四月尾，小鄧臨時話：機票平喎！去環阿爾卑斯山脈囉！
小鄧度嘅行程，次次都有番咁上下（哈哈！睇怕越黎越難突破啦），
我倆本來買左火車票，打算去廿幾日內地，仲唔拿拿淋退票咩（夠誠意啦卦）！四人組都算順暢，今次遇嘅雨水唔多，最多都係天陰啫！真係大大大感恩啦！
10／6就返左黎，一直都整理D相，好想快D同大家分享今次行程，今日終於的起心肝la ! 今次嘅環阿爾卑斯山脈，景色都好一致。。。。大美，湖光山色靚到無朋友，叫佢做洗滌凡塵之旅都唔太過架！
好！先黎個前奏，睇下景先
，賣下關子唔講喺邊度打邊度
（唓！你唔講，我都知啦！
），行程同消費下一步再交代。
（厘張咁C都放？
）乜咁講呀！人家被列入世遺架！
繼續放多幾張
你實知厘度係邊啦！
今次環阿爾卑斯山脈之旅，唔止洗滌心肺，仲睇左好多世界文化遺產，
以下將會逐一介紹，仲會講下揸車過境同俾路費嘅情況添！
首先交代此次行程：
25/5 20:00 HK Airport T1 LH731 23:20 > Munich
26/5 D1
05:30 arrival 06:30 car pick-up @ Sixt
Munich> Schleissheim Palace (48.248611, 11.568333) >
Wieskirche 威斯朝聖堂《世遺》(47.680715, 10.900177) >WeiBensee
住宿:Appartement-Hotel Seespitz (47.575800,10.624433)
27/5 D2
Schloss Neuschwanstein(47.558068, 10.747668 )>
Fussen Gasthof Krone Knuckle(47.57089,10.69536) >
Hopfensee (47.607539, 10.678905) > WeiBensee
住宿:Appartement-Hotel Seespitz (47.575800,10.624433)
28/5 D3
Fussen > Bodensee > (Swiss) Burg Hohenklingen(47.666904,
8.858761)> Stein Am Rhine(47.658926, 8.860417)>
Zurich old town (47.370103, 8.540891)
住宿:Resort Walensee(47.115417, 9.256483)
29/5 D4
Walensee > (Liechtenstein)Vaduz Castle(47.139669,9.525669)>
St.Gallen >Abbey Library《世遺》(47.422494, 9.376689)
住宿:Resort Walensee(47.115417, 9.256483)
30/5 D5
Walensee 《世遺》> Glarus Overthrust >
Grindelwald (46.557071,7.901652) >
經Interlaken (46.687375,7.869552) > Kandersteg>
Gasterntal(46.445387,7.738799此景點有一定限制與難度，請參考126＃、129＃＆130＃)
住宿:Blümlisalp(46.499350,7.675467)
31/5 D6
Kandersteg >Blausee (46.532688, 7.664218) >
Bern Rosegarden(46.95047,7.46057)
> Bern Old City《世遺》 (46.947312, 7.444672)
> Vineyard Terrace葡萄梯田《世遺》(46.487913,6.752946)>
Geneve Lake > (France)Annecy(45.899556, 6.129403 )
住宿: PrivilodgesLe Royal – Apparthotel(45.900100, 6.124417)
1/6 D7
Annecy > E25高速路MontBlanc白朗峰觀景台(45.92424,6.66693) >
Alps(Mont Blanc) Tunnel (45.901177,6.861364)>
(Italy) ComoLake
住宿: VillaSan Martino(45.996933, 9.232715)
2/6 D8
Como> Funes ( Dolomites山脈 )《世遺》 >
SantaMagdalena Village(46.639994, 11.716725 )
住宿:Rieferhof(46.649899,11.699434)
3/6 D9
Funes> museumladin (46.680414,11.893222) >
Parconaturale Tre Cime (46.640398, 12.231796
LagoDi Landor Durrensee)
CampingLago Di Dobbiaco (46.706291,12.217527
Lagodi Dobbiaco Toblacher See)> Funes
住宿:Rieferhof(46.649899,11.699434)
4/6 D10
Funes > (Austria) Innsbruck(47.269234,11.404158)
住宿:Ferienparadies Natterer See (47.237016, 11.339751)
5/6 D11
Innsbruck> Zell Am See《世遺》 (47.320827, 12.795970)>Hallstat(47.562242,13.649457) >
Grundlsee(47.624789, 13.833813) >
Altaussee(47.624688,13.833840)
住宿:Apartmenthaus Hinterer(47.625650, 13.636216)
6/6 D12
Gosau Village (47.583537,13.533786) >
Gosausee(47.525728,13.515737)
住宿:Apartmenthaus Hinterer(47.625650, 13.636216)
7/6 D13
Salzburg《世遺》 (47.810291,13.054588) > Berchtesgaden
住宿:Villa Bello(47.651116, 13.073657)
8/6 D14
Berchtesgaden > Konigssee(47.588152,12.989890)> Munich
