(D1-D5) http://chuchu-hung.blogspot.com/2023/05/32-d1-d5.html
(D6-D11) http://chuchu-hung.blogspot.com/2023/05/32-d6-d10.html
D12 千戶苗寨→貴陽
從西江到貴陽，原來有直達車，但我厘個時昌只能經凱里轉車啦！尋日已經買定到凱里車票去凱里有兩條線，一係去凱里南（高鐵站），另外係凱里市中心（班次較密），千祈唔好買錯飛或上錯車呀！
見售票廳前有個牌表示有直車去荔波，都差不多九點啦！應該又係無車啦！唯有等旅遊業復常先得啦！
到達凱里客運站，厘度亦係個交通換乘站。諗住高鐵站好近啦！點知行左５、６分鐘，若趕車就急死啦！
厘個轉運站建得好靚，仲有時間，出去影下南場廣場，有風雨橋、鼓樓，好有民族特式。
而家坐火車，若在網上購票，已經可以唔使取票，直接刷回港證可以入閘上車啦！（記得喺手機截屏存底呀）
到左貴陽東，雖然有旅遊集散中心，不過烏燈黑火，無人（櫃枱後有舖）。貴陽有兩個高鐵站，分別係貴陽東同貴陽北，若時間許可，貴陽北方便D，有地鐵連接，唔使塞車。
貴陽東只能坐巴士啦！
喺貴陽嘅公園或馬路，種有唔少櫻花，且品種多。
入住延安西路嘅錦江ＸＸ風尚，距地鐵十分內步程，好多巴士站就喺酒店門口附近，厘間值得推薦俾窮遊嘅朋友，20平雙床有窗房都唔使120蚊，最重要係三樓有免費自助洗衫房，寄存多日行理都無問題，我地間斷共住九日，竟然無影房間相添！補兩張大堂相啦！
返貴陽主要係買左後日去平壩車票，今晚係貪方便先去花果園賞夜景同食飯
有購物廣場、金融商貿中心，高樓大廈林立。
花果園係個小區，非常繁榮，區內超過40層嘅大廈就有200幾楝，厘兩座D人叫佢做花果園雙子塔。
有購物廣場、金融商貿中心，高樓大廈林立。
最吸引遊客係花果園濕地公園嘅網紅點～白宮，真係幾夢幻，聽講白宮耗資27億人仔，網上有不少談資，感覺神秘，點知之後去兩次花果園都有風，無今晚嘅倒影咁清。
影白宮除左要無風，最好係人少嘅日子，地上木棧道會震，若假期人多，小朋友跑跳，無論手持或腳架都有影響。
旁邊有路可接近白宮
Ｄ１２ 完
D13 貴陽→觀山湖公園→貴州省博→額斯特公園
貴陽面積好大，包括三縣兩區，天河潭以前去過，今次只重點遊花溪區就有夜郎谷、青岩古鎮、十里河灘。。。等，貴陽亦有千園之城美譽，好多公園好大好靚，仲係免費添！尋日算整休左半日，三月中正好係賞花季節，今日多數係步程，先去佔地五千幾畝嘅觀山湖公園，睇地圖就知綠化面積相當大，且花果品種豐富。
我地初到，就見山邊路邊種滿梨樹。
厘條路一邊係梨樹，一邊係玉蘭。
厘Ｄ密密麻麻嘅小黃花，唔知叫咩！
公園唔止花多，仲好有詩意。
園內步道建得好靚，緩步跑徑保養得好且長。
叢碧園內結合石山、樹景同盤景，屬精緻小園。
黎到湖邊，見兩爺孫玩得開心。
睇清原來湖邊好多蝌蚪，從未見過咁多，有Ｄ毛管戙。
厘個標題話有櫻花，已到三月中，係賞櫻時候啦！不過主要係早櫻，晚櫻仲係含苞待放。
公園內嘅公廁好乾淨，旁邊種嘅早櫻已盛放。
部份湖景
厘Ｄ屬早櫻，三月中盛放, 無光, 梗無咁靚啦 !
