返回上集Ｄ1-Ｄ6 (Ｐart １)
http://chuchu-hung.blogspot.com/2021/07/14.html
D7 2/4
西部長途巴士站서부버스터미널＞河東하동 ＞花開화개＞
花開市場화개장터＞十里櫻花路십리벚꽃길 ＞酒店(花開)
今早寄存大行理後，又去西部長途巴士站搭車去河東嘅花開，再黎當然更順暢。
（講起存行理，又出事！訂房前已傳E-mail講清楚我嘅行程＆日期，出發鎮海同花開都需要存放行理各一天，好彩早一晚同店家溝通，點知佢話唔得(身體語言)，只能存一次(鎮海當天存左)，雞同鴨講，手機又唔打得咁多，俾佢地覆嘅貓佢又唔識睇(英文)，終於佢打電話俾位操普通話嘅人同我講，咁先搞掂。）
7:00開車，見到條橋知道已到，差不多十點。
車站對面最高果座嘅後面有間細超市(僅此一間)
車站行前幾步有座橋
過橋就係花開市場，飲食、農產品、甚至衣服都有。
市集前廣場
花開樓嘅底層有地方休息進食
韓國人重視養生，男仕尤重保健壯陽，睇包裝都明。
韓國嘅柿乾都馳名
逛完市集，一般網友都會返車站搭巴士經十里櫻花路到雙磎寺落車，然後漫步反程到車站回釜山。但我地喺花開留宿，唔使急，過番車站果邊，漫步十里櫻花路。落車時已見滿地花瓣，心諗，又話花開嘅花期稍遲嘅？出發前仲驚未開添！
過橋右邊就係十里櫻花路，先到唯一嘅超市買Ｄ野再起步。
吓！咁快有櫻花雪！
地上滿滿都係花瓣，會唔會黎遲左呢？好彩還好啫！
路口好幾間民宿、酒店。
馬路恍如櫻花隧道
停車場外望，四周清雅秀麗。
繼續前行
開始分為高低位置，左邊高位係馬路同棧道，右邊低位亦係馬路。
我地先走右邊
不時出現小食檔，間中仲落住櫻花雪。
花開賞嘅屬天然美景，更令人愉悅舒暢。
左邊係延伸棧道，亦係最靚嘅觀景台。
路旁最右係停車場，當然遊客集中嘅地方梗有小食檔啦！
被茶園美景吸引，忘記再上番棧道，反正聽朝順光，聽朝再去。
一般跟團會車到雙磎寺站，團友再步行出市集，咁就只能集中遊厘段櫻花路/棧道。
除左路口嘅酒店，中段嘅民宿好多都好幽美。
厘Ｄ攤檔多數開喺民宿前嘅路邊，我估係民宿兼營卦！
繼續沿花開河前行，準備漫步到民宿check in。
花開河對岸同樣係綿延嘅櫻花隧道
條路咁長(約六公里)，人有三急都有唔少流動廁所。
又見廁所，因為無用過，唔知衛生情況。
整個花開嘅民宿星羅棋佈
不時有單車隊經過，佢地好多開左手機安喺車頭拍短片，的確好正。
(如果想行入黎，搭車走，要喺邊度買票呀？) 呢！就喺落車厘間食肆就有票賣，見唔見舖頭最左邊棟左兩個牌？
班車時間表
剛好有車到站，上車有可能喺旁邊停車場。
回望街道係咁嘅，停車場喺食肆斜對面，厘張係第二朝影嘅，所以無人 。
我地求祈搵個地方食Ｄ野，哈！食左Ｄ餸先記得影相，其實湯麵上只有兩小片豬肉。
為左平幾萬₩宿費，我地仲要直入。
我地有入過厘座坊，裏面有座廟，唔大，就唔打擾啦！
過左雙磎寺站，人車都少，企路中間影相都無問題，景緻不差。
大概距離雙磎寺站15分鐘腳程，到達民宿；講到check in，又出事啦！
因網訂時已約攞房時間，老板又知道，厘次順利啦卦！因為係<到付>嘅，老板用計數機出示₩120000，又坐地起價？我即出示預訂確認單，佢先笑口噬噬話：ok ok。呵呵！真無語！