住宿:Appartement Pension Zum Zacherl(48.147436, 11.730092)
9/6 D15
Munich City > Nymphenburg palace (48.160330, 11.505638) >
19:00 AirportLH730 22:15
出門當然要消費啦！跟住係粗略嘅消費項目：
來回機票（漢莎航空直航慕尼克）：＄6500/人
住宿（14晚）：＄5430/人
餐食、門票、路費及汽油雜支：＄5750/人
15日總消費，17680/人
唔使18K，喺歐洲玩15日，我倆覺得好抵玩啦！
當然，我地今次仍然以自煮為主，都有幾餐喺外邊食嘅！
厘排較忙，個帖出左咁耐，而家先正式出發，真係唔好意思。
此行俾我兩樣新感受，一、係我有史以黎見到最多小野花嘅一次，
除左喺慕尼克，每日都同<佢地>打招呼，真係心曠神怡。
二、係俾路費; 我地大鄉里，無乜經驗，尤其有多個路口選擇時，
感覺有D緊張，更怕行差踏錯，分分鐘俾雙重路費兼走多成百公里架嘛！
之後自覺有D滑稽兼惹笑囉！（喂！去片啦！）
知啦！出發啦！老規矩，景點後嘅果組數字係GPS黎嘅！
25/5 20:00 HK Airport T1 LH731 23:20 > Munich
26/5 D1
05:30 arrival 06:30 car pick-up @ Sixt
Munich> Schleissheim Palace (48.248611, 11.568333)
> Wieskirche 威斯朝聖堂《世遺》 (47.680715, 10.900177) >WeiBensee
住宿:Appartement-Hotel Seespitz (47.575800, 10.624433)
話說厘班機嘅型號，我係第一次搭咋！
個螢幕右邊有埋USB頭，幾貼心喎！
兩款晚餐
個洗手間喺下層
有五格咁多，仲可以俾母嬰用嘅！算寬闊啦！
食埋早餐先落機
是日行程路線圖：
大家搭完長途機，比較辛苦，主要都係返酒店（唔係呀！返酒店行181公里
因為係夜機，26/5 06:30就到慕尼克，首先梗係去Terminal 1 個租車櫃枱攞車先啦！
跟住去個多層停車場搵到架拍檔老友，就開始我地嘅14日旅程啦！
呢！厘位靚仔將會同我地齊齊走過14日嘅湖光山色，
不過厘架靚仔拍檔嘅身型似乎Fit左D，D行理要度一排先放得哂。
雖然長途機辛苦，不過睇得唔好嘥嘛！由機場到Schleissheim Palace 只需廿零分鐘，施萊斯海姆宮花園唔收費，去行下囉！
去到先08：00，花園剛開放，我地無打算入皇宮，咪求祈搵個免費位泊下囉！
（問左位工作人員，佢話泊一陣就無所謂啦）
泊左架車就周圍騰，個花園好大, 不過除左我地，就只得工作人員打掃緊。
落地第一個景點就已經野花處處
之前做過功課，睇皇宮都係留力參觀寧芬宮，厘度熱下身算啦！
工人仍正在清潔
厘個標誌性嘅景，點都要交代兩張嘅！
散完步，鬆下筋骨，直驅到住宿附近嘅威斯朝聖堂《世遺》。
洗手間要收費
據講厘座小教堂至今仲神蹟不斷
厘座洛可可風格嘅教堂細細地，但美輪美奐，雕刻精細。
側面小祭壇一樣咁靚
厘座木雕耶穌像係教堂精髓，有玻璃鑲住，據講自從一位婦人執左厘個像
供奉喺小教堂之後，耶穌像就經常淚流兩頰，且神蹟不絕。
教堂頂繪上聖經故事
後面嘅管風琴更增添華麗
今日係四人組行程中，遇上唯一嘅雨天。
走嘅時候經過旁邊嘅小教堂，又入去影番張相囉！
天色較差，都係直車去酒店啦！途經嘅景色，感覺雲霧飄渺。
我地住喺WeiBensee嘅湖邊Apartment，整座樓宇外觀好有原野氣息。
辦好check in 手續就上樓
我地住一樓（唔使驚，有lift嘅
）
兩個房間好舒適，仲有景觀添！
客飯廳寬闊，設備齊全，啱哂我地自煮一派。
仲有個露台
放低哂行理，見天色好番D，落去行下囉！
酒店旁己經有個觀景台眺望湖景（咁樣邊可以滿足我地吖！
）
一於親自落湖畔體驗下，因為係渡假村形式，好多一家大小黎享受假期
睇下個輸水系統，都知氹到小朋友開心啦！
難為爸爸搞到手都軟啦！（佢都玩得好開心啫
）
今日天色較陰，不過湖光山色一樣秀麗。
我地會住兩晚，唔使急，返去煮飯仔，簡簡單單食住先。
D1 完
又出發LU！
今日行程好豐富，車程來回三十零公里左右，所以步行多過車行，
全程靚景，不離湖光山色。
27/5 D2
Schloss Neuschwanstein(47.558068, 10.747668 )>
Fussen Gasthof Krone Knuckle烤豬手(47.57089,10.69536) >
Hopfensee(47.607539, 10.678905) > WeiBensee
住宿: Appartement-HotelSeespitz (47.575800, 10.624433)
當日路線圖：
唔想同人迫，食完早餐就出動去天鵝堡
落停車場攞車，咦！大雄搞咩拉條繩呀，仲唔上車？
由於路面窄，出車前要拉下條繩，牆角轉綠燈先出車，確保無對頭車，咁就安全啦！
因為新、舊天鵝堡裏面都唔準影相，又要跟導遊行，
每邊只得半小時左右，所以決定唔入啦！
到達天鵝堡才08：00，連停車場都未有人收錢，問過工作人員，
佢地話泊入去得啦！於是泊左車就開始今日行程LU！
厘度嘅建築好有童話FEEL
天色陰暗且早，山間霧氣低降，另有一番意境喎！
我地先繞湖而行，享受下大自然氣息，非常舒服。
遍地野花
我地四人好似包場咁
繞湖期間，不時出現新舊兩堡嘅倒影，湖面仲有層薄霧添！
新天鵝堡被雲霧半掩
小鄧話要搵位影哂兩座堡嘅倒影喎！終於搵到個位啦！
可惜我器材同技術有限，加上欠光，只能影成咁囉！
新天鵝堡位處高峰，薄霧輕罩，真面目半遮半掩。
舊堡個位低D，睇得清楚好多。
跟住四人組沿厘條路行上天鵝堡（就喺馬車站對面）
雖然係斜路，但林蔭山路，空氣清新，行得好舒服。
（亦可以坐巴士或馬車上）
途中不時有告示提醒遊客，堡上唔發售門票，要入堡，一定要喺山腳售票處購票。
一路前行，舉頭望下，新天鵝堡間中都出現喺眼前。
厘段路約步行30鐘
山上可以眺望山下綠茵平原，非常清新嘅景觀。
影新天鵝堡，厘面應該係最靚嘅，可惜遮住呢！（你講啫
）
嗱！有相為證，D明信片全部都係厘個角度，咦！有雪山做背景，又真係四季都咁靚喎！可惜要攀上東北面嘅山頭先影到呢！（又話最佳角度係瑪麗安橋嘅
）
到啦！到啦！
喺門前睇個堡梗唔靚啦！（咁要去邊呀）
最少都要行去瑪利安橋囉！我知好多人都去過，不過都放埋張地圖上黎啦！
厘條就係瑪麗安橋啦！唉！唔明點解D景點經常掛滿鎖，唔環保兼費工程拆卸。
厘度視野開闊，可以俯覽整個綠茵平原同山上整座堡壘。
（好似有個高位再好D個喎！）
