豬熊足印: 自組緬甸11天攝影團實錄

又出發啦！

今回小鄧自組12人嘅緬甸11天攝影團，由29/11 – 9 / 12, 我倆梗唔執輸，第一時間報名啦！

不過今次係交當地旅社安排，所以無花心思搵料，講真，全程去左咩地方，

真係唔太清楚(多謝Ming姐個行程簡述，慳唔少功夫呀

)，希望無搞錯啦！
至於景點資料，網上多不勝數，我就唔講啦！
香港到緬甸有港龍直航，但因凌晨機兼且貴好多，我地情願揀越南航空轉下機，反正當地團以＜剩肉＞計11日，飛行時間好之餘，仲平千幾蚊，

都話小鄧精明架啦！

多謝哂啦！

話明係攝影團，時間梗係充裕好多，睇行程先：

D1    香港 > (越南河內轉機) > 仰光 > Central Hotel

D2    仰光(Yangon) > 佛學院 > 大金塔日夜景(Shwedagon Pagoda) >
Central Hotel

D3    仰光機場(乘內陸機) > 蒲甘> 參觀市場 > 文化村 >
      瑞山陀佛塔觀日落(Shwesandaw Pagoda) > Kumudara Hotel

D4    蒲甘(Bagan) > 部份團友坐熱氣球 > 參觀佛院 >
   阿難陀寺(Ananda Phaya) > 參觀佛塔群 > 拍攝牛羊群 >
   登塔觀日落 > Queen House Bagan & Restaurant  > Kumudara Hotel

D5 蒲甘(Bagan) > 瑞山陀佛塔觀日出 > 參觀市場及品嘗地道咖啡 >
      柚木寺(wooden temple) > Kumudara Hotel

D6 蒲甘機場(乘內陸機) > 曼德勒(Mandalay) > 嚐本地早餐 >
      馬哈根德昂伽江僧院(千人和尚廟) > 因瓦古城 >
柚木寺(Bagaya Kyaung) > 參觀尼姑廟 >
        烏本橋日落(U Bein bridge) > Hotel Queen Mandalay

D7 曼德勒(Mandalay) >  烏本橋日出(U Bein bridge) >
         Nandawkyun village > 妙登壇寺(Mya Thein Tan) >
         Min Gun鐘寺 > 烏本橋日落(U Bein bridge) >
      Hotel Queen Mandalay

D8 曼德勒機場(乘內陸機) >  希赫(Heho) > 沿途停車拍攝 >
      Pindaya慶祝洞窟(Pindaya Cave ) > 途中小休嚐當地下午茶 >
      Nyaungshwe碼頭(乘小船,Nyaungshwe Docks) > 茵萊湖(Inlelake) >
      GoldenIsland Cottage

D9 茵萊湖日出(Inlelake) > 沿途欣賞水上農田及房屋(乘船) >
      木柴市場(5-daymarket ) > 寺廟及廢墟(ShweInn Dein) >
      茵萊湖日落>Golden Island Cottage

D10  茵萊湖(Inlelake) > Nyaungshwe碼頭(乘船)>
        希赫機場(Heho，乘內陸機) > 仰光(Yangon) >
仰光市內火車遊 >卡拉威宫晚餐(Karaweik Palace) >
   Central Hotel

D11  自由活動（昂山市場）> 仰光機場 >
        越南胡志明機場（轉機）> 香港

至於旅費方面，遲D再交代，而家透露大數先，全程連飲料雜支，
六程飛機，都係＄15000／人，個人覺得非常抵玩啦！

以下係緬甸11天嘅總消費（當然唔計手信啦）：

香港⇄ 緬甸來回機票（7月越南航空價）＄2570/人
當地11天團費（包4程內陸機）細目:
團費USD1215/人+餐費USD245/人（10午10晚）=約$11388

總消費:
機票$2570+ 團費$11388+ 飲料小費捐獻等雜支$850= $14808/ 人

唔使萬五蚊港幣，連大交通坐左六程機，
何況仲食得好，坐車超舒服（平均每人兩座位以上），
住得OK，住喺市中心唔錯啦！

跟住再俾D溫馨提示:

1) Book緬甸當地團，因受到外匯管制，訂金分兩次繳付，總數約40％，要經第三國家收取(有泰國、越南，甚至德國等)，小鄧亦只能靠網友評價決定用邊間旅社啦！以下有宗笑話。

落訂前，小鄧傳來醫貓：今天已滙出US$3,300首期訂金至緬甸旅行社,希望11月底我哋唔會見報"港人隔山報團受騙,流落仰光街頭待救"啦 !haha~~

2)持特區護照往緬甸需辦簽證，可參考以下條LINK：
http://myanmar.e-consulate.org/myanmar/jsp/myanmarindex.jsp

3) 緬甸唔接受信用卡，酒店訂房只接受現金美元、歐元同英磅，街頭購物有D收美金，有D唔收(例如洗手間)。

4) 緬甸消費要求新鈔，我試過俾5蚊頗新嘅美鈔，佢都要我俾過張再新D嘅，所以兌美元時，向銀行要求盡量提供較新鈔。

5) 緬甸公廁部份收費200-300MMK（約20-30美仙），簡單而乾淨，OK架！

6) 最大問題係要經常赤腳（襪都唔得），我試過上山嘅路都要赤腳，對香港人好有難度架！（好痛呀）有團友用透明黏貼鞋墊貼腳底（可多次重用），再用膠貼黐實，效果唔錯。

7) 佛國都會要求女仕入廟嘅衣著唔可以坦胸露臂，厘樣多數朋友都知架啦！

好啦！講住咁多先，借住團友幾張相做頭盤，遲D正式出發帶大家漫遊緬甸啦！

第一次坐厘種機，機翼喺窗口以上，今次一坐就坐4次。

Ricky傑作

小鄧傑作

大雄作品（手機都咁靚）

Sit sir傑作

正式出發啦！

厘幅緬甸地圖，紅色線路就係我地會去嘅城市，不過城市間係坐飛機啫！

大金石喺Kyaiktiyo，可多加一天來回。

D1 香港>(越南河內轉機)> 仰光>Central Hotel

厘次緬甸行喺香港坐越南航空14：30飛機出發，
到河內再轉16：40班機往仰光，機上剛好睇到漫天落霞。

18:10抵仰光後，晚膳餐廳環境唔錯，喺PadonmarRestaurant。

我地嘅晚餐菜譜

每餐都有嘅煎炸小食

4人一份餸菜，較特別係用葵葉織嘅飯筒。

甜品

飯後返CentralHotel休息，個名無呃人，真係喺市中心喎！

牆上嘅掛氈畫好靚

我地全程住三星，房間寬闊乾淨。

D1 完

D2 仰光(Yangon)> 佛學院> 大金塔日夜景(ShwedagonPagoda) > Central Hotel

雖然一把年紀，但我倆仍希望盡所能睇多D野，由於酒店喺市區，
睇得唔好嘥，趁早出動，行完先返酒店食早餐啦！
厘間係住宿酒店嘅外觀

對面係維修中嘅臥佛寺(房間俯瞰)

沿大馬路南行，遠遠就見到迴旋處嘅Sule Pagoda，
好奇怪，中文竟然叫白塔，原來係緬甸語嘅音譯。

經過消防局

市政廳

有唔少歐洲式建築嘅民居(始終被英國統治過嘛！)

到左白塔寺，因時間好早，無乜人。

一般寺廟本地人免費，外國人要收費嘅！厘間都唔例外，盛惠三個大洋（USD）。

市政廳正面

AYA銀行

以馬內利浸信會教堂

班都拉公園獨立紀念碑（Mahabandoola Park）

唔知講乜野，成條街咁長，有人喺度住，令我諗起香港，
當日影左又唔記得問導遊，真失敗！

緬甸好多烏鴉，間中亦唔少白鴿周圍飛。

D舊式民居好靚

高等法院

周圍踱下

又見到間旅遊警察局，連警車都有區分，唔知負責範圍點嘅呢？

電訊公司卦

緬甸傳統服式好流行，無論男女，下身都穿紗籠，男式叫“籠基”，女式叫“特敏”。

男女都習慣用頭頂重物

嘩！哥仔，眾目睽睽之下，你搞咩呀！

唔怪之得團友問導遊，到底著紗籠有無著底褲啦！

喂！有筍工呀！

教半日都有15萬，仲有獎金添！

咁即係幾多呀？（約1200蚊啦！）

因為時間仲早，無乜人，天氣又唔熱，北行返酒店方向。

厘座建築幾靚

香格里拉酒店就喺我地住嘅酒店隔離

民居一景

戲院

火車站

居民喺火車軌施施然咁行，完全唔覺危險。

緬甸人早餐都喜歡食油炸鬼，味道同香港一樣。

觀光旅遊巴，不過未有客啵！

火車總站及大堂

我地上天橋行返酒店

旁邊嘅火車維修站

天橋下望

厘間商場算具規模啦！

報紙檔

路邊早餐檔開始營業

本地電話卡同店舖前嘅付費電話

仰光公車

返酒店食早餐Lu!