厘晚全座民宿得我倆，佢話唔使check out啦！插番條鎖匙喺門度就走得
房間同床都好大(可住4人)
仲有個設備齊全嘅小廚房
室內嘅廁所
露台有飯桌同燒烤爐
佈局有D奇怪，個按摩浴缸喺餐枱後面，浴缸旁嘅凹位係淋浴間 (方便先清潔再浸浴)。
窗外美景
處理好房間，放下不必要物品，買左嘅食材放入雪柜，出去閒逛lu！花開河上有多座橋，我地選擇返回雙磎寺站附近，過橋只見兩旁地攤。
厘間壽石園類似木石藝術品店
左邊紀念新羅時期金大廉大使從中國帶回茶樹種子；中間係茶始培道追仰碑，紀念首次在此植茶。
培茶基地既有茶園，亦有茶博物館。
可見上面有兩座墳
厘種環境非市區賞櫻可比
網上話十里櫻花路實際得六公里，相信係指入口至雙磎寺站，其實一路步入，全是櫻花路，從我所住民宿繼續前行亦然(唔知有幾遠，無行哂，據官網指，盡頭屬智異山南端)，加上過橋到對面山邊嘅路旁，都種滿櫻花，加起黎何止十里櫻花路啊！
我地漫無目的，只跟心意走，厘D棧道屬對面山路，一樣咁靚，只係無人啫！
就算無預訂，平日都大把住宿地方，不過唔知點開價啫！經過眾多民宿，最喜歡厘間，但位置較偏，且位於山丘上，店員一見我地，即跑出迎接，可惜令佢失望囉 ! 不過佢地好友善，俾我地周圍參觀。
從山丘上俯瞰四野
好似厘位遊客咁，有閒暇釣魚仲好，我地漫步返民宿，知道住處較偏，又唔想行番出去食晚餐，起步時就喺唯一嘅超市買左簡單食材。
從未見過拳頭咁大嘅餃子，一包12隻，我只能食4隻，另一半幫我清埋，勁！
Ｄ７ 完
D8 3/4
十里櫻花路십리벚꽃길＞沙上사상＞迎月路달맞이＞
海雲台海水浴場해운대해수욕장＞南川洞櫻花路남천동벚꽃길＞
AION PARTY아이온파티 ＞酒店
花開較偏遠，遊客一般都要九點零十點先到達，所以我地八點離開，
店東住對面小屋，整座民宿空無一人。
果然，四周寂靜，最鐘意咁嘅環境。
厘座坊後係條小村
仲認唔認得厘度，雙磎寺站尋日嘅熱鬧，要等頭班車到先復見啦！
尋日主要到對面山頭走動，今早只走十里櫻花路。
企喺路中慢慢影，絕無人車干擾，爽！
我地沿途所見，厘間民宿最旺啦！
開始有少量遊客出動
所見嘅民宿都好少客人
早上光線更好
開始多左私家車出動
到達我地今早嘅目的地，沿棧道進入觀景台，亦係河東花開面嘅戲肉，厘度早上順光。
厘個觀景台有高低四層，位置參差，係最佳觀景點。
尋日下午企滿人，今早得幾個人，光線又唔錯，係最佳時間，晏Ｄ人潮就殺到架啦！
剛好有對CP 作影模，咪走雞，嘩！真係無得輸。
望住個景直情唔想走，足喺度玩左大半個鐘。
若著鮮色衫就更迷人啦！有位韓服美女就無敵啦！(發夢)
不過，厘個花況可能再多十日就無啦！你睇滿地落櫻。
離開觀景台，繼續步向路口。
厘座民宿又係拍烏蠅，好奇點解唔減價吸客呢？網上有人改住河東巴士站附近，房價平一半有多，卅分鐘車就到花開，且班次頻密。
漸近路口，終於見到首架巴士，釜山入黎嘅長途巴應該仲未到。
見到厘座碑就知到路口啦！
車站門口侯車處
售票處內厘度門通向洗手間(上面寫住)，到步落車最好去左洗手間先起步。
