嘅出口。
普寧寺同是外八廟之一，清朝時期曾成為塞外藏傳佛教中心，佢同普祐寺相連，可一次過參觀。
入門見碑亭，厘座碑亭比前兩廟具規模。
鐘樓亦絕不遜色
天王殿
大雄寶殿
殿前嘅雲龍石階媲美宮殿嘅螭陛，同樣有祥雲騰龍吐珠，四角有螭首，可想而知地位幾高。
殿內佛像
裏面亦係講經堂
大雄寶殿兩旁仲有東西配殿
配殿旁嘅普賢菩薩騎象像，以前係白色／灰色，今時唔同往日，
而家菩薩同白象都換左金身啦！其實仲有座文殊騎獅像（我無影囉）。
通往上層台階道上
建築群佔地唔少，駁相都駁唔哂，從厘張相可以見到部份嘅八小部洲，
主建築兩旁上白下紅嘅係日台同上紅下白嘅月台。
中間係整座廟嘅主體＜大乘之閣＞，好宏偉！有開寬嘅須彌座同精緻嘅祥雲欄板，
仲有龍石柱，此等建築非皇家不能用 。
D大鼎香爐夠有氣勢啦！
咁豪華嘅建築，裏面當然唔簡單啦！有座號稱世界最大嘅木刻千手觀音立像，
三層樓咁高，可惜有人睇實，只好借網上圖片同大家分享啦！
以下三張圖片來自網上，係咪好靚呢！（當然指觀音像同拍攝手法啦）
四大部洲之一
八小部洲之一（頂上有喇嘛塔及平頂六角方台的），上紅下白為月台。
又係D許願平安鎖
從上下望寺廟建築群
彌陀殿
除左木刻觀音巨像，厘座寺整體建築群好有層次感，風格多樣，顏色配搭得好好，
睇左咁多座廟，我首推普寧寺。
普寧寺東側有一度門通普佑寺，係普寧寺附屬嘅經學院。
中央法輪殿只剩下基座遺址
旁邊殿堂內供有菩薩及羅漢
走LU！經普寧街離開，非常冷清。
時間尚早，都未夠四點，我地又發傻勁，不如去磬錘峰景區入口，
睇下可唔可以近距離D影番張磬錘峰囉（我諗無人好似我地咁傻啦）！
坐言起行，兩傻上左架6路，喺小南門站過對面轉10／28路到喇嘛寺站。
仲要行半個鐘先到 , 磬錘峰就完全望唔到啦！
證明我地。。。哈哈～～
也許旺季才有，故在喇嘛寺下
D23 完
承德旅遊資料：
~ 承德沒有高鐵，最方便是從北京出發，火車約4.5～6小時不等（視班次而定） ;
北京往承德也有班次頻密的長途巴士（我無坐過），正常需5小時，
承德長途汽車站在双桥区武烈路26号 。
～ 承德旅遊景點頗集中，交通非常方便，我們住火神廟附近，幾乎有直達車到每一景點，
票價都是一元（好抵玩）。可參考承德旅遊官網，如下表：
官方網站
http://www.bishushanzhuang.com.cn/webgroup/index.asp
～ 若時間充足又愛好攝影，避暑山莊可作一天遊，半天遊必需（團隊多半天遊），
淡季園內沒有進膳地方，請自備乾糧，一般小食亭是有的。
～ 避暑山莊佔地甚廣，宜購旅遊地圖遊覽。
～ 遊玩承德，除避暑山莊外，多以外八廟為遊覽對象，此等都被列入世界文化遺產，
若時間不足，可選其中幾個寺廟參觀；至於磬錘峰只在旺季開放。
～ 避暑山莊套票分三聯票及四聯票，均為三天內每景點一次有效，票價分淡旺季，
大概便宜廿至卅元，六十歲以上沒有聯票優惠，只能即場購半票 , 磬錘峰及四聯票只在旺季發售。
三聯票有多種選擇：
A. 避暑山庄+普陀宗乘之廟+普寧寺（此行成人￥190） ／
B. 避暑山庄+普陀宗乘之廟+磬錘峰 （限旺季）／
C. 避暑山庄+普寧寺+磬錘峰 （限旺季）；
四聯票 : 避暑山庄+普陀宗乘之廟+普寧寺+磬錘峰（限旺季）
～ 曾嘗試網購避暑山莊聯票，因沒二代身份證無法網購，可在避暑山莊售票處購得。
～ 若不想自行周章，北京旅遊集散中心也有承德二天遊（當然遊的較匆促），
行程是A類三聯票景點，分火車團及汽車團（￥480＆￥550），包2正一早及住宿，
