巧遇九級極光大爆發之北歐三國自駕窮遊實錄（煲粥煮飯二，含大量極光相）

繼冰島煲粥煮飯之行既成功，又溫馨，
四人組於16/3/2015再度出擊北歐三國------芬蘭、挪威＆瑞典，
大家千祈唔好問我此行有幾豐富，景色有幾優美同多元化喎！
（咪傻啦！係人都知厘條極光線無冰島景色咁可觀啦！）
但四人組此行收獲，絕不遜於冰島，皆因遇上廿年一遇嘅九級極光大爆發
（點人咩！有無咁誇呀！），唔係我講架！我照搬CNN咋！你問版權人啦！
無論如何，小鄧居功至偉，（小鄧,轉行擇日，有得諗呀！）
我代表埋其餘三位講聲，辛苦啦！多謝哂！

今次行程，我地主打係追蹤極光，結果第一晚已在芬蘭中寶，
第二晚在挪威遇上廿年一遇嘅九級大爆發（呵呵！歸本囉！），
雖然口講話以後睇唔睇到都無所謂，結果，老天真係厚待我地，
再有三晚精彩表演，為紀念此行有幸在Karasjok..Norway 看到大爆發，
我地已改名為＜卡啦show四人組＞了！

今次真係影到開哂巷，俾個心理準備大家先，以後可能厭我放得太多極光相，
睇到大家悶到嘔呀！（預先講左主打係極光囉喎！）
在詳細遊記未開始前，先上幾張相同大家分享下先。

 Ivalo..Finland







Karasjok..Norway












Hamnøya  Norway






Sortland..Norway




Kiruna (Sweden)












以上分別攝自芬蘭、挪威同瑞典嘅極光相，小鄧形容此行中左大三元喎！超幸運兼大大感恩呀！
睇完相就入正題啦！最多人關心嘅梗係行程同消費啦！先介紹行程，我地15／3晚由機場出發，抵芬蘭都係16／3，29／3抵港，一共係14天北歐三國遊，主要都在北極圈內；另外，好多人關心嘅GPS坐標，我將佢附埋喺地點旁，方便參考。

15/3     21:00 HK Airport Check-in, 00:45 Finnair flight

16/3 D1  06:00 Hel > 08:30  Rovaneimi > Car pick-up > Foodshopping >
              Kakslauttanen Resort玻璃酒店(68.334489,27.334584)>  Ivalo
                 住宿:Näverniemi Holiday Center (68.643372, 27.528905)

17/3 D2  Ivalo > Inari Lake(68.907644, 27.017627) >  
                 Karasjok Norway
                住宿:Karasjok Camping (69.469083,25.488516)           

18/3 D3  Karasjok >  Alta
                 住宿:Alta River Camping (69.929587, 23.262536)            

19/3 D4  Alta>museum(69.947466, 23.186522) >
              Rotsund  
                住宿:Spakenes Sjobuer (69.76325, 20.46353)

20/3 D5  Rostund > 途中觀日蝕>Tromso
                  住宿: Ersfjordbotn Kystferie (69.699637,18.618917)            

21/3 D6  Tromso sightseeing
                 住宿:Ersfjordbotn Kystferie (69.699637,18.618917)            

22/3 D7  Tromso > Svolvear (Lofoten Island)
                 住宿: Svinoya Rorbuer (68.234306, 14.579667)   


23/3 D8  Svolvear > Reine(67.934652,13.090724)
              (Lofoten Islandsightseeing)
                住宿: Eliassen Rorbuer(67.946182, 13.133700)

24/3 D9  Reine > Svolvear > Sortland  (Vesterålen Island  
                 Sightseeing)
                住宿:Vesterålen Sjøhushotell (68.718750, 15.409933)

           
25/3 D10  Sortland > Narvik 峽灣(68.397794,17.500998) >
                Abisko Sweden  >Kiruna IceHotel(67.850881,20.595244)
                   住宿:Camp Ripan (67.860701, 20.240594)

26/3 D11  Kiruna > Lulea> Gammelstad 教堂村(65.645984,22.028595)
                   住宿:FirstCamp (65.595617, 22.072150)

                  
27/3 D12  Lulea> Rovaneimi
                   住宿:Kotareitti Apartments (66.508817, 25.763754)

               
28/3 D13  Rovaneimi>Santa Claus Village(66.544330,25.849472)
                 >16:00 Airport (66.558124,25.830434) >
                   ReturnCar > 16:30 Check-in

29/3 D14  Afternoon > Hong Kong

跟住落黎當然係全程消費啦！
機票：$9700/人
住宿：$17300/4人
汽油：$2500/4人
膳食：$3000/4人
租車＆保險＆洗車＆泊車：$10250／4人
電話卡：$140/4人
Autopass(路費)：$100/4人
總計每人約：$8330+機票$9700=$18000

嘩！萬八蚊玩14日北歐，仲要好食好住，真係平靚正，撞埋睇到極光，當然超。。超。。超值啦！不過就要自己動手揸車、煮飯同清潔，都幾辛苦，但家庭式，好溫馨架！
以下係D1-D8嘅路線圖:


D9-D13嘅路線圖:






行程及消費數字咁齋，再講就無人睇架啦！至於溫馨提示，好多喺冰島遊記一開波就寫左，至於北歐嘅，去到邊就寫到邊啦！出發Lu！


16/3 D1
06:00 Hel > 08:30  Rovaneimi > Car pick-up >
Foodshopping>  Kakslauttanen Resort玻璃酒店
(68.334489,27.334584) >  Ivalo
住宿:Näverniemi Holiday Center (68.643372, 27.528905)

當日行程路線圖：


終於到左芬蘭轉機啦！


上到機仲要等工人除雪


由赫爾辛基飛羅凡尼米嘅航班只提供清水同汽水，其餘嘅需付費啦！





飛機越接近羅凡尼米，大地積雪越多。

湖泊結冰


近岸嘅海水都結哂冰

06:00抵羅凡尼米，機場唔大

好容易就見到幾間租車行嘅柜枱



我地幫襯厘間


行理帶只有一條


原本我地租HondaAccord STW Aut，但車行改左架平治E220俾我地
（著數左喎），厘架就係送我地跑3128公里嘅白馬。






 
今日全程主要行E75
首要醫肚同上糧先，路經一間芬蘭好多嘅K-SUPERMARKET.

門口厘兩部係回收鋁罐機，顧客投空罐，部機就會吐錢出黎 / 將錢入卡。

旁邊有哂收購價（真係童叟無欺喎）

咦！超市裏面已經有熟食檔囉喎！求祈買D野填飽肚算啦！

厘餐都係€27/4人啫！


坐完長途機，大家都較攰，特別係小鄧要揸近300公里，所以食飽就繼續，務求早D埋棧休息下啦！



一路上，行兩個鐘，小鄧已經喊悶，話芬蘭D景好一致喎！（咪就係得兩旁密茂嘅樺樹林囉！）













兩小時後，黎到Kakslauttanen Resort玻璃屋酒店，

厘度係RECEPTION同周圍環境







住玻璃屋標榜可以舒服咁訓喺度睇極光，當然要付昂貴費用啦！
一般嘅房間較細，仲要共用浴室喎！（>3K，價錢唔一般呀！）
不過厘度亦提供普通獨立小木屋嘅！



非禮呀！（嘻嘻！我幫個木刻叫咋！）



厘度係RECEPTION嘅後面

到此目的，當然係想參觀下D玻璃屋啦！（唔該盛惠每位€14）

我衰孤寒，唔俾架啦！唯有ZOOM埋去影張啦！
（睇到未呀？日後我帶你睇間仲正架啦！）



無野睇，走LU！
途中見人玩雪地電單車，好似好刺激喎！（咪搞我副老骨頭啦）

圍住嘅就係車場


經過一小鎮




喂！喂！喂！停車呀！厘個咪係有電話卡賣嘅標誌囉！入去囉！

哈哈！便利店門口排左幾部老虎機喎！仲有人幫襯緊添！
（以後經常都見，北歐人幾喜歡玩老虎機喎！）

厘排估係彩票之類啦！

我地位大內總管輝哥去搞搞張電話卡先

架上有好幾款


我地買左厘款，SIM卡連少量儲值€6，再增值€10，有效期15個月。




 

 搞掂哂，16:00終於到左今晚住宿嘅Näverniemi Holiday Center，
佢位於河邊，呢！厘間屋仔同兩棵樹，就係小鄧睇中嘅極光前景啦！
（老友，影極光首要係有極光先得架，哈哈，有都未必係厘邊啵！）

條河結左冰


住宿環境唔錯




小木屋有客飯廳，廚房設備齊全。



兩個房間幾舒適




洗手間附帶桑拿房添！好乾淨整齊。






執好行理，望出去，竟然有落日紅霞喎！今晚有望啦！

今日大家都攰，早D煮飯，簡簡單單食臘味飯，蕃茄薯仔椰菜肉碎湯算啦！
（梗係啦！萬一出極光，都唔知餐飯幾時食囉！）

好！食完飯，帶埋部機出去探測下先，雖然無料到，
但滿天星就係好現象啦！機會好大呀！

22：00，有啦！有啦！



雖然今晚形態唔算靚，但勝在顏色豐富。





估下紅色橫線係咩？（係架直升機飛過呀！）

最盛時橫跨天空，直射到另一邊，
可惜厘邊D屋嘅光污染太多，搞到D極光唔明顯。

第一晚就睇到咁斑斕嘅極光，都好開心架啦！當熱身，12點零鐘收工！（D極光相好假咁喎！）我都認同呀！真係疑幻似真，但發誓無做手腳架！









D1  完


溫馨提示：
雖然影極光對我黎講仍係初哥，但憑多次經驗，可以同無經驗嘅朋友分享下心得，
師兄師姐們咪笑我班門弄斧喎！

～雖然前景靚，能增加整體構圖的美感，奈何每次看準選址，均沒出現極光
  （僅在冰島西奈爾半島嘗過一次）；因此，住處偏僻（這點非讚小鄧不可），
    光源少，即是突發，也能就近捕光，省時舒服，我們多次都在住處門前拍攝。