早餐後驅車往佛學院，途中所見。

一到佛學院，見小僧侶陸續化緣返黎。

厘度個禮堂正舉行婚宴

新娘同新郎好熱情，邀請我地入會場，不過我婉拒左（唔好意思嘛），只喺窗口影入去啫！

哈哈！佢竟然客氣咁行出門口俾我地影添！好慚愧，影得唔好。
（留意下佢地仍係著拖鞋嘅）

佛學院另一大堂

厘個係講經堂兼飯堂，暫時未有人。

去庭院行下，見部份小僧食緊炒米粉，佢地有專人照顧膳食，又有飯後果添！

旁邊煮食用嘅炊具仲未清理

厘度嘅盛載飲水器

再返去講經堂，門口掛左個敲木，用黎敲響通知僧侶們食飯時間嘅。

堂上枱面越放越多僧砵（睇黎都一樣，佢地點知邊個係自己嘅呢？）

小僧侶分工合作，會喺每個砵裏面＜畢＞部份飯出黎，留番嘅係僧侶自己享用。

砵內唔止有飯，仲有餸菜、零食、餅乾麵包，甚至紙包飲品都有，都係善信布施嘅。

厘條走廊掛滿旗幟同相片，一陣就好熱鬧。

遊客越黎越集中喺走廊

原來僧侶們會喺度排隊入飯堂

剎那間，飯堂已坐無虛席

前面位小僧只望住前面，無食飯，睇到有D心酸，唔知係咪新黎未慣呢？
哈哈！原來佢無匙羹，要等大哥哥食完借俾佢。

厘邊係較細年紀嘅僧侶（睇黎<10歲）

雖然咁多人喺度食飯，場面就幾靜喎！睇清楚，佢地係將飯砵放喺枱下，
餸菜放喺枱面，低頭食飯，真係食不言架！

跟住我地再到附近嘅尼姑庵，一位外藉女仕正布施筆同書本。

庵內嘅飲水盛器，睇完僧尼嘅寺廟，似乎尼姑嘅真係乾淨整齊好多。
連廁所都乾淨好多，不過尼姑庵有分客廁同主廁，男客只能用客廁，女客就有優待啦！

影左成朝，去食午餐囉！途經所見。

午膳餐廳(MonsoonBar and Restaurant )

喺度飲啤酒梗會貴DD啦！通常3-4千（1000MMK約等於USD1）,
佢地好細心，連啤酒杯都雪埋。

小食係素春卷

四人一份菜，份量足夠，每餐都有咖啡、茶。

上車去參觀囉！厘位係我地導遊，12人坐大旅巴，非常舒適。

途經所見

喬達基臥佛寺（ChaukhtatgyiPaya ）

殿內有兩個鐘俾信眾敲嘅！

佢原本係露天坐佛。

而家經修飾改成咁靚嘅臥佛。

腳底有108個六道輪迴嘅圖案

對面仲有個高台俾遊客影相

正面全景

其他小佛堂

走囉！睇人等巴士

緬甸人等車時一樣做低頭族，不過少D之麻。

黎到大金塔(Shwedagon Pagoda)，導遊每人派張貼紙，上面手寫當天日期。

遊客搭電梯上去，經長走廊進入大金塔。

喺長廊俯瞰已經有靚景

為左一次過睇哂大金塔嘅日夜景，我地由16：00行到18：30，實在面積好大，太靚啦！
我地人人都行到腳痛，但唔捨得唔影，我就行左三轉，影到無電。
雖然維修緊，但無損大金塔嘅美態（當然真身應該靚好多啦）

都要讚下佢地嘅搭棚功夫，遠睇都唔覺搭左棚。

本地人免費入寺，遊客需購票。

日間景觀

整個寺有七個厘D corner，分別由Monday至Sunday分佈環繞中央大塔腳下。

每個corner都有浴佛擺設，供善信使用。

繼續前行

部份塔座

入黑前，工作人員開始清潔打掃，一字排開，每人揸雙掃，好有陣容架！

有D蹲身刷地

厘排設施應該用黎點油燈，但一盞都唔見，唔知係咪要到時節先用呢？

天色開始昏暗，各大小建築開始著燈。

晚上嘅佛殿更顯金碧輝煌

入夜人潮越黎越多

厘兩張係日夜景觀分別

雖然日頭己經影過哂，但入夜又真係靚D。

走Lu！回頭再影張大塔，個天己經黑哂！

今個晚餐有驚喜，喺ShanYoe Yar Restaurant , 侍應捧黎時以為又係4人份啦！

點知佢話唔係，係一人一份，嘩！太多啦！無一個人食得哂，味道唔錯，正！

D2 完

D3 仰光機場 > 蒲甘(乘內陸機) > 參觀市場 > 文化村 >
瑞山陀佛塔觀日落(Shwesandaw Pagoda) > Kumudara Hotel

今朝搭06：00機去蒲甘，04：30落lobby攞左早餐就驅車去機場，
天都未光，又要上機，影住咁多先！

機上早點

07：15就到左蒲甘，我地坐嘅飛機。

厘個時間最啱去街市，咪笑喎！唔少團去架！
街市一樣賣珠寶廣告，梗係啦！緬甸出產寶石翡翠嘛！

既然黎到街市，當然都搵D野影下啦！
市場嘅活動已好忙碌

攤販都全數開工啦！

厘D係緬甸少女嘅防曬恩物，佢叫特納卡(Thanakha)，係將黃香楝樹幹磨成粉末，
混成漿搽喺面上，亦可以好似磨墨咁，用樹幹喺個類似硯嘅石塊上加水磨成漿。

緬甸女性同小孩九乘都會搽，男性亦有架！不過少D啫！
話時話，又好少見D女仕有雀班喎！不過搽兩pat野出街，唔知香港女仕肯唔肯啫！

輝哥傑作

我以為厘堆係芽菜，但團友睇過話似薑絲（唔係呀

），
可惜雞同鴨講，最終搞唔清係乜。

其實街市裏面幾黑，只要有光嘅角度，D遊客就企喺有利位置捕捉，攤販似乎已習以為常。

香港無見過未熟且去核嘅洛神花（唔知我有無睇錯呢）

早上黎街市買野嘅，梗係以婦女為主啦！

嘩！成大袋粟米，一大盆葫蘆瓜照用頭頂，厘招咪叫做<無得頂>囉！

巷口牆上掛滿布偶木偶，厘檔佔地少喎！

洋人單車隊黎交車，喺蒲甘，好多遊客踩單車，
特別係電動單車，最受遊客歡迎，慳力嘛！

厘個街市係遊客必到，喺度開單車租賃店，有腦！

緬甸人用陶器多過瓷器

走LU！玩轉街市後，又去民族村玩啦！
黎到民族村，同好多東南亞熱帶地方一樣，鄉村屋都係吊腳樓，
以竹木葵等建材為主，佢地喺涼棚下作手工藝。

亦有羊棚

厘位大嬸織緊個用馬尾毛混竹織成器皿

厘位婆婆食嘅唔係雪茄，而係土煙，用粟米層皮褢煙絲吸食，
因為好多煙灰，所以夾住個椰殼盛煙灰。

佢一見我地黎，即刻吸另一支香煙猛推銷。

你睇，左一支，右一支，係咁吸，婆婆，注意健康呀！

見婆婆吸得咁爽，我地又唔會幫襯買煙，
小鄧就請佢去個好D嘅位慢慢吸啦！我地就係咁影。

厘位婆婆精D，齋幫手卷煙賺錢，唔吸嘅！

又有煎炸野，每人試一件，不過好多油！

厘度招呼遊客飲茶嘅地方，主人好客咁俾D特納卡我地試搽，
三位勇者試過（當然包括我，好奇左好耐架啦！），初搽上面無乜特別，亦無乜顏色，
跟住涼涼地同抆緊塊面，感覺似做冰涼面膜，顏色亦越黎越現，呈淺黃色，不過乾左後，
我覺得有D痕，之後又無事，但其他兩位完全無事。

厘個家庭有大學生成員，喺城市教書嘅！

另一個家庭

大水缸係村民必備嘅，相信雨季就更有用啦！

厘個涼棚望落幾舒服，我諗唔落雨時，佢地都會喺度訓嘅！

樓底吊住花生

厘位姑娘喺度雕漆器

緬甸嘅牛似印度、尼泊爾果種，有個峰，又瘦。

趕羊嘅婆婆健步如飛

睇佢幾咁開心

係時候食午餐啦！今餐喺 Amata Boutique House，環境好好。

花園有個表演台

對面已經有好多佛塔啦！

入去食飯LU！

佐膳香料（辣椒、蒜、花生芝麻果仁。。。）

豆湯（飲完先記得影）

厘碟從未食過，類似過老嘅水瓜，認真高纖。

又係四人份量，飯後有咖啡、茶。

飯後上車前，走遠D影多張，每個塔都有編號。

途經所見(Bagan Golden Palace)

由於大量男人出家，所以經常見到地盤女工搬泥啦！

先返酒店攞房休息，大隊到黃昏再出動影日落。

因為酒店露台己經望到周圍都係佛塔，有咁多時間，睇得唔好嘥，出去逛囉！

無數過行左幾多個佛塔，總之隨緣咁逛，大型佛塔多數有人睇，甚至賣紀念品。

一般佛塔入口有緬文數字，對下個緬文數字表，應該係2212，我諗係編號卦！

佛塔內最少有座佛像，有的精工，有的粗樸。

另一座佛塔，感覺好新，厘座係2206。

厘座較具規模，有圍牆，窗戶都好講究。

我地喺厘座塔內遇到位伯伯

佢話裏面嘅佛像同壁畫都係佢嘅個人設計。（又幾靚喎）

廟堂前仲有畫賣添！

厘兩座佛塔喺埋一齊，當然唔會錯過啦！

門口豎左個對遊客衣著要求嘅告示

係咁易逛左十零廿個塔，平原太大，塔亦太多，短時間無可能行得哂，
所以喺蒲甘，單車／電動單車都好受歡迎。
返酒店集合，上渴望已久嘅瑞山陀佛塔觀日落囉！(ShwesandawPagoda)
（當日掛住上塔，忘記影相，厘張係第二日上午嘅）