非常抵玩，不過切記要親到官方經營的旅遊集散中心報名（酒店代報名或有車到酒店接送的都是假冒 ），
北京的黑旅遊業很猖獗，千萬小心，以下官網有充足資料可供參考。
http://www.bjlyjszx.com/list.jsp?id=5
官方報名處地圖
～ 承德的公交大站較混亂，如稱火神廟站的公車站，分佈在迴旋處的四角，共四個停靠站，
需實地觀察才能弄清楚各路的停靠點，但不算困難。
～ 承德外八廟：包括溥仁寺、溥善寺（已不存）、普寧寺、安遠廟、普陀宗乘之庙、殊像寺（沒開放）、
須彌福壽之廟，廣缘寺；持普陀宗乘之廟（小布達拉宮）門票是包含須彌福壽之廟在內的。
13/11 D24
承德 ~ (K7718 , 07:41-13:11)北京 ~ 景山公園
玩左承德兩日，行到有D攰，今日坐火車回北京已中午，算係整休，
上過景山多次，始終無去過明思宗殉國自縊果棵樹嘅位置，
橫掂無目的地，咪去行下，順便睇下霧霾下嘅紫禁城囉！
出火車站後，先搭地鐵到酒店攞房，食埋野再去景山。厘個時候，幾乎每個公園嘅銀杏都金黃
每次都係由西邊上山，經富覽亭、輯芳亭，再到萬春亭影故宮，今日霧霾咁勁，
意不在故宮啦！先到東邊山麓憑弔一下厘位失國皇帝。
厘棵老槐樹係喺東城區移過黎，原來果棵已經無左，其實真實位置都係傳聞。
後面塊碑都係2003年先被工作人員發現斷成兩截改作石枱面，後復修。
反正黎到，沿山路經周賞亭、觀妙亭，一邊欣賞矇矓故宮。
時近黃昏，故宮嘅神武門開始有人流離開啦！
雖然係咁，不致差到睇唔到遠處北海公園嘅白塔。
我地由東向西落山，公園已到關門時間LU！食完晚飯早D休息，聽朝出發去清東陵。
D24 完
14/11 D25 北京 ~ 清東陵
慕名已久嘅清東陵，今日終賞心願，踏足其上啦！
爬文考慮過，如一天遊的話，來回遵化長途車票要￥100，再加套票￥112，團費只係￥198，
遊覽時間同交通幾乎一樣，省錢省煩且包導遊 ， 最終決定跟團算啦！
遊陵墓有導遊講解，趣味豐富好多嘅！（有關資料容後再交代）
早上喺1號線地鐵四惠站A出口對面嘅長途車站上車
9：00開出，先上車，後購票（我地同售票員講跟團就得，厘班車留左位俾我地嘅）；
其實當日只有六位團友，現場所見，全車滿座（乜去遵化嘅人咁擠擁架），見佢地現付￥50／位。
約三小時車程到清東陵景區，只有六人落車，互問一下，原來只有我地六位團友，
其實咁嘅低成本安排的確唔錯（同公交公司合作），主辦單位同消費者雙贏。
落車後即見景區售票廳
右邊有洗手間、便利店、金佳美旅行社同郵筒。
原來導遊已與其中一位團友聯絡好到埗電聯，好快就見導遊出現，展開清東陵一天遊。
（我地未俾錢，又未買飛喎！）成人票即場付予導遊，老人票由導遊帶往售票處直接購買。
清東陵立體模型地圖
買好套票就可以啟程，先去區間車站上車（唔買套票得唔得呀
不過只係清東陵神道，總長就有14.5公里，點行呀！
區間車喺景區內有好多分站，遊客可以落車遊覽，再坐下班車（無限次任搭，，免票人仕單購￥30），
不過我地去時，整個景區真係好少人，應該維持唔到15分鐘一班車啦！
架區間車都係得我地六人
導遊話停1分鐘俾我地落車影下石牌坊（第一站）
第二站係大紅門
跟住經過碑樓（無停）
去到神道又停一陣影相，淡季真係唔錯。（曾見網友說十.一遊陵，兜左路連神道都無睇，又要加遊）
雖然陰天又有霧霾，影響視野，但一望無際嘅神道，的確壯觀。
又上番車，經過龍鳳門。
七孔橋正維修
黎到轉車站，厘度有好多食肆（當然無乜生意啦）。
