前言
因為係首次踏足加國，反正黎到溫哥華囉！玩完洛磯山脈，咪再多留十一日，玩埋個大溫哥華囉！
上集遊記：自駕自煮窮遊洛磯山脈16天(Part 1)&(Part 2)
http://chuchu-hung.blogspot.com/2016/07/16part-1.html
http://chuchu-hung.blogspot.com/2016/07/16part-2.html
（唔係呀！三至五日，乜都玩哂啦！
）唉！豬熊二人一係唔玩，一玩就好濫，乜野都睇得一餐，且一把年紀，唔好太快啦！再快就。。。無得玩架啦！
因為係全公交遊，行程景點對公交遊嘅朋友係次要，首要係清楚如何利用公交到達目的地，所以簡略分享溫哥華嘅公交種類、乘坐方法、收費等 ; 眾所周知，有好多移居加國嘅港人、台灣和內地人，佢地當然好熟識當地啦！希望朋友們睇到豬豬喺度班門弄斧（尤其錯漏笑話），千萬多多包涵，如有錯漏，請各位師兄師姐幫忙更正。
因為大溫哥華嘅公交，喺2016年4月開始有幾多改動，豬熊親身試過先寫，
希望幫到首次想到溫哥華作公交行嘅朋友們啦！
溫哥華公交經驗分享 :
Waterfront Station係大溫哥華嘅公交樞紐，係遊客必到之處，搭乘 skytrain各線路，seabus都可以由此出發。
skytrain類似香港地鐵，唔同嘅係無服務台，唔見服務員，列車無司機，全電腦化，類似機場嘅無人駕駛列車 。
Waterfront Station內觀
厘個喺 china town嘅站，連名稱都有中文字。
站內只有自助售票機（我唔識英文喎
） , 唔使驚，我都係！加拿大售票機係我見過最完善嘅！
（你大鄉里啫
）佢有多種語言選擇，選中文咪得囉！
厘張係Compass Card，類似我地嘅八達通，可以透過售票機或指定地點購買，每張押金$6，買卡後再增值，我只增值$50，D9去退票，連卡費退回$12.4，去左咁多地方，交通費比香港要便宜。
厘張係Daypass，$9.75從00：01至當日00：00無限次任搭，包括所有隸屬Translink經營嘅 skytrain、seabus 、巴士＆電車，非常方便。
（我兩樣都唔用，俾錢得唔得呀！）得！無折扣，俾貴D都事少，最弊係巴士唔接受紙幣嘅，你需要大量硬幣呀！都係用以上兩種啦！
其實而家大溫交通費平左啦！由2016年4月開始，使用Compass Card乘大溫巴士係一票制，
只要在90分鐘內任意轉乘，每程收費$2.1（現金要$2.7），其餘只要涉及skytrain/seabus就分三區制 , 票價分別係$2.1、$3.15、$4.2（現金要$2.7、$4、$5.5） 。係啦！仲有係周六、日，公眾假期（梗係指加國啦）同埋每日18：30後，搭任何大眾公交，90分鐘內都係計 1 zone票價，所以安排行程時考慮埋交通費都可以慳錢架！
(點分區、Compass Card喺邊度買、可唔可以用黎買Daypass......?)
自由行當然要爬文啦！喺度再寫，可能要寫兩頁都未完呀！詳情請大家入去睇啦！
http://www.translink.ca/
買左飛，可以去搭巴士啦！
溫哥華嘅巴士站好多型式，
唔好想像好似香港巴士站咁提供詳細資料，係無嘅！
一般係厘種，有總站名、站編號。
較詳細嘅係厘種，有總站名、站編號，仲有到站時間。
站柱上嘅圓筒可以轉動，上面列明到站時間，經驗所得，非旺區到站時間有80％準。
厘種有 T 字嘅係轉車站，有較多巴士停靠供轉乘。
厘D最簡單，得個站編號，如果唔熟識，根本唔知身在何方，尤其路旁多樹或店舖，厘種無蓋巴士站好易睇漏眼。
巴士站同香港一樣，有蓋及無蓋都有。
以下係電車及巴士嘅外觀
上巴士啦！通常都有位坐，溫哥華市區巴士較完善，有廣播同走馬燈，可以預知落車站，車頭上車，車中間落車（同香港一樣），落車門扶手有拍卡機，因為已改為一票制，所以只要上車拍卡就得啦！（轉車點呀）無論轉幾多次車，都係上車照拍卡，落車無需拍卡，但唔會扣錢。
（落車要打鐘呀 ?）對！除左扶手柱有鐘（同香港一樣），
車身四周有條黃色繩，只要拉一下就打左鐘。
（做乜司機唔開門嘅）係呀！司機只負責開車，唔開門架！落車開門，
請自己動手按一下車門中嘅門邊，門會自動打開啦！
最後分享下佢地搭巴士嘅文化，乘客與司機好互動，通常乘客上車會打個招呼，落車記得講聲Thank you 呀！
跟住係sea bus，好簡單，只有一條線，來往北溫哥華與溫哥華之間，
兩個碼頭分別係Waterfront Station 同 Lonsdale Quay Terminal。
船身有多個出入口，似地鐵車門。
除左大眾公交，仲有的士。
市區自駕，泊車當然要俾錢啦！
厘D係旅遊觀光巴士，持有效票可以隨意在指定地點上落。
厘D咁Cute嘅係水上的士，比起喺陸上兜路當然快D，票價就梗要多D啦！
厘種最尊貴，水上飛機。
維多利亞公交經驗分享 :
我地此行亦有到維多利亞，厘個係溫哥華到維多利亞嘅公交碼頭Tsawwassen，當然你都可以坐水上飛機去啦！
溫哥華嘅Compass Card喺維多利亞係唔通用嘅！厘張係維多利亞嘅Daypass ＄5，上車只要出示車票即可，投幣的話，巴士兩小時內可任意轉乘 , 每程收費＄2.5，要轉乘記住問司機攞張Transit ticket，無就要再俾過錢架啦！ 出發前爬文，都話喺船上紀念品商店度買定Daypass，但4月開始上巴士買就得啦！可使用紙幣，不過司機唔負責找續嘅！
詳情請入去官網睇啦！http://bctransit.com/victoria/home
維多利亞嘅巴士，大致同溫哥華差不多，不過無廣播，又無走馬燈（咁點落車呀），哈哈！咁唯有用電子地圖配合GPS，外加醒醒定定囉！必要時請司機提你落車都得，落車都係按一下車門就自動打開，記住講聲Thank you喎！
（我去景點，搭咩車？喺邊度搭呀？）
對啊！厘個先係重點，要旅途順暢，唔講都知要交通順暢啦！
溫哥華公交即時資訊：