厘個矮樹林我估係桃花卦！不過只開好少，有Ｄ花苞仲發育緊，相信點都要一頭半月先有睇頭。
厘Ｄ高大嘅係晚櫻，要到四月初先盛放。
河邊放牛童塑像後面有座苗族錦雞圖騰（我估咋）
漫無目的，一路遊花園。
厘度唔止分兩邊，仲種不同品種嘅櫻花。
低矮綠葉嘅係繡球花, 應該要四,五月先盛放啦!
厘度早櫻晚櫻都有，高而禿嘅係晚櫻，要遲兩三個星期盛放，所以賞櫻期長達一個月。
園內好多處都有櫻花蹤影
唔止公園，馬路邊亦種唔少櫻花，夜晚仲有燈飾添！
從觀山湖公園北門行去貴州省博物館只需
十零分鐘（免費），任何遊客入內，都必
需預約，若無，入口有保安可協助預約。
博物館參觀嘅人唔多，無論睇或影都好舒
服，厘座係新館，2017年先開放，以前我
去嘅係舊館，無咁大咁靚。
大堂展品，應該係苗族錦雞圖騰。
貴州省內嘅13個少數民族,以苗族人最盛,
約400萬。
苗族房屋與建築。
厘張唔係坐嘅櫈，係苗族編花帶櫈。
各種籚笙與祭神道具/戲曲用面譜
各族服飾
厘兩套令我諗起南美秘魯＆玻利維亞
嘅服裝，都係強調女仕臀部壯健，
可能象徵生育能力卦！（斷估無辛苦）
厘類苗族服就最常見，旅拍中最受歡迎。
除實物展覽，館方仲安排遊客玩屏幕穿
著民族服，點解無男裝架？
貴州仲有唔少出土化石，甚至恐龍骸骨。
薩斯特魚龍
半甲齒龜
赫章可樂嘅夜郎文化中嘅喪葬方式～
套頭葬，屍體嘅頭同腳都有一個
陶罐套住。
仲有好多文物值得欣賞
明朝嘅平播鼎
走lu !
逛完博物館，食午餐休息下，再坐巴士到
額斯特地質公園，竟然喺民居中間有個咁
嘅公園。
橋對面好似有座假山，非也！如假包換嘅
額斯特地貌。
我地先上北石林，初登高仍可俯視公園
行行下似個迷宮，感覺有Ｄ驚喜，雖然唔
可以同雲南嘅石林媲美，不竟咁嘅城市公
園都係首次逛。
從地圖睇，公園佔地唔大，原來兜兜轉轉
都要腳力架！何況仲分南北石林添！
一線天
雖然無乜路標，但見路就行，想走嘅就向
下，總唔會迷路被困，公園開放至
21:00，最好唔好摸黑上去啦！
落番去大草坪，叫陽明草堂，明朝哲學家
王陽明雖曾被貶貴州三年，但多篇傳世文
作都喺貴州完成，且政積卓著，所以喺貴
州人心中地位相當高，貴陽修文縣就有具
規模嘅陽明祠。
王陽明石像
依指示繼續行上南石林
南北石林都唔多人，行起黎好舒服，
影相更無人阻，
今日三個景點喺埋附近，好輕鬆，正！
Ｄ１３ 完
D14 貴陽→平壩櫻花農場→貴陽
期盼已久，堪稱世界最大嘅櫻花基地～平壩櫻花農場，我地終於見面啦！
平壩位於安順與貴陽中間，因為貴陽有好多直達專線，只需個零鐘就到，
當然訂專線啦！（必須網上預約，會喺溫韾提示詳述）
好似一共有五、六個地點發車（來回約¥50），我當然揀延安西路嘅旅遊集散中心
啦！從酒店行去只需十零分鐘，厘度亦係貴陽老客車站，同時有其他景區專線，
又有唔少貴州打卡團，之前介紹過千戶苗寨＋鎮遠古鎮＋梵淨山三天團都係厘度
報名。
我地搭嘅專線11:45到，本來係09:30出發，結果被通知延至10:00，回程17:00。
我地只到停車場咋，仲要坐擺渡車（¥36來回），厘程必需坐，一來唔熟路未必識行, 二太遠太嘥時間啦！（約廿零分鐘車程）
落車己見到厘個牌，直升機亦喺度升降。
落左擺渡車，又見到往觀景台嘅電瓶車。
因為係大路，沿途已有櫻花，我地無坐，
行去約30分鐘。
經過遊樂場
