(Part 1) http://chuchu-hung.blogspot.com/2016/10/19part-1.html
16/9 D10
Valdez > Willow Lake
Richardson Hwy (同D8&9)
Valdez Glacier View Park 61.148695, -146.172825
Horse tail Falls 61.067940, -145.905534
Bridal Veil Falls 61.070328, -145.893590
Thompson Pass 61.128578, -145.729744
Worthington Glacier 61.201255, -145.545292
Tsina River 61.208574, -145.480388
Chitina (Edgerton Hwy) 61.514863, -144.437867
Pippin Lake Cabin 61.700536, -145.172227
今日行程大致係尋日嘅回頭路，Richardson Hwy 係出名嘅美景大道，四人組可以多一次機會觀靚景，可惜天氣仍係陰雨，不過無咁大霧，稍好！
是日路線圖：
由於Alaska冬天海港結冰，船隻都上岸＜過冬＞，南方就睇唔到厘D情景啦！
Valdez係個漁港小鎮，當然唔少得海產廣告啦！
告別住宿酒店後，黎到Valdez Glacier View Park ,
天氣差D，湖中冰塊雖唔算多，仍值得黎嘅！
湖邊山腳正在進行工程，唔知係咪開條路呢？
正想離開，就有架載滿獨木舟嘅車黎到，梗係有團黎扒獨木舟，咁就唔走住囉！
原本嘅霧飄向山谷，仲落起雨添！
似乎團友無受影響，留心聽講。
落水LU！所有人都努力劃向冰川。
喂！喂！喂！你兩位搞咩反方向扒呀！（隻獨木舟唔聽話囉！唔通扒番上岸咩
）
成隊獨木舟向冰川方向隱去
D霧就越降越低，好似飄到黎咁，都係徹退囉！
都係出番Richardson Hwy去睇下個Bridal Veil Falls 。
附近仲有個Horse tail Falls，兩個瀑布唔算壯觀，但路經囉！當然都影低留念嘛！
途經Thompson Pass繼續前往Worthington Glacier，途中見有驚艷，當然停車影下啦！
整個山坡色彩斑爛
七彩地衣舖滿石上，好似彩石。
又到達Worthington Glacier State Recreational Site（尋日黎過），
希望今日天公造美啦！點知都係差唔多。
觀景台就喺中間條斜路行入去
冰川圖說
繼續前進，離遠又睇見隻大蝴蝶冰川
尋日有霧，今日好少少，清楚D。
Richardson Hwy絕無冷場，沿途美景不絕。
條河都幾乾下
厘個冰原好大，所以厘度可以見到好幾條冰川。
似春色多過秋景
厘排山峰另有特色
又係停車影相時間
厘度係Tsina River
可以睇到岩層好易被水蝕風化
跟住厘段路嘅金秋，想唔著迷都幾難呀！走多次都係享受多次啫！（如果換個陽光普照就完美啦
）
今日都係半遮面
Chitina Wayside附近嘅河床都有D乾涸，沙洲上同樣點綴住金黃。
今晚嘅住宿，環境一流，由厘條小路入去，只有我地一座小木屋，整個私人空間好大。
就係厘座小木屋，有前後門架！
廚房旁邊度門係後門，可以直出湖邊。
仲有個私人碼頭
初到時有風，無倒影，而家水平如鏡，靚！
遠處仲有雪峰
厘兩位反斗星梗唔執輸，一於扒下免費艇。