～我們非專業人仕，測試極光初發，必需利用相機，個人是把快門調至lifetime，
    ISO調到1000以上，焦距無限遠，以手持向無雲／少雲處拍攝，務求在短時間
   360度搜尋光蹤(經常影幾十張都搵唔到)。

～按經驗，如在屋前，從初發至爆光，有足夠時間入屋準備的（如加衣，取腳架等）。

～ 有說極光始發於北面，此行證實並不正確，實際每個方向都有，只是北方較多，
    因此要360度搜尋，以免錯過最佳時刻。

～ 最多人用嘅極光預測網
http://www.gi.alaska.edu/AuroraForecast/NorthPolar

～ 還有更新勤密的網站，Aurora Borealis Forecast , 今次試過，更好用。
http://www.softservenews.com/ 





又出發LU！
17/3 D2  
Ivalo> Inari Lake(68.907644, 27.017627,) >
KarasjokNorway
KarasjokCamping (69.469083, 25.488516)

昨晚有好嘅開始，如果今日又有，咁就。。。。（邊有咁筍呀）
今日無咁辛苦，走百零公里啫！全程主要行E75轉入R92。以下係當日路線圖：




尋晚D蕃茄薯仔湯飲唔哂，用左黎煲粥，加個五香肉丁炒一丁麵，飽哂！

食飽就準備起程啦！出門即見兩位雪地電單車手，佢地好友善咁俾我影相。



咦！厘樣我大鄉里，唔識，唔知係咪天氣太凍，怕電池無電，所以叉定先呢？

我地食飽就輪到架白馬啦！當我地收架平治時已覺有D驚喜，
但又諗，好大食喎！點知係油渣車，仲慳油過冰島架
SuzukiGrand Vitara 4x4 (Automatic)，
行左3128公里，都係花$2500蚊啫！（歐幣平左嘛）



在北歐加油可以先入油，再到店內告知幾號油鎗交款就得啦！

經過超市，又入去行下買D野囉！

卷花紙咁靚，都係免費提供俾顧客。


繼續前行，經過尋日間教堂，今次影到真面目啦！

沿途都係小鄧形容為好一致嘅景色（咪一直喺度喊悶囉！）


標題寫明係實錄，就算景色一致，都要如實上相架啦！





掂啦！無咁悶啦卦！睇下個牌，入挪威境啦！

看圖識字，行車一定要開大燈。

景色繼續一致（係挪威啫！未深入嘛！）


途中準備左三文治同熱湯，北歐可停車地方非常少，想搵個野餐區更難，
就算有，又遇上大風雪，我地多數喺車食就算啦！
景色繼續一致，上面嘅應該係滑雪場。


好早就到Karasjok Camping，輝哥攞房，我當然周圍影下啦！



厘個大細路一見架車，馬上坐上去影番張相啦！

我地都係住小木屋

雖然比尋晚間細小小，得一房。（床單毛巾需自備／另付費）

但廚房客廳五臟俱全

洗手間仲附帶桑拿添！


落行理LU！尾箱足夠擺野。
 
咁早到，當然四出睇下環境啦！住處周圍。（雲量頗多喎！）





跟住揸架車出去兜下



十零分鐘就到sami museum，裏面展覽有關薩米人嘅生活點滴。






可惜只能望門興嘆呢！

回程途中，執番個日落尾聲。



架車只能泊在避車處

路旁嘅宣傳牌


天空雖然有雲，但天晴，機會總係俾有準備嘅人嘛！
所以一定要早D食飯，今晚食三文魚豬扒飯，雜菜湯同沙律。

飯後開好腳架，沖定薑茶，當然出外望天打卦啦！
雲量有五成，不過老天仲係俾機會我地，
有啦！頂上中間偏左，仲有右上呀！（睇唔到呀？）

睇唔到？ZOOM幾張近嘅！睇到啦卦！





嘩！唔係咁好彩呀！又係彩色架！

底位都有啦（樹頂對上）！唔同你玩住，嗱嗱淋入屋準備先！
（要加衫攞腳架嘛！）仲使講咩！一早開定腳架放哂喺門口啦！
其實厘個時候先七點幾（睇個天仲藍色就知啦），無諗過咁早就有。

 
厘個遊記話明係＜實錄＞，所以不論靚唔靚，只要有描述性嘅相 ,
都會放上黎，希望大家唔會覺得好垃圾啦！
雖然唔知當晚係廿年一遇嘅九級大爆發，但都感到有排玩呀！
先黎頭盤，個天仲係藍色。


右邊仲係多雲






嘩！成天都係，都唔知影得邊忽，算你有廣角又好，魚眼又好，
除非你分身有術啦！否則，每次只能曝一張囉！

厘張係頭頂高空，無前景可言，但七彩變幻，如遊龍騰空。





通常爆完一輪就會靜落黎，雖然仲有，但比較靜止同綠色嘅！






弊！腳趾係咁抽筋，趁首輪完畢，入屋加多對襪，飲杯薑茶，換番條羽絨褲先。
（一早沖定哂啦！喺屋前就有厘樣好）
搞掂！出番黎都未上演第二輪，企左陣，又黎啦！



睇下以下三張，好神奇，睇住D雲竟被強極光趕走呀！







嘩！老天實在太厚待我地啦！第二場，足足爆成個鐘，
好彩加左對襪換左條羽絨褲啫！今晚實行持久戰啦！！！
留意下前景，厘部份嘅相係從不同方向影架！




以下厘四張，可以呈現紅綠光嘅變化。








咁都算爆到七彩啦卦！

  
 天頂嘅一樣精彩，影左咁耐，都仲俾機會我影番幾張，當然亦錯過好多啦！
咪講話影相，用眼睇都睇唔切呀！但誠心地大大大感恩呀！
係時候幫佢地起番幾個名啦！

蝶舞光影






花放






唔知幾時ZOOM左，棵樹對唔到焦，矇左！我要求好低架咋！照收貨。                            
個圓點光唔係月亮，係北極星呀！


仙袂飄飄






簡直係極光停不了，雖然爆完一輪，睇清楚好幾條光帶又升上黎啦！

等左幾分鐘芝麻，又黎一幕幕嘅
驚艷












稍息中（咁都算稍息，有人參極光團都係睇到咁咋）


跟住又黎一場蛻變








緊接嘅係龍捲風







飛龍在天



火鳳凰


夠熱鬧未？唐代嘅飛天都黎埋啦！


再黎就係光影盛宴




最後由尼斯湖水怪之魂壓軸，整場極光騷，直情令人透不過氣呀！





當然之後仲影左好多啦！不過精彩嘅我都交哂出黎啦！
無私藏架！（唔夠喉?）
影極光誘人處，係大家同時同地，都可以影出不同效果，
最多我面慒D，借埋輝哥D相放上黎益大家啦！

輝哥作品（佢支係廣角鏡）




















當然仲有小鄧嘅精彩畫面啦！不過佢可能覺得大家睇到膩，
遲D先同大家分享都唔定架！
其實當晚我地由七點幾影到凌晨一點十分，簡直興奮到透不過氣
（剩睇我寫得幾興奮都感覺到啦卦），連見慣極光嘅北歐住客，
都行出黎睇到嘩嘩聲。

今次歐洲北極圈之行無揀錯，睇下＜騎呢騷＞四人組，人捕極光，
佢地捕極光，幾鬼嘆吖！相比網上朋友話：當晚喺黃刀，
要頂住 -30度嚴寒，我地舒服得多啦！



D2  完


出發啦！
18/3 D3  
Karasjok>  Alta
住宿:Alta River Camping (69.929587, 23.262536)        

相比較早兩日，算係較平淡嘅一日（無極光嘛）。
原本由R92轉R93，走兩百公里，但小鄧話全程行E6靚D，走多50公里 。
以下係D3嘅路線圖：

   
今早食鮮奶麥皮、多士。

講起多士，北歐嘅Guesthouse唔興有多士爐，
今朝想食多士，點搞呀？咪用煲烤囉！（連煎pan都無呀）
輝哥又製作佢嘅至愛，花生醬香蕉多士。

食飽，九點零鐘啟程，向Alta邁去啦！尋晚落過雪，途經景色雪景偏多。






三角形嘅就係尋日去過嘅Sami museum

挪威好多汽車酒店，甚至有D富裕家庭都有一座，
方便佢地周圍去到邊，住到邊。

繼續前行，雖然景色都係＜一致＞嘅雪山、河流，望落就靚多啦！
（起碼小鄧無再嗌悶嘛！）



小社區內嘅教堂

 

