陝北有驚喜~乾坤灣、雨岔、波浪谷

 今次主打景點位處較偏, 但仍能順利以公交完成,感恩!
厘條線港人較少到, 最近見有兩三個攝團, 6天都要9K,
真係忍唔住想同公交友分享下, 至於我地之後去嘅華山同西安,
因網上資料豐富, 就唔寫啦! 網友若有需要提問, 盡我所能答啦!
豬熊見西安機票超抵($1226), 21/5 咪由香港飛西安, 再坐火車到延安,
以延安作基地(因為延安有直達車嘛), 遊玩延川乾坤灣(住兩晚), 返延安hea住幾日,兩次即日來回甘泉雨岔大峽谷(超爽!), 玩夠再出發去靖邊波浪谷住左三日,基本上花十日漫遊三個景區。

先放幾張相俾大家睇睇, 再考慮幾時走一轉都未遲!
延川乾坤灣

清水灣與會峰寨

甘泉雨岔大峽谷係捕捉光與影高手嘅樂園, 我厘D低手, 真係失禮哂!
甘泉雨岔大峽谷（一線天）

甘泉雨岔大峽谷（牡丹溝）

甘泉雨岔大峽谷（龍巴溝）

甘泉雨岔大峽谷（樺樹溝）

靖邊波浪谷

有關乾坤灣資料
交通方面:
方案一(直達程家大院/乾坤灣大酒店等)、
延安汽車南站至乾坤灣交通(直達):
官網話延安汽車南站有11:40&16:30兩班中巴, 經實踐, 職員話每日一班來回, 有車報班先有, 若無車報班就無啦! (一定要早D到車站, 等職員通知司機有客) 結果我地坐11:40嘅直達車, 車程約3小時; 返程時間是07:00(乾坤灣大酒店發車)。
(嘩! 咁危, 萬一無車點搞呀?) 咁就要用方案二啦!

 
方案二、(利申: 我無試過, 只在行前作備用)
延安汽車東站 (延川大巴 07:10@30分鐘,約1.5小時) >延川汽車南站>乾坤灣中巴>乾坤灣南大門服務區
延川汽車南站每天有三班車發往乾坤灣南大門服務區, 車程約40分鐘, 發車時間分別是7:30、10:30、15:30，返程時間是9:30、13:30、18:00。
註: 從南大門服務區至乾坤灣仲要坐半小時區間車

建議住宿:
由於景區勁大, 非自駕的必需坐電瓶車代步(節假日不能自駕入景區), 電瓶車的路線以乾坤灣為中轉, 因此住近乾坤灣最方便,
其中有乾坤灣大酒店、程家大院和渡假村窯洞賓館等。

門票¥80(65歲以上免票): 基本上分多個景區, 每入一景區即剪孔, 每票一進, 三日內有效。
(人地要影日出日落點呀?) 偷雞囉! 寫到再講。
車票¥60: 票上註明即日有效, 不過無人理, 照無限次任坐。
官網:http://www.ycqkw.cn/Index.html

跟當地團遊: 以上三景區, 網上非常多當地一、兩天遊, 全以延安為出發點, 價格相宜, 由百幾至幾百都有, 當然唔可以好似我地咁hea住遊, 睇你想點玩。

 

講完乾坤灣嘅資料, 出發LU!
食完早餐, 慢慢退房都未遲, 去到南站先10:30, 乾坤灣售票處唔喺南站售票廳, 而係停車場內汽車出入口旁嘅窗口, 一定要早D通知職員你去乾坤灣, 佢會打電話問車, 確實有車黎緊先會開售車票。

我地坐嘅係厘部中巴, 鬼咩! 除左中途上上落落同司機拉下貨, 全車連我倆得3個人去乾坤灣。

11:40開車, 厘架車會直入景區, 經過村落, 部份民宿, 最後到乾坤灣大酒店, 我地選住乾坤灣大酒店, 唔錯!

附近嘅程家大院屬四合院風格

渡假村窯洞賓館具黃土高坡特色

搞掂就去遊客中心買門票同車票

由酒店行去乾坤灣只需15分鐘, 去LU! 初黎報到, 打左窿先知, 原來每景區只限進一次, 為免爭拗, 安排黃昏時光線會靚D。

乾坤灣廣場

乾坤灣沿棧道共有1、2、3號觀景台, 每個觀景台都有高低位,
加埋都有6、7個觀景台架! 以下係各個觀景台嘅角度。
我覺得喺1號觀景台睇似頂草帽

厘張第二日黃昏影嘅!