上另一車，兩三分鐘就到，步行到裕陵，乾隆盛世，又做左61年皇帝喎！陵寢梗有睇頭啦！
入口正在維修
整個陵區壯觀
隆恩殿
帝后通常左右各一個黃瓦燎爐
隆恩殿前嘅丹陛係龍鳳平排
殿內展示清朝各帝后貴妃圖（乜D后妃個個差唔多樣嘅
二柱門及其後的五石供，皇室女眷只可以黎到厘度。
過左五石供，就係地宮同陵墓最高位嘅明樓。
向下通道進入地宮，兩旁棧道可通明樓。
地宮第一道入口
兩度石門保持完好
兩邊石牆刻滿經文、佛像同五供，嘆為觀止 , 據講，到目前D經文仲未被翻譯出。
進入金券（放棺槨墓室）嘅門，被當年盜墓嘅孫殿英（亦有說是韓大保）炸開，而家橫放地上。
當時孫對金券度門屢攻不開，結果狠炸裂開後，發覺乾隆棺竟浮左出黎
（其時金券水浸），頂住度門，厘個已證係事實，故事長篇，有興趣請睇官網啦！
http://www.qingdongling.com/decipher/donglingdadao
裕陵共葬乾隆及兩后三妃，經孫一伙人洗劫同破壞，五具白骨亂棄，
已經撈亂骨頭
（明明話一皇五后妃架），
未化白骨，咁未無撈亂囉！
乾隆棺槨
門頂上嘅圓窿係門軸
我估厘幅係六字大明咒
走LU！
近睇石五供，雕工非常精細。
乾隆有三位皇后，其中兩位同葬喺裕陵（帝陵），無設皇后陵，
只有裕陵附屬嘅裕妃園寢 , 行程當然去埋啦！
裕妃園寢入口
後妃墓一般只有一個青瓦燎爐
厘座係香妃墓（容妃）
佢嘅地宮就喺鐵花欄嘅下面，規模較細同簡單。
裏面只有一具棺槨
石門亦無破損
由厘個裕妃園寢嘅規模，可以感受到乾隆盛世有幾多妃子啦！
其中最具規模嘅係純惠皇貴妃墓，有地宮，亦有明樓，可見其地位。
地宮內有兩具棺槨，正中赤朱色嘅係純惠皇貴妃（睇都知豪華啦），
旁邊嘅破棺竟然係乾隆第二任皇后
竟要委身於純惠皇貴妃側，果真係死無葬身之地，悲慘！
究竟厘位烏拉那拉氏點解令乾隆恨佢入骨，連墓都唔俾一個佢呢？
（我諗還珠格格裏面講嘅皇后就係烏拉那拉氏）正史當然隻字不提，
但網上野史多不勝數，有興趣可自行搵下啦！（通常野史梗好睇過正史
可見石門因被盜受損
有朋友對睇陵墓好抗拒，除避諱外，佢話悶到嘔喎！其實我睇過好多陵墓，
發覺清東陵唔止值得花一日時間黎睇，仲係我睇嘅陵墓中，最有趣味性之一。
（當然要知道背後故事啦）
參觀完裕陵，D故事聽得津津有味，跟住步向慈禧陵。
先到達碑亭
裏面嘅石碑當然氣勢不凡啦！
碑座四角刻有魚、蝦、蟹同龜。
慈禧隆恩門
厘座橋可能在維修
隆恩殿前嘅丹陛，除左鳳上龍下外，
中央底部仲刻左隻老鼠
鼠雕嘅傳說有二：一係慈禧誤以為慈安屬鼠（慈安實非屬鼠），意是死都將慈安壓住。
二係慈禧屬雞，雞最怕鼠，痛恨慈禧嘅監造官暗使工匠刻上老鼠，讓慈禧死不得安寧。
壁虎之說係因壁虎在中國宮廷中有重大隱意（宮中以朱砂養壁虎製守宮砂），
喺后妃住處嘅石陛多暗刻壁虎，視為守宮嘅鎮物。慈禧得知佢嘅陵殿丹陛有此物，
即怒將有關官員同工匠殺死，到底係佢淫亂宮幃心虛，感到侮辱，
還是怕鎮物喺佢死後真會起作用就唔知啦！（厘樣要問慈禧啦
搵到隻小動物喺邊未呀？
慈禧隆恩殿
慈禧陵燎爐
厘幅亦係鳳上龍下，慈禧陵嘅兩塊丹陛，較乾隆裕陵嘅，手工精細華麗得多。
再睇石階上嘅欄板都係鳳上龍下，鳳柱係一鳳壓二龍。
龍逐鳳欄板
龍頭水口表情動作生動
嘩！使唔使咁靚呀？隆恩殿令人睇到目瞪口呆，即使盛世乾隆的都遠不及厘位敗國西太后咁有氣勢。慈禧陵有三絕：金絕，剩係三殿用嘅黃金達4592兩；木絕，全殿嘅棟、樑、枋都用黃花梨木造，
慈禧嘅棺槨當然更上乘，用金絲楠木製；石絕；入黎已睇到，無論丹陛欄板石階，