於是我地過左橋繼續上山
其實角度相同，只係高D啫！不過此路唔似之前咁舖好哂，長者或較論盡嘅就唔好行啦！
由厘度望過去，堡嘅右邊，就係最多明信片攞嘅角度啦！
俯瞰舊天鵝堡同山腳整個景區
行番落堡嘅入口，已經擠滿人潮，參觀堡壘，
必須在山腳售票處購票後，按票上預約時間到城堡入口等候，
入口處會打出入場編號（左邊個牌），遊客需對號入場。
大家慢慢等 , 我地落山先啦！
望番過去，條瑪麗安橋係橫架兩山之間，下面係個深谷。
橋底仲有條瀑布添！如果條橋掛滿鎖，實加重負擔啦！
嘩！11：30，停車場已經泊滿車啦！
行完新堡，梗係要行下舊堡果邊啦！
上到去，第一眼就望到座聖母聖嬰像。
厘邊同新堡一樣，購票後要按預約時間對號入場。
花園廣場上嘅雕像，當然唔少得天鵝啦！
參觀完返回停車場攞車啦！因為我地到得太早，管理員會喺水撥上夾上字條，
請你到收費處繳停車費。
走LU！嘩！
買票條龍足足成條街咁長，而家先黎入堡參觀，真係要大半日囉！
已經十二點，離開天鵝堡後，都係時候去Fussen醫肚啦！
首先當然搵位泊車 , 喺市鎮泊車，梗要付費啦！
小鎮泊車算平，€1/hr, 厘部機只收硬幣，
同歐洲好多地方一樣，買張泊車飛放喺擋風玻璃下就得。
跟住當然一邊行街，一邊搵食啦！
富森係個浪漫而美麗嘅小鎮
搵到啦！就係厘間Gasthof Krone餐廳，唔係呀！未開門？
（係呀！13：00再黎過啦！）
唯有周圍貢下囉！門口好特別喎！哦！係富森博物館。
佢旁邊仲有座教堂，不過無開。
未夠鐘，繼續閒逛，其實此刻以遊客居多，商店多賣紀念品、服飾之類。
終於營業啦！門前除左有副武士盔甲，仲放座木枷鎖，
連洋大嬸都有興趣搞笑，影下相，我地當中只有輝哥有犧牲精神做下模特兒，
原來座枷鎖好重，無人幫手，自己係甩唔到身架！
（嘿嘿！輝哥，想甩身？請我食豬手啦）
經過走廊，牆上飾有西洋武器。
我地係第一批客人（我地專誠捧場，係咪應該俾個折頭咁呢
）
咦！靚仔羅賓漢喎！咪寫住，俾個餐牌黎睇下先得架！
跟住佢問我地邊度黎，我地咪話香港囉！佢竟然俾個咁嘅餐牌我地喎，
係咪好有親切感呢！（我地裝過，仲有日文、韓文。。。嘅）真係掂呀！
我地清一色食原隻烤豬手（以前食過烚嘅，咪搞），叫左兩杯黑啤同兩杯無酒精啤酒，埋單都係€71.2啫！比起慕尼克就平得多啦！
份量絕對重磅，小鄧話：試過厘次，厘世都唔再食烤豬手啦！（後來改口話過幾年喎）最意外係輝哥，竟然食剩好多，嘻嘻！我就食哂層皮，剩番D肉。
飲飽食醉，當然慢慢散步去攞車啦！
弊！抄左牌添！
嘻嘻！好彩係人地架車啫，我地都未夠鐘
。話時話，千祈咪博懵或唔買泊車飛呀！佢地D警察好勤力架！
返上車，跟住就去Hopfensee，湖邊散步
厘度有好幾個停車場，我地泊嘅要€2/hr，原來唔係劃一價，有D係€1/hr，豬仔左添！冬天經常遇剷雪車，夏天就時時見剷草車。
好靚嘅湖光山色
見到歐洲人嘅生活真係好愜意
除左岸上活動，仲有水上活動。
湖中有浮台，唔怕凍仲可以游下水。
湖水清澈，又有雪山，岸上草坡舖滿野花，童話一樣。
厘種環境，釣下魚，乎復何求呢！
你睇，連停車場都有咁靚嘅山景。
行完Hopfensee, 返Apartment途中，經過翠綠小村莊，有世外感覺。
因為就住喺WeiBensee湖邊，返去休息陣，飲杯茶，
尋日天陰又剛落機，今日天色晴朗，落去環湖囉！（又係湖？
）話左要洗滌凡塵，無湖無水，點洗呀！黎啦！個湖好靚架！
之前我都提過，此行係我有史以黎見到最多野花嘅一次，
今日無論去到邊，都係野花處處，厘片較艷麗，多桃紅色。
厘度佈滿黃白二色，清雅D。
湖邊嘅蘆葦一樣生意盎然
藍天白雲，獨欠水中鳥，空中魚啫！
有位釣魚郎加隻艇，趣趣地，好過無啦！
香港人生活咁煩囂忙碌，能夠靜靜地欣賞下厘幅美景，你話係咪可以清心降火呀！
悠遊嘅畫面，好羨慕。（我唔識踩單車嘛
）
繼續環湖漫遊
厘個象鼻石係WeiBensee嘅景點
環湖期間，發覺林中有唔少被伐嘅樹，被斬成一段段，估計係冬天取暖用，
不過樹頭都被美化一番。（可能係遊人或附近居民嘅傑作卦！）
無論近唔近湖邊，厘度嘅居住環境都一流！
連天鵝都陶醉喺佢地嘅私人空間，絕無被騷擾。
咦！有座教堂，行去睇下囉！
係座小教堂加墓地
教堂有雪山湖水作伴，美不勝收。
繞湖一周需要兩小時
已經19：00，索性影埋日落先返上房囉！可能被山所阻，
只見晚霞（又燒唔起），唔見落日，黃昏景都好誘人嘅！
返去食左兩個大pizza做晚餐。
D2 完
今日將由德國經E54進入瑞士，車程較長，走380公里，沿途當然唔少得湖光山色啦！
28/5 D3
Fussen> Bodensee(E54)> (Swiss) Burg Hohenklingen (47.666904,
8.858761)> Stein Am Rhine(47.658926, 8.860417)>
Zurichold town (47.370103, 8.540891)
住宿:Resort Walensee(47.115417,9.256483)
當日路線圖：
尋日行超市，見D pizza做特價，鬼咁大個只賣€0.99，仲唔抬三個走咩！
我同輝哥仲金精火眼睇清有無過期／睇錯標價，點知找數後，
果真一蚊都唔使，仲平過HK ; 尋晚食左兩個做晚餐，今朝早餐咪又食Pizza囉！
小鄧仲問：有無人食pizza做早餐架！
（有，咪我地囉！）麥片+pizza+咖啡/茶
再見啦！WeiBensee
呢！我地咪住左邊果座囉！
厘度D屋都好有風格架！
車行途中，見嘅都係青草坡、野花、牛隻，
再唔係就雪山、湖泊，景色相近得黎，一D都唔悶喎！
因為將要入瑞士，大家都知瑞士物價出名貴架啦！梗係去超市入貨先啦！ 經常喺超市見到一袋袋嘅木柴，過左冬天，無乜人用，擺門口特價速銷卦！
厘間超市嘅車要入一/兩蚊先借用得，用完放回原處插番條鍊，
硬幣自動退回（好似以前家樂福咁）
入好貨繼續行程，一路上天朗氣清。
到啦到啦！厘度就係瑞士同德國邊境。
初到貴境，第一件事係俾買路錢啦！
呢！過對面油站買張高速公路行車證就得啦！
每年CHF40（我地行幾日咋喎
），唔該一樣多謝CHF40。
厘張就係高速公路行車證，要貼喺規定位置（張證後面有說明）。
小鄧係要我地幫佢影厘張相，你估佢想講乜，傳返香港俾朋友，個個都話：咪四人組囉！
（而家你地梗知啦）佢話張路票要40蚊囉！
想唔買？都得，咪唔走高速囉！不過捉到行高速會勁罰架！
搞掂哂 , 繼續行程LU！
跟住上去Burg Hohenklingen
雖然係座古堡，但而家轉做餐廳啦！
我地上到去，可能未到午餐時間，所以如入無人之境咁。
無咩野睇
，走LU！
其實我地嘅目標唔係上堡，而係堡下嘅山腰，只係睇得唔好嘥，咪上去囉！
山腰有咩睇?