油菜花田
厘度好多小食攤檔，飲食無憂，Ｄ野唔貴，離遠見到熱氣球就知差不多到啦！
熱氣球唔係隨處飛，而係定點升降。
熱氣球營地
觀景台前有條長樓梯
整個觀景台分兩層，因為係周五，
比想像中人少。
觀景台景觀
之後，我地離開觀景台四圍逛，厘度嘅櫻花主要得一個品種，似韓國果Ｄ，基本上可說係由多個櫻花樹林組成，同只有路兩旁植樹嘅櫻花隧道有Ｄ唔同。
當然唔少得旅拍啦！
唔知點解好多會著韓服，扮去左韓國
還是覺得櫻花係要襯日韓？
我上左個自建觀景台（¥10），俯瞰
角度都唔錯。
因為好接近樹頂，可見已開花九乘，黎平壩最好係三月中，畢竟早櫻期短，單瓣又比複瓣易謝。
離開簡陋觀景台，再向人流少嘅地方去。
就算條路呈櫻花隧道，兩邊多係櫻花林，
竟然墓頂開滿櫻花，感覺浪漫。
只要你肯行，唔怕無獨享嘅櫻花林。
即是馬路有人，樹林實在好大，
隨便都有清景。
有Ｄ仲有油菜花田點綴下添！
繼續賞花（唓！你Ｄ相咪全部一樣！），的確係咁，但壯觀嘅場面係要親身體驗啦！想睇與別不同嘅，可以坐下熱氣球，甚至直升機囉！
行下行下，我地到左音關。
厘邊有個遊樂場
再前行係個茶場，加上櫻花，
有些少唔同啦卦！
茶場有少量裝飾類建築
亦有油菜花田
場地比想像中大好多，明知自己亂咁走，又無乜路標，有迷路感覺，都預左個半鐘以上回程。
四點零鐘，終於行番去擺渡車站。
排隊嘅人唔多，好快就上左車，廿零分鐘出番停車場，上番專線車，遊客唔可以隨便落車，一定要坐到老客車站（即旅遊集散中心）。
又去花果園區，尋晚好正，無風，
今晚吹到影都無。
尋晚試左本地人嘅炭火燒烤，今晚試本地人嘅豆豉火煱，勝在蔬菜可無限追加，啱我！
Ｄ１４ 完
平壩櫻花農場交通方案：
往平壩櫻花農場交通，一、二為實際經驗，三沒試過，可作參考。附圖一&二是景區地圖，可配合內文參考。
附圖一
附圖二
（一）專線遊
～往平壩櫻花農場(免門票)多在貴陽或安順出發，若只玩貴陽，想方便可選專線往返，每年三月初會有不同平台出售專線車票，今年攜Ｘ較早（¥55來回），貴安櫻花季（微信小程式）到三月十日右才開售（約¥49來回），二者線路相約。
～往返專線發車點很多（貴陽市內），時間不一，每年有差異，相同處是必須網上預訂，即場不受理，預訂可透過＜一碼遊貴州＞或在微信小程式搜尋＜櫻花＞二字找尋有關平台。
～我預訂老客車站的往返時間為09:30-17:00
～若乘專線車，到停車場距景區中心還有12公里（附圖一Ａ點），往返需乘擺渡車往核心景區（附圖一Ｂ點，網購¥36,現場¥40）
～乘擺渡車後已到景區，往觀景台步行卅分鐘 / 乘電瓶車（附圖一Ｃ點），沿途有景有食的。
～茶園在櫻花林的反方向（附圖一Ｅ點）
～一、二、三號停車場及觀景台有電瓶車連接（¥10）
～乘¥15車可到鹿島公園(門票¥20), 內有櫻花+鹿, 附近是漫櫻園及繁櫻廣場,估計在一號與六號觀景點之間(我沒去過)。
（二）團隊打卡遊
～賞櫻期期間，旅遊集散中心天天有團出發，消費比專線更平宜，因下車點不同（附圖一Ｄ點），無需乘擺渡車及電瓶車，步行賞景，但時間短速，07:30集合，九點前到，12:30集合午膳，13:00返程，14:30前返抵老客車站。
～團費分兩種，包午膳¥79，不包午膳¥69，建議報不包午膳團。
～茶園在櫻花林的反方向（圖中Ｅ點），距下車處步程約十分鐘，建議返程預留時間往茶場，然後上車回程。
