我倆當然唔執輸啦！點知小鄧補一句
＜花開花謝, 聽天由命＞，真係俾佢開口中添！
遇上暖春，好在小鄧醒目 , 即時將行程倒轉，
先到北面山區的九峰鎮，仲可以趕及觀賞遍地桃花盛開，
如果唔係，連李花水尾都可能睇唔到啦！
原本想睇嘅李花同櫻花，只剩下寥寥無幾，好過無啦！
但訪古村落就幾意外，小鄧玩得好隨緣，唔知係佢口才了得，
還是識用迷術，竟然條條村都順利參觀，
有的仲熱情招待添！呢樣真係要俾個讚佢。
跟住講下消費，我地全團11人，費用隨玩隨夾。
22座小巴車租 ¥1100/日（不包路費及司機食宿）
三晚住宿100-128/ 標間/ 晚
門票、路費及膳食約 ¥500/人
小費 ¥300/11人
全程 ¥1100/人 ,超值啦！ 仲有找五張六合彩，行善之餘，我地十位嘅下一程幸福靠哂小鄧啦！
D1 福田 > 休息站午餐 > 九峰鎮 > 橫坑村
D2 橫坑 > 上廊村 > 茶料村 > 韶關
D3 韶關 > 始興滿堂大圍屋 > 蘭藝館 > 翁源縣湖心壩民居群
D4 翁源 > 青雲村 > 新豐櫻花峪 > 福田
起程LU！
D1 福田 > 休息站午餐 > 九峰鎮 > 橫坑村
本約好08:00福田口岸，結果08:30才出發。
我地11人坐22座小巴，呢種車我坐過多次，
呢次坐位較一般寬闊，正！
因為要趕喺有陽光嘅時間到達，我地未夠12:00
就喺休息站食個快餐或湯麵(唔記得影相添)。
3:30就到左韶關嘅樂昌市九峰鎮茶料村，
嘩！好燦爛呀！
睇下張相，就知花海魅力沒法擋啦！
喂！靚女，咪咁心急啦！大把時間喎！小心架車呀！
哥仔，唔落車，黎個高位攞景，正嗎？
帥哥，呢D係荷蘭豆嘅花，前面先係桃花林呀！
（嘻嘻！都係小鄧話我知係荷蘭豆咋！）
梯田上種滿桃樹同油菜花
好快就行到桃花林，一大遍都在盛放中，
我當然拎部傻瓜機，成個傻瓜咁係咁影啦！
天色咁好，唔影多幾張咪好嘥？嗱！咪鬧我虐待大家呀！
我一早介紹大家睇小鄧嘅靚相架啦！
最煞風景就係呢D電線，避都避唔到。
喺桃花林附近，多多少少都會種D油菜花，
此時油菜花都在盛放，但李花唔多。
沿路前行，兩旁都係李樹。
惜李花香雪已過，明年請早啦！
油菜花後嘅嫩綠丫枝，全係李樹。
既然仲有紅桃黃花迎客，遊客當然唔嘥啦！
舉機嘅熱烈，騷手弄姿嘅開心。
其實望清楚，仍然仲有李花嘅蹤影架！
不過多數落哂，有D落剩花蕊。
而且萌芽嘅嫩葉都頗大片啦！
紅桃白李加上金黃油菜花，佈滿整個山谷。
雖然整片花海真係好吸引，但同時山林
亦被過度開發，多數山頭都被嚴重破壞啦！
再行入D，仲有片未敗嘅李花，
雖然談唔上香雪海，都仲有D睇頭啵！
落去睇下先！
呢片李樹林嘅花仲未謝，正呀！
李樹睇黎矮好多，原來係用鐵線將軟枝拉低，
唔知同頭先嘅有咩唔同呢？
估下呢兩桶係咩吖嗱？
上面果兩桶係牛糞混乾草，估計晒乾做燃料卦！
見呢片油菜花同後面嘅桃花都好燦爛，等左好耐，
靚女們都戀花不捨，都好嘅，等佢地襯托下個氣氛囉！
如果早兩三個星期，就三色並發，應該靚D嘅，無計！
今年太暖啦！花期早左成個月咁濟。
臨走前再影多兩張
其實呢度有條溪都幾靚
可惜D人唔珍惜，搞到周圍垃圾，嘥左咁靚嘅環境。
本來我地想喺鎮上嘅九峰酒樓住宿，但店住話滿哂啦！
(乜真係咁旺呀！) 最後按原定計劃去橫坑農家樂度住。
呢度雖然隔涉，勝在環境同空氣都好過鎮上。
本來好清澈嘅溪流無好好愛護，搞成咁 !
住宿嘅樓房外觀 (因為得5間房，有兩位男仕要喺村裏面屈就)
房間算乾淨企理，不過洗手間係踎廁。
住宿樓房隔離係黨支部
住宿樓房對面係餐廳（話係飯堂更適合）
小鄧訂晚飯，點知老板娘接單先去買餸（平時梗係無乜人黎啦）。
無無聊，影下相，村口嘅摩托車。
政府提醒村民土葬嘅禁令
都係睇唔到日落架啦！
點知漫天晚霞又幾靚喎！
唔好意思，又係食飽先記得影。
D1 完
溫馨提示：
住呢度記得同老板娘講價，佢好識開價架！
土雞開價120大洋，小鄧醒目呀！等老板返黎，
仲撳住老板娘唔准講，哈哈！80蚊有交易啦！
房租開價120，還價100。
|
D2 橫坑 > 上廊村 > 茶料村 > 韶關. .
見尋晚天色好好，今朝早D出黎吸下新鮮空氣都好呀！
尋晚半夜出門口睇星，原來有隻小鄰居，差D俾佢嚇死。
橫坑農家樂坐落喺山谷，有日出睇都唔會靚架啦！
D雲好有動感喎！
咦！叫做睇到日出喎！
無無聊一個人，得隻小傢伙出黎招呼我咋！
 