行左個零鐘，終於有個靚景又可以停車嘅野餐區，午餐都係芝腿治加熱湯。



河上嘅冰開始溶





可以睇到冰塊被水流互相擠壓而突起

行左一個鐘





有位停車影相，又落下車。





厘部份河上嘅冰，被河水擠壓得仲緊要，離岸較遠嘅已經無冰啦！



厘D峽灣景色，夏天時較色彩繽紛。

挪威嘅冬天，如果無剷雪車，真係不敢想像，
我地見大雪時，道路剛剷雪，唔夠半個鐘，又被雪封。


挪威嘅高原、山地同冰川佔左2／3，河流、沼澤無數，
道路多係蜿蜒曲折，唔係依山，就係傍水，所以景色一致
......靚呀，挪威嘅峽灣出名靚嘅！








今日雖然無陽光普照，起碼唔使捱風雪，道路好走好多，亦安全好多。




經過厘個鎮就到我地嘅住宿地方啦！







見到厘排木屋同兩座燒烤屋，就知到左啦！



我地住Alta River Camping，睇個名都估到近河邊啦！
厘座係Reception同周圍環境



厘個大細路見有架滑雪橇就攞黎玩，職員見到仲笑住話，
係俾住客玩個喎！（嘻嘻！又係幾好玩架）

厘個係佢地嘅標誌


客飯廳唔算大，都設備齊全。



有兩個相同嘅房

洗手間OK，無桑拿房，其實我地都無乜時間用，所以有無都無所謂啦！

搞掂哂，落好行理，又揸車出去入油兼睇下附近環境。


今晚晚餐好豐富，蠔豉螺片炆冬菇，仲有大白菜墊底；梅菜豬肉；
臘腸潤腸臘鴨飯，冬陰功湯。

當晚天色好差，落微雪，無緣見極光啦！唯有早抖！


D3  完



19/3 D4  
Alta>Alta museum (69.947466, 23.186522)>  Rotsund  
住宿:Spakenes Sjobuer (69.76325, 20.46353)

今日全程沿海灣走E6，雖然無精彩嘅極光，但途中欣賞左一段靚景，
又遇上全程最驚險嘅路況，真係心血少D都唔掂呀！

D4嘅路線圖：


尋晚食剩D冬菇肉絲，又買左椰菜，今朝早餐一於食湯麵啦！

食完早餐，出門口望下個天，太陽點努力都穿唔過D雲。



開始上行理出發LU！門口嘅冰真係好跣，好在佢地喺屋前舖左碎石啫！

住宿旁嘅AltaRiver

望番轉頭左邊就係我地住嘅Alta River Camping

過橋啦！前面山路好斜，有成9％斜度，仲要係之字路，小心！

挪威嘅路牌好清晰，中間嘅係地方名，93係所在公路名，125同4係向箭咀方向嘅距離。

厘個兩萬人口嘅城市，房屋當然要有番咁多架啦！


黎到AltaMuseum，厘度出名睇岩畫，屬世界文化遺產，因為喺露天，
被雪遮蓋，所以要5月後先有得睇。
門票：冬季65NOK，夏季95NOK（兌港幣差不多1：1）
博物館入口






我地入左大堂，見館內無人參觀。



職員又答應俾我地出觀景台走走喎！一出去就係有枱椅嘅設備。

如果係夏天，可以繞厘度嘅路同棧道參觀（而家被雪覆蓋哂囉）。



呢！就係厘D岩畫la!（想知由來喎！）
請入以下條LINK瞭解啦！
http://www.alta.museum.no/sider/artikler.asp?hovedmeny=hovedmeny-norsk&forside=true&mal=forside&meny=forside-norsk








唔入博物館，走LU！ 

汽車沿E6行走，黎到個內海灣，又有避車處，停低影下相囉！





沿E6上山，過完隧道又入隧道（乜咁多隧道架），





終於喺隧道前見個高位可停車，喺高位影，仲靚！
大雄喺度影乜？


咪喺度自拍厘個景囉！




又過隧道，再走幾分鐘車，嘩！正呀！梗要停車啦！
原來厘度先係觀景台，我地頭先太心急啦！（咁樣好，越睇越靚嘛）










簡直塊鏡一樣




影完景，走去後D高位影下人先。

呢！個景點標誌喺度。

全景係咁


厘艘船太大啦！好似浴缸裏面嘅玩具咁！（如果係隻鮮色艇仔就靚哂啦）

厘度風景咁靚，食埋午餐啦！都係熱湯同三文治。
享受完美景，走LU！（其實前路險阻正等住我地）
途經好多厘類結左冰，呈藍綠色嘅冰瀑布。



路過小鎮


鎮內教堂


小鎮位處山谷


厘度夏天四周都係瀑布，不過而家都一樣靚。



又黎一個小峽灣


厘個係漁民嘅碼頭

對出海面有養殖場
 
又黎雨雪啦！

                                
雖然行緊車，都清楚影到一排排嘅房屋，睇黎大部份係民宿。



仲可以見到燒烤帳蓬嘅支架，厘度夏天應該七彩繽紛。




亦有好多汽車旅館



甚至小艇，厘度夏天應該好熱鬧。


沿途景色




天氣越黎越惡劣，厘張相可以睇到正大風雪。

其實係雨夾雪，視野越黎越差。



過左Sørstraumen橋，我地一直沿路上山。

好左一陣，又迎來大風雪（仲勁過頭先），最怕厘D飛快大車經過，
引起嘅強風，簡直可以吹郁架車。

見唔見路桿由紅色改成螢光黃色呀！厘段可謂驚心動魄半小時呀！

唔止大風雪，你睇個視野！

根本連一兩公尺都睇唔到（隱約見到D樹），條山路又窄，又唔可以停車喎！
最弊GPS度睇到前面係個急灣吖嘛！

小鄧眼力好，只能模糊咁估枝路桿位置（你地睇唔睇到支桿呀）

終於過左山頂厘段驚憟漫長嘅路，大家總算鬆口氣，安然度過之後，
小鄧就抵死咁話：咁先攞到驗經架嘛！太平淡你地邊有野講呀！
（又唔見佢頭先咁風騷，咪鬧我篤爆啦！佢頭先連呼吸都唔敢大力呀！）
我地架車一過，封山嘅標桿即降，表示厘段路暫時封閉啦！
（應該封啦，真係好危險呀）
海面起哂白頭浪

可能被高山所阻，過左頭先果段，天氣穩定好多啦！



終於捱到黎野餐區，停車抖抖。




  
繼續前行，天色仍暗，但總比頭先好太多啦！





過左橋，又黎到一個漁港。



對面山上卦滿冰雪



地上亦舖滿白雪，不過千祈咪行落去呀！唔知有幾深架！

Northern Troms 嘅導遊地圖

休息左一陣，繼續前行（厘個係修路牌），快到住宿點SpakenesSjobuer 啦！



住宿環境唔錯，客飯廳都幾大。







廚房夠大，設備齊全。

洗手間附帶桑拿室






兩個睡房喺樓上






雖然落雪，窗外景觀仲睇得清。

屋主仲有間玻璃屋添！（聽朝帶大家行下啦）

今晚晚餐有紅蘿蔔菜乾湯、煎三文魚、腰果肉丁炒雜椒，仲有大白菜豆豉鯪魚。
風雪之夜，極光就無啦！

唯有食碗椰汁雪耳補數啦！


D4 完


20/3 D5  
Rostund> 途中觀日蝕>Tromso
住宿: Ersfjordbotn Kystferie (69.699637, 18.618917)

今日天色仍差，預報由三粒雪減為一粒（好囉！起碼路況無咁惡劣），
哈哈！(要求果然低左好多吓！) 有時係東邊日出西邊雨，
口痕團友話：厘D咪叫一啖沙糖一啖C囉！

言歸正傳，今日走二百零公里，主要由E6轉R91，再轉E8，
跟住入862後就連過三個島，到達住宿點啦！
（乜無景點架）一開波就話左無特定景點，只係邊走邊睇嘛！
當日路線圖如下：

早起見窗外風雪停左，竟然仲有少少陽光嘅希望添！





出去行下囉！架車變成咁，都唔知一陣揸唔揸得郁添！（大吉大吉！）

記唔記得我話過會帶大家參觀間仲靚嘅玻璃屋呀？
（尋日入黎一直大風雪，梗唔去啦）

嗱！厘間先算係似樣嘅玻璃屋嘛！你睇下，有小廚房（仲裝修緊架）。

有洗手間之餘


仲有得沖涼


外望有山有海，如果有極光，肯定正到痺啦！


要屋景，有屋景，無敵呀！

仲要只此一間，獨家住宿，問左老板租金，超抵，2000NOK／晚。

我地就住有燈果間小屋，當然比玻璃屋平好多啦！四個人住先一樣價錢。

四周環境
  

返入屋煮早餐囉！今朝食腐竹白粥，菜甫煎蛋，炸菜雲耳，雜椒肉丁炒麵。

早餐後，竟然有微光照耀雪山，雖然雲多左D，喺厘兩日算係美景囉！



佢地形容得啱，又黎風雪，真係一啖沙糖。。。。

之前查過，北極圈嘅國家可以睇到日全蝕，行程安排原本留喺度睇日蝕，咁嘅天氣，免啦！
起程啦！真係好嘅唔靈醜嘅靈，一上車，踩極油都係空轉，架車話唔郁就唔郁，
原來蝕雪太深，搵老板幫手啦！佢話推車喎！（掛住幫手，無影相添）終於搞掂！
早上一段路，天色馬馬。