都叫做有些少晚霞，不過一剎那就散。
我地都返入去煮飯仔LU！呢！中間一丁點嘅就係我地間小木屋啦！
D10 完
17/9 D11
Pippine Lake > Matanuska Glacier
Glenn Highway 依Bell's travel Guides 的 Glenn Highway
按個人喜好隨指引到景點，遊記內再交代。
http://www.bellsalaska.com/highway/glenn-highway/
Sutton觀景台 61.94692,-147.14899
Nelchina Glacier
觀Matanuska Glacier 61.80012, -147.66179
Matanuska Glacier Hiking (售票處 61.79321,-147.79772)
Homestaed Cabin 61.804046, -147.981415
今日天公造美，賜四人組一個大晴天，一早出門幸運遇上野鹿，沿途景色大美，加上盡興自由行冰川，整日興盡而歸，感恩啦！
是日路線圖：
清晨起來，即出後門直到湖邊，湖面薄霧籠罩，更添美感。
厘個唔係太陽，係月亮黎架！
雖然厘個方向睇唔到日出，不過天邊彩霞映照雪山，靚！
迷濛嘅雪山與湖面
先出發去觀景台賞景，再返回都未遲，哈哈！今日嘅開始就收到兩隻野鹿做大禮，應該運氣唔錯！
早晨呀！靚仔！咪走得咁急，打個招呼先啦！( 乜咁無禮貌架！)
噢！唔啋我，唯有拜拜你條尾囉！
繼續行車，窗外美景使唔使咁靚呀！
半小時左右就黎到觀景台，厘度可以欣賞四座山峰。
（無記低GPS，喺Bell's travel Guides Richardson Hwy 內嘅112.5 mile）
就算喺路上都望到咁靚景
繼續LU !
睇完美景，再驅車返酒店執行理，離開前再到湖邊，天色光亮，
山景倒影當然又清晰D，住厘度真係好正。
尋日天陰，影得唔清，今早再影過。
驅車途中，仍然望住幾座靚山景，比起今早觀景台睇嘅仲近。
大美雪峰，路邊就執到啦！
咁嘅靚景，係人都停車欣賞啦！
走LU！
前面似有石龜擋路喎！
公路兩旁都係巍峨峻嶺
原來石龜無擋路
只係朝望高峰啫！可惜神峰唔俾石龜睹真貌。
（所以佢死唔肯走囉）
繼續向下一觀景台進發
厘度可以欣賞到Matanuska Glacier，呢！最遠白色嘅唔係河，係冰川同佢嘅冰舌黎架！
Matanuska Glacier
咁靚嘅環境
又有枱凳，喺度食個中午路餐就最正啦！
食飽飽，返停車場放好野。
厘幅簡介將冰川描述成老翁嘅長鬍鬚，因為冰川長達27公里啊！
再行上山，希望有個高位遠眺整座冰川全貌啦！
沿途景觀
俯瞰停車場與冰川
走LU！驅車到冰川訪客中心付款，準備冰川自由行囉！
一般行冰川多數跟團，仲要付昂貴團費，厘個冰川屬私人擁有，當然亦有探險團啦！不過你亦可以付USD25，再簽埋張生死約（責任自負），咁就可以隨意進入冰川漫遊，無時限規定，爽！
訪客中心及付款處
辦好手續，可以返上車直入冰川前嘅停車場。
沿路有紅色雪糕筒指引安全步道，距離無幾遠，仲有兩套枱凳供遊人休息。
好多本地人扶老攜幼到訪
地面積水處，架左木板防濕腳同濕滑，厘D睇落似泥濘嘅地面，實際好多係冰黎嘅！
冰舌前嘅水唔算多
我地前進時，剛有冰川探險團離開。
咦！全女班！睇佢地嘅裝備只有手杖、頭盔同腳下嘅冰爪，唔需要冰斧。
