(D1-D5)
http://chuchu-hung.blogspot.com/2023/05/32-d1-d5.html
D6 鎮遠古鎮→鐵溪→石屏山→歪門斜道→古鎮夜景
一早起身，又出陽台睇景，駁張相，喺陽台可以睇嘅範圍可望到新大橋與盤龍大橋之間，左邊係新大橋，右邊盡頭好模糊嘅係盤龍大橋(今晚會去)。
今日天氣好，去鐵溪囉！喺祝聖橋旁係７路總站，可以直達鐵溪，咁多人係有個團等上石屏山咋！
坐到鐵溪嘅乘客得我倆，又係包景區。
路邊攤全部無開，鐵溪內無任何小賣（旺季可能有），一定要自備水同零食。
60歲以上雖然免費，仍要取票嘅。
進入景區之初，條路平坦乾爽。
無論上高落低，都係沿溪而行，風景同空氣都非常好，門票好似¥40，非常抵玩。景區長12公里，開放嘅約4公里，我地連影相，慢慢玩，三小時完。
厘Ｄ森山老林先有嘅景色最啱我
哈！竟然有個整潔廁所。
蛤蟆洞入口（洞口形似），洞內唔深。
蛤蟆洞出口
一路前行，好多地方陽光照唔到，所以較多菁苔，有朋友夏天去跌左三次，落斜時我地特別小心。
苗女照, 的確清明如鏡 .
有Ｄ岩壁較特別
黃羊岩
龍女望夫
經過<虎牙道>，高個子就要低頭，嘻！無問題！
嘩！咁大嘅蜘蛛網見過多次，但咁粗嘅絲就第一次見啦！
棵樹綁哂紅帶，應該到啦！
厘個牌寫著＜核心景點已到，請原路返回＞。
個潭位於深幽處
龍潭雖小，水色真係好靚。
陽光可以直照深處，據講龍潭深不可測，到而家都唔知水深幾多。
隔離池水色完全唔同，明顯只有龍潭水色特別靚，似寶石藍。
職員同我講，我可以原路落（快Ｄ），或沿下山路回古鎮，我見人人都原路返；據資料，可由四方井街/復興巷上，經古城半山上石屏山觀景亭都得（免費），如果要影日落，應該喺厘邊落山。
遠眺舞陽河
沿山路上，半小時可到觀景亭，亭內有小販售賣飲料零食。
山上古城垣，被稱為＜江南的塞外城牆＞，佢地稱苗疆城牆。
對面剛有火車經過
我諗職員同我講另一條落山路, 應該喺度直行向前, 剛好有位仁兄行過黎，問佢由果邊上黎行幾耐呀？佢話兩個鐘，係城牆爛路，幾難行，聽完梗決定原路返回啦！留番俾年青人試下啦！
厘間酒坊嘅建築應該有Ｄ年份（文物保護單位），留意門口都係斜開嘅！
繼續上，Ｄ牆都有特色。
前面係傅家大院啦！厘度屬私人展館，無優惠，不過門票非常平宜，¥20包導覽，就算一個人都照講，超讚！因當時有位女仕遲進場，追上參觀，之後導覽再為佢補充錯過部份，尋日黃昏我同佢地傾過，佢話時間唔夠（要睇都得），無解說嘅參觀無意思，所以堅持每位遊客都照顧到，叫我地若有時間聽日再黎，厘種精神值得敬佩！
良弼名家，可見係官家大宅（明清朝），而家仲有後人居住架！據導覽員講，左牆邊嘅梯級係下人用嘅，主人行正門梯級。
祖先起家用嘅扁擔，兩頭尖，可作武器及擔挑。
導覽員為每扇門上浮雕解說，非常詳細。
天井進入前廳通道
厘度嘅一枱一凳、杯碟碗盤，全都有來歷同典故，多到唔記得。
厘張楠木雕花床已經好名貴啦！
厘座係咩？真係估佢唔到，原來係嬰兒凳。
好多傢俬都鑲有黃金，到而家仲保存得好好！
櫃內每件磁器都有故事，都係珍品，導覽員好有心機介紹。
唯一要保持距離嘅係厘張金絲楠木雕花床，用玻璃罩住，之前睇果張係楠木雕花床，已經好名貴，厘張多＜金絲＞二字，價值就不可相提並論啦！
唔止木料名貴，佢嘅雕花仲係五層立體雕刻，據講慈禧到此時，曾想將厘張床據為己有，而家話雖過億，根本係價值連城。
厘個書房每件家具、文具都係珍藏，導覽員話傅家大院內可以隨便坐，隨便摸，隨便影，但要愛惜厘Ｄ珍品，唔好破壞（太大方啦），你話厘廿蚊係咪勁超值吖！而且遊客有被受尊重嘅感覺, 當然遊客要更加自重啦!