仲天昏地暗


又遇上整路






過左厘段，天色好左D，當我地睇到太陽時，已過左全蝕LU！

終於有個避車處可以停低影下，我無帶長焦，只能夠影成咁！
咦！點解會咁嘅？（折射卦！有無高人可以解畫呀？）

唯有借輝哥幾張充撐下啦！（多謝輝哥）



中國古人話，天狗蝕日，乃大凶之兆；又有人話，親眼睇到極光，會一生幸福；
嗱！我兩樣都睇哂，算打和啦，只求無風無浪，有得去旅行就得架啦！



出發行左個零鐘，車尾已舖滿雪，要剷雪先得。

                               
又行一段，見風景唔錯，停車影相兼望下個日蝕，出番好多囉啵！

相信頭先天色最暗，風雪交加時，正係日全蝕嘅時刻啦！(就算有得停車都影唔到啦！)
又係一個峽灣，仲有養殖場添！





又繼續行程，景色仍然一致。。。咁靚，都係雪山、湖泊、河流嘅組合。











終於見番個藍天白雲 , 又有地方停車影相啦！



山體前掛滿冰雪



公路上都係入下隧道，出下隧道。



想開番架車，睇怕要一輪功夫囉！其實唔使好耐，泊喺度兩三日就可以搞成咁架啦！

風景越黎越靚，小鄧開始發＜偉論＞啦！
佢話：厘條線真係唔適宜自駕，咁靚，得你地影相，又無得停車。


終於有得停車啦！


唔好睇D雪又白又滑又可愛，踩落去，肯定雪足深陷，等人救都得啦！


 

開始入鎮，密密嘅影相機等住我地，不過有提示會影超速嘅，
厘個係提示＜前面影快相＞嘅牌。

大概500-1000米之內就會有影相機
（無陰你喎，仲想點呀），目的想人人安全駕駛啫！

每日必見嘅剷雪車，見到佢喺前面，安全感都大好多。


越黎越多房屋


終於黎到極光勝地Tromso啦！

我地當然唔係住市中心啦！而係沿862過兩條橋，
經過兩個島之後，就到達我地住嘅島Ersfjordbotn。
留意下，又有快相啦！



跟住就有相機




我地住喺海邊嘅小木屋，當然唔係厘間咁豪華架啦！（Reception黎架）

係厘間啦！要沿山路落一小段，大風雪起黎，你都咪話唔驚！

厘個峽灣係影極光嘅熱點，所以喺度住兩晚囉！
四出行下，天氣好差，預報仲差，選址好都無用，唔使諗啦！






 

客飯廳幾寬敞


尤其是窗口，直情將外面景色引入成一幅畫咁。

廚房設備齊全


剩係厘排刀都夠氣勢啦卦！

兩個睡房都有小窗觀景



今晚食忌廉湯，白汁豬扒意粉配青紅椒。


唔好意思，食左D添！


雖然雲層好厚，都出去探測下啦！叫做影番個夜景，其實雲層之上嘅極光好活躍，
因為影到雲嘅邊緣有綠色，但要面對現實，今晚食白果啦！

一於補番個芝麻糊做宵夜，希望在明天（雖然天氣預報都話無機啦）。




D5 完


21/3 D6  Tromso sightseeing
住宿:Ersfjordbotn Kystferie(69.699637, 18.618917)

      
因為係行前預訂酒店，就算天氣唔好，都會喺極光勝地Tromso住兩晚架啦！
其實玩極光線，除非好多時間hea，否則都要捱夜，幾攰架！
所以今日輕輕鬆鬆出去周圍兜下，仲可以返黎食個午餐，當係整休囉！
早餐食餐蛋麵配咖啡茶。

算有少少藍天，景色還可以。





因為雪地行車，我地車身較低，轆同車底之間積滿雪，加上我地唔夠經驗，
無即時清理，搞到結冰，行車好容易唔穩定（少少跣軚），
之前Spakenes Sjobuer嘅老板建議我地去洗車清雪，於是見油站有洗車服務，咪洗埋車囉！

洗車前



之前我地都清理部份積雪先黎洗車架啦！地上烏黑嘅雪塊，就係從車底清理出黎嘅！

先入裏面買張洗車票


喺洗車房旁嘅電腦scan一下張票

就可以將車駛入洗車房


其實洗完當然乾淨D，但車底嘅雪只清到八乘啫！



 繼續行車,過橋中

橋上掛住紅白相間嘅風標，係大風警告。（日後仲見到個全紅嘅添）
Sandoysund bridge


天色好番D，風景唔錯（維持到今晚就好囉），過左橋搵個位停車影下相。



再到個高位，又影過。

沿862公路，穿過Tromsoya再過Bruvegen bridge，俯瞰兩岸。







北極大教堂係厘度嘅標誌



過左橋後，再搵停車位置影相（都係唔夠全面）。









黎到纜車站，厘度可以坐纜車上山觀極光嘅！


厘個高位影條橋就差唔多啦！

內灣風光


中午返Guesthouse食pizza加烤雞膇





食完午飯，見天色越黎越差，都係趁無雪落，出去逛下。

遠處峽灣仲有少少光，希望今晚少雲無雪啦！（天氣預報話可能性極低囉）



如果有陽光，厘個景肯定仲靚。






好多極光相都係喺厘個灣影嘅！（可惜我地無緣呢）


居民自家哂製嘅魚乾比較受保護

仲整兩件衫作假人，嚇走D海鳥啄食D魚乾。

繼續沿峽灣進入小村，望番轉頭，最近海邊灰色間小木屋就係我地住架啦！


有疏落嘅小屋，但無乜行人。

難得見到兩位小女孩（佢地又難得見到我地喎）

初時怕醜，後來仲攞手機出黎同我地影相添！

小心喎！海邊危險呀！

繼續前行


可能落左兩三日雪，下午終於好天，媽咪帶小朋友出外玩下啦！佢地都好友善，俾我地影相。

小女孩返屋企啦！原來係間紀念品店。

停緊課嘅學校


返Guesthouse途中，遇上來自台灣嘅遊客，佢地專程揸車黎厘個島行下，可惜天氣太差。


返去煮飯食啦！今晚有菜乾湯，螺片炆冬菇（大白菜墊底），仲有豉汁蒸三文魚。

食完飯，天空雲層極厚（好過尋晚），雖然有一剎那搵到光蹤，
但之後雲層越厚，再搵唔到啦！都係入屋早D抖啦！



D6 完


22/3 D7  
Tromso > Rya-tunnelen > Svolvear (Lofoten Island)
住宿: Svinoya Rorbuer (68.234306, 14.579667)

今日本來可以走回頭路，從E8進入E6嘅，但小鄧選擇行858，
俾Kr100經Rya-tunnelen，再入番E6，佢話梗要行唔同嘅路，
睇唔同嘅景啦！最後進入國王之路E10，足足要走400幾公里，
比較長途，小鄧，辛苦哂啦！

以下係路線圖：

今朝早餐食鮮奶麥皮，煎蛋多士（得一件嘅），無多士爐，喺鑊度烤緊嘛！



執好行理上車（其實行車前已經清左好多車底嘅雪架啦）

太陽仍穿唔過厚雲

挪威海拔唔算高，最高都不過2500米，但境內山嶺非常多，沿途靚景不絕。

嘩！野生馴鹿呀！咦！無角嘅？上網睇，原來公馴鹿每年12月左右脫角，
而母鹿就唔脫角，所以聖誕老人嘅鹿車係由母鹿拉嘅！

隻鹿好＜姿悠淡定＞，完全唔驚車，仲企定定等過馬路，
咁難得嘅機會，我地梗係停哂車影厘位俊男啦！
見唔見隻鹿呀！都幾大隻架！

隻馴鹿一定心諗：我讓你，你都唔過，我過先啦！咪撞埋黎呀！我趕住赴約架嘛！

佢姿態美妙咁慢慢踱入樹林LU！

拜拜你條尾啦！



 
終於黎到Rya隧道，厘條隧道長2.7公里。

厘個牌寫住＜紅燈著時，表示隧道關閉＞。

厘個牌寫明要俾Kr100架！（乜機都無，又無人收費，喺邊度俾錢呀）個牌底下方形嘅圖案，係話可用Autopass。

厘條隧道算好行，好快就出隧道啦！

大家都睇住有無收費站／油站，因為有網友話係喺出隧道第一個油站俾錢，
弊在行左老遠，都無見到油站呢？



搵唔到俾隧道費嘅地方，又唔想俾租車公司收取高昂手續費
（好似要成Kr320一單），唯有麻煩D，上網登記Autopass啦！




溫韾提示：
如果大家玩挪威要收路費嘅城市，例如卑爾根，奧斯陸之類，
就一定要申請番個Autopass戶口啦！方便之餘，唔使俾罰款或手續費嘛！
登記費Kr1，先用信用卡過數Kr300，用完自動增值Kr300，
餘額會退番入你戶口（我地三個月後收回退款），好方便。
仲有，當你使用收費道路後，三日內登記仍然有效嘅，
但之前付左費嘅就無得退架啦！

登記及說明嘅網址如下：
http://www.autopass.no/en/visitors-payment



隧道出黎後，雖然路旁、山腳經常見有小屋，但馬路真係幾乎無車。
好少見車房喺二樓

沿途風景










豎左國旗，唔通係政府機關？

繼續都咁寧靜


對面似係個漁港




終於見到馬啦！



咦！樓盤廣告喎！你地啱唔啱呀？

開始進入小鎮，有D人氣啦！有教堂，仲難得見到行人。





經常都有告示牌提醒司機小心鹿隻

開始起風雪啦！

最怕厘種對頭大車

視野有D模糊，好彩仲睇得清楚。







雨雪吹到玻璃窗上，立即結成冰。



厘條木建嘅天橋，應該係行人卦！

終於影到厘對封山嘅路桿啦！封山時，對路桿會降下。



繼續大風雪


終於到左個似樣嘅鎮，停車休息下，食埋午餐先再繼續行程。






停車後，望下架車，幾乎唔認得架車，又要清雪啦！


留意轆嘅四周，積滿哂雪，初時無即時清理，過夜後結冰，好易引至跣    軚。
黎到停車地方，喺車食左三文治，飲D熱湯，休息一陣，繼續行程啦！
  
雖然落緊雪，但厘條村真係靚，停車影下相囉！

如果有陽光，厘個倒影應該好殺食。

前行中，好多彬樹，好有聖誕氣氛咁。（其實天氣好差）


十足聖誕樹




少見嘅行人天橋

你話無佢點得呢？

沿E10過Tjeldsund橋





橋上又掛風標，今次係紅色，應該風速更勁啦！

過左橋，最多都係搵到個咁嘅位影相，唔理想，走LU！

哈哈，我叫佢做一樹島(snipholmen)，我喺Google地圖見到，
原來夏天真係都得一棵樹啫喎！

睇到架剷雪車，好似正同風雪搏鬥咁，唔該哂！



天氣仍然好差，而且發覺架車有少少跣軚，都係小心為上，停車睇睇，
D雪蝕實哂個轆，唯有整走D雪啦！你睇清楚，得一個剷，連匙羹都出埋
（雖然唔好用），好過唔做啦！如果有條熱水喉就正啦 !