在加拿大搭乘公交，必需懂得使用網上即時資訊，溫哥華公交由TransLink經營，出發前只要上官網，使用佢嘅 tripplanner，輸入起點同目的地 ( 可輸入地址、巴士站編號、巴士站名 )，佢會出哂所有可使用嘅公交、轉乘方法、所需時間、現金/Compass Card嘅車費等，非常方便準確。
http://tripplanning.translink.ca/(不適用於維多利亞)
維多利亞公交即時資訊：
維多利亞公交由BC Transit經營，所以車票同官網都獨立運作，使用方法與TransLink大致相同，
不過厘個官網時常無反應啫(改用google亦可)！好在對遊客而言，維多利亞公交路線較簡單。
http://bctransit.com/victoria/home (不適用於溫哥華)
以上嘅公交資訊當然唔算詳盡，但希望仍能幫到首次去溫哥華作公交行嘅朋友啦！
全公交旅遊，花在交通嘅時間當然比自駕多好多，腳程亦較自駕多，所需體力自然多D啦！
有幸厘方面我倆仍可應付。
但喺城鎮，好在落左車就唔使理，喜歡遊幾耐都得，唔使心念咪錶過鐘，
又唔使回頭攞車，各有所長啦！
除非採取遊車河速遊方式，否則用Compass Card 點都比Daypass抵，以下行程，
我倆由首日至D9都係用Compass Card，到D10先轉用Daypass，因為退左票嘛！
要隨時得到公交資訊，保持行動網絡暢通，對自由行者好重要，
我喺HK 3Shop網購左張$280嘅歐洲卡，無限上網，喺大溫無試過斷線，
比起本地Fido（我都有買）抵用得多。
正式出發前，掂都交代下行程啦！(藍色係住宿)
D1 Queen Elizabeth Park > Spygass Ferry Dock > Super8
D2 Burnaby Village Museum > Deer Lake >
Burnaby Lake> Burnaby Mountain > Super8
D3 Richmond > Gulf of Georgia Cannery > Garry Point Park
Steveston Museum >Fisherman’s Wharf > Super8
D4 Library Square Public House > BC Place >
Charleson Park > Granville Island > Super8
D5 Super8 >Downtown > Gastown > Canada Place >
Roedde House Museum >UBC > Buget Inn
D6 Buget Inn > Tsawwassen > Victoria > Butchart Gardens >
Ocean Island Hotel
D7 Craigdarroch Castle > Government House > Beacon Hill Park >
Finlayson Point > Mile zero Monument > Thunderbird Park >
Helmacken House > The Breakwater > Fisherman's Wharf > Inner-Harber Ocean Island Hotel
D8 Victoria > Vancouver > Chinatown >Buget Inn
D9 Seabus >Museum Of Vancouvour > Capilano Suspension Bridge Park
Buget Inn
D10 Lynn Canyon Park > White Rock > Super8
D11 Vancouver > Hong Kong
出發啦！
11/6 D1
Queen Elizabeth Park > Spygass Ferry Dock > Super8
因為玩左14日，日日湖光山色，體力花唔少，今早俾個藉口我倆，
乘機訓晏D，因為要送小鄧同輝哥車嘛！
心諗，唔通我倆真富貴（貴人呀），落雨添！當然照出發啦！
是日路線圖：
先去就近嘅 Queen Elizabeth Park ，希望去到無雨落啦！事隔咁耐，千祈咪問我當日搭咩車喎！
因為就算你前一晚上TransLink 嘅 trippanner 睇定巴士都無用，D車喺不同時間可能停嘅站都不同（有D站唔停），轉車方式又有變，所以喺出發前上網預計自己幾點到車站，系統會幫你計算最快最方便嘅轉乘方法、各項轉乘收費，連預計到達目的地嘅時間都俾埋你，係咪好正呢！好野唔怕長氣，上多次條link啦！
http://tripplanning.translink.ca/
遊覽大溫哥華，唔好用香港搭巴士嘅概念，想一程到達，轉車幾乎係必需嘅！
咦！咁多雕塑，睇真原來全部係鷹。
厘座有D埃及feel
園內餐廳
導覽圖
其實公園唔算吸引，尤其陰天（咁做乜黎喎），因為公園位於溫哥華市中心，又係高位，可以俯瞰整個溫市（可惜遇上天色欠佳呢），咪係囉！
指示各方向嘅景點，D山海拔係計英呎架！
喂！兄台，咪阻住影相啦！
厘組銅像共有四座，除左攝影師外，其餘係二女一夫關係，（邊個係太太）梗係企得疏D果位啦！
俾張影後你睇啦！明未？
無乜陽光，俯瞰景都無心機影，周圍行下，厘度都有厘壇喎！
厘個係溫室（付費），入去睇下情況先。
入大堂可以睇到裏面，唔大，都係走LU！
四周賞下花
因為附近係住宅區，我倆喜歡安步當車
窺探下附近民居囉！
香港人都好想有咁嘅居住環境呀！（有人有架！你無之麻！）
咁樣嘅汽車，香港已經好少見囉！
行下行下，去到 Spyglass Ferry Dock ，喺加國，一見厘D椅就知係賞景點啦！留心睇下，D椅腳全部用鋼索連鎖住架！可能怕好似香港D渠蓋咁喎！
遠D仲有一排椅
地上塗鴉幾靚，連D邊都畫埋。
厘個碼頭好有生氣，多種水上活動同交通不停咁來來往往。
尤其厘種水上的士，外形好cute，顏色鮮艷。
對岸嘅自然科學館
好可愛嘅愛國裝扮，其實佢地戴左同一幅眼鏡，都係國旗圖案。