鷹襲長空

忘記係咩啦! 定係隻鷹嘅背面

喺2號觀景台某D角度睇黎似隻鞋

厘個叫定情島, 仲以為有愛情故事聽添! 原來佢係山西陝西嘅友情分界喎!
見唔見有船埋岸呀!可以上島架! 不過船費另付啦!

從2號觀景台落低位

可能落差大, 遊客怕落左又要上, 網上少見; 厘度有個玻璃箱, 入左條巨石, 似足條蛇, 叫巨蟒守島。
哈哈! 裏面好多人仔, 似巨蟒守財多D .

厘個定情島又叫女媧之履, 傳說係女媧飛過時掉下嘅!

喺3號觀景台同之前兩個完全唔同, 睇真原來係半島, 咁係咪叫做凡事要多面睇呀?

第二日黃昏,行遠D, 多左山脈少左樹, 氣勢好D。

山岩間, 奇形怪石特別多。

景點之一: 古窰洞

第二日早上, 電瓶車開八點, 我地出發去會峰寨。
清水灣同會峰寨屬同一入口, 一把年紀, 保住膝頭較重要, 都係坐索道上會峰寨好啦!

之前唔知要下行先欣賞到最美嘅清水灣, 結果浪費左回程索道, 朋友們要坐索道, 買去程好啦! (跟團無時間就例外啦)

會峰寨入口

依指示步去觀景台, 第一眼望落, 似迷你版Machu Picchu .

喺另一方向, 可以欣賞到清水灣。

向下走, 從側面睇會峰寨, 完全兩個樣, 似骨排。

厘個景好似叫母子情深

面對山巒起伏, 令人心曠神怡。好彩等吊車時同職員溝通下, 佢話有時間的話,
千祈唔好錯過走路落山,行埋河邊棧道, 於是, 我地放棄回程索道, 蝕水都漫行4個鐘, 正確呀!

途中景緻, 碧水幽谷, 綠水嘅地方係水庫。

到左會峰寨入口, 雖然已廢棄, 梗要入去行下啦!

經過已破落嘅古民居

寨中祖廟及民居

由山上下望, 應該都有唔少古民居。

沿路落山風景不絕, 個人覺得會峰寨+清水灣先係整個景區嘅精華。

到河邊棧道, 見有摩崖天書, 雖然幾攰, 都上去睇下, 自覺係凡人, 乜都睇唔到喎!

又經過座窯洞式寺廟, 對面仲築有戲台添!

我地約左電瓶車師傅喺索道站等, 行左咁耐, 唔知會唔會走左呢?原來平時遊客少, 可以的話, 電瓶車會專程車你周圍去, 仲會俾埋聯絡電話, 可以隨時接應, 結果返索道站, 師傅真係等緊, 佢話一般最多等兩小時喎! 真係辛苦哂! 感激!
師傅問係咪返酒店, 有車坐, 梗去埋另一黃河棧道啦! 點知佢話好一般咋喎!但我地話對黃河有情意結, 想多接觸, 得米! 師傅又車我地去, 車行都超過半小時, 無可能行去架! 厘D崖刻當然係重塑啦! 如果因風化而無得睇, 重塑亦無妨, 可能日子耐D感覺會好D。

進入厘段黃河棧道, 因常有落石, 所以一定要帶安全帽。

的確, 厘段棧道, 風景不及清水灣段, 師傳為還我地心願,
就叫我地沿棧道行到伏羲碼頭等我地, 大概卅分鐘就行完。

下望伏羲碼頭及古船客棧

伏羲觀天(有D勉強)

女媧祈福就好神似啦!

如果唔係師傅指引,  要向岔路位置睇, 一定錯過啦! 多謝哂!

按旅遊導覽仲有好多零碎又隔涉嘅景點, 因興趣不大, 我地就放棄左,
天時暑熱, 返酒店涼冷氣訓晏覺, 等黃昏再去乾坤灣睇日落, 點知是日多雲, 無機囉!

 

溫馨提示:

~ 講番重入乾坤灣/清水灣等景區, 你可在05:30前入去影日出, 因未有人上班,  
基本上入左去, 幾時出黎無人理你; 又或者唔去好一般嘅景區,
將打窿數目留番重去嘅景區都可以, 佢地只數你去左幾個景區, 無識認去左邊。

~ 另外, 車票一定要跟身, 每位司機都會要求你出示車票(途中若有位都可截車乘坐), 可以俾佢打窿, 但千祈唔好俾佢收左你張車票(試過差D俾司機收左, 好彩有其他司機阻止), 否則坐唔到車即係唔使玩啦!