不但係上等漢白玉石，雕工更勝乾隆嘅裕陵。
深入隆恩殿後，留心睇下，奇怪！
大金龍柱後嘅裝修，一D都唔馬虎，當年每條龍刻全用真金。
殿內展覽慈禧生前日用品同衣飾
繼續前行
黎到厘度，終於搵到樣不及裕陵精美嘅，就係石五供啦！憑眼觀，明樓仍係乾隆嘅有氣勢D！
向下嘅斜道通墓室，木棧道通明樓。
論墓道同墓室，以慈禧嘅地位同風格，算樸實喎！（你以為啦！佢將財寶堆哂上身，
諗住帶埋落去就真啦！
仲有佢身上著嘅、蓋嘅、戴嘅、陪葬嘅都鑲滿金銀珠寶，據講孫殿英盜墓時，
墓室被洗掠一空不在話下，將慈禧著嘅衫除個清光，最名貴係佢口中嘅夜明珠嘛
（傳說送左俾宋美齡）！點攞都唔得，咪用刀割開塊面攞囉！如果慈禧有知，
我諗佢覺得慘過死多次囉！（網上五花八門嘅資料，多到睇唔哂，亦越睇越有趣味。）
剩低嘅係慈禧具棺槨
被盜墓時被破壞嘅石門
門頂上嘅玉石雕
細心觀察，圓拱分三層，一、二層係左鳳右龍平排雕刻，但頂上只有一龍，
同外面嘅丹陛欄板風格有別。
參觀完就由木棧道出明樓，樓內立朱砂碑。
樓外有通道可繞墓（墳頭）一周。
從明樓下望五石供發隆恩殿，睇完落去，走LU！
之後我地行番去區間車站，搭車去景陵（康熙），可惜地宮無開放，
但仍能參觀一部份，無所謂啦！俾個藉口再黎過。
雖然係咁，神道仍好有睇頭。
厘D石像生係景陵特色
五門牌樓增神道氣勢
碑亭無開放
景陵遊覽圖
遊客可以經玉帶橋去到隆恩殿
厘度嘅丹陛雖然細緻，都不及慈禧果兩塊。
隆恩殿內陳設簡單
遊客只能走到陵寢門
由門縫睇入去，同乾隆裕陵一樣，都係先到二柱門，後五石供再到明樓及地宮。
因為坐16：00班車返北京，我地周圍蕩下影下，本想去睇孝莊陵遺址，
反正等景陵開放再黎，無謂趕啦！
其實行車都要一段時間先行哂神道
D25 完
北京往清東陵溫馨提示：
～ 從北京到清東陵，可從北京四惠乘往遵化長途車（班次較密，￥50/位），
到石門收費站下車按指示前行800米到售票廳（路牌3公里是大紅門），
問題在回程，長途車自遵化開出，我們報團的六位是旅行社預留16：00的班次，
特別經東陵接載我們（最遲上車），當天所見，也是全車滿座，
因此，散客最好查問清楚及能否預訂回程車票。
～ 四惠至清東陵估計是在旅社有團時才特別行經（09：00班次），其餘班次不入清東陵；同樣地，回程到清東陵載客的，也是為旅社預留的團友座位（16：00），
如有空位，應能上車，但萬一滿座，也許要包車到遵化再坐回北京了
（遵化往北京尾班車為17：00）。
～ 以往北京旅遊集散中心星期六、日的清東陵團已取消，目前清東陵一天遊由金佳美代辦，可經網上/清東陵駐北京辦事處預訂（成人￥198，六十歲以上￥168，包區間車），團友是自行到四惠長途車站乘09：00班車直達景區售票廳前，會合導遊遊覽景區，淡季遊覽時間頗為充足。遊畢再自行到景區口乘16：00班車返北京，
途中司機會要求收證件，回鄉卡則出示即可。（詳情參考313＃）
～ 一天遊不包餐，團友約十一時多抵達清東陵，後即展開行程，團友需自備乾糧充飢（曾見網友說導遊帶去吃飯，使遊覽時間大減），或遊畢有閒到食肆用餐，
但食肆距大門上車處還需15分鐘區間車程，為團友留座的班車是遇時不候的，
所以需小心控制時間。
～附北京四惠長途車站圖片 :
北京一號線地鐵四惠站A出口，不過天橋，沿樓梯下，即到此。
直視對面天橋底右邊，即是長途汽車站。
找到這輛汽車就對了！
～ 清東陵區間車路線遊覽圖
由於篇幅過長，未能一氣呵成，D26-D28置於Part2，
歡迎繼續到訪，謝謝！
沒有留言:
張貼留言