以上兩種，個人實地經驗，但每年安排可能有異，路線只供參考。
（三）公交自助
從貴陽市往平壩櫻花農場需轉兩次車，首段因出發點各異，中段轉乘701路在貴安管委會站轉貴安7路在平壩農場路口站下車，步行到景區（全程約３小時,可在百度地圖試行）；打車約¥150，車程一小時左右。
溫馨提示:
～直達專線除需網購外，還註明需自行預約入園（當天若有餘額可現場補預約，萬一滿額可能進不了場）；一天團 / 公交自助 / 自駕因入口不同，無需預約。
～按官網說現場有六千多品種櫻花，有50幾萬棵櫻花樹，株數估計有的，至於品種，我不是內行，現場所見全是單瓣淺色早櫻，因景區太大，或許其他地方有更多品種。
～一般情況，平壩櫻花農場於三月初開放（少花），滿開在三月中，我在三月底再次到訪，雖仍有花（天一半地一半），已普遍長葉。網上及導遊都說在早櫻滿開兩星期後有晚櫻盛放，但兩次到訪，只見過五棵晚櫻（我再訪目的也是為此），因此，三月底以後別去了（綜合網上去過的意見）！改去貴陽其他公園或南明河畔吧，貴陽市晚櫻多的是！
～平壩櫻花農場景區非常大，無論以專線/ 團隊遊方式，只能玩部份景區，亂逛的人需小心迷路，若想一天速遊全景區，可選乘坐電瓶車穿梭。
～區內有旅拍服務及飲食供應，價錢不貴。
～區內沒住宿條件，即使區內民居，也非正式接待單位，若需住宿，可選平壩縣城（約15KM），打車約¥50。
～由於區內沒住宿，即是住縣城也不便，故不建議花時間及體力在公交上，還是選直達專線較理想，遊玩時間多點。
D15 貴陽→夜郎谷→青岩古鎮
今日仍玩貴陽，去南郊嘅青岩古鎮，自千戶苗寨到貴陽，見公交塞車又塞人，拿拿淋洗哂Ｄ衫，將大行理寄存喺酒店，輕身揹背囊算啦！一來可以輕鬆玩途經景點，亦唔使攞行理搭公交，厘個就係之前我話喺貴陽搵酒店嘅先決條件。
由貴陽到青岩古鎮，途經兩個景點～板橋藝術村（免費）＆夜郎谷，本來板橋藝術村就喺我地210路嘅轉車站，可以遊完再轉401去夜郎谷，但我地喜歡細遊，上網睇過，都係只去夜郎谷算啦！
夜郎谷入口
售票處及收費標準，個人覺得成人票都係20蚊，非常抵玩。
雖然話揹背囊，當然空身更舒服啦！問下游客中心，可以免費寄存行理。
厘位創辨人，宋培倫係貴州湄潭人，佢嘅作品得過無數獎項，甚至獲美國贈綠卡，邀請留美深造，但宋先生婉拒左，仍回貴州大學任教，可說將畢生奉獻俾國家。
佢畢生夢想係隱居山林＆鍾情於夜郎國（漢朝西南夷其中一國，今貴州六盤水），到五十幾歲決心將兩個夢想喺花溪厘度實踐，宋先生耗盡積蓄及廿年精力（而家係富翁），成功打造佢嘅夜郎天堂，雖如此，宋先生81歲時，竟將一生嘅心血與夢想捐贈俾國家。（可能係門票平嘅原因，做乜寫咁多去簡述佢呢？）宋先生嘅故事令我既感動又敬佩囉！
厘度仲有住宿同餐飲
即是賣紀念品嘅房屋都充滿藝術氣息
厘度可以用石頭村形容，全部都用磚、石、陶、瓦建成。
厘Ｄ就係夜郎圖騰嘅胚胎骨架
一河兩岸嘅山谷林地，竟然獨資獨力創造（估佢Ｄ學生都幫手卦），俾個敬禮！
唔寫咁多，請大家慢慢欣賞宋先生作品。
厘度應該係個表演場，不過而家無任何表演。
除左河谷兩岸，山頂仲有古夜郎屯堡遺址，咪走雞呀！
山頂古夜郎屯堡遺址
山下多條樓梯通山上，Ｄ樓梯一Ｄ都唔馬乎。
繼續賞景兼賞作品
厘隻石兔唔知係咪兔年先有嘅呢?