厘D只係一少部份咋！

 
繼續前行，條路好D啦！



又過隧道，厘條長1.3公里。

嘩！一出隧道就見靚景。

又過隧道（挪威隧道真多）

四面山嶺


雖然睇黑白片，仍然都咁靚。





影完相再前行，又過一條隧道。



雖然落雨雪，都有藍天喎！

黎到厘邊，豁然開朗，天色同路況都好番好多。

唔係黑白片啦！好迷人嘅村莊。

仲有雪山做背景


雖然隔住玻璃，都掩唔住湖光山色嘅美。







終於搵到位停車影番兩張相，但都無頭先個景咁靚啦！
所以小鄧咪話厘條線不宜自駕囉！（如果你唔抵得諗，邊玩得咁平呀）


 
六點幾，終於到左漁村Svinøya Rorbuer，因為到得較遲，
嗱嗱淋攞房先，咪阻人收工。
客飯廳寬敞




窗外景色如畫




房間更好，兩個套房。



雖然天色唔好，睇極光機會微，仍盡早食飯，早D休息，養精蓄銳嘛！
尋日浸多左冬菇，大家又鐘意食，今晚食埋佢，天寒地凍，
臘味飯真係越食越好味（老人家特別鐘意咋卦），
蕃茄薯仔易買易煮，又平，不二之選啦！

食完飯出去影夜景，雲層仲厚過尋晚，唔好諗啦！
漁港當然泊滿船啦！

仲有一排排嘅小木屋添！


坦白講，當架車一上島，就聞到濃烈嘅魚腥味，真係唔係人人頂得住嘅，
不過入左屋就完全聞唔到啦！
以為條漁村會好靜啦！點知原來好熱鬧下，好多遊客咪就為左佢而黎囉！
厘度有好幾個超大晒魚棚（見唔見左邊遠處都有呀），專業晒魚乾，
同時亦作旅遊嘅招徠，所以每個魚棚都打晒燈架！影相？絕無問題啦！

你地有機會黎，千祈唔好學我咁豬仔，風雪天走入去影相，
結果俾上面D水滴落衫同帽度（係又腥又臭架，死蠢！）
今晚無極光，早抖啦！



D7 完  



23/3 D8
Svolvear > 120km > Reine(67.934652,13.090724)
(Lofoten Island sightseeing)              
住宿：EliassenRorbuer(67.946182, 13.133700)

今日雖然只沿E10走，但算係精彩嘅一日，國王之路景觀真係靚到無野講
（弊在無乜地方停車呢），咁都好嘅！有得停車，肯定天黑先到囉！
我唯有一路行車，一路前面左右咁有影錯，無放過啦！
（有時仲要揩輝哥油，連佢個窗口位都殺埋）小鄧要專心揸車，
最多炸型話我影得唔靚啫！起碼補番張相俾佢慢慢睇嘛！

D8路線圖：


今朝訓醒，出去望下，竟然天色開朗，有藍天呀！（天氣預報都知啦）

其實厘度全島嘅Guesthouse都屬同一公司嘅！睇下周圍泊滿車，就知幾好生意啦！

嘩！陽光呀！早兩日無陽光唔緊要，今日係景觀精華，有陽光，厘程又賺啦！
心情都輕鬆好多。（梗係，行車都順D安全D啦）



返入屋煮早餐LU！大家熟識嘅餐蛋通粉（中間果碟係咩？）
係涼拌海蜇，OK架！（配搭有D騎呢喎）
喂！我地改左名叫<騎呢騷>四人組，騎呢配搭好正常喎！



食完早餐，出去四圍遊下，D枱椅舖滿雪，當然無人坐啦！

原來今朝有霧淞，可惜個天唔夠藍呢！

沿住條路行上橋，由於厘度除左做旅遊，亦係魚獲處理場，
所以好多廠房、晒魚棚，更多嘅係大貨車出入，搞到條路又黑又濕滑。
（為靚而有特色嘅景觀，無計啦！）



四周環境






幾多斜路，行路時真係小心翼翼，好怕跌親。

挪威人好多漁戶，境內又多湖海，所以好多家庭都有私家船隻停喺屋旁。

厘度島嶼多，所以周圍都有山丘，加上落雪，成幅畫咁。

漁港碼頭



 
好多Guesthouse都建喺海邊




厘個島真能兼顧到旅遊與漁業嘅相互發展，某程度係因為厘D晒魚棚夠吸引。


厘個係運輸魚獲黎厘度加工嘅碼頭

有大型起吊貨柜機

厘邊D屋應該屬本島居民嘅！


處處都景色迷人

從高位俯瞰




條路又斜又濕滑又污糟，小心！小心！

民居內街就好少少，唔住小木屋，都有酒店。

鄰近嘅幾個小島

橋上風光


島上民居






島上頗多魚產公司，由捕漁、處理至出售，一條龍做哂。



我地就住厘類型小木屋



厘兩間原本應該係燒烤屋，不過而家用黎放工具。

好迷人嘅港灣


向山向海，都係一流靚景。


 
行過間公司門口，見佢地將整理好嘅魚用雪蓋住。

藝術畫廊博物館


香港人見到咁嘅居住環境，真係羨慕！

我地就住喺魚棚旁邊厘間




佢地係魚身同魚頭分開晒嘅！




雖然唔可以坐，但作擺設，都好靚喎！

嘩！山頭都被照耀得雪白，今晚有希望啦！



經過間豪華嘅Guesthouse，行入露台參觀下囉！唔住都睇下嘛！

我地住紅色細間嘅，對面白色嘅就豪華D，可住多D人
。

厘座唔知係咩機，我估同包裝有關卦！（地下咁多包裝好嘅貨）



天色越黎越好


咦！有隻古老船隻經過。

天氣好，倒影都清晰D。
 
告別SvinøyaRorbuer，沿E10驅車邁向EliassenRorbuer，
沿途靚景不絕，目不暇給，怕大家睇到悶咋！

魔界呀！都話上天厚待我地架啦！留番今日先俾個晴天我地，大感恩呀！







原本嘅觀景台被厚厚嘅雪覆蓋，根本唔敢行出去呀！




影完相又前行，路經一座教堂。

雖然未算陽光普照，但滿足啦！

陽光照射下，湖光山色都加幾分美態啦！





需要時會著紅燈，控制相向車輛流量。


（你好煩呀！）咪厭我煩啦！國王之路出名風景靚架！又無得停車，唔影嘥料嘛！








其實我差不多影哂D路況俾大家睇架！目的係俾自駕嘅朋友們，
參考厘條線嘅路況同天氣，如果喺冬春季節去，有個心理準備啫！





靚景停不了！專心揸車呀！


終於有位停車，影番張正經D嘅！


全景觀


繼續行車，靚景梗係影唔停啦！



又有個避車處，落車LU！整個全景先！





貴州有個六六大順，厘一排六六大順嘅山唔弱喎！

 
嘩！邊似人住嘅地方呀！



厘個避車處算寬落囉！



繼續前行，咦！斜坡上係間博物館，不過無開。



斜坡下對住條橋，風景又係無得彈；一於喺度影相兼食埋午餐。









繼續行程啦！美色一路伴住我地。

厘度嘅景點標誌成個如意結咁，同其他地方嘅四葉草標誌唔同，
前面景點好似係個鳥類觀測站嘅特殊建築，我地唔會去啦！


厘D靚景，只能喺行車途中匆匆影低咋！





哈哈！要揩輝哥油啦！

靚景齊齊影啦！

唔使爭LU！落車影啦！

使唔使咁正呀！





終於可以企定定影番張厘個牌


 

雖然上車繼續前行，但我部相機都未停過，
真係多得數碼相機嘅發明，唔係邊有影得咁爽呀！
成幅油畫咁






雖然行車中角度所限，仍然想同大家分享沿途景色，靚。。。好靚。。。超靚。





有得停車，又未必有行車時咁靚嘅景LU！

對面山體鑲左個標記，大家喺度研究，
小鄧話：係三個人喺船上釣左四條魚喎！（好似有D文路喎）

繼續穿插於美景中




又停車影幾張


挪威好多島嶼，稍大嘅都有橋樑連接，所以有好多橋橫跨島嶼之間。



諗番起，喺挪威揸車，安全過冰島，起碼厘D峽灣山路有圍欄吖！安全感大好多。
 
初時睇到厘個牌，仲以為表示厘度係防風或防山石走廊添！
（哈哈！都話你白癡架啦！）原來個旋風符號係Moskenes市嘅標誌，
其中包括我地要去嘅Hamnøy同埋Reine,即係話我地已進入M市囉！