跟住行去搭Skytrain到Marine Drive Station ，喺車站上蓋有大統華超市，可以買埋晚餐。
落去轉車站搭巴士返酒店
返到酒店樓下，見D雲燒得幾靚，厘個時候先去河邊都黎唔切啦！求祈影張。
我地繼續住多四日Super8，不過由雙床房轉為大床房，慳好多嘛！
好好彩，俾左間露台房我地，正！（相片唔係當日影嘅，所以天晴）
D1 完
12/6 D2
Burnby Village Museum >Deer Lake > Burnaby Lake>
Burnby Mountain > Super8
今日遊本拿比嘅博物館&兩湖一山，因為諗住環下湖，需要D時間，所以早些少出發。
是日路線：
落車後按電子地圖指示行去博物館，途經清真寺。
Hart House係間餐廳，環境一流 , 不過太早，未開。。
博物館都未開，先去遊Deer Lake。
嘩！佈置得咁浪漫，仲唔係婚禮場地。
沿棧道繞湖，陽光唔太好，Deer Lake比想像中無咁靚 , 就當晨運，非常舒服。（梗係啦！睇完十幾日湖光山色）
厘度係加拿大雁嘅天堂
因為本拿比嘅兩湖位於市中心區，所以湖區遮唔住大廈，係本市居民假日消閒熱點。
藝術中心
遊完湖，時間差不多，博物館已經開放。
睇外圍，以為係封閉式嘅博物館，其實裏面係露天嘅民族生活村，保養得好好，最好係免費嘛！
厘座屋外晾嘅係民族手工藝，進大廳有幾位女仕正埋首工藝，因為個廳唔大，唔想太擾人，所以無影，只打個招呼就算。
房屋小巧可愛（咁仲小巧，大過你屋企好多啦
）
屋外嘅農具
厘所係1922年嘅學校，裏面有位教師（講解員呀
）
厘間服裝店我最鍾意，除左店面令人感覺舒適，店後嘅小廚同休息間先夠吸引。
打鐵工藝店
厘座浴室又係一絕，細細地，浸浴、乾蒸都有，好正！如果我有間就好囉！
厘間似客飯廳兼廚房，說明指引要睇厘盞燈，的確古雅。
條村雖小，五臟俱全，總之村內影院、郵局、銀行。。。一應俱全，上得太多相，怕悶親大家。
厘間銀行嘅陳設，有D兒時都見過，好親切。
太年青嘅可能唔知厘座係乜，一格格係表格分類，提款、存款、轉賬。。。總之做乜都要填啦！
以下嘅都係昔日店舖，有D門口會有指示導覽。
蒸汽火車頭
教堂
條村嘅外觀都好靚，曾經見過一遊記，話厘度好商業化，所以來前諗住行個圈就走，點知無乜商業味道喎（可能淡季呢）！參觀左兩個鐘。
你估厘座屋又係咩吖？
1223年嘅火車，專誠建間屋保護，諗都知係正野啦！
仲可以上去任坐添！車廂內嘅頂燈、藤製座位、行理架等，都配合得好典雅。
旁邊仲保留左火車站
離開Burnaby Village Museum，原本計劃搭巴士去Burnaby Lake嘅，
點知我嘅唯一團友話我地環湖喎！行去唔係好遠之麻（睇地圖係囉），行就行啦！
（無小路去架）搵左條單車路，沿單車路而行，
見到DD啦！yeah！
吓！又係樹林路？
行行重行行，終於有D野睇下，似番個湖啦！
厘度係水鳥天堂
一路行，雖然有湖區地圖，但奇怪每處都被人破壞，整走左＜you are here＞嘅Mark。
我倆講笑話：梗係D人行到㷫都見唔到湖囉！
行左一小時，一路上喺度呻笨 , 終於見到個瞭望台。
唔怪之得啦！湖區雖然大，但保育成沼澤區，非常適合鳥類棲息。
咦！前面難得有個親水觀景台喎！去囉！
望番個瞭望台，聳立喺叢林中。
咁睇又值得黎喎！（應該搭車）好有生氣嘅鳥類保育區。
細心觀察，沼澤中有好多雛鳥喺鳥窩內。
厘隻唔知咩鳥，唔好睇佢黑麻麻，飛起黎翼下羽毛紅色，好靚，可惜部機打唔到。
厘隻鴨毛色豐富，但雙眼紅色，有D恐怖。
有遊客餵食，D鴨爭相潛水揾食。
睇下張地圖，巴士站就中間部份，落車沿路行落黎就係觀景棧道。
行左個幾鐘，水都飲哂，見有飲水機，入番樽先！咦！厘度嘅飲水機照顧埋狗呀！（小朋友都無咁低架）見唔見後面地下仲有個呀！
之前講過，喺度作公交遊，轉車係必然嘅！搭車去到轉乘站，再搭車上山頂，再行卅分鐘就到啦！
環境好正嘅休憩公園
仲有個玫瑰園
厘度係本拿比嘅高位，可俯覽北面嘅Boulder、Hamber & Grey三個Island。
厘個草坡仲立有印第安原住民嘅圖騰，係日本雕刻家為紀念Burnaby
與日本Kushiro締結成姊妹而立嘅！
喺度仲可以眺望本拿比市
今日夠盡興啦！仲行到夠本，
返歸厘程係 巴士~skytrain～巴士，去到 22ND STREET STATION，一出月台，景觀唔錯喎！梗係吸引遊客駐足影相，所以用密密嘅鐵網包圍，好難先影到張咁嘅！疊堆心水返歸啦！
D2 完
13/6 D3
Richmond> Gulf of Georgia Cannery > GarryPoint ParkStevestonMuseum >
Fisherman’s Wharf > Super8
今日主要玩Richmond嘅西南海岸一帶，雖然列治文係最早發展唐人街嘅地方，因Downtown嘅較具規模，於是放棄遊玩啦！
是日路線：
由速8去列治文其實好方便，落車之後，好容易就搵到Gulf of Georgia Cannery，前面有個廣場。
入口係紀念品商店
本來要$10.2/人，但因四人組之前買左國家森林公園嘅Discovery pass，
可以免費參觀，不過唔免票，出示張Pass登記攞票進內。
廠內當然停產左好耐啦（1979）！1994年對外開放成博物館，當年嘅生產線都仲保留住。
厘個係模擬捕魚船倉
無心理準備，一行入去見咁嘅畫面，真係嚇左一跳！（做得幾真嘛）
船長房間
陸續都見有老師帶學生入黎參觀，好在我地早到啫！走LU！
跟住沿海邊步行到Garry Point Park
附近景點地圖
好靚嘅海灣，喺度釣唔到魚都欣賞到美景吖！
厘座紀念碑，中間豎立嘅似係修補魚網用嘅梭。
環境咁正，我地都坐下，享受厘刻嘅悠閒。
厘個公園係旅加日人所建，充滿東洋情調。
坐左一輪，發覺如果天朗氣清，厘度係個觀星影星嘅好地方，360度環迴，整個天空全入眼簾。
另一魚罐頭廠遺址
公園厘段路兩旁，全部種植櫻花，亦係旅加日人所種，到春天，整條路櫻花閉天，應該壯觀。
之後，我地進入內街 .