就係厘度D葡萄梯田同俯瞰下面嘅藝術小鎮Stein。
呢！望落去密麻麻嘅棕色屋頂，就係施泰因小鎮。
喺度可以欣賞萊茵河兩岸
一邊係依山嘅葡萄梯田，一邊係大遍綠茵草坡，景色怡人。
簡單地草坡上劃上條車路，就成一幅美圖。
葡萄園有規劃咁分佈喺山腰，你仲可以選擇參觀葡萄酒廠同試飲，當然要俾$$啦！
由厘度望番上古堡，氣勢唔錯。
享受完山風，俯瞰左萊茵河美景，落山入鎮囉！
雖然施泰因無被列入世遺，但絕不遜色。
厘個中世紀就建成嘅小鎮，以濕壁畫聞名，
散發住濃厚嘅藝術氣息，被譽為萊茵河上嘅明珠。
房屋嘅窗台設計，一樣特色可愛。
前望嘅城門，由中世紀保存至今。
市政廳廣場
畫滿濕壁畫嘅建築同飄窗（突出嘅窗台），都非常吸引。
連渠蓋都精心設計
歐洲人好熱愛單車運動，經常組隊旅遊。
鎮中心嘅建築，幾乎每座外牆都畫上濕壁畫。
厘幅畫似乎描述一場審訊
聖若爾教堂
睇番河岸嘅房屋，幾乎都有佢地嘅私人碼頭。
對岸嘅係聖若爾教堂
橋上風光
D花盆好有創意
入去教堂參觀囉！對門以十二門徒為題，設計富現代感，估佢唔係古建築卦！
教堂內設計簡樸
旅行團講解壁畫
你有無興趣買呀？
入D橫街睇下囉！厘度嘅單車位好充足
有個大水池，啱哂小朋友打水鎗戰啦！
雖然內街巷無中心咁華麗，不過部份門窗有地方風格，居民都重視裝飾環境。
城門外觀
跟住行出河邊嘅觀光碼頭
文化節日嘅宣傳（估係同划艇有關卦）
厘段萊茵河提供唔少旅遊觀光路線
售票處
近岸碼頭
玩左咁耐，返去攞車LU！厘度嘅泊車售票機較全面，可以入硬幣，又可以用信用卡。
往Zurich途中
途經厘座既似水道橋，又似公路嘅架空道路，唔通係水道橋改建嘅！（我亂噏咋）
窗外匆匆而過嘅美景
塞左半小時車，終於黎到蘇黎世嘅舊城區。
舊城嘅湖邊擠滿遊客
中間果座係蘇黎世歌劇院，當然仲有唔少古舊建築啦！
剛巧有青年正在繪畫塗鴉
我地繼續上橋到河邊
美麗而充滿活力嘅蘇黎世湖與利馬特河連接
遠處仲有雪山作背景
岸邊不乏天鵝、水鳥等。
岸上雕塑同噴泉
行到舊城區已經18:30，但我地仲要去Resort Walensee check in，
為左唔想阻住職員收工，唯有匆匆遊覽。
舊城區唔少靚建築，可惜部份圍上圍板維修。
格羅斯大教堂與橋上騎像
利馬特河岸
利馬特河上另一座石橋
右邊尖塔係聖母教堂，左邊雙塔係格羅斯教堂。
歐洲人特別喜歡曬太陽
經過蛋糕店
諗住入格羅斯大教堂參觀，途經嘅街巷。
點知去到已經關門，只好影下外圍啦！
蘇黎世嘅電車
19:00，走LU！希望唔好塞車啦！
往Resort途中美景
我地到步較晚，好彩早有準備，今晚食日式冷麵、麵豉湯，預先已切好材料，
涼拌就搞掂，好快開得餐，至於Guesthouse嘅設施，聽日先交代啦！
D3 完
出發啦！
D4行程簡單，上午玩列支敦士登，往St.Gallen途中午餐及俯覽St.Gallen ，
下午遊玩St.Gallen，全程來回200公里左右 。
.
29/5 D4
Walensee > (Liechtenstein) Vaduz Castle (47.139669, 9.525669) >
St. Gallen《世遺》 > Abbey Library (47.422494, 9.376689)
住宿: Resort Walensee(47.115417, 9.256483)
D4路線圖：
我地喺Walensee住兩晚，尋日到得晚，今早補影Guesthouse嘅環境。
廚房設備齊全
客飯廳足夠使用
洗手間
厘間房大D，有個大露台，向湖。
厘間房都唔錯，一樣有露台，向山，幾舒服。
落樓下四圍行下囉！
渡假村好大，分好多座建築。
我地住二樓
湖畔有露天茶座，面對湛藍湖水同弗盧姆斯山嘅奇特山峰。
左邊係室內餐廳
厘度亦有大片草地，住客可以喺度享受日光浴。
睇見都覺消遙，加位美女畫面就更靚啦！
湖邊有碼頭
有沙灘
行50M就有水上活動提供
想玩刺激嘅，亦有！
睇怕厘個啱你啦卦！我老人家都係慳D好。
厘幅相介紹Flumserberg(弗盧姆斯山脈)所有山峰名稱，大家慢慢對啦！
散完步，返去食早餐囉！（哎呀！忘記影早餐添！ 厘度要硬性包早餐，聽朝影過）
往列支敦士登途中，見厘條橋幾特別，不過車速快，影得唔清楚。
欄杆之上嘅就係橋身
木橋入口，封閉式，裏面好似幾黑下，如果踩單車，佢縮短好多路程喎！
繼續沿途景色
到瑞士與列支敦直登嘅邊境啦！再前行轉左，我地就由瑞士進入列支敦士登。
黎到瓦杜茲堡嘅山上，剩係個遠景都無敵啦！
堡前插左兩支旗，右邊嘅係國旗。
見國旗上有皇冠，都知係行君主立憲制啦！
問左門口嘅職員，佢地話泊一陣無問題，於是直接泊架車喺堡旁邊。
瓦杜茲堡入口
醉人嘅無敵山景
我地沿斜路上落，多角度欣賞，無論環境同建築，都配合得好靚。
其實個堡向崖果邊，仲有好大部份建築，可惜厘邊睇唔到，要落山先睇到。
黎到身為著名嘅郵票國，梗要去郵票博物館參觀啦！不過首先要泊好架車先。
停車場
此國人民梗係好鍾意雕刻藝術，去到邊都見到一兩件。
邊個作者咁大整蠱，要佢碌光豬瞓喺度，任由風吹雨雪打呀！
廢物都擺得好有味道
黎到郵票博物館（免費）
門面好細同簡單，一入去就係條樓梯。
第一感覺，似入去間紀念品商店。
睇清楚，其實博物館面積雖然細，但展品收藏得好好，可以隨意拉出黎欣賞
（我諗人多就有問題啦），郵票種類多不勝數，要細看，絕對要花唔少時間。
部份展品
除左郵票，仲有其他與郵政相關嘅展品
厘D咁中國化嘅係售賣品
離開博物館，落到街，當然不忘同大家分享下行人道地上嘅郵票啦！
馬雕塑旁嘅地上都有張
經過露天茶座，厘兩張坐椅好搶眼。
剛開始擺檔嘅小攤
厘度提供旅遊小火車同本地遊服務
唉！睇住架小火車開走都影唔切，唯有影張A貨啦！
明碼實價，有哂遊覽時間。
咪搞錯喎！厘架係普通巴士咋！幾舒適架！
望番轉頭，可以睇到瓦杜茲堡嘅另一面。
經過公園
剛好有老師帶著學生遊玩，我地就請佢地食D中國小食（各種涼果），
哈哈！點知得老師同兩位小朋友敢試啫！其他只係好奇一望。
（梗係啦！媽咪話陌生人俾嘅野千祈咪食架
）
遊覽完列支敦士登，繼續向St.Gallen進發LU！
途中搵左個高位免費停車處,既可以俯瞰聖加倫，又可以自在食午餐，
小鄧，你好野。
我忘記詳細位置，大概在Dreilindenweg(47.421118,9.384944)附近。
(小鄧，如我寫錯，請提出更正，謝謝！)
泊好車就行埋草地
搵張靚枱，大家留意下遠處有度門架！我地一陣就出去門後欣賞美景。