繼續深入，越黎越多冰隙，小心D行，咪跌落去就得，尚算安全，當然著冰爪就更穩妥啦！（無冰爪就要著對防水防滑嘅鞋）
厘兩位仁兄就危險啦！企喺條咁闊又咁深嘅冰隙邊，一跣腳就。。。
四人組黎阿拉斯加咁多日，厘個景點係最熱鬧啦！
厘位伯伯著對皮鞋就唔好行斜坡啦！小心呀！兜遠D嘛！
雖然厘度應該有冰下河、冰洞之類，不過無專人帶，
都係唔好太冒險，上黎踩下冰川，影下相，過下癮就算啦！
四人組都見到D小型冰洞
有D冰隙幾深同幾闊，底部有水流動。
走LU！今日天公做美，即使走喺冰上，一D都唔凍。
再見啦！Matanuska Glacier
往酒店途中，仲有些少耶穌光添！
Matanuska River
黎到今晚投宿嘅Guest Cabin
超喜歡厘幾條原木柱，好特色，唔知係咩樹呢？
又係Moose嘅角
厘度嘅居民，當然要儲大量嘅柴先夠過冬啦！
木屋有兩個闊大陽台
就係面對咁嘅無敵靚景
屋內有兩間房
洗衣乾衣機一應俱全
敞大嘅客廳同廚房，隨便煮咩都無問題啦！
D11 完
18/9 D12
Matanuska Glacier > Girdwood
N Glenn Highway + Old Glenn Hwy
依Bell's travel Guides的Glenn Highway
按個人喜好隨指引到景點，遊記內再交代。
http://www.bellsalaska.com/highway/glenn-highway/
Wiener Lake 61.81168, -148.17207
Long Lake 61.80379, -148.23808
Matanuska River Valley 61.78831, -148.44120
Sutton Liburary & Historcail Parks 61.71073, -148.87737
High Point View 61.64650, -149.76954
20 Miles River & Glacier 60.82963, -148.97874
Portage Glacier Cruise 60.78337, -148.84381(售票處)
Alyeska Tram (Cable Car)
Alyeska Resort 60.970701, -149.098757
今早都係陰天有霧，好在黃昏坐遊船觀冰川時放晴，盡興而歸，
最後坐吊車上山，先係大風小雨，好在後轉天晴，可以漫遊一下。
是日路線圖：
早上出發到Wiener Lake，雖然陰天有霧，又係相似嘅秋色湖景，但仍然迷人。
厘個湖唔大，就係咁先有豐富倒影。
再去另一高角度欣賞Long lake
連路邊野草都咁阿娜多姿
每個角度都咁靚
望眼不盡嘅金秋
沿Glenn Hwy到達Matanuska River Valley
繼續沿Glenn Hwy經過Sutton Liburary & Historcail Parks，
佢亦係個露天博物館，介紹山區居民嘅民族文化。
即是垃圾收集區，都用心美化。
厘排信箱好似放喺枱面咁
走LU！行車時經過，見對面山嘅房屋密集，應該係個小鎮。
馬路上嘅行車線好有動感，厘度亦係個High Point View，
如果天氣好，可以遠遠遠眺阿拉斯加山脈
河中島上建有風車
另一邊可以俯瞰平原上小鎮
途經個觀景台，可惜無甚睇頭。
走囉！
厘度唔使講都知係20 Mile River，我地黎到橋邊，起碼都睇到座冰川吖！
（黎厘間屋做咩？
）要入去買船票，準備坐船近距離欣賞冰川呀！