到Steveston Museum （免費）
厘度前身係銀行，後來作為醫院，跟住改為郵局兼博物館，細細地，打理得好整潔，保存往昔漁村風貌，又為醫院作昔日見證，早期唔少日人旅居列治文，當中都有佢地嘅陳列部份。
到列治文當然唔少得漁人碼頭啦！雖然現時係淡季，又係淡市時間，
街上無乜人，不過食肆林立，節假日應該好旺。
厘度亦係觀鯨出發點之一
四圍亂逛
嘩！好Cute呀！
睇埋車頭仲得意，成個笑臉。
沿港灣好多新樓吉屋
我地經民居街道去巴士站，好舒適開揚嘅居住環境。
你啱唔啱呀？有唔少樓盤喎！
途經厘間圖書館
我地要搭巴士再轉Skytrain
剛好坐車頭，厘度應該係列治文嘅唐人街啦卦！
八百伴都有（厘度有唔少日本同韓國人架）
橫掂都上左Skytrain，索性直搭到Waterfront Station，去加拿大廣場行下囉！
我地行上waterfront Station旁嘅平台休息，睇下景，嘆個自備下午茶。
旅遊巴士
厘架免費shuttle去Capilano Suspension Bridge Park嘅！
我地諗住要有門票先坐得，於是喺info centre預購門票先（詳情行程當日再介紹），原來去程唔理嘅！回程先睇飛。（死蠢，俾我做生意都會咁啦
）
info後面嘅係Flyover嘅售票處
黎到郵輪碼頭，無得坐郵輪，都睇下嘛！去阿拉斯加就喺度上船架！（下次先啦）
厘艘船頭設計棧鬼呀！（剪咪剪，我唐老鴨識游水架）
喂！乜咁快就開走啦！（厘個碼頭真係好繁忙喎）
水上飛機不停上上落落，睇得過癮。
剛開左艘郵輪，又有隻泊埋黎啦！
觀鯨船又來來往往
溫哥華會議中心，同位伯伯閒聊，佢話新移民唱國歌就喺厘度囉喎！
我叫佢做＜水滴定海神針＞，好鬼搶眼。
據講對岸係全加最貴嘅樓
剛好遇上世界保險業會議，人山人海，佔據整個廣場，好唔容易先少D人。
厘間公司正影緊團體相
會議中心旁邊嘅奧運火炬廣場，2010年冬奧運火炬就係厘支啦！
廣場末端有經常喺加國海域出沒嘅虎鯨（積木砌嘅），所以佢地嘅觀鯨活動非常發達。
水上飛機停機坪
加拿大廣場
臨走前影張全景先
今日玩夠，搭車返酒店啦！( Waterfront Station 大堂 )
D3 完
14/6 D4
Library Square Public House > Yaletown>
BC Place >Granville Island > Super8
厘日仲hea，因為我個團友喜歡行下睇下，主要係去Granville Island，除左由酒店搭車到圖書館外，景點都唔太遠，況且，Yaletown步行先有意思嘅！
今日路線：
做功課時，我一見厘間圖書館嘅建築就好鍾意，當然要黎參觀下啦！
圖書館內，因為時間尚早，店舖未開。
不過已經有唔少人享受緊書卷味
要行遠D先可以欣賞整座建築，靈感唔知係咪來自古代卷軸呢？
我地沿鬧市而行，厘座係Fairmont Hotel 。
溫哥華藝術館
屋頂上嘅係船刻定天線，還是係船刻形天線？
泊喺旁邊架車好卡通
跟住踱去耶魯鎮，主要街道唔多 , 我地黎到已經係午飯時候，食肆特別熱鬧，有唔少中菜館。
厘個雪糕熱狗，唔係！冷狗至啱！
卑斯省體育館，厘度曾經舉辦過世博同冬奧，初建時（1983年）似菠蘿包，
有個充氣頂，後來爛左，之後改建成咁樣。（由菠蘿包變皇冠）
2010年殘奧會亦在此舉行
厘個位睇自然科學館清楚D
跟住去Granville Island，由厘度去 , 坐Aquabus最方便，但要$5.5，
如果行返轉頭坐巴士，連埋等車時間，同行去差不多，團友提出沿Island Park Walk行，應該幾舒服，二話不說，行啦！ 的確唔錯，除左港灣碼頭，仲經過環境優美嘅民居同幾個公園。
剛建BC Place時，應該無大廈阻擋。
部份公園
公園內嘅加拿大鵝可以隨意遊蕩，似乎無任何威脅，人鵝唔會爭路（梗係啦！D人都讓鵝）。
港灣內有幾間雅緻嘅餐廳
水上的士停泊碼頭
厘種可以俾單車上船嘅
講開單車，加國好鼓勵市民用單車，可以帶單車搭巴士或skytrain（巴士都得？
），係呀！每架巴士只要車頭前有單車架提供而又有吉位（可放兩架單車，不另收費），乘客就可以帶單車搭車啦！有次見對情侶帶單車搭巴士，放左幾次都係阻礙司機視線，司機不但無發脾四，仲落車幫佢地搞添！真係抵讚 !（網上圖片）
厘幾座水上房屋，似民宿多D喎！都幾特色，但唔夠維多利亞嘅靚。
黎Granville Island嘅遊客，都唔會錯過vancouver biennale open air museum 嘅作品，佢係溫哥華 Biennale 藝術雙年展嘅巴西藝術家嘅作品，厘六個水泥桶變身成有趣嘅人型立像，之前English Bay嘅大笑銅像（上集遊記中），都係厘個藝術展嘅展品之一。
連D車都好可愛
工作地盤當然唔可以內進啦！
其實整個島都好商業化，遊客必到嘅
，除上述藝術品，主要係島上嘅 Public Market，話明係市場，當然商業化啦！
島上Aquabus嘅碼頭
有遊客掉個三文魚頭，兩隻海鷗搶食。
坦白講，唔黎Granville Island唔心息，黎左又好一般啫！
厘間係兒童屋，鬼馬在有個小朋友專用門口。
連洗手盆都照顧到，唔使問，洗手間當然一樣啦！（我無入去呀）
沿住Granville Brigde過對面搭車囉！
咦！有快艇租，唔貴，仲唔使執照？安唔安全架？
我地搭50號車
返酒店休息，食完晚餐再步往酒店附近嘅Fraser River欣賞日落，原來橋上睇唔到日落，但有唔錯嘅火燒雲。左邊舊雲似唔似海上航行嘅大船呀？
河上有好多等待運送嘅木材
D4 完
15/6 D5
Super8>Gastown >RoeddeHouse Museum >
Museumof Anthropology> Buget Inn
厘日嘅主菜係人類學博物館，點知人老記性差，又貪著數，擺左烏龍，望門興嘆添！
厘樣下面會交代架啦！幸好都有唔錯嘅收獲。
是日路線：
本來Super8可以住足全程嘅（除左維多利亞兩晚），只因好奇，出發前訂左
Downtown邊皮嘅酒店，行前睇評論，話周圍多流浪漢，同我團友商量，
佢話唔怕喎！見識下，點知真係＜領野＞，我無走遍全香港（都話你大鄉里啦
），但厘次係我見過最多流浪漢嘅地區啦(主要係癮君子)！我唔敢影相呀！不過話雖如此，都長見識架！