~ 索道票在非節假日有價講嘅, 司機或服務員都會問你, 估計有佣金卦!

~ 回程方面, 落車前記得問清司機回程班車時間, 你可要求民宿/酒店電聯汽車司機(其實司機同車都喺乾坤灣過夜), 在住宿門前接載上車, 早上班車行經民宿/酒店/村落時, 都不斷響horn示意村民及遊客班車到啦! 感覺溫馨
喺乾坤灣住左兩晚, 晨早7點坐班車返回延安, 十點多D抵達延安,
到南站前經過預訂嘅民宿, 所以要求師傅停車落客(一般長途巴都係咁),
因為連住幾日, 改住民宿, 個人覺得超值, 寬敞之餘有廚房同洗衣機, 可以輕鬆洗衫嘛!
到此, 乾坤灣圓滿結束
預告:下個景點係甘泉雨岔大峽谷。
 

 

甘泉雨岔大峽谷資料

交通方面:
延安汽車南站直達雨岔大峽谷售票處, 汽車售票窗與乾坤灣相同,
在停車場汽車出入口旁, 每日一班, 08:30發車, 車程約一個半小時;
15:30返程(最遲16:00開車), 誤點自負, 可向司機取電話號碼, 以便聯絡;
票價¥90, 包來回; 最好早上早點到站, 因客滿即走, 且只此一班車。
(我試過在站內隨便搵人問, 佢話無車, 問我有幾人, 幫我叫包車, 咪亂信呀!)

同樣都係厘類中巴

景區內不許自駕(以前可以), 遊客必須購票乘坐區間車, 每位乘客獲派乘車證, 憑證乘車, 行車屬巡環線, 分三程乘坐, 不走回頭(售票處>第一景區>第二景區>售票處), 每程30至40分鐘; 票價¥70, 押金¥50, 交還乘車證時退還押金,
若由司機購票亦可, 票價¥80, 無需押金, 但失證也需賠¥50。
景區車售票處

乘車證

目前景區尚未規範為國家景點, 故免門票(據說已獲批1/7起收門票),
景區被發現的暫時有5條溝, 分別為一線天(約400米)、牡丹溝(約700米)、
龍巴溝(約前800米+後1200米)、樺樹溝(約800米)和花豹溝(不詳),
目前開放前4條溝, 每日開放一組(次序不詳), 一組為一線天、牡丹溝和樺樹溝,
另一組為龍巴溝和樺樹溝, 花豹溝未對外開放。

攻略
~ 計劃行程最好多留幾天, 以配合天氣作彈性調動, 因峽谷垂直狹窄, 即是晴天,
陽光也只能在11:00-15:00照射入谷, 按我們兩天的經驗, 最美是12:00-14:00左右, 若遇上陰天, 景緻相距甚遠, 雨天更糟, 必需租用雨靴, 甚至關閉景區, 雨後即是天晴, 也可能需租用雨靴。

~ 四溝中以樺樹溝最美, 但車程則安排在第二景區(只按我們經驗),
臨場要注意區間車安排的先後次序, 多留日照最佳的時間在樺樹溝, 確保掌握最美景色與光線。

~ 若當天開放龍巴溝(約前800米+後1200米)及樺樹溝(約800米),
建議只走龍巴溝前800米, 放棄後1200米(詳情在遊記內交代),
預留時間參觀最美的樺樹溝, 除非你預算去兩天而有把握天氣晴朗。

~ 若準備兩天入溝, 最好首日入溝購車票時, 先查詢明日開放哪條溝(我地係連續兩天開放不同溝, 有可能是同組隔日開放)。

~ 延安到雨岔車程不遠, 且早去也沒陽光, 不如住延安更舒適, 免搬酒店之煩。

後感
甘泉雨岔大峽谷肯定係拍友嘅樂園,不過按現場觀察同收到嘅消息,好壞參半,
好嘅係有公交直達(唔知係咪為規範景區作準備呢),非常方便,遊玩時間更勝當地團(行前做左功課,攜某嘅團14:00上車返程,馬XX好D,14:30上車返程,相對公交最遲16:00,多玩個幾兩個鐘啊!)。
景區安排有序,4溝輪流開放,的確具備收費條件。

壞嘅係越黎越多人,情況似步行街,尤其樺樹溝,塞人情況嚴重;
另外,聞說1/7起收門票(遲早嘅事),消費又要打大D啦!
 

講完資料性嘅野, 入正題講下實戰經過啦!