買左飛再驅車到碼頭
剛好趕上開船時間
上船囉！我地上樓上甲板坐。
艘船漸漸遠離碼頭
睇到嘅冰川越黎越多
冰川不同位置嘅冰，形態各異，較高嘅表面覆蓋棉花般嘅白雪。
冰舌向湖中伸展
下層表面好似直立嘅鱗片一樣，層層疊疊。
睇清楚，有D冰塊好似鍊咀咁，上端有個窿。
冰舌末端似堵岩壁
甚至有冰洞
甲板風光
冰石結合，猶如冰筍。
厘D似捲起嘅花瓣
冰川不斷向下流動
冰川嘅溶雪，喺旁邊形成瀑布。
（厘位船員做咩呀？）佢正在用網撈冰上船，搞掂！撈到塊揀手冰。
咪就係厘舊囉！旁邊嘅係敲碎左，俾乘客試下D千年冰係咩味道囉！
遊左個幾鐘，返程啦！遠遠見到碼頭。
多謝天公造美
落船前經過嘅貼士收集瓶，多謝！歡迎再次光臨。
返停車場上車，到酒店check in，
今晚我地住酒店，所以分兩個房間。
Alyeska Resort 門前有個取暖爐，方便住客寒冬圍爐取暖聊天，觀天都得架！
我地就住喺吊車站旁邊
攞左房，趁時間尚早，上山囉！山頂可以欣賞到多條冰川。
吊車內下望
（唔想花錢可唔可以上山呀？）可以，好似佢地咁，只要夠腳力，有時間就得啦！
Chair 6索道目前仲未開，係冬天供滑雪人仕使用嘅。
剛才仲飄緊毛毛雨，突然又出太陽，仲有彩虹添！
山上觀冰川
山下風光
山間積雪唔多，不過形成條雪溝，幾有趣！
Chair 6吊車站
Upper Tram Terminal 左旁是 Alyeska museum ,二樓係seven Glacier Restaurant，晚膳要預定啊！
落山時天氣較好，睇得清楚D。
D12 完
19/9 D13
Girdwood > Whittier > Seward
Seward Highway
依Bell's travel Guides的 Seward Highway
按個人喜好隨指引到景點，遊記內再交代。
http://www.bellsalaska.com/highway/seward-highway/
Hope Junction (mile 56.3)
Summit Lake 60.638593, -149.503256
Tern Lake 60.53473, -149.54863
Moose Pass 60.487017, -149.371053
Exit Glacier Hiking 60.188432, -149.631298
Point of View Suites 60.104186, -149.445276
等左12日都食白果，差不多天光先有條雞肋極光，當然唔放棄啦！
返酒店瞌三個零鐘又出發啦！今日陽光普照，D湖景靚到無朋友，
跟住行Exit冰川亦天色清朗，感恩！
是日路線圖：
凌晨3：30，輝哥按門鈴，話有極光喎！當然速速起床落樓啦！可惜停車場嘅光害，影得好矇矓。
因為溝通有誤，遠遠見小鄧開車，當然急跑追瘦佢同輝哥啦！日間小鄧已經搵左拍攝地點，呢！就係有座山做前景嘅路邊，中間仲清楚睇到北斗七星 , 如果完全無街燈就正啦！
四人組形容極光只得＜一碌葛+北斗七星＞，等左好耐都毫無變化，
對睇過大爆發嘅四人組就梗係無乜新意啦！
加上我倆有個腳架衰左，唯有借張凳做下力，當然震架啦！
曝光之際，相機掉落背囊上，索性由佢，咪攪左張咁嘅出黎囉！
捕左個鐘都得條雞肋，走LU！嗯！一喊走啫！條雞肋就郁啦！無腳架影嘅，大家將就睇下啦！
咦！有架飛機喎！影埋走啦！返去瞓番陣都好吖！