開餐啦！
睇下張相嘅背景，泊滿哂車（好彩到得早啫），估唔到竟然有個咁正嘅休憩處
（厘度唔係一般休息站，只係個休憩公園，無店舖嘅）。
食飽最好係郁動下啦！行出去鐵絲網後面，厘個俯瞰景，又係靚到絕啦！
出面嘅湖應該係Bodensee。
厘位哥仔喺度睇左好好好耐，睇到唔願走。
食完影完休息完，繼續行程啦！聖加倫舊城係唔准汽車駛入嘅，
汽車只能泊喺舊城外嘅停車場，再徒步幾分鐘進舊城區。
嘩！整個廣場好似舖左紅地氈，好耀眼 , 最意外係將梳化同地面連為一體 ,
空間感覺擴大左，減低刺紅嘅壓迫感。（我諗厘度入夜後有幾分酒吧嘅氣氛啫）
遊客好隨意咁蓆地而坐，感覺舒暢。
又話汽車唔准入舊區嘅？但地上有汽車圖案嘅係車位黎啵！（點同啫！人地要permit架）
哈！黎個仲誇張。
牆飾係剪紙雕塑，整個區顯得既有創意，又具文藝氣息。
充滿神話色彩嘅廣場噴泉
城內多有特色建築物
見到座教堂尖塔啦！
聖加倫修道院《世遺》
先參觀美輪美奐嘅聖加倫大教堂
後面嘅管風琴
較特別嘅係最後面有座台階建築
參觀完教堂，離開時聽到外邊有D躁音，原來門外嘅內廣場係個足球場，仲有青年踢緊波添！
跟住當然要去重點參觀嘅圖書館啦！ 《世遺》
無諗過咁靚嘅世遺景點，門面竟然咁唔起眼，花左些少時間去搵。
要上樓上買飛，隨身包包要放入儲物櫃。
門票正面及背面
CHF12/人
進入圖書館前嘅走廊
厘座圖書館保養得非常好，入去之前先要套上鞋套。
聖加倫圖書館雖然空間唔大，藏有好多古籍（唓！你識睇咩！都無得你睇吖），
可惜嚴禁影相，為左唔令大家失望，只好借網上照片一用囉！
真係好靚啵！值得參觀。(網上照片)
參觀完圖書館，更上一層樓仲有些少展品，係有關一D古籍嘅內容同文物。
之後我地沿樓梯而下，到地下出口。
經過走廊，以為係石板，竟發現地上舖嘅係木板，唔係普通縱切面，
而係橫切面嘅，有D清楚睇到年輪，保養得非常好。
出口前嘅噴泉
厘度係個內庭花園小廣場
離開圖書館後，我地繼續穿插於舊城區。
修道院全景及背面
大教堂全景
其中一個廣場
咦！有洗手間，當然用得唔好嘥，覺唔覺D圖案指示有D奇怪呀！
原來意思係分男女廁，女廁係女廁，但女仕亦可用男廁（不過男仕優先），
真係好體貼女仕喎！多謝！
厘種洗手間我第一次用，個馬桶大到成個人都掉得落去，
咪話洗手間都放埋上黎咁不雅呀！（我大鄉里，新奇嘛）
（做乜影埋個人）因為唔撳住塊廁板，佢會彈番上去架！
咪走住，之後仲行上高位，近距離眺望聖加倫市，其實同之前個休憩公園差不多，
只係近D啫！唔同嘅係厘度要徒步約廿分鐘先上到黎囉！
此行多數天朗氣清，經常見飛機航跡劃破長空。
高位眺望，雙塔係修道院，尖塔係大教堂，仲清楚睇到教堂頂嘅圖案。
落番黎經過個人工湖（上去都見，不過無影啫），D人喺度游水曬太陽。
原路返落去
聖加倫火車站
旁邊係巴士站
入火車站行下囉！
就黎開車啦！下站去Gossau，嗯！我地D12都會去架！
兜番出外圍行去背面入口係麥記，入去八下價錢咋！
一個Big Mac要11.7瑞朗（成百蚊港幣），都係返去煮飯食實際D。
時間差不多，返去攞車囉！厘度嘅自動收費機又有D唔同，佢無泊車飛出，
只要你揀車位編號，再入硬幣，1.5／hr，想停幾耐都得。
回Resort Wallensee途中
因為火車站就喺酒店附近，入Resort範圍必需穿過路軌，剛有火車經過，所以要停車等候。
行得啦！
玩足一日，返到湖光山色嘅Guesthouse，真係舒服。
食香腸，飲紅酒，休息夠就落去影日落。
嘩！勁爆嘅耶蘇光，落樓去湖邊囉！
落到去，耶蘇光就無啦！一幅晚霞美景就有。
影完日落，返去煮飯食LU！
D4 完
又出發啦！
30/5 D5
Walensee > Glarus Overthrust 《世遺》 >
Grindelwald(46.557071,7.901652) >
經interlaken(46.687375,7.869552) > Kandersteg>
Gasterntal(46.445387,7.738799此景點有一定限制與難度，請參考126＃、129＃＆130＃)
住宿:Blümlisalp(46.499350,7.675467)
今日較長程，走300公里左右，景色依然靚絕。
D5路線圖：
喺瑞士，我地一共住三晚，都係要梗性包早餐，所以早上多D時間周圍行下，
落到去雖然日出左，但雲霧低降，清新景色一樣迷人。
一條長長嘅雲帶，懸浮喺山腰 , Resort就位處Wallensee嘅湖邊。
尋日朝唔記得影早餐，今朝補番，厘間餐廳好大，食物豐富。
見有C兄問到厘間Resort，離開之前，再詳細介紹多D，厘度係Resort嘅入口
Reception
裏面有出售日用必需品，足夠應急。
喺Resort Walensee嘆左兩日，要離開繼續行程，出發LU！
因為Glarus Overthrust範圍離此地不足卅分鐘車程，又係世遺景區
，整個地質結構區喺瑞士阿爾卑斯山東部，達300平方公里咁大，
要細賞除時間外，更要導遊作導賞先得，我地只去感受下佢有乜獨
特啫！
沿路景色
進入Glarus小鎮，見佢地掛滿徽號嘅旗幟，唔知係咪咩慶典呢？
一路上山
靚景當然要停下車，影下相啦！
厘個公共燒烤爐應該好好用喎！
已經進入世遺地質範圍景區，當然我地睇唔到重點
（化石同特有岩層之類），不過山形幾特別喎！還下心願算啦！
其實300平方公里咁大嘅景區，我地無可能確知特定位置，
亦對地質無知，只係欣賞下沿途奇特嘅地貌都好開心啦！
高位又停下，影下山谷嘅村莊。
再上高D
越黎越多雪
厘個地形好特別，成個窩咁，仲有路行上山添！
一路上，雲霧亦越多。
上到黎，完全係另一種氣候。
睇下個GPS，已經係海拔1967米。
繼續前行，厘座教堂有D不中不西咁。
我地一陣就係要經厘D路落山（千祈咪大霧到睇唔到路就得啦！）
你睇，D霧就殺到黎，都係走為上著啦！
嘩！勁呀！
咪以為佢地三個輪，絕唔慢架！佢地一架兩座位，一架三座，逢車過車，梗包括我地啦！唔係點影到佢地呀！不過太快啦！好難影得清楚。
講開又講，我地一路走黎，發覺歐洲人好喜歡玩單車同電單車，尤其係電單車，
不論男女，多數係中年以上，甚至退休人仕，通常著全黑皮衫褲
（咪好似佢地咁著囉），風馳起黎駕技仲好狠下，真係幾型架！
向下一個景點Grindelwald進發，被譽為少女峰地區最美嘅小鎮。
途中遇見由luzern開去interlaken嘅金色山口快車（Golden Pass）