又一間豆花老店
經過豬槽井，正好有居民使用。
厘Ｄ巷全部相通，所以隨便搵個巷口上黎就得；據講厘度仲可以去到石屏山，唔使經山腳入口俾門票添！不過喺度行去要兩個幾鐘喎！
喺厘度，好多大宅都屬保護文物，不過十有九座改做民宿。
另一座大院
門口坐左位食水煙嘅仁兄，呵呵！睇清佢個水煙筒係ＤＩＹ架，仲係廢物利用添！好嘢！
一入門係個大庭院，角位有更樓。
部份展室
澡堂
走LU! 去搵食時，經過新大橋，見三艘裝有馬達嘅艇，佢地唔係捕魚，係好似捕魚拖網咁，用網將樹葉同垃圾圍埋一堆（今日成條河都係樹葉），然後撈上艇。
今日改行河邊棧道，棧道好長，可直通盤龍大橋。
河邊好多酒廊食肆
貴州口味真係唔適應，但唔試下地道菜又唔甘心，我地唔會停凱里，就喺鎮遠試，酸湯魚按斤計算，鯉魚4X（佢地叫田魚）、鯇魚6X、鯰魚8X（忘記佢地叫咩魚），二人份量一般約兩斤，前二者多骨，我地試左鯰魚，配料可任意追加，味道好一般。
鎮江閣
盤龍橋附近夜景
盤龍橋
喜歡清靜嘅朋友可以住厘邊，有唔少民居，距景點較遠, 有唔少公交可達。
Ｄ６ 完
呢! 就係厘間啦! 我早廿日訂貴過walk in 50/晚，已經覺得好唔抵架啦!（張相係晚上影嘅，因當時有氣，無影！）
改為入住厘間
之後出去行下，睇資料話附近有個太陽洞，即管行下。（原本計劃在夜遊）
厘條都係舞陽河，屬下游。
施秉市容漂亮整潔，但人氣少得可憐，怕靜嘅行喺街上可能有Ｄ驚。
經過革命烈士紀念碑，上去憑吊下。
按資料從旁邊斜路上，路邊好多信徒留低嘅＜指路碑＞。
經過白鶴橋
再上係太陽洞，咦！乜係道洞呀！我睇嘅係類似山門嘅天然山洞，日出陽光會穿透山洞，我問當地人，個個都話係厘度，道觀門頂的確寫住＜太陽洞＞，但我地繼續上又無路，當時問觀內道姑，仲俾網上相片佢睇，佢地話係厘度啦！甚不友善；實情係我地行錯地方還是另有情況就不得而知啦！若朋友知情，不妨留言解惑，謝謝！
網上所見原本的太陽洞
我地所見嘅太陽洞
逛下超市，買些少嘢，返房休息；施秉市容整潔，即是中午，街上都超安靜，厘兩條街九乘係酒店、賓館，我好奇點做得住呀？但酒店前枱話施秉夏天幾乎間間住滿，因為而家係淡季咋！
17:00左右再出動，到杉木河夜漂景區，厘度無優惠，入去行下¥20，套票¥50，我地買套票，佢話包滑索、玻璃橋。。。等，實際連工作人員都無，只開放玻璃橋。
整個景區投資頗大，為左睇日夜景，我地揀黃昏入場。
只見一團隊到訪，小火車載團隊入內。（好似十蚊）
因為正月過去不久，花燈展仍繼續，所以夜遊可觀賞唔少花燈；至於夜漂，一來係枯水期，二係天氣仍冷，唔適合漂流，據講夏天好旺，特別係暑假，附近兩條街嘅住宿爆滿。
睇完燈光show落去lu！玻璃橋電梯口貼有警告遊客告示
厘座就係玻璃橋，燈光會變色，夏天時，圓型觀景台底會向下噴水。
四周山壁有激光字畫
酒店旁牆上夜燈廣告圖案
厘間酒店叫水墨雲山˙山谷酒店
區內夜景及花燈
從厘度遠望，可見山上月光及其倒影，個月光就係剛才講嘅大氣球，幾可亂真，睇怕喺度賞月可不受雨雪圓缺影響。
個龍頭會郁
繼續賞燈夜遊，現場所見，只有一團人進場，夜遊後離開。
景區入口夜景
雖然出左景區，仍有美景可賞，且環境唔錯，只係無人啫。