頂層石級都幾高，我生得矮，行得較吃力囉！

嘩！使唔使咁早呀！頂層最佳位置已經滿座啦！

塔上眺望四周

中間係Dhamma-yam-gyi Pahte （最大嘅佛塔）

最搶眼嘅係阿難陀寺（Ananda）

That-byin-nyu Temple （最高嘅佛塔）

等日落期間，睇下塔上環境啦！

塔嘅另一面背光，影出黎又另有一番味道。

好多遊客唔多影相，坐喺度齋欣賞都好正！難怪列世界十大最美日落啦！
（可惜我技術C，影唔出意境）

喂！靚女，攞景啫！唔係攞命喎！小心呀！

整座塔共四條梯，無分上落，但上塔前一定要全赤腳。
（基本上唔可以袋對鞋上塔，無俾佢地捉到就另計啦！
嘻嘻！我衰過一次，俾管理員叫我放低對鞋先上得。）

厘個時候，塔前嘅停車場已經停滿旅巴。

今日算走運啦！睇到好靚嘅日落景色。

直至太陽落哂，餘輝仲係映照到滿天紅霞。

小鄧成日講嘅magic moment，今日有得睇啦！無加色架！天色由暗轉亮，放射式映出紅霞。

可惜厘個時候，停車場嘅車都走哂，剩得好少遊客睇到啦！

天色暗淡，要改為曝光啦！

大型佛塔開始著燈，我地影到D人走哂，有阿伯叫我地走先肯撤退。(開電筒摸黑落塔)

晚飯喺Nanda Restaurant ，厘間餐廳係由破塔改建而成，好特式，入口係塔門。

仲有兩位盛裝美少女迎賓添！

好多遊客光顧

一邊食飯，一邊睇表演。

有時仲俾觀眾睇下表演者點樣拉扯布偶

今餐甜品好惹火，係隻炸香蕉，當然仲有咖啡茶啦！

D3  完

D4 蒲甘(Bagan) > 部份團友坐熱氣球 > 參觀佛院 >
   阿難陀寺(Ananda Phaya) > 參觀佛塔群 > 拍攝牛羊群 >
   登塔觀日落 > Kumudara Hotel

今早有七位團友05：15出發坐熱氣球（USD320／1小時，每人一座位），
雖然我無坐，好在小鄧慷慨提供相片，大家不妨睇下到時值唔值得坐啦！
以下5張相都係小鄧傑作

薄霧飄渺，蓬萊仙山唔知係咪咁上下呢？

據講目前仲有大小2217座佛塔，咁就一覽無遺啦！

坐完熱氣球，公司會送一張證書同Postcard，仲有頂帽添！
小鄧抵死咁問公司：我地唔要證書同帽，有無得平D呀？（人地梗唔啋佢啦）

原來我地房嘅露台可以睇到熱氣球

可惜我訓得晏左D，07：30氣球已經陸續降落，其中一個仲落喺我露台對出，
仲以為係團友果隻；心諗：成為佳話喎！團友大可以話<我試過坐熱氣球返酒店呀！>
可惜唔係佢地，一個美麗的誤會呢！

食早餐前，順便影下酒店入口，有馬車喺門口等客。

亦有馬車兜客

早餐可以喺室內／室外餐廳度食。

早餐後出去影下相囉！小和尚（擺拍）

厘位賣花姑娘好好人，自願俾我地影。

仲借埋檔生意俾我地玩，我同團友試頂過，唔好睇佢地行得咁輕鬆，好重架！
唔識用力，分分鐘整親條頸，仲極難平衡，都算體驗過婦女嘅＜無得頂＞吖！
打搞位姑娘咁耐，我地旅行在外，無可能幫襯買花，隊長事後識做架啦！
雖然我地係耆英團，但人人玩得，連導遊都奇怪咁平凡嘅野，落喺我地手就變笑料啦！

跟住黎到收納孤兒同貧童嘅佛學院，佢地年紀好細，大概係6-12歲左右。

似乎係佢地嘅自由時間，睇見佢地，諗起兒時生活，無咩玩具，但玩得好開心，好簡單。玩射橡根圈，射左上樹，執唔番。（留意下有D小和尚要著羊毛衫，但佢地仲要沖凍水涼）

打功夫

睇人玩都開心

咦！佢地影咩呢？

原來係僧房，夜宿嘅床舖。

佢地喺個大蓄水池前面沖涼，當然係凍水啦！（應該幾凍嘅）

可以見到年齡較大嘅幫幼齡嘅洗衫（仲幫佢地洗頭）

照顧幼小 (Ying sir傑作)

厘張真係靚到無語，點都要借黎一用架啦！
Sit sir 作品

初時唔知佢地做乜，後來見一位小僧飲完碗水苦哂口面，
唔使講，梗係藥啦！小小年紀，原全係自助助人，睇見有D心酸，
但回想兒時，何嘗唔係咁照顧弟妹呢？現今香港，可能所餘無幾啦！

除左請佢地食下野，團友仲好有愛心，攞部手機俾小朋友輪住撥每張相黎睇，
佢地嘅表情，已經話我知佢有幾好奇同開心啦！

打鐘食飯啦！（當時見有房車駛進，車內嘅人對飯菜巡視一番後離開，可能係贊助者卦）

仲未齊人

佢地唔使化緣，D飯菜幾豐富

估唔到仲有老火西洋菜湯添！

小僧們開始念經，結果，我地等左好耐，直至離開都未念完，細細個就體會＜搵食艱難呀＞！

離開佛學院，跟住就向緬甸四大佛寺之一，阿難陀寺(AnandaPhaya) 進發。

寺廟前有座拱門

先經過一條滿是紀念品嘅商舖街，再進入寺廟。

幾特式嘅有罩盛器

廟內通道

寺內四邊各有佛像

最特別係正殿厘座，以下係從近而遠拍攝嘅。（請留意面容）

正殿前有個立佛嘅底座，應該有典故卦！

跟住又去行下佛塔，厘度矚目所及，等閒都超過百座，且座座都好靚，
千祈唔好問我邊座打邊座喎！我出名係路盲，
如果要我自已漫遊平原上嘅佛塔，哈哈！肯定蕩失路啫！

我對景點貪婪，座座都想睇，可惜影得外觀黎，又無時間睇裏面，都唔知係我玩景定景玩我啦！
入左厘座有金身佛像，連度閘都花心思嘅佛塔。

喺塔外望到個受保護嘅歷史遺址

厘D細嘅無入

厘座嘅佛像用磚砌，無修飾外表。

諗住入去厘座That-byin-nyu Temple （最高嘅佛塔）

尤其後來先發覺有個古樸拱門，可惜無時間，影下相滿足下啦！

總之靚塔多不勝數，蒲甘古城佛塔全盛時期有五千座，
而家冧剩都有2217座，可想而知幾咁壯觀呢！

個流動攤檔就喺頭頂，想話佢阻街都唔得喎！

上車去食午飯啦！大伙都覺得食物一定唔及香港多姿彩，
特色比較重要，今餐又有驚喜（特色）。
餐廳喺河邊

環境優美

咦！搞咩咁大陣容，唔通有人辦喜慶？

前兩人敲鑼打鼓

後兩人抬餸菜  (我地仲周圍望係邊度嘅添！)

呵呵！原來係我地嘅！餸菜好唔好無問題，已經先聲奪人啦！
虧店東諗到咁好玩嘅上菜方式，又謀殺唔少記憶卡啦！

餐餐必備嘅煎炸小食，旁邊嘅應該係蒜片辣椒浸魚露，我見導遊餐餐攞佢黎撈飯。

餸菜同甜品，個湯似冬蔭功，外加咖啡茶。

跟住再去間臥佛寺影相，打橫好長果間就係啦！
佢座落喺瑞山陀佛塔(ShwesandawPagoda)對面。

整座建築僅容臥佛，旁邊只有兩尺零通道，兩人相遇要側身通過。

（擺拍）

Ricky作品（擺拍）

走過隔離座廟，又係好窄嘅通道，光線要靠窗門射入。（擺拍）

玩左大半日，返酒店休息，黃昏再續。

時至黃昏，又出動啦！導遊帶我地影牛羊，我地守喺牛羊必經路上。
又有馬車經過

等左無幾耐，羊群間歇通過，大家拍得不亦樂乎！

一陣我地會上厘座Pya Tha Da塔影日落 & 村民趕牛羊，
不過而家已經唔少人攞位啦！頂上月光咁早就出黎！

地面層兩邊佛像

塔門外望

厘座塔樓嘅梯級有D中東味道

更上一層樓

因為塔高不及瑞山陀佛塔，當然景觀稍遜啦！

西面部份景

不過厘度有牛羊回家嘅動態嘛！

另一邊景觀

遠處維修中的金塔

牛羊群走經塔下

夕照佛塔

老外陶醉於自拍照

日落後到Queen House Bagan & Restaurant 晚飯加睇表演。


D4 完

D5 蒲甘(Bagan) > 瑞山陀佛塔觀日出 > 參觀市集及品嘗地道咖啡 >
      柚木寺(wooden temple) > Kumudara Hotel