打造圖騰嘅材料之一
玩左幾個鐘，係時候走lu！去青岩古鎮啦！
青岩古鎮始建於明代(1378)，當時係軍事重鎮，如今變成四大古鎮之一啦! 幾乎唔見有團住青岩古鎮，厘度只有民宿，團隊只作淺遊，我地揀左間青年旅舍，一出巷口就係古鎮中心嘅北清明街，唔錯！
房間好大，一房一廳，厘幾日降溫，浴室竟然有暖風裝置（類似浴室寶）。
其實我地已經黎過，以前包團只係入下景點就走，今次住兩晚，一於細遊，雖然鎮內景點我地免費，都係無乜再入去。
上次無上過城牆，今次當然唔會錯過啦！我地先從南門（定廣門）上城牆，厘邊嘅城牆較壯觀。
古鎮地圖
只要稍高一Ｄ，城內城外好風光盡收眼底。
沿城牆遙望遠處，果座寶塔所在地就係大興國寺，我地聽日會去。
腳下厘Ｄ戰船，全係花燈。
南門外嘅停車場及農田風光
繼續上，城牆雖然有Ｄ陡，不過唔長，慢慢行並唔辛苦。
今日係周末，遊客較多。
城樓另有通道，與城牆並唔相通。
返落去大街
迎祥寺同當年一樣
厘Ｄ係刺梨乾，用作泡茶，可健脾消食。
新鮮刺梨係咁嘅
青岩古鎮有條街必到嘅～背街，街口有間小屋係周恩來父親曾住過嘅，雖然當年黎時都係民宿，應該換左老板啦！
背街內嘅房屋都改建成民宿、食肆，但無改佢原來嘅特色。
萬壽宮基本無變
黃昏時分，行到北門，見城牆無乜人，又上去賞下景囉！
右邊山頂方形建築係觀景台，所以唔係好高。
俯瞰北門街道
繼續上，俯瞰北門廣場
雖然南西北城牆係連貫，但有門封住，唔能夠通過，唯有原路返落去。
古鎮北門（正門）
食食下先記得影相，想試絲娃娃好耐，以前見絲娃娃店係自助形式，擺滿長枱，幾蚊一位，而家因疫情改變形式，咁仲好啦！我地食個二人餐，再加沙窩粉，都唔使一百蚊。青岩古鎮嘅特色餐幾乎係公價，二人餐大多58-60，不過豬手計重量，好難啱啱好，通常會貴Ｄ，個人好喜歡食豬手，但佢地嘅味道太鹹。
Ｄ15 完
D16 青岩古鎮→大興國寺→古城牆及花燈夜景
8:30出發，先玩大興國寺，行去大概40分鐘，向住個塔行，包對！但由東門坐巴士好方便，且多車，花溪18路1&2線，203/210都可以，雖然尋日係周末，遊客無咁早 ，去東門路上都無乜人。
穿過東門
厘度就係東門閘口，我地黎時坐花溪1路
就喺對面落車，從東門入。
坐四個站，好快到，我地本來搵到正門，但正門緊閉，以為白行添！原來一向只開側門～般若
門（我估節慶先開正門）。
大興國寺原名大慶寺，有600幾年歷史，期間不斷修繕，喺地圖睇都知佢唔細，原來連鐘樓都咁高咁靚。
五孔橋連貫寺廟兩岸