厘張睇到眼花，只知左一、二係河東及花開，好似無我要嘅。
售票員叫我睇厘張，哦！最快要10:25，買票先。
巴士只稍停，上客即開，三個牌從左至右分別係花開、河東、釜山西部。
13:20回到沙上，入百貨公司內嘅food court醫飽肚後，我倆商量：三樂江雖兩次到訪，都未全開，咁近，不如再去囉！
果然全開啦！當然更有睇頭。
樹上全開花，地上滿落櫻。
釜山仲有想去未去嘅地方，今日可以去迎月路果邊賞櫻。三樂江近掛法站(502)，坐地鐵到萇山站(201)lu！按韓巢指示步行廿分鐘到，點知全程上斜，早知喺8號出口搭巴士啦(2/7/10路)！
經過公園
黎到海邊觀景台
厘度仲設計成四級，方便遊人坐立，真心講，景觀好一般。
當日條街好熱鬧，對面唔係酒吧，就係食肆，仲塞車添！可以話人車爭路。
厘段路似乎做埋停車場咁款，行人路偏窄人多擠迫，唯一可取係方便企馬路影相。
繼續前行到小公園
厘度有個旅遊中心同海月亭，亭上叫做稍稍可眺望，效果一般。
要賞花，沿對面行就差唔多，可惜又無行人道。
幾乎所有櫻花樹下泊滿車，市區就係咁，所以論市區，首推三樂江囉！
迎月路雖在山丘上，但沿海邊而建，間中可望海景，係海上養殖場。
路旁以海為題嘅壁畫
因為行上萇山站同海雲台都差不多，不走回頭路，去海雲台沙灘行下囉！
之後從海雲台站(203)搭地鐵去南川洞(211)一號出口進入，行到金蓮山站(210)離開，可以話整個賞花區屬屋苑範圍。
都係人車爭路
可能玩過鎮海同花開，市區又到過三樂江，相對厘度嘅景觀就無咁吸引，影幾張相就改去西面食晚飯，今晚選擇西面站(219)7號出口左邊嘅AION PARTY。
場地寬敞乾淨，韓西式都有，又無時限，ＯＫ嘅！
韓國習慣入座前付賬
Ｄ８ 完
D9 4/4
釜山부산＞首爾서울＞ 酒店＞南山谷韓屋村남산골한옥마을
今早到釜山站(113)乘坐09:17嘅火車到首爾，告別釜山啦！
火車售票處，無論你坐高鐵/普通火車(無窮花號)，都係在此買票。
火車站內仲有自助式置物柜出租，方便帶行理遊玩完直接搭車嘅乘客。
標明有₩2000/6000
唔識韓文？有中英日文俾你揀。
為左穩陣起見，我地到釜山首日就預訂去首爾火車票，售票員見我遞紙仔買票，就知我唔識韓文，佢好細心幫我圈出重點，用簡單英文交代，真抵讚！
我地選擇無窮花號，時間雖較高鐵長一倍，但車費平一半(果然係一吋光陰一吋金)，我地考慮到玩左咁多日，趁長途火車休息下，反正係漫遊啫！
前面嘅係我地坐嘅無窮花號(以國花冠名)，對面果列係高鐵，都係往首爾。
咪以為無人坐呀！係我地早上車咋！其實滿坐架，多數係韓人，亦不乏外國遊客，見網上介紹列車上有卡拉OK、茶座、遊戲機室......。
未夠15:00我地已離開火車
由首爾站(426)乘地鐵到忠武路站(423)攞房，因為玩左咁多日，首爾又連住四晚，搵間交通方便又有洗衣機嘅。
厘間係全自助民宿，連大門、房門密碼都透過手機短訊通知，凌晨都可自助入住，最正係全英文(雖然我英文C，好過係韓文吖)。搞掂哂，隨便食左個湯烏冬同拌飯，由酒店行去南山谷韓屋村只需十分鐘，今日就玩厘個景點算啦！
一到入口，最矚目就係厘間韓服出租公司，見佢好好生意。
韓屋村入口(免費)