老板娘起身煮早餐，我見佢喺度擲油茶花入廚房架！
自家晒嘅白菜乾
 
尋日雖然欣賞到桃花海，但全部係單瓣嘅，
難得老板種左棵複瓣桃花，好似係靚D啵！
 
一天都光哂
未有早餐食，周圍行下，呢度四望山頭，多多少少都能見到桃花。
條溪遠處亦有
食完早餐08:30出發往上廊村，途經嘅都係村莊。
 
09:05，途經條村前有個桃花林喎！落車LU！
桃花林後就係祠堂（唔記得問條村叫咩添！請問有無人知呀？）
 
祠堂係全新村屋建築，外表無乜可觀性。
原來條村係姓潘嘅
呢條村嘅桃李都開得較遲，
仲可以見到些少桃李爭春嘅景色。
  
村民自家晒嘅芥菜
入口上整個晒棚，一D都唔嘥。
 
好使好用嘅涼晒陽台，不過南方人唔似北方，又晒粟米，又晒辣椒。
條村好乾淨企理，水電供應有齊。
我諗香港無人敢掛兩把利器喺門口卦！
好野呀！自家製嘅加長版拖拉車，載多D嘛！
 
呢個木製欄柵雖然簡陋，D木咁實淨，都頂得下啵！
涼乾嘅水瓜，個瓜囊要黎沖涼洗野，夠環保呀！
屋頂都用黎晒芥菜
呢D肥雞隻隻都幾斤重，真正走地雞，
見佢地咁逍遙，真係唔忍心食落肚架！
桃花林嘅旁邊有好多貯藏室，貯乜都夠地方啦！
呢條村嘅桃花，遠睇好似好疏落，其實D苞好密。
呢度環境好好，村民非常好客熱情，見我地喺度影相 , 搞搞震，無厭我地，
仲攞兩盤桔請我地食，見到團友揹背囊嘅，仲起勢塞D桔入袋，
係咪好似桃花源記裏面嘅民風呢？
朋友，我擺姿勢俾你地拍，乜你地咁唔識做，米都無粒醒下架！無眼睇你地呀！
 