入正題啦！早上退房，搬到Gastown東邊嘅Budget Inn Patricia Hotel，話係三星，見窮遊難得嘅房價，咪試下囉！早上去到，竟然俾房喎！搞掂就出去LU！
其實酒店位置好OK嘅！我地睇情況，避開行門前嘅 E Hastings Street，
改行後面嘅 E Cordova，好好多！斜對面係 St. James Anglican Church
行前D係溫哥華警察博物館
由酒店離Gastown只有十分鐘腳程（所以咪訂左厘間酒店囉）。
Hotel Europe
喂！先生，你做乜企咁高呀！（我德高望重囉）
話說百年前 , Gastown無乜人，厘位外號Gassy Jack帶左一頓威士忌黎厘度，宣稱如果幫佢建酒吧，就可以有飲唔完嘅酒，佢嘅酒吧居然喺24小時內就完工，仲帶旺條街陸續有超過150間酒吧，大家為左紀念佢，就叫厘度為Gastown，且保持著百多年街景不變。
厘間皮靴店好有西部牛仔風味呢！
繼續前行參觀蒸汽鐘
剛好係時候噴蒸汽同響音樂，其實得十零秒左右，影慢D會走雞，要再等半個鐘啦！
反正近加拿大廣場，特登沿海邊到西端區，順便睇飛機嘛！
厘座係海港中心嘅觀光塔，門票可以當天兩次入場，方便遊客影日夜景嘛！
D水上飛機好多，來往頻密，多嘅時候似海面上嘅大海鷗。
今日對面山有雲霧低降
沿海岸而行
見有高位，梗係兜上去啦！呢！遠望果個叫死人島Deadman's Island。（唓！搞乜改個咁嘅名呀！）以前係墳場，而家係海軍基地。
前行去附近嘅West End （西端區）睇樓， Roedde House Museum （1893年）
Barcaly Manor ，做左中心，唔開放嘅！
再隔離厘間而家係生命之友協會(1895年)，厘條街有超過十間厘類建築，有興趣不妨逛下。
厘間係溫哥華現存最古老嘅消防局（1908年）
睇完樓，行到攰，坐車去哥倫比亞大學（UBC），目的係大獲好評嘅Museum of Anthropology（人類學博物館），講起厘度真失敗，爬文時知道逢星期二有夜場，17:00-21:00 , $9就得，窮遊梗揀啦！（無mark低果度死呢 唉！自由行成日改行程架啦！去到先知～衰左！！！（都話你懵豬啦）
下次會醒少少架啦！大家將就D，睇住些少啦！ 黎到UBC，離遠見豎左個圖騰。
加國特有地窖設計,可貯藏酒及穀類
亞洲學術大樓
傳統文化研討會紀念圖騰
博物館入口
嘩！我唔識車，係咪好古懂呀？就算唔係，我都俾個設計獎佢啦！
車尾成條沙魚咁，唔得，要四面都同大家分享。
擋風玻璃成對巨型眼鏡咁！
入到大堂，喂！乜關門咁款嘅！實Q話TUE先有夜場，今日Wed，衰左！
下星期二已經返港LU！算啦！厘D咪緣份囉！好在都有DD野睇下。（大家咪學懵豬呀）博物館後園豎左好多印第安原住民嘅圖騰
旁邊嘅現代雕塑
以下係館內有關人類發展及文化習俗嘅陳列，佢地好大方，全用落地玻璃，雖然反光，將就睇啦！場內有人架，不過借出做運動場地咋！雖然入唔到場，但隨緣而觀，好開心，唔算白行。
D5 完
16/5 D6
Buget Inn > Tsawwassen Ferry Terminal> Victoria >
Butchart Gardens > Inner Habour > Ocean Island Inn
今日行程簡單，只玩維多利亞嘅布查花園 ＆ 內港，原定跟團算啦！點知除布查花園，幾乎係車遊，兩天團都唔合心水，況且跟團集合時間，仲早過自己去，都係靠自己啦！
是日路線：
由溫哥華去維多利亞一係搭船，一係坐水上飛機，我倆當然係坐船啦！晨早check out兼存放大行理，只帶兩日用品輕裝到Tsawwassen Ferry Terminal，除左指定日期有08：00班次，啱我地嘅只有09：00果班船。
Tsawwassen Ferry Terminal有幾班唔同目的地嘅船，去維多利亞係其中之一。
售票大堂
人多時唔想排隊，亦可經自助售票機購票。
早左大半個鐘黎到，先買左飛，然後搵個地方，坐低慢慢食早餐。
電樓梯旁大大隻字寫明Swartz Bay／Victoria喺樓上5號Berth
按指示到候船室
可以舒服食早餐
上船LU！隨便坐，航程約兩小時。
出發前爬文，話喺厘間紀念品商店買Day Pass嘅！
而家上巴士買啦 ! 咁鬼多人問，好煩呀！自己睇通告啦！
船上設備齊全，有玩有食嘅！
更多人上Deck面睇風景，曬太陽。
唉！雲層越黎越多，希望唔好落雨啦！
睇到碼頭啦！
以下幾張相係回程影，所以天色唔同左（因為抵目的地趕上車嘛）；Victoria 嘅 Swartz Bay Ferry Terminal。
落船跟住人潮，一出碼頭，就見厘個巴士站牌。
另一邊的士排哂隊等客
上車買DayPass，厘度接受紙幣，我地俾十蚊紙幣入機，司機就meet兩張飛俾我地。
停喺最遠深色果架就係直達Butchart Gardens嘅81號，因為爬文話未必趕到，我地到達時未見架車（以為開左），上左架72諗住轉車去啦！
點知見前面有架81號剛到，仲唔拿拿淋落車跑去咩！哈！厘刻感到買DayPass真爽！
原來81號會配合船程到碼頭，等落哂船先開嘅（當然唔好太慢啦）！
如果首個景點係布查，你可以疊埋心水坐81號。
到總站係門口售票處，當時正落緊雨，園方提供雨傘俾遊客使用，唔怕無遮啦！
入去第一件事，梗係到Information Center 攞張地圖＆放低背囊啦！（免費寄存行理）
嘩！真係周到，足有廿種語言嘅地圖，梗有一張啱你卦！（超讚）
咦！好多人喺度等咩呢？
原來係餐廳
入去八下囉！門口已顯出花嘅魅力。
真係坐無虛席喎！見有D團喺度食。（要訂位架）
如果真係好想試下厘間餐廳，可以預訂High tea 吖！
進入園內，滿眼都係花，厘個棚底搞到遊客滿頭花碌碌，
咁鬼靚，係咁鱷高頭欣賞，真係頸都攰埋。
厘度唔止花靚，樹同草都一樣可觀。
楓樹嘅末端開始紅啦！
連垃圾桶都裝上頭花
怪不之咁多人鍾情路邊花啦！你睇係咪好迷人呢？
厘個玫瑰園，睇到眼花瞭亂。
園區分好幾個主題花園
布查花園夏天仲有夜場，周末仲有煙花睇架！當然門票又貴D啦！
再行下，仲有木馬仔喎！
厘度嘅奇花異卉真係多到睇唔哂！
厘三條鱘魚雕塑係意大利名雕塑家嘅作品
喺園區嘅北端，有個小碼頭。
喺樹叢望出去都幾得意
厘個意大利花園，Cafe環境好好，都幾多人幫襯。
厘幅外牆上，行近睇清楚，滿佈花卉。
厘D路邊花雖然好靚，但都係時候攞番個背包走啦！