我喺延安住咁多日, 就係預留晴天去雨岔, 話說我揀左26/5星期日去,
哈哈! 完全唔使排隊, 上車即開, 非常順暢, 當日開放一線天、牡丹溝同樺樹溝,
之前做左功課, 有哂策略, 點知一落車, 喺一線天遇到位農民, 話可以帶我入龍巴溝喎!(梗要代價啦) 當然心動啦!
但心知唔夠時間, 立即同隊友決定聽日再黎過搵番個農民(俾多些少啫), 好開心同順暢咁結束當日行程, 未到15:30就全車到齊, 出發返回延安。

從售票處坐車到一線天及牡丹溝需半小時車程
一線天入口(400米)

從一線天行過對面, 大概十分鐘就到牡丹溝入口。

牡丹溝(700米)

到出口LU!

樺樹溝都唔知點揀相, 實在太吸引啦!真係忍唔住放多左,
手下留情, 咪鬧喎!

由牡丹溝坐車去樺樹溝入口, 約卅分鐘。
樺樹溝入口

睇完牡丹溝, 入口平平無奇

越行入去就越塞人, 皆因步步是景囉!

落雨或雨後, D水會浸得較高, 需要改著水靴。

我對光與影嘅掌握真係差, 高手點會影成咁吖!
為左介紹, 醜醜地都要繼續去相架!

後面嘅人一路係咁叫前面人前進, 前面嘅又誓死不前喎!
我地唔趕, 慢慢啦! 難為本地團要14:00-14:30上車果D!
仲要預半小時車程出售票處架嘛!

過左大半, 景色越黎越靚, 塞人更嚴重。

咁靚景, 溝內多處只能通一人, 想唔塞人都難啦!

真係石頭都變繞指柔

朋友們, 同遊左咁耐, 到出口LU! 係咪好爽呢!

都話人同景要講緣份架啦! 如果無遇到位農民, 我地未必決心再去,
就唔知景區嘅安排, 27/5係周一, 天晴, 閒日無咁多人啦卦! 應該好玩D。
我無眼花呀! 咁多人排隊嘅?

梗係D人諗住周日人多唔黎, 揀閒日黎啦!

終於可以上車, 開車前, 會有位服務員上車宣報今日開放咩溝 (似開大細咁),
點知佢話開龍巴溝同樺樹溝喎! 即時感覺中獎啦! 我同隊友相視而笑(慳番成舊水).
因為之前一日已經細遊樺樹溝, 今日決定放時間入龍巴溝, 前800米比牡丹溝同一線天靚。
售票處坐區間車到龍巴溝約40分鐘

龍巴溝嘅前800米景色較平均, 苔蘚無咁多。

有時通道較窄, 但仍有落腳位置。

左邊小徑有出口, 但我倆繼續向前入溝。

後1200米得我倆, 絕不易行, 如果雨天或體力不足, 建議放棄, 最闊嘅地方當然無問題, 但咁好行嘅佔極少

女仕還好, 腳細, 較多落腳位, 男仕腳大, 連落腳位都無, 我地不時要彎身側身兼出埋璧虎功,  兩手扶牆磨擦到痛, 終於諗起背囊有對準備去華山嘅手套, 好彩呀!

間中仲要爬過大石

厘段難度高D又長50%, 背囊同相機都刮花哂, 最後連相機都收入背囊,
所以影得幾張相; 講真, 如果天氣好又有時間, 厘段都幾好玩架! (記住唔揹背囊同戴手套)

後來被一位男仕趕上, 佢醒呀! 得支水, 連背囊都無, 佢話朋友行過,
叫佢放低所有, 輕身上陣喎! 連褲都換埋, 出到去洗下腳就得囉喎!
佢有朋友睇住就話啫! 我地搵邊個睇喎?

因為經常左腳踢右腳, 右腳又踢左腳, 條褲搞成咁。

行到出口, 見到條鐵鍊, 沿鐵鍊向上爬就係出口,

咪開心住, 出口喺半山, 仲要行近兩公里先到停車場 ,

我講左咁耐, 只係行完第一個景點---龍巴溝咋!
閒談間, 原來位男仕最年輕, 我地三人行, 加埋係188歲, 好意頭!
跟住坐車去樺樹溝(約30分鐘), 速遊一趟已經夠鐘搭車返售票處啦!
(記住每段要預留3、40分鐘搭區間車)

至此, 甘泉雨岔大峽谷兩天四溝之行又滿載而歸啦!
預告: 下一景點靖邊波浪谷

跟住又講下靖邊波浪谷嘅資料啦!