途中又停下影下
兩個零鐘後，我地到左Grindelwald。
厘個旅遊中心，剩係山景都煞食啦！
仲有個免費洗手間
厘度係旅遊中心前面嘅小廣場
厘張圖係介紹厘區嘅山峰,，亦係上少女峰Jungfrau Railways Passport 嘅首頁。
格林德瓦都幾靚
但較商業化D，始終係上少女峰嘅交通重點站嘛！
成條街多係同旅遊有關嘅行業,所見都係遊客。
跟住揸車周圍兜下，黎到較偏嘅民居，感覺好正！周圍佈滿野花，又有奇峰環繞。
兜左一陣，影下相，走囉！經返市中心。
個遊樂場嘅設計，用嘅物料都帶大自然氣息。
到Blümlisalp嘅Guesthouse途中，雖然係回頭路，但陽光好D，繼續補送美景。
整張全景
又見吊車
反正四點半都未夠，經過Blausee，睇下仲有無得入場。
噢！停止入場啦！http://n2.hk/d/images/smilies/default/smile_o03.gif同職員商量，我地買定飛，聽朝自己早D入去得唔得。
（無得傾呀
）唯有聽日九點請早啦！
既然Blausee收左，無謂嘥時間，先去check in，再到下一景點Gasterntal。
Hotel Blümlisalp前嘅街道環境
Hotel 嘅外觀
四人單位，不設廚房。
窗外景觀，咦！有巴士到喎！
厘個房門口嘅裝飾。
搞掂就出發囉！
途中經過去Oseschinensee嘅吊車站，當然都係停駛啦！
咦！厘種咩火車黎架？
原來係俾汽車搭嘅火車，（搞乜架車唔自己行啫）原來D汽車＜坐＞火車穿越Lötschberg隧道到Lötschberg渡假區，快捷方便。
黎到Gasterntal，原來行車有嚴僅限制，每小時只能在45-05分，厘廿分鐘內上山，其餘時間係供落山嘅車輛使用。
仲要買CHF12路票
望上山，原來係開條棧道作車路，應該有一定難行，如果唔係，唔會有時間管制啦！
剛好又係開放通車上山時間，正在爭紮上唔上之際，有人準備攀石，
整裝待發，於是向佢地請教下啦！
點知佢地好好人，話載我地上去，仲叫我地唔使買泊車飛，厘度無人理嘅！
咁好人，我地就卻之不恭啦！四個人迫哂上車，搞到佢伴侶要屈車尾，
真係十二分多謝兼唔好意思。
呢！就係遠處部紅色VAN同厘兩位大好人啦！
臨走前，仲話前面十公里有絕地靚景添！
（講笑咩！我地無車，而家又17點幾啦！）係咁易行下算啦！我地仲要徒步落山架嘛！ 厘個淺灘，如果雨季，應該會被水淹。
D水好清澈
汽車可以通過條橋繼續上山
厘度有雪山溶水沿溪流下
人生路不熟，都係開始搵路落山好啦！萬一天黑就弊！
初時我地行山路，咦！有條橋喎！
可以過番去車路，其實車路灣急而窄，喺車路行非常危險，繼續前行。
又見另一橋，睇黎開始遠離車路啦！
我地一把年紀，無乜膽，都係轉頭行車路囉！勝在原路落，實搵得番我地架車嘛！
行山路，萬一去左第二個山頭就。。。估計無乜車嘅，小心D啦！
其實車路開得好靚，只係窄D，只能容一車通過。
厘個位都唔錯，俯瞰山谷村落，條村路仲伴隨溪流而開添！抵加分啦！
繼續前行，厘段就係下面望上黎嘅棧道啦！
沿路山景
終於落到黎啦！其實厘度係旅遊同攀石勝地，一樣有酒店。
溫馨提示：
此景點行車有一定難度與限制，請小心自行判斷。
玩到差唔多，係時候返去LU！
途經美景，仲有列火車停放喺度，落車影下相囉！
厘個大唔透，仲要上去＜裝＞下喎！
又整張全景先
厘度應該都係酒店／Guesthouse黎嘅！
左邊係吊車站，去邊就無留意，見無乜車，我地架車就咁泊喺路邊。
經過厘間餐廳，建築得好靚。
返到Guesthouse嘅花園啦！個雪峰被雲霧遮左。
今晚無廚房，我地今早已準備好涼拌日式冷麵嘅材料，返去撈埋就食得。
D5 完
31/5 D6
Kandersteg>Muggeseeli (46.488975, 7672195)>
Blausee (46.532688, 7.664218) >
Bern Rosegarden(46.95047,7.46057)>
Bern Old City 《世遺》(46.947312, 7.444672) >
Vineyard Terrace葡萄梯田 《世遺》(46.487913,6.752946)>
Geneve Lake >(France)Annecy(45.899556, 6.129403 )
住宿:PrivilodgesLe Royal – Apparthotel(45.900100, 6.124417)
當日由瑞士玩到去法國嘅Annecy，全程走280多公里，
天朗氣清，由08玩到23點，非常盡興。
D6路線圖：
因為包早餐，所以07就去餐廳食早餐，餐廳唔算好大，簡單早餐亦算唔錯。
食完早餐08就check out 離開，趁Blausee未開放前，可以遊下附近先嘛！
陽光普照嘅住宿地點
唔使十分鐘車程，就黎到Muggeseeli，清晨見到咁嘅靚景，人都醒神D啦！
仲擺埋長椅俾遊客坐喺度慢慢欣賞，使唔使咁嘆呀！
想像下對住厘個美景食早餐，即使食三文治都正啦！
Muggeseeli嘅周圍景色都好靚
繼續出發
途經大遍野花，又落車LU！
厘度全屬民居，厘個花園佈置得好似好隨意，但好舒服。
返轉頭經番尋日個鎮仔，太早啦！無乜人。
影左一輪相，途經我地住嘅Guesthouse，就向Blausee進發啦！
去到剛好九點，門票CHF7／人，我地係第一批遊客。
Reception除左售票外，仲有好多Blausee特產同紀念品買嘅！
一條魚大概十幾廿蚊瑞朗，喺瑞士黎講，唔算貴啦！
為左照顧埋小朋友，仲有雪糕賣添！
從入口前行，離遠已見一潭碧綠湖水，睇落有D似九寨嘅五花海
（當然仲係五花海靚D啦）。
四周林木保育得好好，石頭都生滿地衣，有原始森林嘅感覺。
唔同角度嘅水色都唔同
Blausee門票包埋坐艇遊湖，就係厘隻艇啦！其實個湖唔大，
我地到離開時，遊船服務仲未開，所以無坐到。
咦！湖中有好多魚，睇黎只屬一個品種咁喎！Reception出售嘅應該係厘種魚啦！
條條都好大條喎！
D魚好生猛，經常為爭食跳出水面。
行去湖嘅後面，仲有條溪。
厘度有唔少小朋友黎架！梗要照顧佢地嘅需要啦！
條橋橫跨溪澗過對面山，果邊望到雪峰。
遠望個湖就係得咁大，不過水色又唔同左。
湖嘅深處仲有條橋，可以觀賞湖面。
湖面清澈如鏡
亦可繞山路而行
湖中都有唔少樹幹倒喺湖底，雖然唔似九寨海子，有華鈣沉積成好似象牙咁靚，
仍不失為怡人景緻。