十點鐘一定要check out出發啦！今日天朗氣清，沿Seward Hwy嘅風光都非常吸引。
黎到Hope Junction 唔停都忍唔住啦！厘度忘了記低GPS，就喺（mile 56.3），參考travel Guides的 Seward Highway啦！
另一邊景色（Conyon Creek）
再前進，又係引死人嘅湖景。
見有條木橋連接對岸，我地咪行過去囉！
點知遇上島主返黎，原來整個島係佢私人擁有（唔怪之得咁自豪啦）於是小鄧用佢三寸不爛之舌，大讚個島靚，島主當堂喜自心生，仲話俾D驚喜我地睇喎！氹到我地鬼咁期待，原來佢猛力喺橋上跳，話會嚇到D魚游哂出黎喎！仲話D魚好大條架！點知跳極魚毛都無條，佢失望時，我地仲失望，我知佢無呃我地，可能唔係季節啫！
唉！跳到腳仔軟，唔同你地玩，車D柴返歸LU！
雖然睇唔到魚，不過厘度真係好靚，好羨慕厘位島主有咁正嘅環境。
之後又到左Summit Lake Lodge，見環境唔錯，諗住入黎湖邊影幾張相啦！
點知佢咁寫，尊重人家，唯有走啦！
厘張相就係離遠zoom埋去影嘅！
唓！原來唔使打擾人家，繼續前行，路邊一樣有個無敵位啦！
Summit Lake
繼續沿Seward Hwy前進，厘個 Tern Lake 真係靚到無朋友，D車經過都一定停低。
今日天公造美，水平如鏡，真係影到唔捨得走呀！
剩係等車過，影下D車都過癮。
咦！有隻水獺喎！
佢個竇就喺旁邊D小樹叢
喺度hea足癮，走LU！
（跟住去邊呀？）講起黎，此行似乎同冰川有緣，睇親冰川都天朗氣清，
四人組又去睇冰川啦！（天氣預告左後日打風呢）
今次係個親民嘅Exit冰川，遊客可以近距離接觸嘅！
黎到Exit Glacier Trailhead
第一個低位觀景台，屬無阻礙通道，抵讚！
1926年，冰舌伸延到厘度
每隔一段距離都會豎立厘D年份牌，隨住全球暖化，冰川越縮越上。
觀景台仲設有免費望遠鏡，而且照顧埋小童及傷殘人仕。
繼續去LU！依指示行就得。
其實下面谷地都係從前嘅冰川範圍
到啦！跟住梯級上就係觀景台。
冰舌末端呈拱形冰洞
繼續前行
到上層觀景台
同樣有繩欄住
不過係警告性質，要靠遊客自律，有遊客走到冰川旁嘅！
沿路離開，唔少一家老幼黎觀賞冰川嘅！
冰川活動歷史圖
返回停車場
再見啦！Exit 冰川 !
途中見隻白頭鷹
今晚嘅住宿可謂秀外慧中，右下果間係我地住嘅！
對正個無敵海景，係個campground，好多住行車停泊喺度。
厘架豪華車嘅主人嘆到呢！
乜形式都有嘅住行車
（秀外啫！慧中呢？）我地有兩個房，可住八人，厘間係我地嘅房，床邊嘅唔係衣櫃。
厘間係小鄧同輝哥嘅房，開落黎就變兩張雙人床，間房一D都唔迫，非常舒適。
客飯廳寬敞，設備齊全，煮咩都得。
最鬼馬係有埋按摩椅
（得一張咪爭餐死
）所以咪再有張貴妃沙化囉！
仲有位瞓喺度享受上網樂添！係咪睇見都溫馨呢？直情賓至如歸啦！
D13 完
20/9 D14
Seward是日打風，只在附近走一圈。
Pointof View Suites 60.104186, -149.445276
四人組試過喺冰島遇過40m/s嘅風速，可以用恐怖黎形容；兩日前天氣預報已知今日會打風，原本計劃嘅6小時 Kenai Fjord Cruise觀冰川同野生動物巡航之旅當然泡湯啦！
人生路不熟，都係小心D好！所以只喺鎮上兜左個圈，疊埋心水去超市買野，返去玩煮飯仔，多謝三位愛心男為我搞左個小型生日會，愉快溫馨。
（好彩預左喺度住兩晚啫！）