交通方面:
~ 方案一、乘延安汽車南站/東站往靖邊班車(最後在東站坐, 內文有詳細交代), 票價¥45.5, 車程約兩小時,下車後可打的(約¥60), 或聯絡民宿接站(約¥100), 車程約半小時。
 

~ 方案二、乘延安汽車南站/東站往靖邊班車(同上), 下車後在汽車站旁乘龍州鄉班車,
票價約¥8(無試過), 下車後再聯絡民宿接站或找當地人送去 。

景區內部交通:
別以為通景區都有車可乘, 我倆首天遊蕩了整個下午,
多見土路少見車, 也少見人, 一般遊客的食住行, 多由民宿代為安排,
除火焰丹霞景區有明確標誌牌, 其餘得靠當地人帶路(即使自駕者亦如是),
有見及此, 我本來已實地收集部份景區GPS坐標, 後發現有心人做的更詳細,
不妨分享一下, 不論自駕/暴走, 相信對遊玩波浪谷很有幫助。
因規定不能貼link, 內文請自行搜尋:
靖邊波浪谷ABC區超全遊覽指南（含導覽圖）
轉載以上內文的地圖位置(特此鳴謝原創者)

住宿方面:
本人極少推薦住宿, 但因景區情況特殊, 住三晚的經歷所得,
特別推薦----靖邊錦玉生態XX。
理由一、較近火焰丹霞及小波浪谷(步行約20及30分鐘), 最少這兩區可任意自行步往。
理由二、家庭式經營, 老板儒雅老實, 好說話; 老板娘熱情好客, 還多了兒子幫助接送,
最重要是價錢公道, 可直接微信預訂(平過網訂), 有商有量。
理由三、我住三天所見客人很多, 因往景區需店方襄助, 而父子各駕一車, 座位充足, 客多拼車相對便宜, 我倆每次都與其他住客拼車, 省下不少。
老板非常大方, 說是玩完才一次過結算, 我倆住三晚標間, 連早午晚餐(當然豐儉各異), 加埋接送靖邊車站和景區, 三天消費下來才¥1259/2人, 比兩天團還要便宜自在。

住宿環境
老板一家真能做到, 怕是自勉的座右銘吧! 辛苦哂!  

院內設有晾衫繩, 可供住客晒晾。

景區方面:
網上眾說紛紜, 且景點名稱混亂多樣(聽到頭痕), 經實地驗證,
的確封閉了不少景區, 如地心丹霞(A區/一號); 火焰丹霞/紅沙峁(B區/二號); 五號等; 正式開放的只有小波浪谷和水上丹霞(C區/三號), 雖然如此,
我倆仍先後遊玩了六處地方(詳情內文再說)。
據路邊社消息, 整個波浪谷被北京財團收購規劃, 一號及二號將在今年十月列為景點正式開放並設收費, 真假就難辨啦!   

 

交代完資料, 出發啦!
經過乾坤灣及雨岔之旅, 對延安汽車南站已很熟識(唔再貼圖啦),
知09:00有班車去靖邊, 於是食完早餐咪去車站囉! 點知等到08:45,
車站職員同我講, 因為得4個客, 無法開大巴,
不如佢地用的士送我地到東站坐靖邊車, 到東站有人接車兼付的士錢,
並保證大巴一定等埋我地4位, 厘樣真係要讚下, 兩站能靈活運用資源又環保,
重點係對乘客無帶來太多不便或損失嘛!

所以之前我建議要早D到車站, 等站內職員好作準備同調配,
其實佢地嘅服務幾人性化架! 另外, 雖然延安東站屬大站,
但有D直達專線暫時只有南站先有, 所以出發前最好問清楚。
到達靖邊大概11點多D, 民宿嘅車已經到左, 抵達民宿食過午餐,
諗住喺度住三晚, 唔急, 徵詢老板意見, 佢都叫我地唔使急,
今日可以到附近嘅小波浪谷玩下先! 仲教埋詳細步行路線, 多謝哂!
好容易就搵到火焰丹霞(B區/二號), 且豎左個牌, 註明幾時開始封閉.

範圍好大, 但都被鐵絲網圍封, (咁你又入到?)
係呀! 仲入左兩次添! 以後會解說。

時值中午, 反正要黃昏先靚D, 於是倆傻咪周圍踱囉!

好享受厘種寧靜清新, 我地無理咩景唔景點, 只係隨心而行。

遠處山間有條棧道

景色壯麗

可以睇到有棧道落谷底

厘D咁靚嘅地表, 其實只係細沙經千萬年積壓而成, 雖然可承受個人體重, 不過仍要輕力D, 唔好喺上面跑跳, 我曾見部份遊客, 為影跳起嘅相片, 不惜踩爛地表, 痛心啊! 因為地表只有一兩厘米厚, 下面全係細沙(以後有照片介紹), 破壞左就消失架啦!