無著數，走LU！費事啋你地，自己去搵食。
大家估呢兩母子喺度做咩？
原來行近睇清，係個井口連同洗濯空間，
遠睇唔覺，設計得既隱蔽，又開揚。
 
車行經過上廊小學
幾分鐘車程，黎到上廊村前。
祠堂在村口，村前有片水稻田。
 
個祠堂好古雅
瓷製嘅結婚生育宣傳畫
 
姓扶嘅我都係第一次接觸，上面刻住漢朝元勳，
即係多者二千年，少都千幾年啦！（唔知係咪南遷黎廣東呢）
祠堂好寬大開揚，唔似一般祠堂嘅陰暗。
 
呢塊匾屬清嘉慶年間（約200年）
祠堂內回望入口，仲有個門匾。
祠堂外圍
入村行下LU！
 
似乎呢度戶戶都有人住
  
D農具保養得好好
呢度放滿竹笏，梗有農戶編竹為生啦！
 
村口廣場仲設有公廁，幾周到喎！
大家喺度混左大半個鐘，點都幫襯D菊花之類，咁就皆大歡喜啦！
 
半個鐘車程，就番到九峰鎮。
午餐喺九峰酒樓，尋晚本想住呢度，奈何滿房，係咪尋晚嘅橫坑好D呢？
（喺九峰鎮算具規模架啦）
 
午飯後啟程，十分鐘車程，又經過一桃花林，有小販集結，落車準無錯。
 
哈哈！今次大家嘅注意力唔喺桃花度，而係D白花仔（又有笑話）。
咦！有白色嘅油菜花喎！係呀！係呀！乜唔係東川先有白油菜花咩？
 
原來白花會變紫架！
哈哈～哈哈！影完一輪，順藤摸瓜，原來果D唔係油菜花，係白蘿蔔至真！
（村民見我地呢D城市鄉里，實笑死啫）
玩左廿分鐘，又上車LU！途經嘅山頭，處處有桃花踪影。
車行半小時，又到條破落嘅村莊。
 
邊個有興趣考番個村官做下呀？
條村裏面已無乜人住，連祠堂都變雜物房了。
外面有幾間較完整嘅屋，原來呢度係大王村。
呢！埋邊現代化果間屋有兩位少女，我地就埋去打搞啦！
小鄧問：請我地飲杯茶得唔得呀？少女二話不說即刻酙茶，盡顯村民純樸嘅一面。
我都唔客氣，諗住咁現代化嘅屋，梗有洗手間啦！點知。。。
雖然好乾淨，無去水喎！少女話:就係個黑桶啦！呵呵！（嗱！佢地D農作物，我有分施肥架！）
喺少女間屋旁有座幾大嘅村屋，入口門前有五星雕刻，
據講曾經係紅軍駐紮地，每年都有大批人黎行祭禮架！
我地經過唔少桃李樹林，都係以茶料村最盛，於是再到茶料村，今次可以上高D嘅山坡。
14：00由另一條路行入茶料村
 
團友講解呢幅唔係圍牆咁簡單
係輸水道與圍牆結合嘅設計，聰明呀！
路口坐滿村婦賣土產，就知唔少遊客黎啦！
  
行上高位先，唷！打擾左對情侶添！呢度又係幾浪漫嘅！
山谷中有條小溪
大家都知我影相C架啦！影黎影去，都唔及小鄧搵到個靚位。
    
小鄧，借你張相俾大家睇下呢！（佢嘅角度真係一SHOOT打盡喎）
臨走前遇上一車人，個個有備而來，實行與花爭艷，影番輯靚相。
16：00告別茶料村，向韶關市進發，18：00到達，住宿如家酒店。
  
酒店出門向右行十分鐘就到晚飯餐廳，風味唔錯。
  
D2 完
D3 韶關 > 始興滿堂大圍屋 > 蘭藝館 > 翁源縣湖心壩民居群
.
.
早餐後09：30出發，原本想去睇嘅桃李花，
因早春而作罷，所以今日主要係睇樓。
半小時車程經過小坑水庫，落車15分鐘影下相。
      