04：45大伙出發到瑞山陀佛塔影日出，到達時仲係摸黑，
我諗住入對拖鞋落背囊，唔使擔心無鞋著嘅狼狽啦！
點知俾阿伯捉住，一定要我放低對拖鞋先放行，無計！局住放低。

上到塔，見阿南達寺（Ananda）仲著住燈。

平原上被晨霧濃罩，好有朦朧美態。

天色開始泛紅

熱氣球亦隨隨升起

天色越黎越紅

終於日出啦！蒲甘日出真係靚。

Sit sir傑作

加埋熱氣球，多左D動感，仲正！

厘個時候嘅阿南達寺已經熄左燈

晨光映照大地，千塔顯得一片金黃。

不過部份地方霧氣仍然縈繞

逐漸一天都光哂！平原上嘅千塔更清晰啦！

睇下塔上嘅人，比起睇日落，當然少好多人啦！

前面打橫果座廟，就係尋日下午影嘅臥佛寺啦！停車場得兩架大巴，其中一架係我地嘅！

係時候落去返酒店食早餐啦！

當我地觀日出嘅同時，有團友無去，佢喺酒店睇熱氣球，
原來都睇到幾多，當然無高位咁靚啦！
Ricky傑作

早餐後會喺途經嘅市集獵影兼午膳
黎到市集，厘架巴士算新淨啦！

化緣小僧

市集好熱鬧

有消防局

我留意到緬甸女仕通常會用頭頂重物，，而男仕多數用膊頭。（留意旁邊男仕抬重物）

連老婆婆都毫不遜色

厘位外賣女檔主，收左錢，又送去第二度囉！

咁就真係無得頂，強呀！

見到D車，就知佢地嘅運載交通工具幾緊張啦！

所以有馬車喺度做生意，當然貴D啦！（好過無吖）

厘D唔知咩葉，排得好靚喎！

中午就喺間地道食肆午餐

當地人必需嘅佐膳香料，有辣椒同洋蔥絲，上面嘅係酸甜汁。
今餐食炒飯（同中式差不多）同青菜，仲有碗芽菜湯，可惜掛住食，唔記得影相。

飯後再去一座柚木寺(WoodenTemple)，途中我地請左兩位小僧同去，
當然係增加拍攝氣氛啦！厘兩位小僧好乖好精靈，又識擺post。
一去到間廟，細嘅行埋牆，我地見背景有塔，味叫佢企埋去囉！
點知大果位（其實大小小咋）見地上多石，即刻除對拖鞋俾佢著住
（細果位係赤腳嘅），之後，細嘅又即俾番對拖鞋對方，
睇到大家對佢地又憐又愛。

可能我地喺車請佢地食好多野，又同佢地玩，黎到廟，同我地好快熟絡，
已經吸引所有人嘅鏡頭啦！

其實全程都係同佢地玩，我D技術C唔敢性賴，團友應該收獲豐富啦！
示範穿袈裟

玩得開心

天生就善於頂物，跑都得，行！濕碎啦！

團友仲俾相機佢地試下影相

黎到寺廟，當然要參觀啦！長廊盡頭係個墓地。（我當然唔知啦）

到兩位小僧到黎時，雖然語言唔通，但一味耍手叫我唔好影，表情有D嚴肅，
小小年紀就咁懂事，真係令人疼惜。（可惜我已經影左D，無理由唔俾大家睇架）

厘個似水池，但無水。

佛像有欄柵保護

跟住，我地入到廟內，入口好細，牆身舖滿華麗嘅瓷磚。

廟內供有坐佛

有玻璃牆保護

後面近窗邊嘅係由原條柚木雕成的神盒，用黎放祭祀供品，係寺廟嘅寶物之一。

厘個廟仲有上層，但謝絕女客，男團友可上，上面有座金佛像，有兩度閘保護。
通上層嘅樓梯好窄

上層景觀

我地女仕唯有周圍影下相，大堂屬多柱建築，全部原根柚木，係寺廟嘅特式。

牆上裝飾華麗。

仲嵌有精工嘅銅鐘

另一邊有條通道，唔知通去邊（無時間睇），但牆身有講究嘅雕刻。

當男團友返落黎，廟門即關啦！且請我地離開添！（夠鐘關門）

兩位小僧同我地好投緣，直情玩到唔捨得走，又攀牆，又爬樹，
身手超敏捷，我地又影個不亦樂乎。

係時間離開啦！請小僧們上車，不捨都要車佢地返去架！
咁乖咁精靈，當然唔會待薄佢地啦！

小鄧日日都話想睇小朋友踢波，車行無耐，終於都俾佢遇到，
立刻又叫停車，雖然無光線，但真係睇得開心。
Sit sir 作品兩張

大家言語不通，小鄧就有本事氹到D小朋友進行比賽，先黎每人請佢地食糖，
再黎就係贏果隊獎包糖，哈哈！小朋友完全明白，睇佢地赤腳踢波，
踢得好認真兼落力，中途入球，以為分勝負啦！點知佢地話唔係，要繼續喎！
此刻真係好感動，佢地物質貧乏，但比香港小朋友還要開心呢！

厘隊獲勝，睇佢地幾滿足。

繼續前行，已經黃昏，村民趕牛歸家啦！

幾日都忘記影架車廂，落車食飯前，影下我地12人坐嘅車先。

晚飯菜式 (忘記影餐廳添！)

有鹹蛋味嘅甜品

今晚天色好好，萬里無雲，團友Ricky喺佢露台，用120分鐘影左張星軌，正呀！
Ricky作品

睇完星軌，再睇下當晚嘅星空啦！
輝哥傑作

Ying sir傑作

D5  完

D6 蒲甘機場(Bagan)> 曼德勒(Mandalay,乘內陸機)> 嚐當地早餐>
      馬哈根德昂伽江僧院(千人和尚廟)> 因瓦古城>柚木寺(BagayaKyaung) >
   參觀尼姑庵>烏本橋日落(UBein bridge) > Hotel Queen Mandalay

雖然咁早啫，酒店餐廳依然供應完備嘅早餐，匆匆食完（之前影過，唔影啦），
06：20出發到機場乘07：30機到曼德勒（Mandalay）

現場見幾架軍用直升機

機場控制塔

我地坐嘅係緬甸航空

我地坐嘅同厘架機同類型，雖然細細地，
但好處係坐機翼位都欣賞到風景，因為機翼喺窗口上面。

機倉比一般噴射機矮身，但都幾舒服，唔嘈，好定。

半小時就到曼德勒，遠處係機場大樓。

落機後搭機場巴士抵大樓，巴士車身賣緬甸啤酒廣告。

入境大堂比想像中先進

大堂有兌換店（共3間，有間無開）

機場大樓外觀

上車囉！今次記得幫大家影張車上大合照，都係一人兩座位。

途經所見

估唔到小鄧咁好諗頭，第一個景點竟然係品嚐當地早餐

導遊帶我地去當地大排檔，似乎厘間大排檔，供應食物嘅款色唔少

厘D似印度薄餅，但佢地將佢整成個波咁先放落鑊煎。

不過我地唔識，又未必啱食，導遊建議我地叫奶茶咖啡，外加一碗撈粉（類似米線）

哈哈！唔鍾意撈嘅，可以有碗湯架！

杯奶茶可以媲美港式奶茶架！

導遊叫左份薄餅，醮類似咖喱嘅醬汁。
我地食得好開心，人人食清哂，埋單13000K（約每人一美元）

大家估下天花頂吊住D咩呢？

俾個近D嘅鏡頭睇下（供食客使用嘅打火機）

係喎！緬甸煙民唔算多，不過厘三位僧人都係煙民，
見我影相，將煙收起左（僧侶可以吸煙）。

我地食早餐嘅大排檔，就喺市集附近。

途經所見

到左有千僧廟之稱嘅馬哈根德昂伽江僧院，僧院成條街咁長，厘D係部份建築。

厘處街度全圍起一式嘅牆板（我估係經文卦）

空地正曬僧袍

厘度每早十點都聚集好多遊客黎影相參觀，等睇善信布施，向僧侶們派飯。
由年少至年長嘅僧侶分批排隊

街上聚集嘅遊客越黎越多

厘度係街尾，僧侶進入飯堂嘅入口

僧院內部

厘D藍色紗布蓋住嘅係白飯

開始布施，以女善信為主。

我咁矮，要影厘D相，唔止要趷高，外加雙手盡舉高相機先影到，可想而知幾多遊客吖！

男性派飯嘅，多數係職員。

雖然飯堂內坐左好多人，但街上排隊嘅就陸續有來。

好快，部份僧侶已經食完飯，有D仲攞埋生果走添！

僧侶入哂去食飯，我地又搵第二樣玩啦！見兩小兄妹好趣緻，
咪請佢地食糖囉！（留意妹妹著得一隻拖鞋）

兄妹又唔抗拒俾我地影相，其他團友又請佢地食野囉！
哈！另一個小朋友又黎影埋一份，實行有糖齊齊食啦！

大家玩一輪，點知妹妹竟然請小鄧食柑喎！難得小鄧無厭小朋友隻手污糟，
仲好得戚咁食黎向我地示威添！（抵得佢吖）

好可愛嘅狗仔

街頭供飲水嘅亭

我地開車後經過，見剛才布施嘅女善信喺度食飯。

車行途經地盤，見女工用頭頂載混凝土。

咁細鑊，真係頂天光都未得啦！

路上汽車 (車尾仲企滿人，不過影唔到)