估唔到韓屋村範圍咁大，之後睇資料，原來景區呈現朝鮮期嘅兩班士大夫宅邸到平民瓦屋的住家規模及家具擺設。
唔租韓服，可以咁樣影相。
厘度主要分為五楝房屋，四楝從首爾各地遷移至此並重新修復， 其中僅尹氏家屋因過舊不合遷移，以新建材復原，以為係一般嘅民族村，早知做多Ｄ功課啦！
入口處嘅建築群，有各種不同用途嘅房間。
厘間屋底洞中放柴，應該係冬天燒柴暖房子嘅，類似地暖。
喺厘組建築中間有一廣場，我諗係民眾聚會甚至小市集嘅地方卦！
厘組房屋相對豪華，間格可以靈活改變。
多三位韓服美女，畫面上嘅情調好好多，唔怪得租服公司咁好生意啦！
喺度可以遙望首爾塔
厘度所有房間只可從外觀，不可內進。
厘個區唔通係大廚房，因為廚房範圍連貫到室外，包括醃缸、研磨工具、水井。。。甚至有爐灶等。
繼續參觀另兩組建築
厘度係祭祠嘅地方
一連串嘅建築，包括書房、寢室、會客室、工作室同廚房。
厘度又係另一個廣場，亦設有大水井、爐灶。
睇完朝鮮期房屋，再向山丘上走去。
公園有個咁嘅建築，唔知係咪千年時間囊紀念廣場(無睇說明)，整個設計係條室內長廊，視線高度鑲嵌透視玻璃，神奇地呈現出活動嘅卷軸風景畫，若畫面出現全韓服遊客，時光倒流感就更強啦！俾個讚！
漫遊近兩小時，走lu！仍然有唔少遊客進場，今日整休左半日，聽日需要多D體力，食完野早D返去休息。
搵食之餘，不忘影番兩張民宿位置相，從對面馬路睇，戲院前係地鐵站，我地就住戲院後面，一分鐘可到地鐵，我地企嘅位置係去機場方向嘅巴士站，方便旅程結束去機場。
Ｄ９ 完
D10 5/4
忠武路站(423/331)＞安國站(328)>北村북촌＞
白麟濟故居백인제가옥＞雲峴宮운현궁＞
首爾歷史博物館서울역사박물관＞慶熙宮경희궁＞
無牛무쏘 (任食烤牛)＞酒店
今日全屬文化之旅，睇左咁多日櫻花，轉下feel；早上先去安國站(328)嘅北村，距酒店只有三站(1/2/3號出口均可)，按指示前行，已見地上標誌。
好快已覺附近建築別具風格
因為仲未去文化中心，手上無地圖，只有下載嘅地圖，知道厘度有八景，進入景區後，對我黎講處處是景，決定隨心而行，無刻意找尋，記憶中厘個係第一景，牆外係昌德宮。
可能我地早到，幾乎獨佔景區(見網照經常人頭湧湧)。
估佢係梨花卦，一樣開得燦爛。
厘間係宮中飲食研究院
只要喺北村內，都似走入朝鮮期般(個窿咩黎架)。
就係咁囉！似狗洞穿過牆後(講笑咋)。
無誇張吧！真係步步是景架！
屋內庭院一樣幽雅怡人，雖然旁邊有車房，卻並不違和。
壁畫一樣俾人感覺悠閒舒適之情
桃花/櫻花爭艷
行走北村都要Ｄ體力，成日上斜落斜，若行動不便就真係有難度架！雖說無乜梯級，推輪椅都死得！！
街巷較窄，無人當然覺得舒服，但人擠時影相都難。
雖然間有微雨，因環境幽美，仍好享受喺度漫遊影相。
終於行到北村文化中心，入去攞張地圖，參觀埋洗手間lu！
估佢係兒童繪畫中心
繼續漫遊，都仲係包景區，爽！
終於見有人黎啦！兩位北村旅遊大使後面跟住幾位遊客，以為有導覽添！(美麗的誤會)不過佢地非常友善同主動，好樂意俾我地影相添！