我地住背包客棧，係座古老建築，喺Downtown，位置非常好 ,
有大廚房，好適合我倆。（忘記影，唯有用網照啦）
其實我地間房細細地，但有餐枱椅、雪櫃，有自備旅行爐具的話，
煮食完全無問題 , 不過係公用洗手間啫。
有咁正嘅廚房，無理由唔用啫！所以早晚餐都喺度解決。
有個公用餐廳，都有好多張枱，做生意之餘，住客都可使用。
仲有個酒吧，夜晚非常熱鬧，現場所見，人流不算複雜。
厘幅咁有意思嘅外場，就係Ocean Island Inn。
搞掂哂就出發到內港，本來行去都係十零分鐘，見有巴士到，當然上車啦！反正有DayPass囉！
厘座係所有旅團必到嘅Fairmont Empress Hotel
附近廣場牆上掛左1994年，英聯邦運動會參與國嘅國徽。
維多利亞內港，厘度嘅夜景好靚，如果一天遊就睇唔到啦！（我地聽晚先再黎）
厘度一樣泊左水上飛機，不過無加拿大廣場咁多啫！
酒店門前有旅遊觀光巴士
突然見架車好有趣，影得切前面，都睇唔到車身寫咩添！
行過斜對面係議會大廈，好莊嚴宏偉，左側有座紀念碑。
右側有座維多利亞女皇像，仲有，你睇D馬車伕好專業，個個著哂踢死兔戴埋高帽架！
再右D係印第安族圖騰
聯合廣場上加拿大10省2地嘅圖騰徽章
維多利亞嘅旅遊業好蓬勃，觀光交通多元，前面嘅係單車，後面嘅係人力車，不過車伕好專業，做埋導遊唔出奇，但好多時見佢倒後行，要面向遊客，又要顧及安全，都好辛苦。
南瓜車？
議會大廈後面嘅百周年紀念噴泉
大廈後面及內園
厘面係卑斯省嘅省旗
廣場上嘅紀念碑
對面嘅政府建築物（統計處）
D6 完
17/6 D7
Craigdarroch Castle > Government House > Beacon Hill Park >
Finlayson Point > Mile zero Monument > Thunderbird Park >
Helmacken House > The Breakwater > Fisherman's Wharf >
Inner-Harber >Ocean Island Inn
原定計劃係三日兩夜喺維多利亞嘅，但諗住提早返溫哥華，所以今日行程算最長啦！由早到晚上十點幾，內港夜景一定唔可以錯過嘛！
是日路線：
我地住嘅背包客棧距市政廳一街之隔
今日都係上車買張Daypass，方便好多，$5抵呀！維多利亞嘅巴士站好簡單，大多得個站編號。（咁點搵呀）唯有配合軟件囉！例如google／官網地圖，睇下個站喺邊啦！
厘度嘅巴士同溫哥華差不多，不過無廣播，無走馬燈，（幾時落車得架）又係用軟件，望住個手機地圖，到站就打鐘囉！所以喺維多利亞搭公交，一定要有離線地圖/行動網絡，再配合GPS呀！唔係就請司機幫忙，提你落車囉！
打鐘可以撳掣或拉條黃色繩，仲有係自助按門邊自動開門 , 記得對司機講聲＜thank you＞呀！
落車LU！（去邊呀）今朝去睇豪宅，超過120年歷史嘅Craigdarroch Castle，屋主人Robert曾經係卑斯省嘅首富。
到了！厘座就係魁達洛堡，整座古堡俾我感覺係實而不華，厘度先後做過醫院＆學院。入去之前，當然前前後後欣賞下先啦！前面有座圓柱塔形嘅眺望陽台。
地面層長廊
入門之後，滿眼都以上等木材做裝飾。
整座建築除左木石建材外，亦有彩色玻璃窗，同樣係材質手工上乘。
成張皇座咁喎！
整座堡共有39間客房，每間房佈置典雅而唔浮誇。
娛樂室已經較大，屬長形空間。
頂層對落有個圓形突出嘅陽台
厘度應該係接待廳卦！充滿英國氣息。
頂層圓形陽台，有開放式270度嘅觀景台，可以眺望維多利亞。
無論木材、玻璃、瓷磚等，都貫徹圓＜完＞美設計。
你睇度門，無論木材或原塊玻璃，都顯現出完美線條，關埋門之後，整個陽台呈正圓柱體，雖然唔係金碧輝煌，但手工就嘆為觀止。
行到頂層，我以為參觀完啦！原來每層仲有後半部份架！
厘個洗手間夠討人喜愛啦！
絕多房間唔算大，同樣係實而不華。
相對其他空間，厘個廳已經稍覺富麗啦！
下面第二套巨型刀叉，唔知係咪食全鹿/羊用嘅呢？
因為我見牆上有幅獵鹿雕塑嘛！
地下客廳又回覆一貫嘅木裝飾
出口係紀念品商店
參觀完魁達洛堡，向南行十分鐘左右，就到Government House。
佢嘅花園面積好大
厘座大宅曾經係總督府，副州長官邸，亦係招待英國皇室人員嘅行宮。
大堂有英女皇伊利沙伯二世及皇夫菲臘親皇掛像
車房兩邊係展品，中間果架睇車牌係目前嘅車輛。
左邊架陳列古老車，右邊嘅距離空間太窄，影唔到啦！
大宅嘅其中一面
遊下花園
咦！厘度都有鹿喎！有兩隻添！
見個玫瑰園有矮閘閂住，以為唔入得，原來為防野生動物進內啫！可以隨便參觀嘅！
走LU！準備去Beacon Hill Park。
Beacon Hill Park
厘個花灑會轉方向同噴水方式，D小朋友都唔知玩得幾開心。
跟住我地向海邊行去
越過一片草地
黎到Finlayson Point，除左欣賞風景，好彩的話仲可以睇到鯨魚添！可惜我地無此幸運呢！（做乜唔出海觀鯨啫）我怕暈船浪囉！
我地喺度休息兼食午餐，欣賞下海景，真係好正！
再向西行就係零起點，唔知幾時開始，全世界好多城市，都有公路零起點厘樣野。
搭車北上去番內港果區，繼續尋日未完嘅行程。
先係Thunderbird Park，厘度除左免費外，圖騰柱任睇任摸。
D圖騰有幾大？
最少三個人先抱得住
一般圖騰頂上絕多係鷹
中下層係人類、鳥獸等，同大自然動物嘅生活空間吻合。
人有三急添！唔怕，博物館、酒店實有洗手間，
橫掂入到Royal BC Museum 大堂，影得唔好嘥（無打算入場嘛）。
跟住去Helmacken House，嘻嘻！厘度免費（只開放4小時），
佢就喺博物館同雷鳥公園之間，由雷鳥公園行去，一分鐘就到。
厘位Helmacken醫生係維多利亞首位醫生，厘座古老大屋超過160年歷史，
裏面展品包括當時用過嘅醫療器材。
漢默肯嘅生活照及介紹
衣車
醫療器材
房屋及展品保存得好好
再搭車到The Breakwater，係條好長嘅防波堤，厘度亦有郵輪碼頭，
當然不及加拿大廣場咁繁忙啦！
假日好多人會坐滿堤邊嘅石級
整條堤呈弧形直伸海中
由防波堤回望岸上
盡頭有燈塔，亦係觀景台。
漫步堤壩，可欣賞四周風景，視野非常好。
甚至遠望雪峰，可惜今日被雲遮掩。
從洛磯遊到大溫，所見嘅海或湖邊，都有浮木積聚，可知加國林木業幾發達啦！
如果出海觀鯨，一定要到Fisherman's Wharf .