一小時後到始興縣隘子鎮嘅滿堂大圍屋，40蚊門票！
售票處空置左，要到圍村門口買票。
滿堂圍佔地廿幾畝，清道光時(1832)當官嘅乾榮用左28年時間建成，
裏外分三層，規模咁大，收費都應該嘅！要保養嘛！
佢係廣東省最大嘅客家圍村，有嶺南第一圍美譽。
呢度係第一度圍牆。
 
入口兼售票處
牆上嘅窗維修過，有D睇黎仲封左添！上面嘅青磚
同簷都保存得好好，據講為求青磚質素好，
工人每人每日只能做到三塊磚。
入門後對住嘅係第二度圍牆
門上奠基塊磚一般會放喺地上，但屋主將佢嵌上門頂牆上。
第一層與第二層牆間地下嘅房屋整齊排列
估唔到個洗手間幾乾淨喎！
 
後排房間成孤形
呢排孤形房間對住個處理夜香嘅地方，濕濟囉！
呢條係水渠，以前嘅用水就靠條渠輸水。
 
門嘅設計共分五層，大門用鐵包木，門頂有水孔，以防被火攻。
大門對上二樓地上係入水孔（木板蓋住）
 
二樓關帝廳
通二樓的中間樓梯
 二樓房間的通廊  通廊兩邊設門及鎖，形成獨立空間。   通廊牆上開有少量小窗  每個房間只有一扇小窗  二樓梯口廳堂窗戶對正風水山  二、三樓梯間有一廳堂  三樓與二樓相約，這是三樓的禁閉室。  面積約普通房間的一半  二、三樓對準攻守據點的牆上開有箭孔  梯頂有蓋板控制開關  另一邊的防守箭孔  每度防守性的門都以鐵包木，具門柵等多重保護。  第二度圍牆地下的雞狗洞  幫襯左呢位第六代傳人買左本書(20蚊)  佢地嘅祖先靈位  內院仲有精緻嘅木架樓台  肥水不留別人田嘅四水歸明堂格局當然唔少得啦！   呢房屋主個宣傳電話掛喺門口，想賺番D導遊費?  古井與石樁  雞狗洞  圍村內有幾口井  行返出門口，左邊部分建築正在維修中。 
跟住去睇下鄉村自家製米粉
只見一男一女打哂全場，工具同地方都好簡單，好在唔似個黑心工場啫。
男嘅負責煮米粉皮
 
女嘅負責涼放同晾晒
 
有D團友仲試食過話好食喎！（似陳村粉）
   
睇完始興嘅滿堂圍，我地向南塘村出發，一小時車程後，先找地方吃午餐。
 
途經一條廢村，雖然破舊，勝在原味，圍牆以鵝卵石建造。
多數房屋以泥磚建築
呢個祠堂上左鎖，但內裏已經空無一物。
好多房屋唔算太破爛，應該被廢置唔係好耐。
地上渠邊已經長滿野草
 
一般村屋嘅二樓樓房門口起喺屋內，呢條村好特別，大多起喺外邊嘅！
   
圍牆角樓
參觀左廿分鐘，又上車經過間蘭藝館。
裏面無乜驚喜，都係一般嘅國蘭，勝在洗手間夠乾淨。
  
16：30，黎到翁源縣江尾鎮南塘村嘅湖心壩民居群，呢度已經有五百幾年歷史，
佔地150公頃，共有59座圍樓，裏面如迷宮。（帶路嘅村民話而家住左16圍村）
從完整嘅建築，可以睇得出當年極具規模。
如今雖不至於十室九空，都有一半空置左啦！
 