園內迴廊建築一Ｄ都唔馬虎
經過一大廳，好簡潔，同事可做宗教場所，因我地無宗教信仰，唔知厘位係咪土地公呢？
對正正門嘅係天皇殿
呢！正門係五孔牌樓，好宏偉。
黎厘度唔一定為禮佛，賞景都好正！厘度係放生池。
厘座就係老遠都望到嘅盛世寶塔，一陣去睹佢真容。
終於到寶塔啦！
原來只可以到塔基，上面唔開放嘅！
從塔基下望部份寺廟
俯瞰山門入口及廣場
厘座全寺位處最高嘅梗係藏經閣啦！一陣去觀摩下。
寺廟外，面對嘅應該係民居屋苑，環境相當好。
寺廟部份景觀，你話係咪好大呢！重點係巨資興建，可見每一細節都精心策劃建造嘛！
可見圍牆、園中小路、自供菜園、欄板照壁等，都打理得清新雅緻，感覺一塵不染，難得！
講經堂規模不小
可到嘅山頭，大多係寺院範圍。
最高建築～藏經閣
由藏經閣平視盛世寶塔，又係另一角度。
法堂大門緊閉，由門縫睇到裏面係佛堂，一邊供奉兩座玉佛（一坐一臥），一邊供奉觀音，設
置都以簡潔為主。
從藏經閣眺望寺院內環境
從藏經閣下行，馬路護牆築成城牆模樣，即是欄路石都咁靚。
我地沿路下行到河邊
河中有石墩橋，但失修斷左。
厘座係水閘，水閘後面係另一座橋，連水閘都係寺廟興建嘅！
河道好乾淨，如果有光無風，肯定倒影都好靚。
院內都有少量櫻花
我地經厘座橋出去
咪住！好似有鎮水獸呀！連厘樣都算埋喺設計內，你話幾用心呢！搵下有無位可以欣賞下對鎮
水獸先。
其實入門已聽到好響亮嘅烏叫聲，心想，唔通有大烏，原來係孔雀，從叫聲咁頻密，應該唔止
一隻，果然有唔少，仲係放養嘅添！
估唔到厘度有咁多孔雀, 真係意外收獲.
春天時，只要雌雄孔雀一齊，多數見到開屏嘅！（細時Ｄ大人又話著靚Ｄ，孔雀就會同你鬥
靚，向你開屏，吹水！）有相為證，其實雄雀係追住隻雌鳥，向佢展示雄姿咋！咪表錯情啦！
雄鳥：你雙眼有病呀？我咁正你都唔吼？喂！筍盤黎架！
雌鳥：你向上望下我，我夠係筍盤啦！咪死追一隻得架！
雄鳥：噢！今次又失敗！收工！搞錯，收屏至啱！雌鳥：收皮啦你！
厘度又見兩隻雌鳥，比較雄鳥，連兩翅都遜色Ｄ。
你唔好睇佢地咁大咁重，都識飛架！（厘隻雌鳥）
原來雄鳥尾鰭下面藏左咁大堆羽毛，好似好細嫩咁，唔知係咪用黎減輕重量嘅負擔呢？
喺厘度影孔雀都玩成個鐘，近距離，孔雀唔怕人，任你影，真要讚下厘位住持！
終於見到對鎮水嚴啦！
厘個池中有天鵝同其他水烏
喂！你係咪搞錯呀！佢地唔係你同類喎！
雄鳥：唓！咁咪慳番囉！
好幽默嘅石雕
厘度又有隻啱啱收屏，我地都走啦 ! 拜拜靚仔 !