厘度好多商舖做海上旅遊活動生意
（你唔觀鯨,黎做乜）厘度大概有三條街，左右兩邊都係好特色嘅水上民宿，梗要黎啦！
當然唔會缺少Aquabus嘅碼頭啦！
咦！有好多隻海獅喎！加國嘅野生動物同人真係幾親近，
梗係D遊客經常餵食，D海獅當正厘度係地盤囉！
走LU！返去內港抖下，準備欣賞夜景。
內港夜晚比日間熱鬧，所以表演者亦多。
厘架又係受歡迎嘅旅遊馬車
議會大廈前厘棵巨大杉樹，每年聖誕，佢會化身為聖誕樹。
樹幹部份，有D較低嘅橫枝，自然地向地下生長，以作支撐。
尋日逆光，影唔到女皇像，今晚可以睇下維多利亞女皇像嘅真容。
海上天邊開始有紅光
四周建築物亦相繼開始著燈
The Empress Hotel開始展現佢嘅夜色
我企喺高處下望，咦！佢地做咩呢？原來女魔術師在表演，佢無忽略上面嘅遊客，竟然掟道具上黎，等橋上參觀者睇得投入D。
右邊高果座係遊客中心
內港停泊左好多船，當然包括觀鯨嘅艇啦！
行下影下，發覺連對面嘅議會大廈都著埋燈啦！
雖然已經九點，天色仲係好光。
下面一列白色帳篷嘅，係night market，當然要夜晚先開啦！
九點幾先開始開檔，有好多都未開添！
除左紀念品攤檔，亦有露天茶座同街頭表演樂隊，你睇對遊客幾投入，跳埋舞添！旁人睇得好陶醉，人人面帶笑容。
十點幾啦！似乎夜幕都唔落，仍有藍天襯托住浮華夜燈，仲有倒影加笑面，邊捨得返酒店呀！
點都要返去訓啦！聽朝坐九點船返溫哥華嘛！
無倒影嘅議會大樓當然無咁殺食啦！
D7 完
18/6 D8 Victoria > Vancouver > Chinatown >BugetInn
今日天陰有雨，好在上午都喺船上，返到溫哥華都快中午啦！天氣差，想行都無咁起勁，況且尋日喺維多利亞玩足十二個鐘，今日都係慳D使（我講體力呀），近近地行下唐人街算啦！
是日路線：
同來程差不多，去番搭船黎維多制亞個碼頭Swartz Bay Ferry Terminal.
我地搭09：00班船，一早走嘅人唔多，因為一天遊嘅人較多，主要集中喺傍晚船離開。
候船室及船票
返到溫市嘅Downtown已經係午後，我地仍會喺Budget Inn住多兩晚，
返去攞番大行理check in上房，再出去唐人街。
Chinatown嘅千禧紀念牌坊
厘座係森記大廈，前身係甜品店，已有百年歷史，係健力士紀錄中全世界最窄嘅大廈（唔知而家有無大廈挑戰成功呢？），底層只有1.5公尺寬（睇落唔似呀），你睇清楚D，側面深灰色果座呀！後面藍色果座唔係架！
海味舖、衣紙舖，十足十荃灣咁款。
唔知係咪落雨（我經過三次都係咁），其實唐人街比想像中整潔，
比Downtown更少流浪漢或癮君子，街道好乾淨。
部份街名鑲喺地下
中山公園睇落有D似荃灣德華公園，唔係好大。
好多本地團都係喺中華文化中心集合，包括去維市一兩天遊。
以下幾張相，係我地另一日早上經過唐人街影嘅，所以天色同時間唔一樣。
早上八點幾，街道非常靜。
中文報紙放喺出版社門口，內容當然唔係香港嘅明報＆星島啦！
紀念品商店廚窗內嘅車牌
黑膠唱片店，唔知係出租還是買賣呢？有無留意店舖玻璃牆內，仲安左防盜窗花呀！唐人街、甚至唐人街附近，八乘店舖都安有厘類窗花，即使診所亦如是。（自己諗諗咩環境啦）
經過International Village商場，入去八下囉！
裏面有Food Court、戲院，當然仲有好多其他店舖啦！因為距離住處十零分鐘，慢慢行返酒店。
D8 完
19/6 D9
Waterfront Station(Seabus) > Lonsdale Quay Market >
Museum of Vancouvour > Capilano Suspension Bridge Park >
Buget Inn
今日本來係精彩嘅一日，天氣預報話下午天晴，上午有雨，上午都係hea下先，去搭下seabus，網友話Vancouver Museum嘅俯瞰景好正，明知天氣唔好，都姑且去睇下啦！
下午去吊橋公園，諗住天晴，結果陰天，好過落雨啦！
是日路線：
一早落住微雨，黎左咁多日，都未搭過seabus，反正90分鐘內任搭公交，有時間梗試下啦！
Seabus只來往Waterfront Station同Lonsdale Quay 之間，我地當然到Waterfront Station過海啦！
船嘅班次唔算密，我地都花些少時間等待。
終於上船啦！
船身有幾個出入口，有D似地鐵嘅門。
船頭係大觀景玻璃窗（回程影嘅，所以望Waterfront）
厘個係Lonsdale Quay Seabus嘅碼頭
厘排應該係停泊船隻嘅倉庫
到左Lonsdale Quay
穿過碼頭廣場嘅街道到達廣場
廣場上有個登高遠望嘅觀景台，陽光普照的話，應該好正！
厘度有個碼頭市場，其實可算係商場，不過太早，未開！
算係見識過溫哥華嘅Seabus，又搭返轉頭到Waterfront 。
見網友話Vancouver Museum附近嘅俯瞰景好正，明知天氣唔好，都姑且去睇下啦！落車後先經過天文台
離遠就見Museum門前嘅標誌～巨蟹，厘間博物館評價馬馬，當然入。。。大堂算啦！
雲霧太大，無乜可觀性，走LU！
經過溫哥華音樂學院
Waterfront有免費Shuttle到Capilano Suspension Bridge Park（共有八個站），梗係坐免費車啦！
本以為上車要出示門票先得（早買定飛囉），原來隨便上車就得啦！園方搏遊客去到會買票入場嘛！
雖然係咁，你咪諗住免費坐去，唔啱玩就坐番免費車走喎！
所謂你精佢唔呆，無門票嘅，對唔住，請搭公車啦！入園當然要檢票啦！職員仲會喺你手背蓋印添！
咦！得六種語言嘅導覽圖，又話中文喺溫哥華佔重要地位嘅！對唔住，無中文喎！
先幫襯洗手間，睇地圖唔係周圍都有架！
各款土著圖騰，不過唔算大型。
厘座咁有東瀛味道嘅！
（排隊去邊呀？）過第一度吊橋，又係最長果條吊橋囉！據講，吊橋建成後，以94隻大象過橋作試驗，可以放心過啦！
（有幾高呀）自己睇介紹啦！
橋頭有職員透過電視監察，若有遊客唔守規矩，喺橋上跑跳，佢會叫咪，咁多人聽住，都幾瘀架！
紀念品商店
條橋真係好長，今日係假期，人山人海。
除左條主吊橋，園區可分為三部份，較底層嘅崖邊木棧道、樹頂吊橋同埋懸崖步道。厘度落去係通往崖邊木棧道，最安全，但唔多人行。
望上去，可以見樹頂吊橋，連接樹與樹之間。
未準備好？可以喺度飲杯咖啡，充充電先開始喎！
我地對樹頂吊橋有興趣D，去LU！記住只可向前，不可後退。（無人時唔知得唔得呢）