跟住黎到個好簡陋嘅碼頭，見路邊攤賣紀念品。

仲有幾位美少女向我地兜售太陽帽、手鍊之類。

厘位好可愛

落船去阿瓦島（Inwa Island）

我地搭厘種船

到左阿瓦島，上岸LU！

有咁多人等船呀！唔係，原來等遊客兜生意啫！（佢地大多好純，無乜尷硬黎）

搭左廿零分鐘船，上岸再轉馬車，兩人一輛。

哎呀！衰左，個口罩漏喺喼添！好彩我慣用大手巾，搞掂！

島上主要以馬車代步，我地一時經過鄉村民居，一時經過古城門同城牆

又經過農田同廟宇

古城門

島上小學

再經過部份魚塘（我估係咋）

卅分鐘，馬車喺度停低。

對面就係曼德勒著名嘅柚木寺(BagayaKyaung)

老規矩，要全赤腳，表面睇厘座寺廟無乜特別，只係露台嘅柱 , 下木上石設計得幾有氣勢啫！

入到去先令人驚訝，簡直係一座藝術雕刻，雖然影得唔好，應該都可以領略一番嘅！

（擺拍）

主殿供奉左一座金佛坐像

廟內每個角落，每寸木材都經過精工細琢，令人嘆為觀止。

廟內仲有個角落，供僧老師為學生上課嘅，不過光線就好差啦！

厘邊門口都雕刻得好細緻

柚木寺全圖

厘邊門窗簡單D

整個寺廟周圍有露台，都用原棵柚木作巨柱支撐。

真係唔捨得走，四面都咁靚。

厘面有塔樓

連階級嘅旁板都雕刻得栩栩如生

再見啦！柚木寺！

重上馬車，坐車廂內嘅視野差D，改為我坐車頭，睇多D！

遇上牛車，我地D車都要泊埋一邊讓路。

回程線路有少少唔同，會穿過城門。

總之兜兜轉轉，入下蕉林，又入下村。

又到番落船嘅碼頭

再落番船

厘座係阿瓦橋（Inwa bridge）

上岸啦！咦！班美少女們又唔同左樣，好可愛嘅少女。

仲認唔認得佢呀？

跟住上番車去午膳餐廳，無幾耐就過橋，我地行緊阿瓦橋（Inwa bridge）

隔離仲有座伊洛瓦底江大橋，兩橋差唔多樣。

途經所見

黎到餐廳門口，落車先發覺我地都有團名架！

午膳喺Sagaing Hill Restaurant

午餐

緬文俾我嘅印象，總係一個個圈咁。

餐後探訪一家尼姑庵（一路前行）

望番轉頭

條街又有厘D刻文（經文卦）

尼姑庵嘅門樓

入去時剛好遇上兩位外藉人仕布施白米

布施完畢，尼姑們為施主念經祝禱。

一粒米都唔可以嘥

整個過程喺厘間房內

我地就周圍影下相，厘度係佢地專用嘅洗手間同浴室。（女賓客都可以用）

飲水盛器

整座寺院在維修，架車係兩位外藉人仕坐嘅。

另一邊嘅樓房

打搞左咁耐，兩位布施者離開後，我地都捐獻些少，諗住走啦！
點知又請我地入房坐低，而尼姑們亦坐低，為我地念經祝禱。
（頭先兩位外藉人仕係雙方都企嘅）

之後，仲帶我地去廚房參觀添！年輕嘅尼姑對我地比較好奇。

曬洛神花

咦！廚房好大，好似72家房客咁，似乎爐灶廚櫃係分組排放，自行整理咁款。

離開寺院行到街口，發現有棵樹，上面嘅果實好紅好圓，有蘋果咁大，但唔知係咩？

上車出發去睇世界十大嘅烏本橋日落啦！
途經所見

經過公路收費站

厘D小學生坐哂喺學校門口（似乎所有學校嘅校服，下身都係綠色嘅沙籠）

厘種情況好普遍

第一次見街邊枱波

16：15終於黎到烏本橋（UBein bridge），條橋係好特別，入世界十大？
真係要睇下一陣靚成點啦！

小艇仲未有人幫襯

埋邊攤檔有炸海鮮，原隻炸蟹仲幾大隻添！

遠處有座寺廟

原本導遊話USD7／艇，當日實收USD10／艇，可坐六人，我地為方便影相，
只坐兩至三人啫！問清楚時間，總之可以坐到日落喎！（咁就早D上船囉）

我地上船時仲係陽光普照

河水好清

好多人咁樣釣魚，船夫話其實D水好凍架！（我信呀！因為天氣都唔熱）

睇下三位釣魚郎背後，真係有好多人落水釣魚喎！

水面潾光閃爍

嗯！厘位漁夫釣到魚啵！

橋上越黎越多人

咁慘！頭痛都落水釣魚，為生活，無計！

停車場嘅車亦越黎越多，釣魚嘅人亦多左。

夕陽西下，連條橋都開始顯得金黃。

全條橋上大概有五、六座厘D觀景亭，厘座喺舊橋就到新橋交接處嘅。

我地先影正光厘邊，可以清楚睇到橋嘅木材建築，甚至橋上行人都清楚入鏡。

跟住就請船夫穿過橋底到另一邊，睇埋橋底真貌。

厘邊當然係背光啦！

咪住，厘位漁夫有收獲呀！（等左好耐先睇到咋）

原來捉到魚係咁樣用竹枝串起嘅！

烏本橋嘅日落剪影黎啦！

當我地厘邊睇唔到日落時，船夫好機靈咁又穿過橋底，
帶俾我地另一個畫面，正！

終於落哂啦！追日都無用啦！於是船夫問我地要唔要上岸行下條橋（趁天未黑嘛），
我地同意，佢就撐我地去河中嘅半島，順便同佢影張相，係咪好帥呢！
咁醒，梗要醒多兩蚊俾佢啦！

我地行上橋

雖然日落左，但餘輝未了，仲有些少紅。

島上遊客悠閒賞日落（其實無咁光嘅）

回光反照，跟住黑哂，去食晚飯囉！

今晚喺曼特勒市中心嘅Green Elephant Restaurant食晚餐

環境好好

連洗手間嘅佈置都好有心思

晚飯菜式

出門之際，乜架車嘅花紋咁靚嘅，哈哈！原來咁啱係樹影咋！

來去晚飯餐廳途中，都經過曼特勒嘅唐人街，厘度係全緬甸最多華人聚居嘅地方，
可惜太黑，車行又太快，影唔到相啦！
今晚住宿Queen Mandalay Hotel

D6 完

D7 曼德勒(Mandalay) >  烏本橋日出 (U Bein bridge) >
        Nandawkyun village > 妙登壇寺(Mya Thein Tan) >
        Min Gun 鐘寺 > 烏本橋日落(U Bein bridge) >
      Hotel Queen Mandalay

影左烏本橋日落，今朝要影下日出啦！我地五點半前到左烏本橋(摸黑)，
不過都有個好位影野，就係停車場嘅河邊，由於好多遊客黎睇日出，
以下幾張相就係等有車入黎時，剛有打燈效果，影到D船好突出。

天邊越黎越泛紅，尋日影日落，無乜雲，個天馬馬地，
今朝竟然送個瑰麗嘅日出俾我地，感恩啊！

有新人黎影婚紗相，我地團友好有愛心，幫對新人執哂附近D垃圾，
（雖然公司會執相啫，點都無咁全真嘛），等佢地D婚紗相更perfect啦！Ying sir俾個LIKE你！
厘張就係Ying sir玩野，幫佢地影架啦！（即傳，無執過架）會唔會靚過公司影架？
如果對新人上網睇到，歡迎你向團友們攞番輯免費婚紗相喎！HEHE，佢地未必識睇中文喎！

你咪以為我做左手腳，實景真係咁靚架！

.

天未光就落網捕漁

今朝嘅雲彩咁正，唔知係咪時時都有呢？

就黎日出，轉個位先，厘個沙洲已經有幾個人等緊。

齋剪影都殺食呀！

太陽出來了！

兩個SHOT駁埋，厘個位就喺橋嘅左邊，突出嘅沙洲上。

再放多兩張

唔止彩雲滿天，整個水面都一樣有。

求祈用手機AUTO影嘅都咁靚，你話係咪好幸運呢？
大雄作品

先前天黑，無留意，原來地上有好多死魚，應該係水漲時被困而死，都幾大條架！

一天光哂，今朝唔坐船，上橋行下啦！

行番去停車場，經橋上，遠望廟內嘅塔上都有人觀日出。

時間仲早，橋上唔算多人，都係D出門販賣同觀日出嘅遊客較多。

咁早落河佈網，真係幾凍架！

烏本橋長1200米，已經超過160年而不朽，全座橋都係用柚木建築，
原本建築係無圍欄嘅，對畏高嘅人，行起黎可能驚D，遠處一段有新建嘅石欄，
不過破壞原來古樸味道。（就算整，都用木嘛）詳細相片黃昏再黎先上啦！
橋上風光

m

影完日出，跟住包船遊伊洛瓦底江,去Amarapura附近嘅敏貢(MingunVillage)，
好舒服！船上有啤酒汽水咖啡賣。

我地坐嘅係厘種船

船艙好大，不過咁好天氣，無人會坐，落黎只為去洗手間啫！

河邊婦女喺度洗頭,洗衫,沖涼.