天氣咁差，乘機瞓到自然醒，早午餐一齊食啦！
簡單嘅白粥、五香肉丁炒麵+炸菜、菜甫、辣蘿蔔，仲有杯咖啡，唔中唔西又一餐。
出發去鎮上兜個圈
鎮上教堂
厘間中餐館貼左張頂讓告示，已關門大吉啦！
厘間都係無開，唔知係打風，還是淡季休業呢？
厘個似集水區多過似瀑布
天色真係好差，慶幸唔算好大風，不過都唔敢去得遠，怕某D蝕風位有危險就無謂啦！
三位猛男話幫我慶生喎！都係去超市行下，買野返去玩煮飯仔啦！
先黎個洋蔥雞湯
煲落湯後，出後門睇下海景，哈哈！同香港石澳一樣，打風先係部份冒險者嘅樂園。
打風下，風箏滑水嘅速度好快，有時快到難以控制，我就睇到戥佢地抹一把汗啦！
話係咁講啫！不過越黎越多人揸車黎玩呀！
我地仲見到個驚險鏡頭，有人收風箏上岸時拉唔住甩左手，風箏以高速吹向馬路，幸好無車無人，萬一有路人被繩纏上，或落喺行車中就不堪設想啦！
最後果位人仕揸車去追番，可惜我地睇到呆左，無影到添！
睇完追風族，先切個蛋糕慶祝下，嘆個下午茶先！
Hea一輪又開始整晚餐啦！上邊果煲係蠔油花膠炆冬菇甘荀，
下面嘅係煎香草薯仔，左邊仲有煲元肉紅棗杞子糖水。
飲得啦！洋蔥雞濃湯，正！
仲有個雜果大蝦沙律
椒鹽蝦球
輝哥仲話今日佢要獨煮喎！多謝哂！我當然唔忍心啦！做個幫廚都好嘛！
睇見大家咁開心，食物嘅味道係其次，我地享受嘅係溫馨友情味嘛！
小鄧都要出心出力，好滾動啊！
D14 完
21/9 D15
Seward > Homer
Sterling Highway
依Bell's travel Guides的 Sterling Highway
按個人喜好隨指引到景點，遊記內再交代。
http://www.bellsalaska.com/highway/sterling-highway/
Tern Lake 60.53473, -149.54863
Homer Overlook Point 59.654283, -151.627622
Aloha B&B 59.668211, -151.519304
雖然尋日打風，當休息下都唔錯，食完早餐，離開個無敵海景嘅住宿環境，
向今晚投宿嘅山上進發，估唔到景觀一間賽過一間，真係要俾個LIKE小鄧，有眼光。
今日路線圖：
出發LU！
首先到Kenai Lake嘅其中一個觀景台
可惜有風雨無光，當然倒影就免問啦！
繼續前進囉！
又經Moose pass
都係Tern Lake 夠吸引，無乜光都倒影依然，當然無前日咁靚啦！但點都舉機影幾張嘅！
阿拉斯加人嘅戶外活動好多元化，經常見佢地＜陸上行舟＞。
打完風總係天色較差，預左啦！
黎到見有棧道，點都入去行下。
無乜睇頭，都係山林，可能厘度係睇羊嘅好地方，我地黎唔啱時候啫！
冬天行厘段路要小心啦！
又黎到Kenai Lake嘅另一觀景台，係個沼澤平原，睇黎，係個生氣蓬勃嘅生態環境。
噢！水中仲有海獅/海狗。
好遠處有兩位持槍獵人帶住隻狗喎！其實Alaska打獵活動好普遍。
之後，我地直驅往Homer。
到酒店前，途經Homer Overlook Point ，本來係個全景無敵位置，
可惜天氣唔好，加上山勢同大樹阻左些少，有D失望。
另一邊山崖上有幾戶人家，景觀同環境一流。
繼續向投宿點進發，前面見有學童巴，左邊伸左個STOP牌出黎，
對頭車都停喺度，估佢梗係學童落車啦！果然有位小朋友。
巴士無開車，對頭車亦等學童過馬路，小朋友好安心咁過馬路。