咦! 有座窯洞, 可能會有D農民喎!

呵呵! 人就見唔到, 羊就有好多, 嘩! 你地就好啦!
可以住窯洞, 真係冬暖夏涼, 夜晚唔使開冷氣囉!

下面係水庫, 黃土高坡, 碧水環繞, 別有意境。

行行重行行, 又見一洞, 行近, 水源充沛, 直達水庫。

下行到水庫邊

厘邊被截流, 谷底形成一片綠茵草地

返到民宿之後, 我請教老板我地去左咩地方, 佢話屬一號景區嘅其中部份。
佢仲話厘D窯洞曾經係山賊嘅根據地

係時候到小波浪谷同火焰丹霞啦! 因為我地先後到過兩個景區三次, 所以相片集中喺日後上載。
個個都話黎火焰丹霞(B區)影日落, 反正近民宿, 我都唔執輸, 初到貴境, 睇定D先(雖然有人潛入內), 喺外圍搵左個高位坐定定, 後來有班攝影團都上到黎, 以為執到啦!

點知唔掂架! 太陽未落山已經被高山擋左, 返歸食晚飯好過!

第二日早上, 本來約好與澳洲4口家拼車到五號景區影日出,
點知收到消息唔准入, 早知尋日同四美拼車去啦! 澳洲4口返房再訓,
有對夫婦自駕入黎搵野食兼請老板帶路,
終於我地拼車由老板帶路到個不知名嘅景區,
先經過水庫, 晨光倒影, 梗落車影番張啦!

上山落坡

由於無乜人到, 連厘種單薄斜面都能完好無缺

厘度嘅地表, 可發現閃爍物質混喺其中, 應該含金屬物質, 係其他幾個景區無見嘅!

老板話厘度嘅丹霞地貌仲會生長, 蓋喺上面嘅草坡, 經風化雨蝕後,
底層嘅丹霞地貌就會露出黎! 即係話波浪谷屬年輕丹霞囉!

眺望遠處, 可見係一整片土地, 因某D原因而斷裂, 形成多層山谷。

D羊好似生活得好開心

繼續遠眺地貌, 有部份真係幾似波浪喎!

意猶未盡又進谷底

厘D裂痕, 睇怕又係一個新山谷將要形成啦!

下望谷底

行左兩個幾鐘, 我地返民宿食早餐, 休息下再出去 。
其實你可以話厘度嘅地貌都係大同小異, 皆因整個地區到處都係丹霞地貌,
所以難免將相片放錯地方, 若有, 請多包涵。
休息過後, 從民宿走捷徑的話, 步行約廿零分鐘, 到達小波浪谷,
中間會經過一塊私人田地, 有位老奶奶會收每位5蚊過路費,因為去左三次,
除左第一次, 老奶奶已經認得我倆, 都無再收我倆路錢啦!多謝哂!
當然你亦可以兜遠路唔俾都得, 出發前老板已通知我地, 所以理所當然俾啦!
因為小波浪谷屬正式開放俾遊客, 從早到黃昏都有團到,

不過黃昏時最多

連埋尋日略遊, 我地前後遊蕩左三次, 小波浪谷整體地勢紋理精緻集中,
雖然景區相對其他較小, 仍很可觀 。
以下照片同屬小波浪谷, 雖非同日, 一次過PO哂啦!

第三次係與同住民宿嘅父子同行, 諗住佢地初遊, 且父年事已高,
帶佢地去到後, 都唔敢叫佢地一齊落谷底呀!

點知厘位七旬有多嘅大哥(我地叫佢大哥), 三爬兩撥跟到落黎, 勁呀!
反而個仔跟喺後面, 我倆直情感到汗顏啦!

谷底就無乜人到, 跟團嘅一定唔夠時間, 自由滕如果無人指點, 又未必知可以落谷底, 且無任何道路, 落去都要體力。

上面嘅欣賞角度多係平面, 谷底就欣賞立面多D。

如果中午落黎, 當然又唔同睇法啦! 唉! 我無本事走兩轉囉!