仲見到岸上有牛車的士（寫住TAXI）

上岸就係敏貢(Mingun)，離遠就見到座白色佛塔----妙登壇寺(MyaThein Tan) 。

好有隊形

哈哈！厘個容易，我都得！

厘位女尼姑好型

小攤檔

我地先到Pa Hto Taw Gyi古廟對面嘅守廟靈獸嘅巨型石獅，不過而家已經面目全非，
現場所見，只剩番石獅嘅PATPAT啫！真係好大呀！

睇清楚，原來只用磚塊砌成，唔怪之得冧啦！

我地又請左兩位小僧同行，其中一位好靚仔添！不過厘次兩位都比較cool。

兩位小僧非常靈活就爬左上石上（擺拍）

厘座就係Pa Hto Taw Gyi，喺1790年始建，未完工，就喺1838年毀於地震，
下面果間係博物館，我地一陣會上去頂上嘅！

攤上的布偶

繼續前行，經過敏貢(Mingun)大鐘寺。（一陣會去）

等小僧休息一陣

厘位係跟住我地賣野嘅小姑娘

妙登壇寺(MyaThein Tan Pagoda)，成個忌廉蛋糕咁，好可愛。

個塔嘅上半部份

一邊參觀寺廟，團友亦一邊擺拍。

我地上左個塔上

另一角度觀塔頂

塔上第一層嘅觀景台

頂層入口

通頂層嘅樓梯

頂層有佛像

頂層圓形走廊式觀景台

向下俯望，遠處啡色嘅就係Pa Hto Taw Gyi磚塔。

厘位小販賣嘅小食，似鹹嘅pancake。

緬甸嘅民族服裝幾靚，佢地仲普遍穿著架！

跟住黎到敏貢(Mingun)大鐘寺

門口嘅水果攤檔

廟內大鐘 ,對下下面張緬文數字表，鐘上刻有5個緬文5字，
原來係大鐘重55555威斯（Viss），對於厘個度量衡，我完全無知，
（咁即係幾重呀？）約90噸。鐘口直徑約5公尺，又係5 ?
唔通緬甸人視5係一個天文風水之類嘅術數。

個鐘特別處係離地70公分左右，可以放低相機影入去。

後來導遊話可以<捐>入去，於是，我地幾位團友捐入裏面，影番張團體相添！
仲研究萬一出事，點抬起個鐘呢？口痕友話挖地最快喎！(咁又係)
鐘嘅內部

廟內仲有棵長得蒼勁嘅樹（唔知係咩樹喎）

敏貢大鐘寺後面嘅佛塔

隨後我地到Pa Hto Taw Gyi磚塔，厘座巨塔未起好就冧左，
成為永遠不完工嘅磚塔啦！D裂縫係由地震做成。

塔嘅入口

塔基上嘅去水口

目前上塔頂條路喺右邊（話係山頂似D）

我地4人赤腳上頂，行嘅同上山梯級差唔多，
不過唔該你全赤腳喎！（都有難度啊）

頂上可以俯瞰河上沙洲同林中廟宇

跟住我地上番船去江邊MyaNandar Restaurant 午膳，敏貢無乜特定碼頭，
見佢地隨便搵啱個位就上落架啦！

沿河景色

我地將會上去厘間餐廳

我地坐近河邊

先黎個春卷小吃

午飯菜式

最後仲有甜品同咖啡茶

邊食飯，邊欣賞表演。

飯後返酒店（塞車中），沖個涼／飲杯咖啡

跟住出發又去影烏本橋日落啦！心諗，無今朝咁好彩啦卦！
尋日坐船欣賞，今日唔坐船，一於細遊烏本橋兼賞落日啦！

厘個時間，梗係多人啦！跟住人群上橋。

炸玉米（玉米炸左唔係開花變爆谷咩）

近岸水退似塗灘

沙洲上嘅農田

橋上無圍欄，太擠擁時確有危險，萬一橋上發生爭執就。。。

厘段係加建嘅石圍欄，雖然安全好多，但破壞左原來風貌呢！

除左遊客多，本地人都經常使用烏本橋。

坐喺河上沙洲嘅茶座欣賞日落，又係人生樂事呀！

烏本橋長1200米，橋上每隔一段距離就有一座亭，大概共有六、七個左右。

橋上亭中嘅畫攤

如果無上橋，就影唔到厘個景啦！中間揮手嘅咪係我囉！

兩個SHOT駁埋

橋下耕地喺夕照下，顯得特別優美。

又到另一座亭，厘度又係無圍欄嘅！

亭內嘅炸海鮮

橋嘅中間有上落樓梯落去沙洲上

河中有竹籬阻擋船隻進入

我地又行番上橋

厘支石柱唔知係乜，我估佢用黎度水位卦！

哂魚乾

除左落河釣魚，亦可以橋上釣魚嘅！

開始日落，雖然尋日影左，但唔同角度嘛！

兩日都無乜火燒雲，唯有影下剪影啦！

清晨同黃昏，漁夫們都咁忙。

餘輝將盡

已經月上橋頭，係時候走LU！

今晚喺 alittle bit of Mandalay Tavern 酒店餐廳晚餐

入口個傘陣設計好搶眼！

餐廳好好生意

晚飯菜式

飯後去曼德勒皇宮外影下角樓夜景

皇宮前嘅大街

D7  完

D8 曼德勒機場(Mandalay)>  希赫(Heho，乘內陸機)>
      沿途停車拍攝 > 慶祝洞窟(Pindaya Cave ) > 品嚐當地下午茶>
       Nyaungshwe碼頭(乘小船,Nyaungshwe Docks) >
      茵萊湖(Inlelake) > GoldenIsland Cottage

今早08：30要由曼德勒飛往希赫（Heho），雖然半小時機，但06：30就出發去機場啦！
仍然坐厘類型機

我地坐嘅緬甸航空

Heho嘅入境大堂

機場大樓

大堂內有兌換店

我地離開希赫機場啦！

機場範圍

我地坐嘅旅巴

我地今日嘅目的地係Inlelake，由Heho到酒店要花成日車程架！
途經所見

厘個月份，緬甸天氣好好，雖然午後有時31、2度，
但好短時間，感覺唔算熱，早晚仲涼添！

Heho厘邊有好多農田，多農戶，農產應該豐富。

農村交通工具

路邊好多時種滿厘種黃花

厘度嘅田有D似東川紅土地（當然無咁靚啦）

有三位小牛郎騎牛跑緊上黎，於是大家又落車LU！

小牛郎好精靈，立刻企上牛背俾我地影相。不過都係頭先＜跑牛＞時好睇D。

有位化緣嘅小僧好奇咁睇我地影乜。

玩夠又上車

沿途見好多婦女地盤工，佢地都係負責運泥石。

真係好似隻鑊喎！

厘D黑衣族人好友善，唔止唔抗拒被拍，仲同我地招手添！

厘幾位係學生，下身著嘅都係綠色紗籠。

汽車繼續前行

警察局

好一幅農耕圖，又停車囉！

厘堆乾草梗係準備運送啦！

爸爸將牛套上牛車

出發囉！睇黎小朋友坐得好舒服咁喎！

整塊農田上，農夫們正在忙碌，睇落好有生氣。

今日午餐喺臨河嘅Greentea Restaurant ，一黎到，大家就影唔停。

餐廳有樓梯可以落河邊

對岸有寺廟

開餐LU！

朱古力pancake好正！

食完飯先發現樓底嘅燈，外觀係久違了嘅大光燈，兒時街邊夜市檔檔都用佢。

厘度嘅洗手間裝飾感覺清新，（又影洗手間？）係呀！
原來我發覺好多女仕去旅行，都好關心洗手間嘅問題架！

厘張相目的唔係影後，係請大家睇燈柱上嘅燈罩。（係個唔細嘅竹籮）

飯後驅車到慶祝洞窟 (Pindaya Cave )，洞窟係將佛像與溶洞結合，的確有火花效果。
我地先要由停車場行一段斜路

可以搭電梯上頂，或者行樓梯都得。

廟前嘅水果攤（D牛油果好巨型）

電梯出口

厘度係入口

厘度範圍咁大，入去前影下俯瞰景，睇下周圍先。

洞窟入口，已見金光耀眼，佛像幾乎將溶洞覆蓋。

兩位善信帶金泊黎貼上塔座度。

初以為眼見範圍就完，原來可以繼續深入。

仲越行越有添！

有D通道好窄

有時由一個洞廳到另一個洞廳

有時上高落低

雖然好多佛像係倒模嘅，但亦唔少手工精細嘅！

有說明佛像，不過唔知講乜。

參觀左成個鐘，走囉！

又向往Inle lake 嘅碼頭（Nyaungshwedocks）進發，仲要成3個鐘車架！
途中落車睇棵古老大樹，又見牛群。

其實厘度好多棵古老大樹，百姓都喺樹下享受佢地樹蔭下嘅閒暇。

厘棵最大，最古老啦！要用幾個石墩托住樹枝。

仲有小朋友玩弓箭

車行途中，又見小孩玩水，咦！竹筏喎！

哈哈！睇真，原來佢地只用幾枝竹助浮，連綑綁都無嘅！
跌落水添！見佢地玩得好開心呀！

又車行一段路

厘檔店主梗係去左訓晏覺啦！

到一間小舖下午茶

我地叫左奶茶同飽（幾似叉燒飽）。

小店仲賣土特產，不過團友完全無興趣，輝哥就幫襯左兩支土酒。

厘包係肉乾，但咩肉乾就唔記得啦！（總之唔係豬牛啦，唔通係鹿？）

終於記得影下個有代表性嘅廁所啦！
一般民居或小店，寺院等，都係咁嘅形式，牆邊有水糟，
水糟內儲水作沖廁，佢地都打理得幾乾淨，OK架！飲完下午茶，又上番車，途經所見。