然後巴士收番個STOP牌，兩邊車先開行，整個過程感覺好和諧，盡顯對未來棟樑嘅愛護。
好快就到左今晚嘅guesthouse，右下層就係我地嘅單位。
嘩！唔係呀！頭先個Overlook Point 同厘度邊有得比呀！如果天氣清朗就更正啦！（嘻嘻！而家都好正！）
客飯廳寬敞一D都唔出奇
飯廳嘅大玻璃窗足以欣賞外面嘅美景，尤其寒冬，安坐屋內就可以欣賞美景。
廚房的驚喜，今晚又唔使睇火就有靚飯食。
洗手間除左有淋浴，仲有洗衣乾衣機。（喺條簾後面）
厘度嘅睡房又係正到痺！足五、六人住。
入住條款中，有一項係注意唔可以俾隻貓入黎！哈哈！隻貓好靚好可愛架！
一見我地開門，佢即刻就想衝入黎。
出面咁又濕又凍，佢梗係想入屋啦！做乜個主人咁無陰公啫！我地唔敢收留佢呀！
辦好check in，第一時間梗係出門口影相啦！雖然天色唔好，但仍係要平原有平原。
要山有山 , 要水有水
由厘度俯瞰，最觸目嘅係長長嘅堤壩，一於親身落去遊下囉！
真係靚到無野講
因為行車中，厘排咁靚嘅屋，返轉頭再慢慢影過。
繼續前行
終於黎到盡頭嘅End of the Road Park。
厘度有個碼頭
岸邊頗多人釣魚（咁都算多），估計有D魚獲嘅，係呀！算熱鬧啦！大多地方都係無乜人架！
呵呵！肯定多魚啦！你睇，一群群嘅海獅，玩得幾開心呀！
岸邊堆滿泊船用嘅海上浮標，厘度遲D會結冰喎！
之後，再回頭去果排海邊嘅吊腳靚屋。
全部都係搞旅遊商業活動嘅店舖，無論你想釣魚、觀冰川、睇野生動物、甚至行山，都一應俱全，不過已經關左九乘幾。
有部份係食肆，都係關門嘅多。
厘間專賣海產，入去睇過，產品好少，且全屬急凍，且價格非常貴，估計都係準備暫停營業啦！
門前放有野生動物骨頭
厘間寫明＜see you in the spring＞，明春請早啦！
睇見厘座雕塑，就知厘度係漁港啦！
海邊停泊數以百計嘅船隻
好浪漫嘅休憩野餐區
返去煮飯LU！唔覺唔覺，已到阿拉斯加尾聲，當然要將食物清倉，有乜食乜啦！
飯後仲有火燒雲，可能係天氣凍，時間維持唔耐。
D15 完
22/9 D16
Homer > Anchorage
Sterling Hwy > Seward Hwy
欣賞沿途景觀
Lakeshore Inn 61.180706, -149.939419
厘日係四人組喺Alaska最後一日，由Homer 沿Sterling Hwy 轉入
Seward Hwy 進入Anchorage，雖然走二百幾英哩，因為大部份係回頭路，
加上整日陰雨，所以無停太多景點啦！
是日路線圖：
今日多回頭路，要睇嘅都睇左，雖然間中稍有停車休息，但天陰微雨，都無乜影相，中午有D餓啦！
橫掂經過天橋底，叫做有瓦遮頭，風景又唔錯，好過屈喺車度食午餐吖！
雖然陰雨，同早幾日（D13）陽光普照景色又唔同喎！今日有D神秘迷離。
山頭舖上薄薄嘅白雪，有D似糖霜。
仲記唔記得話要俾驚喜我地睇果位島主呀！我地又黎啦！今次遇唔到佢添！ 佢嘅居主環境直情係大美啦！無論咩天，都有咁靚嘅倒影，唔知雪景係點嘅呢？
又到 Hope Junction ，仍然咁吸引。
咦！厘幾座山好熟口面，咁似坐Portage Glacier Cruise睇嘅山景嘅！
繼續前行，又有靚景，當然要停車啦！如果天晴應該又係靚爆鏡啦！
剛好就喺Seward Hwy 嘅77miles路邊
另一邊有草原、雪峰同冰川，絕唔遜色。
不如返去Portage Glacier Cruise影下相囉！哎呀！真係關左喎！