我地過橋行返酒店，其實先八點幾，街上幾乎無人，不過酒店附近有唔少食肆，都係買外賣返房食好。
Ｄ７ 完
今日只玩雲台山（係咪搞錯呀？鄭州焦作都有雲台山），係呀！無搞錯，焦作嘅我都去過，厘度因獨特嘅白雲岩額斯特地貌而被列世遺。
從網上資料，話施秉旅游客運站有直車去雲台山，點知職員好憫地話："這裡已經沒有去雲台山的，你們不要再來"，一笑！
唯有用方案二，轉車再搭4路去景區啦！厘度係4路總站，可直達云台山景區門口。
無所謂，我地今日大把時間，十點到景區門口。
進入景區，雖說有區間車，可以行少Ｄ，不過都係無職員。
從導覽圖睇，景區好大，但唔係全部開放，我地十點起步，下午四點出返正門。
排雲關，因排雲關未夠高，只睇到咁多。
沿途有對地質介紹嘅木牌，唔知點解，而家國內各省都爭相建玻璃棧道、玻璃橋等，厘小段玻璃唔算好通透。
筆架山
雲台山之所以叫雲台山，因為經常雲霧漂渺，山形"四面削成獨出於雲霄之半，山巔如台"。
繼續邊行邊賞
山上好多叫大明松嘅松樹，其實此山有豐富野生動植物資源，只係我唔識寶啫！
印斗閣係個觀景台，可俯瞰陡崖。
再上又一平台，高Ｄ又睇遠Ｄ，五指峰、筆架山。。。盡收眼底。
一覽眾山，山巒起伏，自覺真係渺小。
洗手間半圓樓閣建築，幾特別。
寶石苑內其實係厘類石頭
老虎背喺度睇，的確有Ｄ似。
繼續前行，可見往老虎背嘅山路。
雲台山風景唔錯, 好有靈氣咁。
鐵索橋
岩壁上嘅白雲岩猶如壁畫
前路去刀背嶺，人多時都危險，兩邊係懸崖，好在生滿樹，安全感多Ｄ，但係崛頭路，必須原路返回。
往刀背嶺必需原路返回，我就唔去啦！老伴有去，都係望厘個景。
厘度可能係去會仙洞、迎仙洞等景區，較危險，封左。
我地沿另一條路落山，途中攤檔全關，沿途無任何小賣。
16:00返到入口
入口附近就係回程公車站
返酒店休息整理後出去晚餐，施秉市面真係好靜，好奇問酒店前枱，原來施秉人口只有十七萬，但面積比香港仲要多四百幾平方公里，唔怪之得日夜都咁靜啦！不過市容同城市建設都好好，感覺係個富裕城市。
我地喺後面街搵到間平靚正嘅自助火煱店，酒類飲料雪糕乜都包哂，¥59/人，終於唔使食貴州風味啦！且蔬菜、食材、海鮮都好新鮮，值得推薦。
餐廳清潔企理，每人一個烤爐、一個火煱。
Ｄ８ 完
D9 施秉→西江千戶苗寨
（喂！又話賞櫻嘅！幾時先有呀？）哎！要三月中先係盛放期，太早去嘥哂呀！咁啦！今日先轉玩西江千戶苗寨，睇住油菜花先，之後就到櫻花架啦！
施秉無直達車到西江苗寨，最方便係到凱里轉車，凱里係黔東南嘅交通樞紐，好多縣城、景點都有車可達，施秉由7:00-17:40都有車去凱里，凱里到西江亦全日有車。
厘次真係喺施秉旅遊客運站搭車啦！
凱里客車站及班車（原站轉車）
因為落車同上車在同一停車場，先去買西江車票，無出過街外，厘張凱里汽車站係開車後影嘅。
西江客車站喺千戶苗寨大北門入口前，先去旅遊中心買票。（60歲免門票，買左廿蚊4次車票）
一般旅行團最多住一晚，團友帶一晚行理就算，但我地住三晚，且不走回頭路，一定要拉喼啦！如果好似我地要住山頂，店家又唔負責幫拎行理，都唔使擔心，可以用錢解決。遊客中心附近有間行李配送服務中心，多種形式嘅處理方法，任君選擇。
自助儲物柜應該屬暫存細件用, 適合即日來回遊客.