你睇佢地周身百寶，工作袋內有好多唔同顏色嘅筆，仲有地圖同主要景點嘅單張，佢地都有問我要唔要地圖，我表示有啦！佢仲幫我圈出所在位置，又教我點走，夠專業，抵讚！再留意下佢地嘅臂章，標明佢地通嘅外語。
雖然已有少量遊客，亦有居民出黎活動，始終景區大而分散，仍然清靜。
記憶中，厘度好似係八景之一。
繼續漫遊
從高位外望，與北村仿如兩個世界，喺度住真有避世之感。
用咁靚嘅石雕舖地，嘥Ｄ卦！
我地都行得差不多，開始落斜離開，沿途一樣靚景不絕。
入黎前無租韓服而感後悔嘅，入厘度仲有機會。
好遲先發覺地上有厘種標誌，唔識睇，都係無用。
人潮殺到，厘位小朋友著左韓服好雀躍，直情叫我幫佢影相，可愛！
唔使問，佢把透明膠遮都係出租公司嘅！保私隱，幫小朋友加番個filter先。佢又真係好上裝，官仔骨骨，十足兩班子弟，
韓服人物的確令古風建築增添氣氛
有Ｄ掃興係落雨低溫，顧得保暖就失左美態。
厘度好似又係一景
遊客陸續到訪北村, 但仲未上到黎。
出到大街
又見北村大使，厘兩位係中(普通話)英語嘅，現場所見，都幾多內地遊客。
厘間最多人幫襯，睇落好似款多色美。
厘位女仕醒呀！先摺起裙擺，免得成索水布。
穿韓服去北村真係幾受歡迎，一來可寄存背囊之類，又就近景區，比自攜韓服方便多啦！
之後，我地黎到白麟濟故居，厘個景點無做過功課，只見＜免費參觀＞&＜History House Museum＞。
咨詢中心無人當值，攞張中文冊子，入去囉！竟有意外收獲；厘位白麟濟係醫生，厘間屋轉幾手後，落入白醫生手，所以稱白麟濟故居。
(以下引自白麟濟故居官方資料)
舍廊房的一部分還被建為2層樓的建築，這也是朝鮮期傳統韓屋所未有，僅見於白麟濟故居，它既保有傳統韓屋之美，又巧妙地融入近代的變化，不管是建築規模與歷史價值，都被視為足以與前總統尹潽善的故居相提並論的北村代表建築。
初見四周與朝鮮期房屋無異
睇清有部份係玻璃窗，感覺加入西方元素，大體仍以韓式為主，木間格仍可靈活改變。
厘套坐墊/床墊下多左基座，有當時西方<床>嘅感覺，係朝鮮期無嘅。
樓底比一般韓屋要高，玻璃窗令室內更光亮開闊，主坐墊放喺椅上，帶有中國味道，牆上仲掛左個帶鐘擺嘅西式鐘，整間屋可說係中西朝鮮合體建築。
非常西化嘅枱
厘座更唔使講，全落地玻璃窗，當時黎講，相信價值不菲。
屋主人講求坐姿舒適，屋外嘅長椅高於傳統韓屋甚多。
走lu!
路經憲法裁判所，似乎怕遊客忽略佢地，整個最佳拍照位提醒你影番張相先走啦！
距離裁判所幾分鐘步程就到雲峴宮，入口寫住<無料入場>。
入口同樣無人當值
雲峴宮嚴格而言只係王族親眷嘅居所(高宗父親)，高宗登位後，大肆修整擴建，並升格為宮。
意料之中嘅朝鮮期豪華傳統房屋。
離開雲峴宮，仍然落住細雨，都係去博物館舒服Ｄ。
路經紀念碑殿
光化門廣場上，前面係朝鮮期多次擊退日寇嘅李舜臣將軍立像。
後面係世宗王坐像，因為幾座宮都喺附近，我地會再黎。
而家目標係首爾歷史博物館，呢！紅色果座就係啦！
路旁仲有座會郁嘅巨人像，係咪廣告就無研究過啦！
博物館旁嘅馬路邊，展示左架381號電車。
博物館外設有露天展場，地上繪有首善全圖，係1840年李氏王朝嘅地理學者金正浩所制木版印刷地圖(今首爾)
同時亦有石碑
厘Ｄ類似中國神道上嘅迷你版石像生