咦！有個半裸像，旁邊仲有射燈添！估計以前夜晚都開卦！
行下樹林都好舒服
湖邊草坡上可以俾遊客曬太陽
仲有人造園景
見佢官網，十月有20日可以入去釣魚架！每位收3.5啫！（幾抵玩喎）
行完，走LU！
門口個水池好天然（佢地好喜歡用天然物料）
離開Blausee向Bern 《世遺》進發，沿途都係一貫嘅山區美景。
好快就到左Bern嘅高位Rosegarten，厘度係個休憩公園，亦有間餐廳叫Rosegarten。
大有大玩，細有細玩，佢地玩得好開心。
（做乜要上黎呀
）就係為左厘個景觀囉！厘度可以俯瞰整個Bern舊城區。(Nydeggkirche)尼德克教堂
伯尼爾(Berner)大教堂
阿勒河(Aare )
整幅全景
最後當然實地參觀舊城區啦！
泊好車後，漫步進入古城。
街道上，除左電車，好少車輛行駛。
我地沿住古城街道邁向時鐘塔
時鐘塔
望番轉頭，整條街都係騎樓建築。
Stadttheater附近，佈滿圍板。
跟住上條橋，欣賞阿勒河。
行番舊城嘅時鐘塔，睇下另一面。
本來想入伯尼爾教堂（Berner），但正在做彌撒
唯有先登塔啦！CHF5／人
我地一路上，最初從塔窗外望，可以睇到精雕細琢嘅塔牆裝飾。
繼續往上
再高嘅就無窗，要上到塔頂走廊，再俯瞰Bern全景。
左上綠色圓頂係聯邦宮
中間長長嘅三角斜頂就係教堂頂
黎一幅全景
繼續俯瞰四周(阿勒河)
時間鐘
尼德克教堂有較特色嘅頂部設計
塔頂走廊嘅半身雕像
其實到旅遊景點簽名留念，唔係內地人嘅專利，只係佢地簽外文啫！
塔內梯間牆上，一樣刻滿遊客名字。
落番地面，成班遊客正在等待入教堂，彌撒應該差不多完啦！
我地當然等。。。等。。。等啦！
伯尼爾教堂
教堂門前噴泉
終於入得啦！彩色玻璃窗同拱頂上嘅牆飾幾細緻。
有部份在維修，比想像中有少少失望，內部較普通。
都係門口雕塑可觀D
旁邊條街掛左好多旗幟
喺糧食廣場兜個圈，發覺厘座食童噴泉有D恐怖。
舊城建築經常帶有個精緻嘅飄窗，份外可愛。
伯恩賭場
橋上城內火車經過，得四卡
。
走LU！返去攞車。
往Vineyard Terrace葡萄梯田途中所見
欣賞Vineyard Terrace葡萄梯田 《世遺》，無特定位置，因為成座山腰都係，橫跨厘座山腰嘅主要公路，少說都有四、五條，睇你搵到邊個正view 啦！整遍山坡都係葡萄梯田，我地喺較低位睇。
望上去亦同樣係梯田，厘間成個堡壘咁，我估係酒莊啦卦！
厘D位係落田嘅梯口，因為馬路較窄，企喺度較安全啫！
落梯田參觀下，有D寫住私人地方，不可進入架！所以行落去要睇清楚，更要小心，唔好做成破壞囉！
山腳係日內瓦湖 , 對面就係法國啦！我地一陣會繞湖去法國嘅。
遊玩完山腰，落湖邊感受下湖畔風光。
好多遊艇
遠眺雪峰
好靚嘅水色
洛桑市嘅遊覽小火車
麻雀仔：乜D人咁嘥呀！等我地黎清理啦！
繼續行程，向法國前進。跨國自駕點都有少少壓力，唔同嘅國家，唔同嘅關口，可能有唔同嘅政策同收費方式，最怕去到唔順利，睇住上面指示，跟行車線啦！
到左前面話明要收路費，又唔知點收法，總之前行就對啦！
厘部份影唔切，只能用描述架啦！
經過車道（類似收費站），有票吐出，攞左張飛就開車走得。
票正面印有每段路嘅收費（我地點會細讀吖，佢話幾多咪幾多囉
）
路票反面（啊啊！我地係文盲）
繼續前行
到左收費站，看字睇圖照做就得啦！因為我坐後面，最右邊(3)嘅影唔到，
個掣係要收據就撳佢，旁邊會出收據。
對我地黎講，厘部機可以用卡，方便D，入卡任佢扣 ,
通常歐洲人多數選現金隊（卡要手續費嘛），要排耐D。
講開公路收費站，唔識俾錢都小意思啦！我覺得最怕面對兩種情況，
因為後面排哂長龍，個GPS又唔會教埋你排邊條隊架嘛！你話無壓力就假啦！
好彩小鄧次次都眼明手快啫！
一、係要喺收費站前就選定行車線，如果選錯，分分鐘去左第二度，
俾多次路費事少，最慘係要行多一百幾十公里先可以更正路線吖嘛！
二、係一過收費站就即刻離開高速，萬一錯過左個路口，又會出現以上慘情。
到左法國Annecy嘅Guesthouse
明碼實價，房間、車位收費，門口張表列得一清二楚。
厘間要預訂車位，好彩一早訂埋車位啫！佢地都唔知幾勻真，
一定要check in左先俾架車入，如果諗住check in先算，又要嘥時間撲車位啦！
唔知乜解救，無影廚房客廳，可能趕煮食同影夜景啦！第二朝都係唔記得，失敗！
因為較夜天黑，我地先食簡單晚餐，仲有杏仁奶露。
再出去影日夜景，Annecy係個好靚嘅小鎮 ,
Cathédrale Saint-Pierre教堂就喺我地住宿嘅後面。
都係歐洲風格，喺D屋之間，有個小廣場。
教堂嘅正面
街道上嘅店舖，多數收左。
內河道
厘間酒店好似幾正
我地先向湖邊行去 , 左邊白色果座唔使問都係教堂啦！
（估錯啦）係教堂改建成酒店呀！（點我咩）
你睇清楚啦！左邊牆上寫住HOTEL DE SAVOIE架！
Le Thiou河景，無論日夜都好靚。
安納西湖
中間座島樹木好密茂
厘度係橫越Annecy嘅河道，上面有好幾座橋 , 中間成隻石船咁款嘅，係1132年嘅河上堡壘。
佢曾經係安納西嘅王宮，後來先後成為法院、鑄幣廠，監獄，而家係博物館。
厘D古老房屋，各有特色。
河上仲有水鳥優哉悠哉
影完日景，又逛下等下，雖然厘度唔係影日落位置，
但斜陽夕照粉紅色同黃色外牆嘅屋，份外嬌艷。
繼續周圍踱
點都影埋夜景先走架啦！
沿河嘅食肆酒吧，天黑先開始旺。
我地繼續遊走喺運河之間，直到街上行人疏落，店舖關門，
教堂著起夜燈，我地先盡興返酒店，已經23點LU！
D6 完
Jun 1 D7
Annecy> E25高速路 >MontBlanc 白朗峰觀景台(45.92424,6.66693) >
Alps(Mont Blanc) Tunnel (45.901177,6.861364) >
(Italy)Como Lake
住宿:VillaSan Martino(45.996933, 9.232715)
今日會由法國經Mont Blanc Tunnel 進入意大利，全程超過400公里，
車程頗長，沿途無特定景點，最精彩係經過阿爾卑斯山群峰嘅觀景台，
沿公路又見唔少山中堡壘。
是日路線圖：
尋日雖然喺Annecy嘅河道間影得好痛快，奈何河中堡壘光線唔啱，影唔到個倒影，喺窗口望出去，見天色大好，陽光照射到教堂嘅聖母像閃閃生光。
於是食完早餐
又行去影過，一路上店舖梗未開門啦！