行理寄存、配送都有
各項服務收費表，好似暫存貴過配送喎！若好似我地咁嘅行理，每次都係¥15啫！
先在大北門乘專車到小北門，我問過，電瓶車由06:00-23:00，絕對夠玩。
排隊搭車前，先打電話搵店家接我地（自己無辨法搵架），又要問清楚，會唔會幫我地拎行理，否則要做行理配送嘛！結果係由店方負責。
我地嘅行理就係紅色同啡色果兩個
到達小北門
店家叫我地喺四號風雨橋落車，行入去經過個亭就見佢，結果我兜左冤枉路先搵到（初到貴境嘛）。
店家親自幫手攞行理，我地已經好滿意啦！
入房仲滿意，嘩！唔係咁抵呀！50平嘅房，仲要有咁嘅景（¥220），之前心想，住三晚，係咪可以搵晚試下陽台房呢（平Ｄ細Ｄ）！主要係陽台開揚無窗阻擋嘛！一於咁話。
之前睇攻略，大都話要住大街，唔使爬山，但最後我地選住近觀景台，明知會行得辛苦，但住得高、望得遠喎！又係魚與熊掌之選。
搞掂哂，急不及待就沿路上觀景台。
途中所見，吉翁係苗寨嘅其中一個大家族。
到觀景台啦！
先黎個全景，中下位置，通頂半圓嘅建築係苗寨嘅表演場～美麗西江。
如果住山腳，可以坐電瓶車直達觀景台。（唔使行，又唔會迷路）
觀景台所見
近山頂一帶好多厘類餐廳，夜晚好好生意，要早Ｄ霸位，當然價格稍貴，睇住咁多先，我地大把時間再上黎。
唔使急，我地大把時間再上黎，落大街行下先，1號電瓶車穿疏於大街。
我地想熟習環境，於是由四號風雨橋行到一號風雨橋，千戶苗寨景區內共七座風雨橋，其實區外仲有八、九號風雨橋嘅。
經過民族歌舞表演場～美麗西江，早年正午有免費場，而家無LU！16:00日場¥40-50，夜場¥130-168（當日日場話係特價啦）
一號風雨橋
厘Ｄ民族服非常受遊客歡迎
一號風雨橋附近嘅油菜花田，今日無乜光，求祈影幾張啦！
接近晚飯時間，我地都訂左個私家位，入間餐廳炒三個菜攞返房，賞景慢嘗。（搞乜成日食外賣呀？平Ｄ？）唔止無平，要收盒錢架！穩陣Ｄ好，晚餐人多，盡量避疫嘛！
食完晚飯，整理下行理，沖埋涼，係時候賞夜景啦！唔使捱凍，喺房戙腳架慢慢玩，Ｄ燈會不斷變色，厘度有夜生活架！Ｄ燈光開到好夜，12點都未熄。
早抖LU！
Ｄ９ 完
Ｄ10 千戶苗寨
千戶苗寨係由十個寨組成，人口約6000人，係目前世界最大嘅苗寨，每年有超過百萬遊客到訪架！唔怪之得我住果間一簽就係十年租約啦！
清晨，房中外望山間繞霧，好有意境。
山上櫛比鱗次嘅都係民宿，睇黎厘邊觀景房唔多。
對面山厘部份多數正對白水河，幾乎家家有觀景房。
房間可望角度好廣，遠望至油菜花田
歌劇表演場一樣清清楚楚
厘個藍球場屬於寨內唯一嘅中學