終於到左個鎮

好快就到左碼頭（Nyaungshwe docks）

上船囉！

每艘船坐四、五人，都幾舒服，不過記得著多件衫喎！（設備幾好，聽日天光先講啦）

睇下對面隻船幾快！我地隻都一樣咁快架！

仲趕得切欣賞落日僅餘嘅霞光

抵步上Golden island cottage時，天色已黑，但酒店都列隊奏樂歡迎，
小鄧同輝哥一上岸，就好搞鬼咁搶左佢地嘅樂器加入。

我地嘅水上房間

四周夜景

去餐廳食晚飯，要經過條橋同其他房間。（聽日天光睇得清楚D）

酒店餐廳晚飯

厘支係我地叫嘅白酒

厘兩支係輝哥買嘅土炮，結果飲剩咁多，送左俾船伕。

食完飯，攞埋腳架影下四周夜景。

我地間房外觀

D8  完

D9 茵萊湖日出(Inle lake Golden Island Cottage) >
   沿途欣賞水上農田及房屋(乘船) > 木柴市場(5-days market ) >
   寺廟及廢墟(Shwe Inn Dein) >  茵萊湖日落

今早又係天未光就出發到另一間水上酒店（梗唔係搬酒店啦），
係為左影日出，仲邀請左兩位船伕擺拍，增加氣氛添！
摸黑登另一間Golden Island Cottages

等左一陣，天色已經露曙光。

兩位船伕好隨意咁傾下偈，嘆煙飲茶。

好服佢地手腳並用黎划船

睇佢地企喺船頭丁點嘅地方，感覺＜牙煙＞，但佢地都不知幾自如。

厘間酒店其實同我地住嘅係同一集團，不過隔離飯香嘛！
好似佢地嘅佈置靚D，無論如何，轉個地方影下都唔錯嘅！


天色開始微亮

兩位漁伕示範捉魚

獨腳划船嘅絕技又真係幾特別。

厘個季節嘅緬甸天色，真係靚到無話可說。

雖然厘個位睇唔到日出，但滿天彩霞加倒影，無論你攞咩機，都能夠影到靚相。

除左影日出同彩霞，都唔少得同大家分享咁靚嘅茵萊湖水上酒店嘅環境架！

酒店嘅船夜晚泊喺建築物低下，唔怕落雨同減少被霧水整濕囉！

房與房或餐廳之間，都係靠水上走廊串連。

同陸上酒店一樣，有佢地嘅自用空間。
呢！兩位漁伕收工走啦！欄柵內嘅範圍屬於酒店嘅！

厘座酒店對面仲可以見到民居

酒店房間

影完相，我地都坐船返酒店食早餐LU！
我地12個人，分三隻船乘坐。

船上設備好周到，坐椅寬闊紮實唔在講，每位有張毛氈同一件救生衣。

坐椅旁仲有個小箱，箱內有濕紙巾、樽裝水，另外嘅好似係一次性雨衣。

椅旁仲放左把遮，絕對唔使擔心日曬雨淋，坐厘種船遊湖，
感覺同大自然親近得黎又好舒服，總之正啦！

雖然話兩間酒店都喺茵萊湖，但坐船都要廿幾卅分鐘，
且沿途風景優美，比起一般遊湖，真係有趣味好多。
漁民撒網作業，佢地用嘅係原始人力捕漁，唔會做成污染。

岸上景色

沿途見唔少船隻已經開始一日嘅工作啦！

可以清晰欣賞到晨霧縈繞嘅岸上美景。

又返到酒店啦！

早餐唔錯，唔算豐富，但美味。

即煮奄列、蛋類。

食完早餐，趁未出發，周圍踱下影下。
水上花圃

天青水靜，倒影如幻如真，咁靚環境，住多幾日就好啦！

稍息完，08:30又出發遊玩茵萊湖，目的地係木柴市場(5-days market ) ，
因為網上去茵萊湖嘅遊記較少，所以放多少少相，希望唔會悶親大家啦！
厘艘居民嘅日用船隻算大啦！好一幅家庭樂在齊心向前圖，
船頭嘅小朋友好細咋！睇見都怡人呀！

運咁多貨都係用小船，其實茵萊湖，似乎只見厘類船隻，
可能禁用大型船，以保護環境卦！

厘位船伕又係小朋友黎嘅！

厘兩間咁簡陋嘅屋，估計係存放農具用，因為附近係水上農田。

厘位農婦正喺水上農田耕作。

同陸地一樣，佢地都有村鎮。

當中唔少營商嘅水上建築，有餐廳、民宿、雜貨店。。。等，生活日用都一應俱全。

岸上荒廢嘅佛塔

厘艘唔知係咪佢地嘅街渡呢？

厘間屋旁有座蘆葦牆，好詩意。

厘個家庭有三艘小船代步，咦！好似以前內地一家有幾部單車咁喎！

雖然船行成粒鐘，沿途一D都唔單調，景觀不停，
真係影都影唔哂，唔似一般遊湖，空蕩蕩咁。
厘D小型綠地，其實係村民嘅農田，一樣可以耕種架！

水上村鎮同陸上一樣，有規劃嘅街道。

厘D欄就好似屋苑圍牆咁

早餐時，我地攞左D麵包準備餵海鷗，另一隻船嘅團友非常好彩，引來好多海鷗，我地就食白果啦！
應SIR作品

咦！起緊樓喎！好似有三層高，咁大座，多數係做生意啦！

離遠見到有座頗具規模嘅廟宇(一陣我地會去)

開始見好幾艘運載木柴嘅船隻，行左成個鐘（個湖真係幾大），應該到啦！

開始駛入條狹窄河道，淺灘泊左幾隻小艇。
我地都相繼上岸囉！

5days-market 滿地木柴，同緬甸其他地方一樣，多數係婦女作搬運勞工。

厘位係經營公廁嘅婦女，帶住兩個小朋友，
睇佢地玩得幾開心（記得兒時都玩唔少啦）。

喺木柴市場埋邊山上，有座寺廟 , 我地先上山參觀廟宇，途經一條長廊，有好多攤檔。

賣影碟同CD

厘檔賣刀嘅仲即席打鐵造刀，兒子就負責為個爐＜打氣＞，好拍檔！

土產紀念品

越行越靜，本來兩邊應該係店舖，可能人流稀少，無人租啦！

哈哈！你估厘三個小朋友做咩吖嗱？佢地喺地下畫左個圈，玩掟拖鞋呀！
要大力掟，隻拖鞋最接近中心算贏，厘個地方嘅小孩，精神上一D都唔貧乏。

沿途上山，無乜人咋！

接近廟前兩旁嘅露天，滿是大小不一嘅佛塔，形形式式都有。

入到佛殿，唔算好大，都算華麗整潔，可能無乜人黎，
厘位外藉女仕著背心都無人理，照入可也。

殿內佛像

廟外佛塔

原路返落去，間中有D少數民族上落。

佢地嘅衣飾幾乎人人相同

接近低處有茶檔，佢地通常叫碗茶加塊脆卜卜嘅餅（有D似蝦片）。

落番到碼頭，睇下木柴市場嘅活動囉！
觀察左一陣，厘位女仕最勤快，人行一轉，佢搬兩轉。

咦！背後仲揹個籮，做咩呢？

佢地負責搬運嘅路程唔遠，只係由廟前入口附近
搬到岸邊方便運上船，大概六、七十米左右。

D船裝滿木柴就離開碼頭

可以睇到搬運工人清一色係婦女

有D帶住小朋友開工

男仕搬運其他野，或者負責開船。

厘位大媽了得呀！你睇佢幾強，一隻手一綑柴，
頭頂一綑，口仲可以邊吸煙，真係唔輸比男仕架！

睇完木柴市場，繼續上船遊湖，前去水上餐廳食午餐前途中所見。

湖中一樣有高壓電纜供電俾厘個水上城市

唔知係廟宇定餐廳啦！

部份房屋仲有水塔設施添！

碼頭除左供船隻上落，仲係佢地洗衫沖涼嘅場所，
咪聽見沖涼就以為有野睇得架！女仕洗頭沖涼係著衫架！

繼續沿途風光

水上電纜隨村落而建，喺厘度遊湖，係咪目不暇給呀！

到餐廳啦！

餐廳好綠化，種滿植物，D蘭花仲開得好燦爛添！

入到餐廳，你真係唔覺自己在水中央架！

餐廳四周都有圍欄，屬私人空間。

餐廳前都豎左隻蟾蜍做裝飾，同陸上城市無異。

外望，隔離都係餐廳，仲有D花款搞作下添！

大陸嘅甚麼情人鎖，太土啦！睇下佢地幾有創意。

厘兩位紅衣少女，正好為湖上添姿彩。

開餐啦！每餐必備嘅煎炸小食，餸酒一流！

原來廚房就喺旁邊

厘D自家農田細細地，我諗足夠一家人食囉！

食飽飯又上船繼續行程

兩父子送我地上船，886！
沿途所見

又到左民族村，厘度都有長頸族。

門口嘅紀念品

另外兩位坐定定任影

旁邊嘅係用黎㧜頸嘅頸飾，嘩！好重架！感覺真係有D不仁道。

民族村內售賣嘅紀念品

途經寺廟

茵萊湖厘個水上城市算係應有盡有，行人天橋亦唔少，仲有好多式樣添！

黎到一D較窄嘅河道，迎面遇啱有船，雖然彼此都會減速呀！
但難免被水花淺濕身（少少啫）。

迎面又有船啦！

黎到某D河道，如果留心睇前面，河道兩旁有欄柵，
只留中間俾一隻船通過，厘個時候就要互相遷就啦！
又黎到一個碼頭，準備到寺廟同佛塔廢墟(ShweInn Dein)。
沿河岸上有D攤檔。