行完谷底

仲見菩薩喺頂上普渡眾生

觀音就教化緊隻大貓

小波浪谷算係介紹完畢啦!
預告: 下個景點---火焰丹霞

 
 

介紹完小波浪谷, 又介紹下火焰丹霞(B區/二號), 從我地民宿步行去大概廿分鐘, 之前提過整個景區已封閉, 我地又如何進入呢?(下文有交代)

首日黃昏, 我地只做塘邊鶴, 隔住鐵絲網 / 高位zoom入去,
竟然當日嘅陽光最好

第日我倆再去觀察, 發覺四周有幾個缺口可進, 但景區內完全無人, 只見工人在趕工, 直至黃昏18左右開始有團進入(約19:30日落), 我倆明白啦!
要喺工地開工時間以外先好進入, 即早晚囉! 由於夏天日落遲, 相對18點後仍有光線, 所以人亦較多, 我地之後兩晚都入過去。
以下相片亦係同地異日, 一次過PO出。

相對小波浪谷, B區大好多, 紋理更多變化, 地勢較平緩。

睇見厘個峽谷邊上嘅觀景台(方格未起好果度) , 真係有D牙煙! 底部穩唔穩架!
細沙黎咋! 要知中國長假期嘅遊客數目真唔係講笑架!

目前景區內正在趕工舖設棧道, 現場所見, 已向谷底施工。

可惜由於最早被發現, 做成嘅破壞亦相對嚴重, 真係有必要設法保護。

脫落嘅碎塊睇落似石頭, 其實稍用力擠壓, 即成細沙。

較平嘅地表, 有D人為影張動感相, 不惜跳爛地面(可能係無心之失)。

千層式嘅邊緣, 唔踫都易爛, 可況踩落去?

從兩棵植物嘅上方, 可以睇到地表破損後, 裏面全係細沙。

最令人深惡痛絕係將自己個名刻上, 甚至刻名山盟海誓, 講個壞消息俾D刻名嘅朋友知吖!
你地 / 你地嘅山盟海誓就快消失啦! 因為我見D工人開始將刻字打磨, 有D可以磨平, 刻得深嘅, 工人越磨越深, 最後都係救唔番(用填補法咪唔會磨爛囉)! 雖然傳言日後收門票, 若能舖設棧道加以保護, 個人舉腳贊成架! 不竟係自家寶貝, 自己唔珍惜, 外人點會愛護呢! 難怪美國嘅波浪谷每日只許20人進場啦!
(嘮騷多左D, 全因睇見心痛, 若有失言, 請見諒 )

B區嘅火焰丹霞就此介紹完畢
預告: 下個係一號景區

 

 

 

厘次又到一號(A區), 又稱地心丹霞 (都話D名混亂架啦!)
今早約好河北父子倆拼車, 05:00出發, 諗住趁清晨無人,
入五號景區啦! 點知去到岔路口, 就見三位大叔欄路,
其中一位仲揸枝高過人嘅大棒, 不過佢地好有禮貌,
叫我地改去對面山, 我地亦提出, 不如俾些少錢,
佢地一口拒絕, 睇黎佢地都係受人所託, 唯有離開啦!
哈哈! 有D似黃鼠狼偷雞不成 ,
到最後, 我地都無緣一睹五號景區嘅風采, 早知第一日去左先啦!

反正我地仲未去一號景區(亦係封左), 爭取時間, 即改去一號景區, 成功進入。
先到高位俯瞰神樹峽谷, 我有D畏高, 且四周都係沙土,
唔敢行太邊, 從相中可見以前有護欄嘅!

厘位勇者, 我睇見都戥佢牙煙!

俯瞰神樹峽谷

厘度唔知係咪龍回首呢?

遠睇, 部份棧道已經起好框架, 加上地板就完成啦!

其實整個地貌頗壯觀

有人形容佢為時間嘅指紋, 都幾貼切吖!

鐵欄將整個一號景區圍哂

從高位欣賞完, 距離幾分鐘車程, 又黎到接近谷底, 設有棧道嘅景區,
我地就從亭旁小路下行

山坡陡峭, 落雨就好成問題啦! 將來成為收費景區後, 當然唔同啦!

落到棧道當然老人都無問題囉!

(D相無光嘅? 天氣唔好呀?)
唔係! 係太早呀! 如果工人開後就唔入得啦!

可見起棧道雖然一樣做成破壞, 但相對影響細好多啦!

全條棧道頗長, 喺網上, 我見閆家寨對面有棧道落谷底架! 但行哂全條都唔見, 返黎睇番, 厘張相係來自網上2018年12月17日(【原創】陝晉之旅：靖邊波浪谷（A區）)

厘張係我影嘅, 半年咋喎! 咁快成條棧道無左?
水庫對面中間長方形果舊係閆家寨, 據講而家已經荒廢左啦!