仲有韓式建築解構
因為落緊雨，無心睇說明啦！好明顯厘Ｄ建築部件屬歐洲風格。
睇完外面，入去lu！
門口嘅石獅，都係迷你版
厘Ｄ相機，兒時都見過類似嘅！
厘Ｄ似放大鏡觀景器，用嘅圖片只供一人欣賞，記得兒時街邊檔亦有。
整體而言，有Ｄ失望，展品唔算豐富。(其實對歷史短嘅國家唔好太苛求)
由博物館到慶熙宮(免費)只需幾分鐘步程，橫掂仲未關門，去逛逛囉！歷史上慶熙宮曾經歷燒毀、重建，又在日佔時期改作中學，至1988年才重新整修。
一到興化門，又係包場。
穿過崇政門到崇政殿(正殿)
殿前廣場每隔一定距離就有一小立碑，分別由從九品至正一品，每邊18個，供各級官員依次列隊覲見。
殿兩旁分別建階梯長廊
建築風格仿照中國
直入參觀幾座殿都不見人影，睇得好舒服。
厘座泰寧殿後面有塊大石，名為<瑞岩>，係慶熙宮嘅寶貝，傳說厘度具王氣，亦係光海君喺度建慶熙宮原因，當時只係王族私宅。
我地依小丘而上，從高處俯瞰宮殿。
今晚試下烤牛，雖然招牌叫無牛，但只食牛，全食肉唔太啱我，但老伴鍾意，我地離開慶熙宮步行到西大門站(532)搭地鐵，到孔德站(529/626)轉6號線到上水站(623)1/2出口北行幾分鐘可達。
門口招牌已經寫左₩18900/位
泡菜、蔬菜同醬料，另加₩500/位(隨意)，冰水免費，飲料另計，韓國習慣先埋單，後食野。問過係無限時限量嘅！
我地一坐低就叫我地到吧枱攞盤牛肉，睇門口嘅照片，估係三個部位，再添時可指定要某個部位。
坐椅成桶型，坐墊下可放背包外衣等，免得薰到件褸成陣味，幾環保，好過有Ｄ烤肉店俾個大膠袋你裝衫囉！
枱面有個鐘，食完唔使行出去，撳鐘就有人送份新嘅。
最後我地食左六盤
食得咁飽，幫助消化最佳方法係行街散步啦！
Ｄ１０ 完
D11 6/4
忠武路站(423/331)＞汝矣島여의도＞國會議事堂국회의사당＞
水原華城수원화성＞行宮洞壁畫村행궁동벽화마을(華虹門附近)＞酒店
厘日行程基本只有兩個，不過頗需腳力啦！黎左咁多日，搭地鐵已無難度，好快就到汝矣島站(526)。
廣場上嘅藝術雕刻
對面就係汝矣島公園
公園內只見厘排櫻花稍有睇頭
厘度嘅單車應該好受歡迎
尋日今早都落雨，睇櫻花真係差少少，好彩係微雨，如果一場大雨，櫻花可以一夜無哂！
厘度嘅櫻花已經落哂！心諗，咁快就無野睇？四月頭咋喎！
好彩間中仲有些少
園內一景
向海邊前行，好靚嘅設計，以為係天橋入口。
原來類似觀景台嘅作用
公園內櫻花落得七七八，但路旁櫻花仍燦爛，早餐車都泊哂喺度等生意。
無餐車，推車仔一樣有客人幫襯。
地上已有不少落櫻
因為整條馬路兩旁櫻花盛放，自然有追櫻團殺到啦！旅巴開始泊滿路旁。
厘個蔬果球雕塑好搶眼
人流開始多
下面應該係個市集，但我地對佢興趣不大。
厘排開得較遲
前面落車嘅團隊開始行過黎，天色又馬馬，係時候離開啦！
我地行去國會議事堂，好Ｑ嘅公仔。
對面就係國會議事堂，厘帶嘅樹木修剪得好靚。
向大馬路厘面似背面多Ｄ，我地兜去後面，似乎更可觀。
2018年平昌冬奧吉祥物守護郎수호랑和半月熊반다비喺度迎賓喎！
厘座紀念碑寫咩我就唔識睇，可能同和平有關卦！
喺議事堂對面小丘上，有個多用途公園/廣場，據講經常有新人在此舉行婚禮，如果係韓服婚禮，簡直靚絕。