我估都有防塌方作用卦

厘個牌就係指示個名家設計嘅廁所，之前已知道喺住宿附近，                            
休息站公廁（67.962284,13.152861）只有夏天先開，
結果唔記得去添！

個廁所係咁嘅樣（夏天黎到就記得去啦）（網上相片）


今晚我地就住厘度Eliassen Rorbuer，都係一個小漁村。

環境比尋晚果間仲正





趁有陽光，放底行理後，立即上車去Reine嘅觀景台(67.928291,13.084268)。
由Eliassen Rorbuer到觀景台只需幾分鐘車程
路線圖：

 
經過個巨型晒魚場

個觀景台成半月形，好長，可以唔同角度影。

觀景台望嘅係我地住宿方向，好一個內港漁村，好多封面同名信片都係喺度影嘅！






嘩！真係好正喎！大美呀！我地已經準備今晚上黎追光架啦！





睇清楚厘D係咩魚？

個巨型晒魚場一直延伸到海邊

今日天氣咁好，有希望。。。搵左個靚位，又有得泊車，早D返去食飯囉！

廚房同客廳設備齊全，仲有張躺椅添！



兩個睡房共有五張床



有趣嘅係廚房頂有個閣仔，反正廳嘅牆上掛左條梯，上去睇下囉！（係放什物嘅）

原來房亦有個，又上去睇下囉！好大嘅，有兩張床，間屋足住七個人。



因為天氣預報，今晚天氣唔錯，極光指數又OK，晚飯簡單D，食擔擔麵、煎三文魚同西蘭花。

夜D仲有腐竹雞蛋糖水添！  
入夜後，突然起風，大風到腳架都吹跌，出去探幾次都無動靜，諗住咁大風，
都係同糖水一樣，食白果啦！四人組商量過，上到觀景台，太大風吹到相機都震埋，
即係有極光都無用啦！反而留喺度，有屋邊擋風，應該好好多。
都係唔甘心，21：40又出去睇下，點知見幾位老外捧住腳架係咁跑，
咪問佢地見唔見到極光囉！佢地好緊張地話：喺果邊！誰知朝指住方向睇，無喎！
寧可信其有，都係入屋＜納野＞啦！再出去，已經好大範圍，不過真係好大風，
我都係厘喺屋邊擋風位啫！（唉！之前搵定個靚觀景台都無用）

唔知同大風有無關，D光變化好大同快。

 
影完一輪，靜落黎，只得綠光。

過一陣，又再舞動。

其實幾個方向都有，只係較靜態，前景又較光啫！

玩到無野玩，影張<極光下的鹹魚頭>，厘個前景創新啦卦！
（厘張相唔掂喎！）咪咁認真啦！玩下搞下氣氛啫！

仲有張＜晒極光的鹹魚＞，味道與眾不同啦！

                                

都成十二點，夠癮啦！雲量開始多，唔玩啦！早抖！

D8  完

24/3 D9  
Reine> Svolvear > Sortland  (Vesterålen Island  
              Sightseeing)
住宿: VesterålenSjøhushotell (68.718750, 15.409933)


今日天氣仲好過尋日，所謂靚景不厭百回看，而且天氣唔同，
反映嘅景觀完全唔同，所以我都會不厭其煩咁放D沿途靚景出黎嘅！
（弊在全條路都靚景不絕呢）

D9線路圖:

（咦！係咪搞錯呀？乜咁似之前張線路圖嘅？）無錯架！之前兩日係向西南走，
而家向東北走，有3／4路段屬回頭路嘛！
（乜咁騎呢？蒸壽司？）因為之前午餐食剩，以為放落雪柜，第日午餐食埋佢啦！
原來唔得嘅！D飯乾硬，（咁咪浪費哂囉！）老人家點會咁嘥呀!
咪將壽司當粢飯蒸熱黎食囉！哈哈！OK喎！我都係平生首次食熱壽司，
再配冬菇肉絲麵，飲埋杯咖啡，唔飽就奇啦！

執好行理準備出發啦！（咦！佢地搞咩呀！）原來佢地要將鎖匙放番入個KeyBox，
個密碼搞極都開唔到，當然最後搞掂啦！走得Lu！

我地住嘅小木屋，環境係咪好正呢？

今日天朗氣清，最後回望。





尋晚D極光就喺厘座山頭後面起架啦！

真係唔捨得走呀！於是再去Reine個觀景台影多次晨景，
咦！可能清晨落過雹喎！



發覺厘度只要有陽光，無論早上黃昏都晒到嘅！                                
如果唔係尋晚咁大風，我地就上左黎影極光啦！網上睇，厘到夜景都靚架！




今日陽光普照，真係晒鹹魚頭架！（咪望住我啦！唔係我吊你地喺度架）



經過海邊又有新發現，厘度係博物館嘅一部份，展品都係與漁民生活有關嘅！











遇上天氣惡劣，厘度隨時會封路。

行厘條走廊，感覺好安全。



沿峽灣有不少漁村同養殖場






國王之路沿途景色點睇都咁靚





我諗厘間紅教堂附近，夏天有十幾廿條瀑布，應該好靚。

 

繼續前行

今日陽光明媚，倒影處處，繼續行車中影個不停。









有得停車就好啦！





真係有位停車喎！



靚到無朋友呀！







整番張駁相，睇下範圍有幾大。

只要肯舉起相機，點影都咁靚。





又繼續起程Lu！

湖面嘅冰開始溶化


點捨得合眼瞓呀！














間中見有浮冰

如果逢靚景都停，厘條路真係有排行囉！



又黎到之前停留過食午餐嘅地方，今日天氣好，可以落車食得舒服D，
今日帶左雞中翼同熱湯、麵包等。

 

食飽繼續行程，又越界影埋輝哥果邊。



認唔認得厘度？咪係之前住過，好有腥氣嘅漁村Svinøya Rorbuer囉！
費事入去，沿途喺車影相算啦！




住嘅時候無咁好陽光，今日靚D。






哈哈！如果喺中國，厘度多數叫做南天門啦！

都係一致嘅湖光山色倒影，不過我就唔悶呀！



如果落過大雪，厘D雪蘑菇一定好靚啫！（乜你仲想落大雪呀，都咪搞啦，係嘛！）

繼續沿途景色，雖然回頭路，當日無咁靚喎！



停車休息下

 

到啦！到啦！我地就住喺Vesterålen Sjøhushotell，




我地就係住棕紅色果D小屋

外圍聽日先影（點知聽朝大雪啫），今日介紹屋內先。
本來客廳都夠用嘅，但張梳化放正大堂正中，搞到個廳較擠迫。

小廚房喺門後面，睡房要上樓上。

兩個睡房都有唔錯嘅景觀



唔理有無極光，都盡早食晚飯作準備先。

今晚都有極光騷上演，不過比較遜色啦！










D9  完

25/3 D10  
Sortland> Narvik 峽灣>Abisko Sweden  
住宿: CampRipan (67.860701, 20.240594)

雖然由挪威入瑞典，都係走E10，同國王之路景觀差得遠啦！
但今日仍係精彩嘅一日，已經要走400公里有多，
仲遇上兩次大風雪封路（其實封路比硬闖安全多啦），
重點係四人組首次有機會睇極光早場show嘛！
原來都幾特別嘅！厘個經驗好難得。

D10路線圖：


今早起來，外邊落大雪，不過景色好靚（早知尋日到步就影左周圍環境先啦）。

隔離鄰舍嘅車，一夜變成咁。



視野好濛，都係食左早餐先，希望停左雪先再影過啦！

今早食白粥炒麵，今朝D粥剩好多，啱啱好入左一壺做午餐，
意外地發覺粥嘅保溫好好，天寒地凍下，食熱粥好正！

食完早餐，終於停雪啦！可以影下周圍環境。

我地就住厘間小木屋

我地架車泊喺兩間屋之間，清雪較易，淋兩桶暖水就得啦！

 

上好行理，出發Lu！經過D Motel都有生意喎！

對岸港口


大雪過後，景緻另有美態。

其實一路上，我地密密咁遇到厘D剷雪車，發覺款式都好多架！

北面遠處有藍天呀！





可惜我地嘅前途仲係白茫茫一片呢！



唔夠半個鐘，又一架剷雪車，真係厘頭剷完，果頭又雪封啦！

 

繼續努力前行


終於到小鎮油站，可以入油同休息一陣。

出發啦！經過一個牧馬場。

又返到Tjeldsund橋

都係紅色大風警告


國王之路嘅簡介

天氣幾乎同D7一模一樣，黑白片，無新意。

仲有好長路，唔好浪費時間，走囉！

點知遇上封路添！D司機都落車打聽。

等左半個鐘，終於可以郁啦！只准細車咋！大車都係要等。



鬼咁開心，以為暢通無阻啦！（今日比較長程嘛）行左一段，又停哂！都係封路囉！

 

又等左半個鐘，終於有得郁啦！

前面修路兼風雪，只好慢慢走。



行左大半個鐘，又黎？
厘次足足等左超過一個鐘，真係唔知幾點先埋到棧囉！



終於等到有架車開路，叫哂所有細車跟住佢行

天氣真係好惡劣，視野又低，但本地人好快就扒頭，一陣風咁就去左，
厘個就係封路位啦！


剩番D外地車慢慢行

最後D車走哂，剩番我地前面架車蟻行，本住情願遲到好過無到，我地都係跟住蟻行。



山中精靈呀！


就算Troll都敵唔過被雪淹

繼續蟻行，哈哈！一到路況好D，連小鄧都頂唔住，對我地話：嗱！我地俾人扒得多，終於有機會扒番頭啦！

（梗係啦！咁蟻行法，天黑都未到呀）

好囉！到瑞典境啦！



又話瑞典今日好天嘅？都係咁上下咋喎！





厘張相捉得太遲，厘幾位仁兄，由斜坡滑落黎，直至路邊先停，真係俾佢地嚇死呀！

咦！路況又真係好D囉喎！




厘列應該係運礦產嘅列車


睇下！有金光，睇落前途似錦喎！




厘隻款未見過


哈哈！路況越黎越好，隻豬仲成日叫，話小鄧超速囉！
（梗係啦！大家都唔想行夜車架嘛）



雖然無火燒雲呀！但黃昏嘅金光，總令人心曠嘅！



經過滑雪場


終於到左Camp Ripan，嘩！久違了的晚霞呀！
天色真係好靚，但夜左到，再唔煮飯，萬一有極光就打亂計劃架啦！

 