（我地公司講信用架！開玩笑咩！）嘻嘻！好在四人組坐左啫！
連前面閘口都鎖埋添！
今日睇條冰川就無咁清楚啦！
出返去售票處，已經人去樓空，明年五月再黎啦！
一小時之後，四人組已到達酒店check in。
話明係湖邊旅館，梗係有魚啦！
仲有Alaska嘅鹿同熊添！
喺酒店旁邊有個冷凍室，唔知係咪為客人提供儲存魚獲呢？
由於阿拉斯加漁獵活動發達（多數Guesthouse註明不准處理魚類，當然唔係超市買果種啦！），於是有公司專為客人提供獵物處理，例如替鹿隻剝皮切肉，包裝好再交回客人。
言歸正傳，我地獲分配嘅係二樓單位。
厘間酒店雖然有廚房，都寫明唔准處理魚類嘅！
單位內部
厘度好接近Lake Spenard，行去只需幾分鐘，就可以近距離接觸水上飛機。
黎到湖邊，見到幾架水上飛機咁近距離，當然好開心，行前睇清楚啦！
厘架連機師只有兩坐位
不過咁殘，坐落都驚驚地喎！
厘架新淨D，多兩個坐位。
呵呵！停機收費好似平過停車喎！
繼續前行，有個閘口，嗱！咪亂黎呀！有監察架！
嘩！原來整個湖嘅周邊都係水上停機坪，肯定過百隻啦！厘種交通工具對佢地黎講真係好普遍。
仲有雪山做背景，如果風和日麗，有埋倒影就。。。
對面係The Lakefront Hotel，可以揸飛機停喺門口入去check in就得啦！
走LU！返去煮埋D剩餘物資，聽日要飛西雅圖啦！
橫掂剩左D花生醬，煮個擔擔麵LU！
D16 完
23/9 D17
AnchorageAK94 12:30 > Seattle 16:45
SuttonSuites
其實四人組嘅阿拉斯加之行已結束，再講都只係轉飛過境，
無咩睇頭，不過有頭唔可以爛尾嘛！
早餐後驅車到機場 , 交車後辦理check in手續，係喎！忘記左講四人組今次好好彩，套機票批左係Precheck嘅（TSA PRECHK）！但四人組大鄉里，到回程先留意到，排預檢條隊真係快好多。
仲有係chuchu去程時被開喼檢查，美國海關交代得好清楚，會喺喼內面頭放張檢查通知卡。
背後清楚蓋上有關資料
阿拉斯加機場當然要有佢地著名嘅野生動物做旅遊大使啦！
不過三隻棕熊係紙板啫！
機場竟然有架1932年啟用嘅飛機，當時民用同軍用都普遍使用。
航站大樓外望
仲有大把時間，上樓上參觀下土著生活博物館。
差不多時間，睇下我地坐嘅機到左未！咦！竟然係迪士尼嘅飛機！可惜影唔到完整外貌。
上機入門口就見有個迪士尼招牌，可惜後面大把乘客跟住，唔可停步影吖！
行理架嘅設計顯得夢幻
今日天氣多雲，不過仍見到唔少雪峰。
又返到Seattle，都係住番之前嘅Sutton Suites，貪佢有免費Shuttle去機場。
玩左咁多日，大家都有D攰，只行下超市，買左D龍蝦同蜜瓜，煮埋D麵就算，路上嘅楓葉部份開始轉紅。
今次個單位望後面停車場大廈
D17 完
24/9 D18
Seattle 09:15 > San Fran 11:33/
SanFran 13:30 > HK
清晨到餐廳食早餐，無人嘅！全部自助。
Seattle機場
我地坐嘅機
今早天氣好好，萬里無雲。
清楚睇到橫過Lake Washington條橋 , 係520 HWY嘅一部份，好壯觀。
又到三藩市，等陣轉機返香港。
又係萬里無雲嘅天空
大城市嘛！梗係密密麻麻嘅房屋啦！
遠處嘅咪金門大橘？
睇清楚啦卦！無辦法，坐正個引擎後面，D氣流影響，濛濛地。
25/9 D19 Arrive HK 18:40
25/9安全抵港，旅程完滿結束！