觀景台全景同我地喺房睇嘅差不多，明知自己住山頂，喺施秉買定麵包蛋糕，食完早餐行上觀景台。
觀景台上已人頭湧湧，苗服打扮唔止受女仕歡迎，亦吸引唔少男仕。
厘度嘅店舖都係做旅拍嘅，我諗全寨嘅旅拍超過三百間，真係好誇張。
因為無光，影下人就走啦！本來我地唔介意行落去，但既然買左４張車票，車票有效期三日，到走果日已過期，仲有３張，唔好嘥，搭車落去一號橋。
電瓶車站
一號風雨橋
一號風雨橋附近仲有個村民車站，都係用電瓶車，不過少Ｄ座位，應該留空間俾佢地運貨卦！我見好多村民搭，估係村民嘅免費福利卦！（亂估咋）
一號橋（左邊）旁就係油菜花田，右邊仲有條細Ｄ嘅橋，不過無編號。
今日有陽光，連Ｄ鴨鵝都活潑Ｄ。
如果要影相，厘片油菜花都夠玩架！
除左山上吊腳樓，厘度山上仲有梯田。（另一觀景台可見,我地遲D會去
油菜花田一般都好多蜜蜂，影下佢地都好好玩。
見村民拉牛去勞作
走lu！深入探訪下厘個大寨囉！其實我地無乜目標，只係隨心意行啫！咦！古街，睇下有咩唔同？入口好少遊客喎！不過店舖都係性質類同。
行下行下，黎到籚笙廣場（中心廣場）剛好有表演。
厘Ｄ籚笙真係唔輕，樂師可以手持垂直吹奏，手力唔簡單喎！
睇完又去旁邊嘅博物館瞭解下苗族嘅民風物族囉！
門前嘅苗女塑像
博物館入口（需出示證件登記）
館內部份展品及說明
苗族星宿曆法圖
苗年盛況
民族服裝
其他圖騰
厘Ｄ純銀飾物好靚，不過玻璃反光太勁，兩張算啦！
苗醫用嘅一般中藥材
苗族建築不用鐵釘，只靠榫卯。
博物館內部份建築
也東寨，我地聽日去，唔係厘度入，厘間只係食肆黎嘅!
寨內嘅衛生院，為村民作初步治療及緊急救治嘅醫院。
沿路前行，竟然今日有市集，賣嘅係民生日用同蔬果，唔少村民喺度買餸，但第日去就無啦！
留意左下果檔，賣嘅假髮，就係苗族婦女頭上嘅髮髻啦！
厘Ｄ串燒好平，十蚊十串，不過肥肉多呢！
厘間食肆專做長桌宴團餐，好多團都喺度食，應該比河景果間平好多。
河岸極多食肆，搵間無乜人嘅醫肚。（唔係人多先正咩？）以前係，雖說疫情放緩，都係健康比口腹之慾重要。
出番大街
河兩岸建風雨橋、木橋或石墩連接。
五號橋
附近廣場
可以睇到幾乎全係旅拍店舖
山上九乘九都係民宿
千戶苗寨旅遊業發展成熟，除左冷門景點，指示都好清晰，但住山頂嘅遊客，迷路係難免嘅！
我地遇過唔少(有住客話佢行左40分鐘仲未返到住處)，包括我地。
厘邊較靜，係寨內唯一嘅中學，留意西江中學下嘅拼音，唔係普通話，係苗語拼音！
三號橋，個人覺得係最靚嘅！亦最多人喺附近旅拍。
有D已經係改(良)版, 甚至見有人租韓服添!
你睇，旅拍唔係女人嘅專利呀！
唔知係咪搞緊直播呢?