我地原路返回，剛好有車，費事行啦！其實返北門只搭一個站，馬路嘅樹種植得好靚，亦有櫻花蹤影。
話明北門係正門，梗係似樣Ｄ啦！
北門對面田園風光，景色都唔輸蝕。
雖然其他門都有花燈，但北門最大型。
北門水燈就遜色Ｄ，但風景搭夠。
北門廣場嘅戲台
花燈日景當然無夜景靚，不過怕佢唔著燈，都影左先，但夜景有燈，無謂悶親大家，留番夜景先上相。
今日禮拜，因青岩距貴陽市區交通方便，打車都係六、七十蚊，由夜郎谷打車，廿零蚊就搞掂，所以好多一家大小黎玩，何況而家貴州有車戶甚普遍，停車場都泊滿。
喺北清明街（大街）有三間舖以羊駝作招徠，幾受遊客歡迎。
我地向人少地方走，當年都黎過奇石館，無乜變。
東、南、北門都去左，西門唔可以唔去，古鎮城牆分佈喺南、西、北門，成Ｃ字形，東門果邊只有城門，城牆已經無左。
稍為登高已可望遠，田園風光更添秀麗。
左邊就係大興國寺嘅盛世寶塔，右邊最高建築係佢嘅藏經閣。
厘Ｄ山岩田野、阡陌小徑，係咪可以洗滌凡塵呢？
咦！有個山洞受人供奉，但又無說明，唔通係ＸＸ僧道嘅修練場所？
我地繼續上
經過另一城樓
仍可俯瞰古鎮街景
相對南城牆，厘邊較清靜。
返落黎又到鎮中心嘅天主教堂，而家已經改做民宿啦！
附近嘅花燈
茶花開得燦爛（估錯唔好笑喎！）
最鐘意厘Ｄ無乜人嘅環境，其實古鎮保存得幾好，仲有好多原汁原味嘅建築，不至於全係舊瓶新酒。
厘間四川會館，印象中與當年不同，而家係茶室。
經過窄巷
又黎到張公館，好似無印象黎過，入去參觀下，記碑刻著大明。宮，天一閣。
屬於老舊豪華建築，包含唔少西方元素，門窗仍中國化。
行左成日，返房休息下，傍晚再出動，其實古鎮內餐食無乜驚喜，間間都係咁上下，尋晚唔出黎同人爭係啱嘅！今晚19點咋！已經水靜鵝飛。未夠八點，連名店金必軒都關門啦！好彩我地早食飯啫！
北城門夜景還有幾個人
再出就人跡罕至，影相真爽，可惜腳架存左喺貴陽呢！
繼續賞燈
似乎恐龍題材好受小朋友歡迎。
水燈都無忽略
厘Ｄ恐龍蛋好有復活節味道
過年嘛！梗要舞獅增添氣氛啦！（雖然已經過左年成兩個月，但花燈為過年而設）
櫻花都有打燈
厘度以原野為題，花草當然唔少得。
路邊野花燈
仲有野生動物
厘Ｄ係水燈，我技術Ｃ，影埋倒影較難就。
厘Ｄ昆蟲非常可愛，栩栩如生。
打燈後嘅建築，另有風味。
返到大街，幾乎全關舖；以為大街上燈飾會著，點知連周末都無開，周日晚更唔會開啦！早抖啦！
Ｄ１６ 完
夜郎谷及青岩古鎮交通：
～板橋藝術村（我無去）、夜郎谷、青岩古鎮、大興國寺、花溪公園及十里河灘都屬於貴陽花
溪區，幾乎同一線上，可順序遊玩；若從貴陽出發（視出發點轉車），210路到板橋藝術村站
下，遊玩後乘401直達夜郎谷；夜郎谷乘回頭的401到板橋藝術村/田園中路轉乘210/花溪18路1線
或2線均可抵青岩古鎮。
～從夜郎谷到青岩古鎮不遠，若不想轉車，打車只廿多元。
～兩天玩三景點足夠。
～若假期短，想善用時間，中午離開青岩古鎮，回程可順路遊花溪公園及十里河灘，從青岩乘
203路可直達花溪公園，自南向北遊玩埋十里河灘，後返回市區。
溫馨提示：
～青岩古鎮內有不少景點（60歲以上免費），例如趙以炯狀元故居，仲有其他寺、觀、祠、閣. .