我地黎到時，剛有展覽散場，工作人員仲收拾緊。
之後我地去水原華城，交通時間長左Ｄ，但方便嘅！我地喺國會議事堂站(914)搭地鐵去水原站(P155)，4号出口（北側廣場）諾富特水原站수원역.노보텔수원乘公交(11/13/36/39)號，八達門站팔달문落下車即見八達門城牆。
被列世遺，遠Ｄ都值得參觀啦！順便睇埋簡介。
地上標誌
要入去，當然先買票啦！我地買四聯票，₩7000/2人，其實部份景點免費嘅，例如65歲連四聯票都免，著韓服免部份門票等，玩韓國，最好先入官網睇清收費，有Ｄ遇上每月最後周三嘅文化日，又係免費嘅！
佢地唔用蓋印喺手，係叫你伸隻手出黎貼喺手背，(貼胸口係咪無咁易甩呢？)哈哈！我就掉失左張貼紙啦！
好在張票仍保管好啫！
嘩！起步就要考體力。
南雉，維修緊，唔入得，可以睇說明。
厘個碑上刻有歌曲，我估係佢地嘅國歌/民族歌曲之類。
終於爬到頂，都達到登高望遠啦！
努力再上
繼續努力，慢慢上，風景唔錯，索氣就抖下，影下相，會舒服好多。
南炮樓
哈哈！咁嘅選擇算唔錯啦！唔想行樓梯，可以揀斜路。
華城原建築是朝鮮期水原市中間嘅堡壘，後建築期於1794-1796年，發展為全長5700米，今保存得最好嘅朝鮮期城池。
西南暗門
又一紀念碑
無論係復修或原有嘅，城牆都展現出雄風。
鐘亭
右邊嘅係華城將臺，左邊係西弩台。
厘度係城池嘅制高點，可監視四周，西弩台更可連環發箭禦敵。
下面黑屋頂嘅方形建築群係水原行宮
我地繼續從另一邊前行
經過城神祠
遊水原華城亦可坐遊覽車，厘度係車站。
水原行宮入口
穿過左翊門，潮流興打卡，厘度可以俾你實體打卡啦！(其實我地好多都無蓋到)
大長今雖然做完好耐啦！仍作招徠，應該有Ｄ用卦！
再過中陽門
黎到行宮正殿～奉壽堂
似乎厘個時候，主座嘅設計升高左，應該坐得舒服好多。
行宮展示較詳細，加上睇埋Ｄ古裝韓劇，唔睇說明都好易明白。
慶典祭品
雖然不准進入殿內，仍清楚睇到，好過被玻璃隔著吖！
繼續參觀，同時蓋章。
厘個供水系統唔係每座宮都有
雖然係韓國旅遊旺季，人文景觀較清靜，好適合我地。
用作居住嘅房屋都裝有地熱設計
軍事政事中心
似乎厘度嘅臘像多依照大長今嘅演員容貌
起層軒內全係禮樂用嘅樂器
維與宅
厘個燒廚房包括用具儲存室，而廚房屬半露天/半開放式。
宮內生活展示
不忘展示大長今拍攝地
之後，我地前去參觀水原華城博物館，廣場上繪上城牆圖案。
途經鐘樓
博物館露天展場上嘅攻城武器
博物館入口
館內主要展示民間生活、護城設計、宮內生活及百官活動盛況。
反正離開左檢票區，到附近行宮洞壁畫村행궁동벽화마을(華虹門附近)逛逛。
胡同內仍係民居、茶座或藝術創作社之類。
仲有華虹門一帶口嘅城牆未上
厘部份好好行，無需上高落低，同樣有雉台、炮台、敵樓。。。等，亦可俯瞰附近街區，且免費(我地上去無要求出示門票)。
離開城牆後途經所見
今日真係行得好攰，加上無興趣購物，只到八達門市場逛逛，回酒店附近食豬肉湯飯，因為聽日又要行，早抖！
Ｄ11 完
歡迎續看(Part 3) D12-D14
http://chuchu-hung.blogspot.com/