雖然唔覺有人叫咪，又唔覺有監控電視，不過都有職員睇住嘅！
真係太多人啦！好彩大家都守秩序。
偶有影相暫停嘅，後面嘅遊客都肯耐心等待。
向下望，係木棧道，一陣會去。
驚都要勇往直前架啦！望遠處，好似有走唔完嘅樹頂吊橋，唔知去邊，總之前行就對啦！
終於腳踏實地啦！個人就完全唔覺驚險，但朋友話佢感覺暈喎！
準備再行底層嘅木棧道，經過幾位員工，喺度帶住幾隻鷹。
厘隻貓頭鷹最惡，係咁兇D遊人。
經過個湖，湖中有三文魚不時跳躍出水面，魚身長七、八寸左右，係細魚。
跟住我地經最長吊橋過返去入口嘅另一邊，去見識下條馬蹄形嘅懸崖步道。
厘度有職員把守，要展示手印才通行。
未見馬蹄形嘅懸崖步道喎！原來佢由長長嘅步道組成，馬蹄形嘅只係其中小小部份啫！
到啦！不過唔係玻璃底，所以唔覺驚險。
小朋友踩住嘅唔係地氈
係提示遊客最佳影相位置呀！
厘D長直嘅懸崖步道，每隔一段都有觀景台，可以俾遊客停留影相，唔錯！
最驚險嘅不外如是，OK喎！好安全。
園方都好體貼，唔係一定要行出通窿處先可能以觀景。
除左棧道同吊橋，園方仲為遊客設計左打印遊戲，遊客可以喺地圖旁邊嘅方格，對點打印，睇你有無去齊重點景區啦！
（乜傢伙黎架？）睇睇上面嘅年份相對下面石頭凹痕，就知水滴石穿都唔係咁易架！
Capilano River
而家人少D，我地兩個佻皮鬼，又行多轉長吊橋先走。
搭shuttle走嘅站，全部喺哂一處，只分兩條隊，
紅線與藍線，每條線路停四個站，揀啱就可以上車啦！
跟住要喺17：00前去Compass Card centre 辦退票，因為可辦退票嘅中心只有一處，聽日用Daypass ，咁就唔使走番黎退票啦！
喺Stadium/Chinatown Station出口（近大統華），沿樓梯上去，就可以搵到客戶服務中心，記得留意辦公時間喎！估唔到用左咁多日，去左咁多地方，入左$50，仲有$12.4退番（包括$6押金），真係抵玩！
樓梯落到底就見大統華超市，絕多嘅中國食品都有，仲有速食中菜同壽司添！(左邊就係樓梯)之後，步行十零分鐘返酒店休息下，夜D再行去加拿大廣場影下日落。
我地經酒店後面街到Downtown，厘幾個咪錶設計夠鬼馬。
向奧林匹克廣場方向，有多層觀景台伸出。
加拿大廣場嘅傍晚不及日頭咁有生氣，加上無乜火燒雲。
Habour Green Park內嘅木雕
要黑哂真係有排等
求祈影幾張逆光嘅！
原來奧運火炬每年喺國慶前都會維修，好彩早兩日影左先啫！
紅霞漸散
都係唔好太夜返酒店，始終果區馬馬太平，離開前遇到兩位騎警（單車），著短褲嘅！
D9 完
20/6 D10
Lynn Canyon Park > White Rock > Super8
行程到此，己近尾聲，尋日退左張card，今早買張Daypass用盡佢，先要Check out，退房後又搬番去Super8，因為佢有免費shuttle去機場，又包早餐，如果唔係好奇，根本由頭到尾住Super8，咁就唔使搬黎搬去啦！下次唔玩搬酒店啦！
搞掂就搭車去Lynn Canyon Park，（吓！又回頭上北溫
）咪係囉！想整理好行理房間，可以直玩到夜D都得嘛！
是日路線：
Lynn Canyon Park 免費嘅，但設施唔可以同Capilano Suspension Bridge Park比啦！
出發前網上睇係16：00關閉，黎到寫住21：00先關。
裏面有間餐廳
厘個公園遊客少好多
小瀑布水源充沛
厘條吊橋長度短好多
過左吊橋，我地沿山路而下，厘段河無乜水。
森林保育得好好，無乜人為破壞。
厘種感覺好正！
繼續前行
刻名留名都唔止內地人獨有，木扶手上，乜文字都有。
沿棧道旁有溪澗，厘度有三文魚。
我地只淺遊小部份
厘個公園嘅垃圾桶好有特色
比預計時間早離開，橫掂搞掂左房間同行理，不如去遠D囉！點知上車拍飛，司機話我張飛無效喎！
（有無搞錯呀
）佢要我入錢，我話張飛早上買嘅！$9.75佢只解釋：隨便你地啦！佢只負責開車，逃票係另有檢察負責，若捉到，如果佢唔信你解釋，會重罰$120。我問心無愧，當然唔怕啦！
心諗，原來我今朝一直搭霸王車都唔知，
（拍左飛就行，無睇，司機又無理喎）好在要搭車到Downtown轉車，於是到Compass Card Centre搞啦！佢地服務一流，即時換張票俾我，繼續旅程。（我諗如果我剛才買左單程票，佢地都會退回卦
）去邊好呢？仲有個白石想去，反正有Daypass，用盡佢，去遠D.
白石鎮喺溫市嘅東南面，係美加邊境小鎮，南下十零分鐘車程就到美國華盛頓州嘅入境關卡，個零鐘車程就到達西雅圖。
厘個小鎮好寧靜，華人唔多。
厘個巴士站柱下面嘅圓筒可轉動，列出巴士到站時間。
部份巴士係咁嘅樣
厘個車站好少見，唔知係咪巴士站喎！（我喺巴士上影咋）
轉車黎到海邊，睇黎係個旅遊勝地。
White Rock Museum & Archives，以前係個火車站，1909年首次有火車由華盛頓駛入白石，當時被視為出入境口岸，而家保存住當年火車控制室嘅模樣。
裏面亦有售賣紀念品
博物館前地上有兩行火車形銅片鑲喺地上，多數刻上捐款人嘅姓名。
向海邊望去，有條火車軌橫喺路上，前面係條搶眼嘅堤壩伸出海面。
厘條就係直通美國嘅百年火車軌
出堤壩行下
沙灘好受歡迎，有情侶慢步，亦有小孩赤腳玩水，
當然唔少得海鷗果份啦！
厘家人就選擇出海遊覽
厘度應該有好多蟹，所以列有捉蟹法例。
遠處有人玩獨木舟
仲有海獅趁熱鬧添！
遠處有兩座雪峰點綴。
厘度停泊唔少遊艇
轉頭返入去岸邊LU！
厘度叫白石，見唔見遠處沙灘上真係有塊巨大白石呀！
沿沙灘向白石行去
見到啦！厘舊白石好流口水啫！掃左白漆之麻，咁嘅A貨都叫特別！
滿心疑惑
，返黎摷料，先知厘舊叫冰河迷子石，重486噸，因為日積月累被鳥糞遮蓋，漸成白色，D海員仲用佢作地標架！點知近年，唔少塗鴉愛好者亦搵厘舊石做目標，搞到市公園局間中都要掃番層白油上去，以保持原來面貌。原來係一場誤會，SORRY囉！
厘度的確好舒服，好多人黎影日落嘅！
漫步左兩個鐘，原路返回巴士站啦！
等車期間，喂！咁樣仲唔係叫搬屋。
搭車時途經美景
返到速8樓下，仲有落霞迎接，此行都算好頭好尾囉！已經訂左聽朝出機場嘅免費shuttle，疊埋心水訓晏D，食完早餐出機場，由3／7開始＜講＞洛磯自駕遊山水，至溫市公交遊，接近＜講＞左個半月，整個上下集遊記，終於完成啦！
又可以準備下個旅程LU！
21/6 D11 Vancouver – Hong Kong
22/6 D12 Hong Kong
加西26天旅程完滿結束