見幾個好細嘅小朋友喺度踢足球，有姿勢，有實際架！

我地沿河前行

攤檔賣嘅野幾特別

厘D好似話係祭品

今日陽光普照，天氣較暖，好多婦女都喺河邊洗頭沖涼。

厘度售賣好多七彩紗籠

厘班小朋友唔止沖涼喎！仲玩水球添！

厘度種滿竹樹，好舒服，有個茶檔喎！地上個天然灶煲緊水，客人就坐喺石頭上。

檔主整咩呢？好似炒緊沙咁。

原來烘緊餅，咁嘅山間生活，真係悠閒。

厘段河水應該喺較上游位置，村民忙於打水運返屋企，睇黎似食用水。

厘檔賣嘅祭品無頭先嘅精緻，內容差唔多。

山區民族，佢地好友善，一般都唔抗拒俾我地影相，亦無問攞錢之類，好純樸。

用動物牙齒做成，唔通係牛嘅牙？

D小朋友好可愛，請佢地食下糖，佢地都表現得好開心。

厘位婆婆主動俾我影添！多謝！

同早上行嘅寺廟一樣，都要穿過一條長長嘅上山長廊，
兩邊小販檔越黎越少。

先經過長廊旁邊露天地方，一個好有味道嘅佛塔廢墟

再上到頂，接近寺廟嘅兩側露天處，築滿各式佛塔，密密麻麻。

通往寺廟嘅走廊

佛殿內

我都係較喜歡山腰嘅廢墟，再返落去細賞。

被拆下/掉下嘅破舊塔頂金屬裝飾

睇真D，大部份嘅塔都保持原好，只係少左個頂上塔飾啫！

有D因為無人打理，塔身長滿小樹或野草。

有D好精工架！（可惜冧左呢）

哈！行下行下，有人燒野喎！咁啱座塔頂又生左棵樹，正好製造氣氛，係咪有D詭異呢？

好多人嘆下午茶喎！厘個牌寫乜？（唔知喎 , 座廟嘅名卦 !）

船伕已經等緊我地上船

咦！佢地有乜搞作呢？好似好有喜慶氣氛咁喎！

上番船，又穿過幾座天橋。

紅白欄柵，唔通係限制嘅水道？

漁民嘅獨腳划船本領，喺茵萊湖好似人人都識。

繼續欣賞水上風光

厘D就係我想睇嘅大型水上農田啦！

佔地幾大下，規劃好整齊，細心睇下，有瓜啦！

玩左成日，終於返酒店啦！吓！又有樂隊迎接？又幾有親切感喎！
好似話：我等緊你地返屋企呀！

其實今朝四點幾出發，都未停過，玩到黃昏返黎，抖陣又話影黃昏擺拍，
咪睇我地成班退休人仕，都算活力充沛，無一個投降。
呢！由未日落，影到開始著燈先罷休，真係玩到盡呀！

今晚嘅晚餐

尋晚又未影過碼頭厘邊，飯後再去碼頭影過囉！

餐後有團友仲繼續影星軌添！一於借黎放俾大家分享下。
應SIR作品

D9 完

D10 茵萊湖(Inle lake) > Nyaungshwe碼頭 (乘船) >
      希赫機場(Heho，乘內陸機) > 仰光(Yangon) >
      仰光市內火車遊 > 卡拉威宫晚餐(Karaweik Palace) >
      Central Hotel

今早要離開茵萊湖返仰光啦！因為乘坐07：45機，
所以晨早食完早餐就坐船再轉車到機場。
咁早起身，當然唔錯過湖中曙光、晨霧同彩雲啦！

霧水好大，清晨仲未有人行過，地上露水令人人都一步一腳印。

又落船啦！船速快，D風撞起，都幾凍架！所以每人都有張氈囉！

今朝非常大霧，睇怕厘個熱氣球上嘅乘客會失望啦！睇黎我地運氣真係唔錯，感恩呀！

就算太陽出黎，都抵唔住霧鎖，無野睇！

霧裏嘅湖面似黑白片

到左Nyaungshwe碼頭轉坐旅巴，先借用車站嘅洗手間，
點知喺門口就俾人叫除鞋，吓！除鞋入車站洗手間
（睇環境啦！如果會一腳都係咪唔去囉），出乎意料，OK喎！

抵達希赫機場

候機室唔大，屏幕上顯示嘅航班唔係咁清楚，廣播又係緬語，
好在有導遊，可以安心四圍八下啦！

候機室距停機坪好近，可自出自入企埋一邊影相。

第一次座位對住個引擎，雖然阻住景觀，不過都幾有趣吖！

另一位團友夠細心，停機同飛行時都影左，點知出黎效果唔同個喎！
（上面係未起飛時，下面係飛行中）醒呀！
Sit sir作品

據緬甸華僑表示，即是第三代，仍屬二等居民，連身份證都與緬甸人唔同，
竟然係張普通過膠文件，大過張2R相。
但厘批華人堅持住中國民族文化嘅生活，中文能力好強，令我猶然起敬佢地不忘祖呀！

中午落機後，黎到間快餐店

雖說係快餐，都算精緻，每枱預放有口果同涼菜。

菜式多達幾十款，導遊話隨便叫，大家都以為餐廳會將幾樣餸放喺一隻碟內，每人一碟。

點知到上菜時，原來係每款菜一碟（大劑啦！點食呀），咪搞到成枱都係囉！好在店方醒目，
到咁上下就截單，唔夠先再叫過，今餐食嘅款式好多，味道唔錯，地道餐廳都幾得喎！

餐後坐車到火車站，試搭當地火車（搭左九個站）。
上天橋

穿插長廊間

下望是火車軌

到左月台

你咪見咁多路軌零件放喺度就以為係停用嘅路軌喎！（操作緊架）

火車行駛線路表有緬英對照（車廂內都一樣嘅路線圖）

月台都有緬文數字同阿拉伯數字

火車頭

火車到啦！我地搭嘅就係厘種火車。

車卡內，厘個時候係非繁忙，乘客唔多。

咦！風扇上嘅咪係中國鐵路嘅LOGO？原來係中國賣俾緬甸嘅！

路軌同民居好接近

唔知佢地揸住個器皿用黎做乜呢？

為左方便，居民經常咁樣落車橫過路軌。（我地都係咁落車，長者團友掉親，嚇死！）

厘位少年個動作好危險，但佢地習以為常。

到站落車啦！

旅巴接番我地，跟住前去卡拉威宫晚餐(KaraweikPalace) ，飯前影下黃昏景先。
對面係之前參觀過嘅大金寺(ShwedagonPagoda)

厘隻畫舫就係卡拉威宫，黃昏日落，鳥倦知還，成天都係烏鴉。

大金寺都開始著燈啦！

夜幕低垂，大金寺同卡拉威宫都金光耀眼，顯得特別華麗。

夠鐘入去食自助餐，睇表演囉！之前入口擠滿人，厘D相係客人開緊餐時，我先出黎影嘅！

所有小亭都係小食亭，厘個時候無乜人，可以隨便食（多數係甜品）。

女仔嘅頭飾好別緻

長頸族婦女都係表演者之一

門前嘅士衛

大堂有兩位少數民族供擺拍

餐廳內食物豐富，種類頗多。

邊食晚飯，邊睇表演。

場中有兩位民族打扮嘅侍應同來賓合照

表演節目都幾豐富

晚飯後返酒店，因為係最後一晚，又近市中，去逛下囉！
天橋上看SulePagoda（在市中心迴旋處）

其實D2早上都黎過，不過又睇下夜景啫！行到SulePagoda對面。

班都拉公園獨立紀念碑（Mahabandoola Park）

AYA銀行及以馬內利浸信會教堂

D10 完



D11  自由活動（昂山市場）> 仰光機場 > 越南胡志明機場（轉機）> 香港

今日已到緬甸行程尾聲，下午14：40機，飛胡志明市再轉飛香港。
因為住喺市中心，大家就各自精彩，喜歡訓晏D又得，出去遊蕩都好方便，
我倆當然唔嘥，明知附近已經行過，都出去睇下本土生活嘛！
早上僧侶已四出托砵化緣，多數嘅飲食攤檔或店（厘檔係賣早餐嘅），
對僧侶都來者不拒，唔知係咪將成本轉嫁俾消費者呢？