厘個看似房間，其實係廳嘅另一邊。

張床面對飯廳


房間係上下格床

北歐經常落雪，所以多數有個玄關掛褸。

洗手間OK啦！


有輝哥幫手，七點食晚飯，算快啦！（果碗咩湯？）
小鄧唔飲魚頭湯，橫掂有紹菜，咪整碗私家紹菜肉片湯過佢囉！

講黎好笑，食完飯，輝哥仲喺度嘆啤酒，掃餸尾，仲話D腰果最啱餸酒喎！
小鄧就係咁易開門望望（我諗係無意識卦），點知佢大嗌：有料到！
我地齊聲笑，玩野啦！信你先奇呀！
佢一臉認真（一D笑容都無），真架！你地睇下啦！

唔係呀！七點半咋！使唔使咁早呀！個天仲咁光，有都唔靚啦！
老天！可唔可以夜D先上演呀！（無得傾呀）
仲未食完飯喎！唔理啦！嗱嗱淋納相機，開腳架，著衫著鞋出去Lu！
（哈，有D似走火警）
睇黎，今晚場極光規模黎得又快又大喎！
睇唔睇到呀？（無喎！）
俾多張，見到啦！個天咁光都睇到，應該勁架啦！

望落好似雲嘅就係啦！不過佢較薄同移動方式唔似雲咁啫！
  

厘D相喺現場睇，真係有D醜樣，於是一路影，
一路Delete左好多（仲白癡咁自言自語，唉！嘥料，咁早架）






返到黎放落電腦睇，又幾特別喎！好彩無掉哂啫！



其實網上較少見咁早嘅極光相

雖然D相望落差唔多，其實係由天光影到天黑架！




厘條最犀利，橫跨整個天空。




今晚雖然無D2大爆咁勁同多彩，不過能夠遇上，都係唔錯嘅經驗，
由七點半到而家，足足超過一小時未停過。
（唔知頂得幾耐，個天未夠黑喎）

 

（做乜影黎影去都係厘個位架！）

其實四圍都有，只係厘邊較多極光升起，
二來覺得厘個前景靚D囉！Reception果邊都好勁架！

停車場厘邊亦有




厘邊得堆雪，但極光唔弱架！





幾邊都有，但我分身乏術，專心揀個靚位算囉！




真係玩死，個天夠黑啦！但最旺嘅就喺D屋旁光位上面。



其實屋內透光影響唔算大，最忌係射燈同街燈囉！

估唔到今晚可以由七點半影到十二點，我地玩到唔想影，就玩極光加人像啦！
終於玩到十二點，雖然仲有極光，我地都棄權早抖啦！
最後唔知場極光SHOW到幾點啦！
  (喂！成枱餸尾碗碟仲未洗，咪忘記執枱呀！)









D10  完 



26/3 D11  
Kiruna> Lulea> Gammelstad 教堂村(65.645984,22.028595)
住宿: First Camp (65.595617, 22.072150)


今日仍然玩瑞典，由Kiruna去Luleå都要350公里以上，慶幸沿途天朗氣清，
途中參觀冰酒店，好早埋棧，仲有足夠時間玩埋教堂村添！

D11路線圖：


好一個萬里無雲嘅晴天，天氣預報非常準，
相信如果喺度留多晚，今晚都會有極光睇啫！（都賺突啦）

哈哈！以前見朋友影到兩個，甚至三個太陽，我今次都親眼見到啦！Yeah！

Camp Ripan一定要包早餐，無得揀唔包，咁就樂得輕鬆，慢慢嘆！



食物同環境都相當唔錯，我地又唔趕，嘆到夠先走。

尋晚影完極光，忘記調番個焦距，鬆郁濛添！











大堂佈置


厘座係Reception連餐廳
 
食完早餐行返去執行理啦！

去水管都結冰


我地住嘅小木屋有個露台，環境唔錯。

Camp Ripan喺近郊嘅高位，位置幾好。
出發LU！附近有個滑雪場





落番去經過市鎮離開

瑞典亦有好多影快相嘅，不過事先有警告牌。

你咪諗住有警告，到時收油咪得囉！因為距離好近就係相機架啦！
 
途中參觀瑞典嘅冰酒店


直望入去已見酒店門口

老師帶小朋友黎參觀

見唔見到欄杆上嘅冰杯呀？厘度嘅酒吧就係用厘種杯，
你可以食埋佢／拎走都得，唔會循環再用。

厘間酒店唔止有冰房，仲提供普通酒店房。

沿大路入去


入冰房參觀要SEK325（約1：1）架！我地入黎睇定D先，睇下值唔值得買飛。

厘D圓拱裏面係冰房



厘D長形嘅亦係冰房，冰酒店每年深秋興建，春後自然溶化，年尾又再建，
其實裏面只有冰雕同張冰床，豪華D嘅就多張冰枱椅，床墊係馴鹿皮，
當然唔會有暖氣啦！一般冰房留宿係18：00至08：00，停留時間較短
（咁鬼凍，點留得耐呀！），行理什物另存儲物房，浴室共用，不過房租奇貴囉！

冰房唔會有門，只有門簾，呢！右邊塊布簾就係啦！

厘個係冰酒店嘅大門

剛好有小朋友進內參觀，我地見無乜特別，決定唔買參觀票啦！



厘個冰洞係提供房客做免費冰雕活動嘅！小鄧同靚女導師傾偈，
提到哈爾濱冰雕非常大型，原來佢都知，仲一副十分嚮往嘅表情添！



部份作品


厘座冰雕係女導師嘅作品

厘D係住客嘅作品





隻天鵝一定唔係普通住客嘅作品啦！


廣場上有五個帳篷，估計係俾房客觀極光時避寒之用卦！

又一批小朋友入黎參觀

渡假村內嘅小木屋

Reception


厘個大細路又攞人個雪橇黎玩

紀念品商店，裏面D野唔平。

走LU！（唔使失望，過幾日帶大家睇過另一間冰酒店啦！）

 
瑞典厘段E10景色一致，都係兩旁樹木，
少見嘅三線雙程行車，對面有大車都唔使就住啦！

不過密密有影快相喎！60公里個牌係警示有快相，但三個箭咀路牌旁就係相機，
如果超速得多，收油都收唔切啦！

15：00就到今晚住宿嘅First Camp

厘個Camp周圍有小樹林

有休憩場


厘度範圍好大，但緯度只得65，睇極光機會少D，住厘度係因近教堂村，
所以放好行理，立即出發啦！

教堂村嘅導覽圖

建於十五世紀嘅石頭教堂

因為三月份教堂只開放周日，就算五月，都係開周末同周日，所以不得其門而入囉！


教堂鐘樓


圍牆外嘅墓碑


我地將車泊喺訪客中心門口


 
由於當時教堂位處偏遠，交通不便，居民唔可以當天來回，
於是就喺附近建小木屋，遇上禮拜同宗教節日，就黎住一兩日，
後來平時都黎小住，越建越多屋，到十七世紀形成小社區添！



而家有成424間小木屋圍住教堂而建嘅！


現場所見，十室九空，近路邊嘅有少量有人居住。

小木屋多數同一顏色同式樣


有D較寬落，有花園。




有D屋門口被雪埋左一半高

對面街嘅應該係後來建嘅，唔同顏色。

喺村內兜左個圈，見嘅只係三兩遊客。



村前有一公車站

回程差不多到FristCamp，有個火車博物館。





返到住宿範圍，先要插匙卡，汽車先能通過入口。



金光照射到樹林

厘度亦靠近湖邊

遠處見到嘅火車，都係博物館其中一列，只係被厚雪包圍，我地唔冒險行過去啦！


返去準備晚飯LU！旅程進入倒數，開始清倉啦！
當晚天晴，滿天星，但唔見有極光，連追光三晚，今晚早D休息啦！


無野好做，介紹下間屋嘅設施啦！
厘間係我地全程最平嘅住宿，客飯廳細細地，但足夠我地用囉！



兩間相同嘅房


洗手間兼浴室





D11  完   



27/3 D12  Lulea> Rovaneimi
住宿: Kotareitti Apartments (66.508817, 25.763754)


因為異地交車費用昂貴，所以hea住回程返芬蘭，
路過就輕鬆行下，無指定行程。

D12路線圖：


尋晚食剩D餸，今朝加埋入D湯麵度，又清左部份啦！

早餐後出發邁向芬蘭，因為要返羅凡尼米交車嘛！經過Bodenvagen橋



黎到瑞典北部城市Luleå，反正唔趕，兜下囉！
到市中心，第一件事梗係搵位泊車啦！搵到停車場，仲要搵個咪錶先。

（我地無唱SEK喎）咦！有位靚女入錶呀！嗱嗱淋行去請教下囉！

9-18應該係平日收費時間，(9-15)我估係假期卦！

個咪錶係咁樣，上面有哂介紹，唔難。
（難在無本地錢嘛）看圖識字咪得囉！好多信用卡都接受，搞掂！

記得入完錶張收條放喺車頭玻璃下，如果唔係，一樣當你無入錶架！

除左泊車飛外，仲有張收條。

 