我地一到，呢位村民就主動招呼，話無人帶好易迷路，我地由修本樓入去。
(我地睇嘅外翰第、大夫第同長安圍都屬保謢文物)
牆簷磚飾精美
可以睇到圍樓嘅建築好考究
雖然木門顯得破舊，仍可以睇到重重門關嘅設計。
古井及門墩
米樁
村民用手搖泵黎抽井水，比用水桶打井水好多啦！
修本樓仍住多戶人家
進入內堂庭院，地方幾舒服架！
樓房間的空地
 村內多座碉樓仍保存完好  部份圍牆已嚴重坍塌  
繼續跟住，都唔知行左去邊，有時D路好闊，有D又好窄，野草叢生，明顯好少人行啦！
 
大夫第嘅部份建築
 
入去呢間睇下
明顯已經荒廢一段時間啦！不過仲睇到建築得幾雅緻。
  
外翰第嘅圍牆
鯉魚吐水（去水口）
外翰第嘅角樓
 
跟住行去長安圍
長安圍前有個水塘，景色好靚。
 
跟住又左穿右插，呢度嘅牆多數用鵝卵石砌嘅。
 
呢座樟樹壇我諗係地主卦！
  
呢個祠堂油漆好新，可能維修緊，所以空無一物。
 
旗墩
長安圍嘅房屋仲安有電錶，應該唔少人住緊。
佢地嘅祠堂，咦！D香吊住黎裝喎！
 
17：30上車往翁源，途經翁源體育館。
18：30先到翁源縣龍仙鎮嘅酒店攞房
   
19：00到附近嘅恆勝客家大院食晚飯
 
對面係翁山詩書畫院
先喺樓下點菜
雖然有氣派，收費唔算貴。
門頂有個小展覽廊，展示客家農家家具。
  
開飯LU！又係食到一半先記得影，少左幾味啦！
      
D3 完
D4 翁源 > 青雲村 > 新豐櫻花峪 > 福田
.
.
.
今天行程都係睇<樓花>，早餐後，廿分鐘車程經過
翁源龍仙鎮嘅青雲村。
 
見圍牆幾靚，又入去八下睇下啦！
呢度係華隆圍
據村民講，呢個門口斜開，係為左遷就風水，攞正東方向。
 除左村口有幾位村民，村裏無乜人。     呢條村亦係喜歡將二樓樓梯起喺屋外      呢條村近公路，四周有阡陌遠山，環境唔錯。  咦！估下呢塊田種咩吖？  黎個近鏡睇清D，係一D豆莢形嘅果實；原來係油菜花結嘅子，就係用呢D種子榨油架啦！  跟住我地向新豐黃礤鎮嘅櫻花峪出發，40分鐘到達。   
櫻花峪由台灣花農花十年時間，將800畝荒山變為櫻花峪。
  呢度除賞櫻，亦宣傳雲天海溫泉同雲髻山景區。   門前路旁已有櫻花，因為早春，幾凋零啦！只剩少量櫻花。   
據售票員講，盛放期喺一個月前，小鄧想博半價門票入去，點知食檸檬，既然無乜花，當然唔嘥錢啦！
  
據網上資料，復瓣櫻花多數無果嘅，單瓣櫻花會結果，叫做櫻花果，
熟左係嬌艷欲滴嘅紅色，但味道酸苦澀，與甜美嘅櫻桃係兩件事。
大伙都算影過櫻花，半個鐘後驅車往深圳方向。
12：08到流溪水庫旁嘅小天鵝酒樓，
見環境優美，就喺度食午飯啦！
  
餐廳旁有樓梯可行落水庫
  
人參果
小鄧訂左條大魚，15.8斤，26蚊／斤，真係好大條，好生猛，大家當然影番張相先啦！
呢瓶係梅酒，30蚊斤。
呢餐好豐富，淨係個魚頭都蒸三大碟，實行大魚四味，又雞又鴨，都係六百零蚊，抵食！
喺餐廳旁邊有個花棚，開滿禾雀花，都算係意外收獲，不過只得一隻色，如果多兩隻色就好啦！
     餐廳旁有條橋  食飽飽，車沿流溪河而行，景色優美。  途經榴槤狀嘅建築，仲興建緊，唔知係咩？  
17：30抵福田口岸
四天樓花開心團完滿結束。
|