風雨橋旁嘅牛角係街燈，亦象徵苗族音樂文代之一。
咦！迷你爬山車呀！
原來係消防車，因寨中地勢特殊，全係木屋，當然重視防火啦！不同用途嘅消防車係必需嘅。
消防局
三號橋
經四號橋及苗家大院
行左半日，返房休息下，我地下榻嘅民宿。
咁好陽光，上觀景台影下相囉！都係太晏，兩點就差唔多。
扎下辮仔，平嘅一百幾十，左上密好多嘅要300蚊架！
停留一陣，行去探古井（無乜人），苗族好重視水井，出嫁新娘一定要去水井挑水分俾賓客飲。
原本古井喺厘度行入去
後來乾左，就喺旁邊另蓋新井。
新井外形有Ｄ似。。。
留意路邊欄杆造型係條龍
經過間餐廳，正有人飯聚，男多女少，高談嘻哈，仲請左女侍唱歌，伴有籚笙樂師，非常熱鬧。
最後起哄，由勸酒變成灌酒，直情被女侍(鍊)住鼻灌酒，（會唔會玩出火架？）
差唔多啦！去觀景台影夜景lu！
當然開揚Ｄ，但人山人海呢！因為好多團係晚飯後入黎賞夜景，住一晚，第二朝九點集合離開，所以，夜生活不缺架！
我地影幾張算啦！尋晚喺房俯瞰大街，而家坐車落大街睇下苗寨嘅璀燦。
觀景餐日落前就已經有客佔位啦!
火樹銀花般，仲不斷變色。
係咪夜色迷人呢？同俯瞰完全唔同睇法，雖然要行番上山(搭車上觀景台都係要行落去)，但山路有燈光，不過無人啫！
夜景旅拍嘅人當然唔少啦!
Ｄ １０ 完
D11 千戶苗寨
今日都係繼續漫遊大寨各處，先出中心區外行下；相信好多遊客連大北門都未睇清已經離開啦！我地先由民宿落山經四號橋行到七號橋，千祈唔好問我橋上橫匾寫咩！Ｄ字我見都未見過呀！
再到小北門
一般大小北門之間多數搭區間車（我地入黎時都係），不過我地今日行出去大北門。原來喺大小北門間都有好多民宿，可惜十室九空，應該係東召新村。
厘度仲有八、九號橋
黎到大北門(見到吊車嗎?)，11:30有攔門酒，一般都從大北門直接搭車到小北門。住山上嘅朋友要注意啦! 喺大北門先要聯絡好民宿，萬一民宿唔負責拎行理，就要喺大北門前嘅廣場處理好行理寄存/配送問題啦！(D9一開始有講)
厘個高台係索道下站（有Ｄ玩完都唔知有索道）呢！山上白色圓形嘅就係觀景台，造型如苗女嘅銀帽。
出去有兩目的，一係周圍行下，二係買定車票聽朝到凱里，客車站就喺大北門口。
職員叫攞電話，我以為又要刷二維碼添！原來佢叫我影底張票，話萬一唔見左，可以查手機，仍可搭車，仲叫我以後都要存底添！你話係咪抵讚吖！
又返到寨內，天氣非常好。
見有剛出爐燒餅，我地試左梅菜瘦肉同牛肉，正！
途經嘅店舖，都係同旅遊有關。
貴州景點，真係無乜邊度唔使行嘅，所以足浴店不少。
今日去Ｄ無乜人嘅地方，亦係一般民居較多嘅，先上東引寨，無期望有特別，既然黎住三日，無理由屈喺房架！由東引路口上。
沿途有路標，厘個寨雖然遊客唔多，但的確有做功夫嘅，佢地唔浮誇，著重介紹民族文化方面。
苗語角幾有趣，有佢地嘅諺語、謎語，仲教你苗語發音，幾好玩, 我地喺度玩左陣。
閱讀西江？咩黎？原來後面仲有圖書館三字！
好奇問下，竟然可以入去參觀。
繼續上，越上高越多民居。
見路標有觀景台，繼續上就啱啦！
厘個觀景台望居住區，可見有好多正在重修，唔知係改建民宿，還是住民富起來，重修住房呢？
繼續上，又一觀景台，都係望民居。
睇清楚，厘邊九乘係普通民宅，較簡陋。