厘度嘅部份建築好古雅



Domkyrka教堂




街道好靜，無乜行人。

厘座應該好有歷史啦卦！


我地沿Stads公園行，路旁放置左兩隻白熊雕塑。

前面打橫條街係市政廳大街，三角形山牆果座唔知係咪市政廳呢？

公園嘅佈置，三月尾，就黎復活節？

市政廳大街一景

你估下係咩？（無錯啦！係入兩個一蚊銀呀）

原來係收費公廁（歐洲黎講，肉酸左D喎）


Stadshotel


Lulea市中心唔係好大，兜左一陣，走LU！途經所見。
 
黎到瑞典邊境小鎮Haparanda





咦！好熟口面喎！

還掂有免費泊車，入去行下囉！同香港嘅幾乎一樣，不過折合左好似平香港少少。

有個幾大嘅餐廳，好多人幫襯 , 環境唔錯。



D野完全唔貴




我地叫左咁多野，連埋汽水、咖啡同啤酒，都係SEK233（約1：1）

客人用餐後，離開前自覺執好餐具到清理嘅運輸帶上，自動送入廚房。


仲有廢物分類添！


食飽繼續向芬蘭進發，路牌上E8係歐洲公路嘅路名，
紅色29係瑞典本地嘅路名，其實係同一條路。

雖然北歐三國都有密密嘅影快車，但全部都有預告，厘個黃色牌就係啦！

後D就係影相機

途經有五、六座風力發電機

厘條公路有唔少巴士站
 
到啦！今晚住宿嘅Kotareitti Apartments，係好舒適嘅小木屋。
厘D相係第二朝補影嘅，落緊雪！


我地住B4

每個單位仲配有一個有蓋車房添！

客飯廳唔錯




個廚房好正，洗碗碟機都有埋。

厘個壁爐唔係裝飾，係真架！房東仲問我地要唔要燒柴，我地怕怕煙熏味，猛耍手擰頭啦！

兩個房幾肆正




洗手間連浴室同桑拿房，好大！





門口仲有個露台

晚餐隨便清埋D糧食

最後小插曲（梗係啦！唔係咁，你地邊有深刻感受呀！）
今午天氣好好，羅凡尼米又係66度以上，有機會睇極光，但飯後雲層殺到，機會好微囉！
不過小鄧同大雄日頭已經探左路，不妨出去行下啦！
於是開車出湖邊 , 點知落左雪地泊車，架車就踩極油門都係空轉，點都唔肯郁（頭大），原來雪地下係冰，跣軚唔蝕地，好彩芬蘭人好熱心，幾乎架架車經過都伸出援手（搞唔掂喎），結果有位附近嘅本地人，返屋企揸架剷雪車黎救車，Apartment嘅房東夫婦都黎幫手，好快就搞掂，小鄧感動咁話：我愛死芬蘭人啦！我都俾個擁抱果位救車英雄，佢地無償咁幫忙（雖然我地都買左拖車保險），好值得每個人學習，芬蘭人們，多謝哂！



D12  完 


28/3 D13  
Rovaneimi>SantaClaus Village(66.544330,25.849472)
>16:00 Airport (66.558124,25.830434)>
ReturnCar > 16:30 Check-in

今日係最後一日，計劃16：00到機場，所以先逛市中心，
再去聖誕老人村，北歐三國就正式告終啦！

D13路線圖：


早餐三人食麥皮，小鄧要加窩蛋，大雄就捱義氣，食埋剩番D通粉，算清哂倉啦！

食完早餐，出門口影下相，今早落大雪，門前道路都舖滿雪。

厘四口家帶左隻船仔，梗係準備同小朋友去滑雪啦！

告別Apartment後，仲有大把時間，先去市中心行下（小鄧可能有血拚大計）。
厘度泊車唔算難搵位，但只接受硬幣，好彩有準備啫！


厘張係收條同泊車飛，一樣都係要放喺車頭當眼處。

對面有個商場，就算唔買野，都入去避下雪啦！

場內好多商店，小鄧同輝哥睇到津津有味。

第一次見單車嘅雪軚


 
我同大雄無諗住買野，於是四圍騰。

除左挪威，芬蘭同瑞典物價差唔多。

我地進入另一座商場，門口又有回收機。

頂層俯瞰街道


同香港一樣，唔少得地產中介舖。

入超市睇下羊脾，20大洋／KG，貴過冰島呀！（又係喎！厘三國嘅羊肉唔見得普遍）
 
行完街，上車食D野，跟住就到小朋友最渴望嘅聖誕老人村，
以前總覺得厘個係人造景點，無乜吸引力，但如果以免門票黎講，
係值得走一轉嘅！（厘度夜景都OK）
景區有好幾個停車場

雖然係淡季，仍好有聖誕氣氛。

Reception加紀念品商店



當然唔少得聖誕老人同山中精靈啦！




磁石貼同極光玻璃畫，兜左個圈，走LU！再去第二度囉！




 
又黎到聖誕老人村嘅郵局，厘度係遊客必到同停留嘅地方。

停留得耐係因為有強勁嘅免費WIFI

厘度售賣嘅，全部同聖誕有關嘅紀念品。



當然postcard係必購架啦！最低消費€1，唔算貴。



買左寫好就攞去櫃枱度買郵票兼俾錢

有三種郵票選擇，細張嘅€1.1，大張嘅€1.9，郵票係貼紙，撕開就貼得。
搞掂就蓋印，寄得！


厘度有兩個郵筒，紅色嘅係聖誕節前先付寄，黃色郵筒係即時寄出，可以寄到198個國家。
 
如果想特別D嘅，仲有其他選擇。






寄出嘅郵件數量，中國位居首位呀！

相信厘度有幾位朋友一定寄出唔少郵件，因為我地出去行左成個鐘，
返黎仲見佢地低頭努力＜寫作＞。（如果旺季，你想搵個位坐都難呀）



為爭取時間，我地寄左postcard就出去周圍貢啦！
厘度範圍好大，唔少紀念品商場。








黎到聖誕老人嘅Office , 厘度標明唔准影相，無計！只好用形容的:
室內環境唔算好大，有D似冒險境界，燈光昏暗，左穿右插，
有路有橋，當然四周都有各種佈置啦！通過幽深境界去到人龍嘅隊尾（做咩呀），
咪就係排隊同聖誕老人影相囉！正確價錢唔記得，大概HK200（可以多人合照），
可惜我地排左十五分鐘，都未見一個人出黎，望下有成廿幾人先到我地，
無謂嘥時間，都係撤啦！




頭先講過，喺度寄出中國嘅郵件最多，
當然要有中文宣傳先可以多D生意啦！走囉！


 
厘D照明設計別出心裁

厘度又有間商店

本來店外露天地上有條界，標榜此地在緯度66度以上，進入左北極圈,
冬天被雪遮蓋，只好室內都整番條俾大家睇下啦！


室外寒暑表（好似廢左）

室外遊樂場


景區導覽圖




厘個表演場，睇怕淡季都係掉空多啦！

（你斷估啫）睇下咁深雪就知啦！



宣傳雪上電單車嘅banner

馴鹿雪橇（無人幫襯）

遠處高位係咩呢？去睇下囉！

Snowman World? 唔通又係買紀念品。
厘條唔係斜路，係樓梯，行起黎要步步為營先得。

個冰洞以冰做嘅部份，應該要黎透光。

高處下望停車場

既天然，又特色美觀嘅設計。
 
原來係一間冰酒店，之前喺瑞典，我地咪無買門票，所以入唔到去睇嘅！
記唔記得我應承大家帶你地睇間仲正架？而家可以免費任睇任玩啦！
入口就見間冰吧（氣氛有D迷離詭異）

厘度就係外面睇到嘅透光部份，原來有雕花嘅。

厘隻冰雕老鷹同熊都栩栩如生



冰吧地上舖滿雪，所以一D都唔跣，由冰吧繼續前行。

一條冰走廊上，有雪人同冰滑梯。



個雪人周不時攞左個鼻落黎玩，俾隻兔仔。。。食？



另一個冰廳


有顏色打燈
 
厘D係冰房嘅清水房（賣樓術語係咁講架嘛）

厘兩間就係可住嘅冰酒店房啦！
講起厘度就好笑，突然喺我前面出現左隻元寶，睇真，原來係輝哥，
佢興奮得濟，想入去坐下張床影張相，點知地上冰面其滑無比，
咁就。。。。唉！

厘間色調浪漫D

厘兩間我都入過去，見到輝哥咁型，我副老骨頭。。。都係咪啦！
於是坐喺冰面SIR入去囉！哈哈！安全到步。
其實每間冰房好細，個門口開得好低，我咁矮細都係僅僅唔撞頭咋！
男人肯定要先鞠躬，後入房啦！

                               



盡慶玩完聖誕老人村，係時候去機場交車，交車前影低先，
多謝白馬送我地走左3128公里，其中約有八日喺挪威，
三日芬蘭，兩日瑞典，好正嘅旅程！

CHECK IN飛赫爾辛基

小鄧同輝哥有斬獲，羅凡尼米無得退稅，要到赫爾辛基辦手續啦！

休息幾個鐘（鬆左落黎，大家都攰），再次上飛機，正式告別北歐，再見芬蘭!



北歐三國追極光之旅完滿結束，多謝所有上過黎
支持厘個遊記嘅朋友，更多謝小鄧策劃&輝哥同行。