. . . .等建築，都值得細賞，由於以前有導賞參觀過，此行目的補回上次錯過的而已。
～雖然夜郎谷可免費存行理，但若採取順道遊玩方式，需經常乘車，以輕裝為佳，建議大行理
暫存住宿酒店，拉喼不便。
～若時間充足，花溪公園及十里河灘可另作一天安排。
～天河潭景區雖也在花溪區，但方向不同，可在貴陽市直接出發。
D17 青岩古鎮→泉湖公園→西普陀寺
今早又到東門總站搭車返貴陽市，由於貴陽公車擠迫，即將貴陽行程分段進行，唔拉喼可輕鬆
Ｄ，本來回程可順遊花溪及十里河灘，反正我地有大把時間，先返酒店玩市區，搵日再去十里
河灘。
我地都係住延安西路錦江ＸＸ，內地好在早上都可以入住（如果有房），放抵所有，搭2號線地
鐵直達泉湖公園，非常方便。
講下題外話，如果我喺酒店樓下搭29路直達景點，只需兩蚊，但搭行上行落搭地鐵，同樣直達
景點就要六蚊，我諗亦係做成巴士擠迫原因之一。
貴陽嘅公園多不勝數，較大嘅天河潭已去過，揀Ｄ未去過架啦！睇資料公園嘅木塔、紅楓同空
山止水都算可觀，且對面又有座西普陀寺。
泉湖公園木塔，感覺作者靈感來自釀酒木桶，塔內唔開放。（又係斷估）
塔嘅四周設水池，任何時間都可順光影倒影，地利有啦！有光無風就要講天時啦！
園內街燈與塔相呼應
沿棧道登山望遠，梨花已盛放。
貴州市人民真係幾幸福，隨便就有個具規模嘅市內公園喺附近。
俯瞰泉湖
額斯特地貌
從下面嘅山洞可見地下河，應該係湖水來源。
棧道上有梨花、櫻花. 、紅楓
沿途有些少景
睇見厘度鐵/銅山門，應該到頂啦卦！
厘度叫空山止水，可惜設計上差少少，要等落雨先有水，應該保持濕嘅狀態先唔會嘥設計者心思。
從空山止水俯瞰泉湖公園
沿棧道越上得高，紅楓越多。（落山影嘅）
今日行程輕鬆，玩完泉湖公園，過對面就係西普陀寺（400米），始建於清康熙時期，後毀於戰火，因建築屬紅牆黃瓦，故有貴陽小故宮之稱。
天皇殿
大悲殿
鐘、鼓樓
大雄寶殿，咦！前面舊石係咩呢？
係隻腳，因為無註明，唔知來源，估佢可能係之前被毀佛像隻腳掌卦！
喺大雄寶殿嘅迴廊有羅漢像
臥佛殿及藏經閣，好似係座玉佛，因為厘度看得好緊，就算喺門外對殿內影相，都會被阻止，參觀啫！唔影得咪算囉！
藏經閣旁有座頗具規模嘅講經堂，唔開放嘅！
旁邊係送子觀音殿，似乎香火鼎盛。
石級頂係個石窟，沿石級中間係咩？
原來係引水嘅設置，中間有水缸，缸內有金魚，亦有噴霧。
啊！財神洞！要搵＜水＞梗係搵財神啦！唔怪之得有引水裝置啦！（講笑咋）
連僧寮嘅環境都好好
喺網上見花果園區風雨橋同鼓樓嘅燈飾好靚，去搵食兼賞景，點知等到八點都無燈，問下附近攤檔，佢地話已經兩年啦！入口都封左；以前厘度好旺，而家靜哂，又係疫情累事。
建設規模都幾大，對比橋下咁多條行車線就可想而知。
由於我地企嘅位置好近，駁相唔易，試兩張啦！
Ｄ１７ 完
.
.