咦！上到大路，又一觀景台，原來有車路喎！但只見村車上黎！
厘度叫神判坳，係Ｎ年前村民排解糾紛嘅地方。
再上，厘個觀景台較大，正在興建中，本來欄住禁入，我地見部份已完工，就跨欄而入。
厘邊欣賞梯田
仔細睇，可見面向梯田嘅已密鑼緊鼓改建中，應該都係民宿。
雖然梯田正對面都有好多民宿，欣賞梯田，點都係從上下望靚Ｄ。
整個村寨街燈好有苗族風格。
落番去，經過農田，種有油菜花、梨樹，粉紅花嘅唔知係咪梅花呢？
經過條頗靜嘅街，我諗旺季一樣住滿。
其實Ｄ食肆幾乎千篇一律，都係帶皮牛肉，酸湯ＸＸ，乾鍋ＸＸ，但好少見豬肉，不過亦有供應嘅！只係牛羊屬招牌菜啫！
因為今日轉住陽台房，出門前已經執好行理，著店家隨時可搬過去，免阻佢打掃，都係返去睇下個房兼休息下。
房間只平30蚊，主要想試陽台賞景啫！其實係隔離房，比之前細好多，但陽台幾舒服，影相唔反光。
仲未去也東寨，休息個零鐘，再度出動，經過間酒廊，設計幾特別，有個烏籠座位。
剛好美麗西江準備開演，演員同樂師都企門口作招徠，疫前日間有一場係免費取票入座嘅，而家要50-80啦！
演員由西方八面行黎
我地沿厘個路牌上也東寨，第日發展成點唔知，暫時唔值得花體力同時間去，既然去左，都同大家分享下啦！
路牌似係新整，但蠟染坊個介紹牌就訓喺牆邊，問居民話已經無左好耐。
厘Ｄ路標明顯係新嘅，上面有守寨樹，又係搵唔到，問村民話喺上面，不過枯死啦！
終於揾到個似樣嘅！厘度係活路頭居住處，睇黎經修輯。
裏面只有個村民坐喺度玩手機（現場無燈，頗暗）
走LU！
橫掂有條柱，唔好嘥，順便釘埋我間民宿路標都好吖！
今晚陽台景色，坐喺度飲嘢嘆零食，不俗！
Ｄ１１ 完
西江千戶苗寨交通及溫韾提示:
～凱里客車站往西江千戶苗寨的中巴很多，08:00-18:00每小時都有車，但凱里高鐵南站班次較少。
～疫前貴陽有不少直達景區車，包括千戶苗寨，以後應會慢慢恢復，我在旅程中，這些熱門景點周六日已有直達車，詳情可上網查核。
～若公交遊又時間較緊，可在客車站下車後預訂下一程車票。（旺季有可能容易滿坐）
～若假期緊迫，貴陽的旅遊集散中心有三天團（職員告知），自貴陽出發，遊梵淨山＋鎮遠古鎮＋千戶苗寨，當然不能與12日慢漫遊作比較，個人覺得算是濃縮精華版了！
～若在苗寨住宿，山上山下各有長處：山上必選觀景房或全景房，可在房中賞景而不受冷熱雨雪影響，若非觀景房，白費氣力上落山。若腳力差還是選山下為妙，山下有車直達觀景台（06:00-23:00），可免爬山之苦，且山下大街夜景也很漂亮，火樹銀花，非常浪漫。
～一般散客會在北門乘車到小北門進入寨內，當然步行也可。
～若帶行理住山上，必需與店家先溝通清楚是否協助運送行理，否則，可找配送行理服務（收費不貴），位置在客車站與北大門之間，即下客車後先處理行理，再乘車到小北門。
～若已預訂山上住宿，最好請店家下山帶領到民宿，否則花個多小時也未必找到。
～苗寨夜景燈光自18:00-24:00（估計冬夏有差異）
～在大北門有索道上另一觀景台
～時間充足者，可參觀東引寨，那邊有多個觀景台，其中有觀梯田景的。
～近一號橋的田園區（春天油菜花），相信是四季不同景，不妨一遊。
.
终於找到你的地盤。👍
回覆刪除我也喜欢慢遊。✌️
謝謝支持!
刪除