俯瞰落去中間位置有個窿, 可能係一線天峽谷嘅入口, 可惜棧道無左, 要另覓山路都唔夠時間呢!

我地只能沿棧道走

工人正打磨除掉厘D遊人刻字

雖然陽光開始照射入谷, 可惜我倆見團隊喊走啦!

為免麻煩, 我地4人都撤退, 返民宿食早餐啦!

臨別依依, 陽光鬼咁靚, 但整個景區回復寂靜!

玩完一號景區(A區), 成功偷雞!~
預告: 下一景區係水上丹霞(C區)
 

 

 

最後介紹埋水上丹霞(三號/C區), 有人話厘個景區最靚, 因為有山有水;
C區可分成上下兩部份, 上部有鐵欄環繞, 主要欣賞丹霞地貌;
下半部係水庫, 主打山水景觀。
由於C區屬開放性質, 任何時間均可, 我地清晨5點出發, 遊完A區,
返民宿食早餐, 沖個涼, 休息下, 換埋衫褲先再出動, 玩波浪谷真係可以好hea .
以下係C區上半部嘅丹霞地貌

上面嘅草地, 經年月的風化同雨水沖刷, 若干年後就會露出同旁邊一樣嘅地貌,
所以話厘度年輕, 會繼續生長囉!

厘D斜坡為方便遊人進入, 地上挖洞, 所以鎮政府要設法喺保護同開放之間作出平衡。

在高處俯瞰水庫及停車場, 同時可欣賞到遠處多層裂谷。

因水蝕形成嘅水洞

兩組波紋嘅交集, 形成好靚嘅谷底。

流水般嘅波紋

祥雲般嘅亦有, D拍友有乜辦法唔磨爛蓆吖!

慘不忍睹

以後規劃為受管理景點, 可能就唔可以多角度欣賞啦! 真係有利亦有弊。

我喺度跣左一段, 好彩得兩位美女相扶, 多謝哂! 相機再添傷痕。

走到水庫旁, 又另有美態。

喺景區內設有蒙古包型民宿, 據講不大受遊客歡迎。

  

遊波浪谷後感:
~ 波浪谷(正名龍州丹霞)範圍很大, 因近年才為人認識, 故保存較完好,
俯拾皆是景, 看多了, 就變得大同小異, 對拍友來說, 卻有取之不盡的題材,
因此, 遊玩波浪谷由一天至數天皆宜。
~ 個人所到(五號無緣欣賞, 四號不知所指), 火焰丹霞及小波浪谷(B區)雖小,
但集中, 以紋理及色澤取勝, 惜火焰丹霞破壞較嚴重, 是旅團必到之處。
~ A區宏大而開闊, 集平面、峽谷與水景於一體(首日遊蕩的水庫亦屬A區),
且有完善棧道, 若整個景區開放, 是必遊之選, 如今早晚還是可進的(請閱內文)。
~ C區較近山水景觀, 可坐快艇遊覧, 目前屬開放狀態。
~ 另有由老板導遊的不知名地區, 所見地表, 帶有金屬閃爍的微粒, 有別於其他景區。
~ 至於五號景區, 我到之日還能進, 未料翌日即不能進, 據聞各區各自為政, 時有變化。
四號景區網上提及很多, 但始終不知其所指。
.
.
溫馨提示:
~ 注意天氣
我到步前兩天, 波浪谷正颳起八級風, 我問民宿少東這裏常刮風嗎?
他答的幽默: 不常, 每年只刮兩次, 每次100日; 呵呵! 也就是到此前, 要留意天氣囉! 免得花錢白跑。 我在雨岔排隊時, 與人閒聊, 他們就剛從波浪谷出來 (該正是早兩天),他們說: 『風大得連站都不穩, 眼睛睜不開, 耳鼻口都是沙, 連沙帶風打到皮膚都痛, 根本沒法玩, 就別說參觀了! 計劃是住兩晚, 沒法, 過了夜就走。』
~ 景區一般沒廁所, 出發前需準備好。
~ 若準備自駕外出一整天, 只能找民宿餐廳之類解決, 個人是以民宿為根據地,
分時段遊玩, 以解決三餐及上洗手間。

遊記到此, 已把延川乾坤灣、甘泉雨岔大峽谷及靖邊波浪谷
三景點介紹完畢, 希望可以幫到大家。

玩完陝北嘅乾坤灣、雨岔同波浪谷後我倆繼續玩了華山及西安,
因此, 把最近期經驗, 總結點小貼士供大家參考, 有興趣的歡迎到訪。

http://chuchu-hung.blogspot.com/2019/07/blog-post.html