穿過房屋下，街與街走廊，石板地面被磨到反光，應該唔短歷史囉！
街巷裏的小廣場
陽光好好
正正照射整座堡壘
還左心願，影到個堡壘嘅倒影，周圍踱下。
唔係呀！咁多舖未開，一早開舖嘅竟然係間雪糕店？
見厘座古堡旁有斜路上，行下囉！行左些少，好似無野睇喎！
（唉！原來走寶，見網上有人去影到俯瞰Annecy架）
繼續穿街過巷
又出番條河，真係有D依依不捨囉！
早上有好多水鳥游黎游去
噢！兩軍匯合。
唔可以再HEA啦！繼續出發！
咪怪我長氣喎！因為厘次無乜車，終於影到D完整過程 ,
只為提供俾初玩自駕嘅朋友，師兄師姐們咪見笑就好啦！
上高速先經取票站，通常見到Reserve嘅車道，我地唔會入，
佢係俾持有類似八達通嘅自動拍卡扣錢嘅人使用，
當然方便快捷D，但我地無嘛！
呢！就係厘種啦！（車行快速，對唔到焦添）
今次影得切啦！就係咁攞左張飛先，再繼續前行。
去到收費站，自然會計算你行左幾多，俾錢啦！
最左邊果條Reserve唔會行，其餘嘅都可以（厘度無分去邊條路同付款方式）。
先將路票插到 1
按指示 : 2上入信用卡，2下入鈔票（自動找續），2右上入硬幣，2右下退回餘款；
3 按掣取收據（可以不要） , 搞掂！走得！
嘩！一過收費站，眼前一亮，好正嘅山景。
觀景台喺高速旁，好容易錯過，小鄧好眼力兼反應快，好野！
所以我特意Mark低個坐標，有圖有坐標，咁就保證唔會錯過啦！
有埋免費車位兼洗手間。（無乜人黎）
行上觀景台
就算無360度咁誇，都有270度環迴山景啦！仲有埋圖示說明添！請自已對啦！
好心就唔好種D大樹喺度遮住啦！
厘個就係位於瑞士、法國、意大利之間嘅白朗峰，係阿爾卑斯山脈嘅最高峰，亦係歐洲最高峰。
可惜多雲，遮左
等左廿分鐘，叫做好D，勉強睇到，算幸運啦！
欣賞完環迴山景，又繼續出發，沿路相伴嘅都係雄偉山景。
見唔見到冰川呀！可惜無得停車呢！
到左Alps(Mont Blanc)隧道收費站啦（人手收費）！穿過白朗峰段，全程共11.611公里，快就快啦！不過D錢去得仲快，要成43.5歐。
如果黎到先關閉隧道就煩啦！好彩唔關我地事。
想平D，又唔介意兜路，可以參考厘條LINK（有時間慢慢度啦）。
http://en.wikipedia.org/wiki/Principal_passes_of_the_Alps
俾左咁多錢，俾番D服務你啦！路票底＆面
仲送埋印刷精美嘅駕駛守則同溫馨提示（底＆面）
厘條隧道好好行
11分鐘就過哂
離開隧道管制區
繼續靚山景
沿途不時見到建喺險峻山頂嘅堡壘
又過收費公路，意大利同法國都係每段收費，都幾煩，寫住TELEPASS嘅唔好過，
其餘嘅著綠燈都可以，仍然係攞左張飛就走得。
左右都係山區
又見堡壘
都係堡壘
嘩！厘個角度，有D似天空之城喎！（當然無咁靚啦）
到休息站去下洗手間，食條雪條，又繼續LU！
厘個收費機又唔同樣，影得切就同大家分享下啦！
最左係插入路票
右邊螢幕會打出銀碼，今次我地俾硬幣，打開硬幣箱，放入硬幣，下面係入紙幣嘅。我地試過有D機唔可以用信用卡，但硬幣同紙幣就一定得，所以最好準備D現金啦！
我地當晚住意大利嘅Villa San Martino，厘間Guesthouse真串，
check in時間只到16：00，遲到check in要收附加費（都係首次見識），
無計，唯有趕赴入棧先啦！
按合約俾嘅GPS坐標，黎到間教堂前面，乜都唔見，問人又唔知喺邊 
好唔容易先搵到，原來就喺教堂隔離，無人？
打電話啦！又話check in要喺山腳間餐廳，都16：05，為免麻煩，都係叫店方上黎吧啦！
等候期間，入教堂行下。
山上環境唔錯
又有停車場
終於搞掂，我地租嘅Apartment好正，有兩個私家花園，仲兩套枱椅設備。
門口小花園就可以開餐啦！
整個Apartment分三層
樓下廚房同大廳，仲有個洗手間（唔記得影）
樓上有兩個睡房同洗手間，睡房仲有個露台。
最估佢唔到就係有個唔細嘅地庫，洗衣機、晾衣架。。。喺哂下邊。
其實我地住喺對住COMO LAKE嘅山上，早D食晚飯，然後落山到湖邊周圍行下。
揸車落山，到碼頭睇下班船時間，想話搭船過對面行下，點知送船尾，算啦！
我地就住喺人字分岔位嘅左岸山上
周圍行下(COMO LAKE)
水渠蓋
今日天色較陰，影相馬馬，無乜收獲，都係返上山，睇下有無高位影下湖景啦！
途經所見
點知一路上到Apartment都無正位 , 見有行人樓梯落山，又行下啦！
相信厘D樓梯有相當歷史啦！個設計花過心思，美觀而唔積水。
其實山上好多旅店
亦有教堂
終於搵到個好一般嘅位，影番兩張相啦！
D7 完
Jun2 D8
Como> Funes ( 《世遺》 Dolomites山脈)>
Santa Magdalena Village(46.639994, 11.716725 )
住宿 : Rieferhof (46.649899, 11.699434)
當日車程較長，要南下經米蘭東走再北上，走近400公里，
基本上途中無景點，因為最精彩嘅就喺目的地Santa Magdalena Village，
亦係厘兩日嘅重點啦！真係好靚，遠D都值。
是日路線圖：
因為今日要走成400公里，食完早餐就起程向Santa Magdalena Village進發，
戲肉就係要欣賞Dolomites山脈《世遺》。
落山時途經間教堂，見座鐘樓造工精巧，落車影下囉！
沿途所見嘅COMO LAKE
中間島上嘅教堂，四周環境一定好好啦！
我地要經米蘭走高速，又要俾路費啦！
唔知厘座係咩，城牆？
行緊車，雖然影得唔好，不過座堡壘就好正。
真係好羨慕D歐洲人，一有時間就拖埋架trailar去到邊，住到邊，比自駕遊更爽。
成隊車隊，可能幾家人約埋一齊，正呀！
沿途山景，散落喺山坡上嘅小村落同農田，既美化環境，又增添生氣。
咦！山坡上有教堂同修道院（我估咋）自成一角喎！
厘座起喺崖邊嘅，睇怕係修道院啦！
又到收費站，意大利嘅高速比較麻煩，逐段收費，好似瑞士同奧地利咁，
一次過收費，買張高速公路證咪好囉！嘻嘻！當然好似德國咁，唔收就最好啦！
繼續前行
到啦！終於到啦！見到厘座標誌性嘅Dolomites山脈，就知到左啦！
先至15：00，拿拿淋check in左先，仲有大把時間去玩嘛！
睇下個環境先，屋主養有好多匹馬，係騎馬旅遊嘅導遊。
厘座係馬房
我地住喺厘座房屋嘅三樓，店東一家住二樓，仲有幫手嘅工人住地下。
我地住嘅地方算係厘度嘅最高位，視野一流，當然上山路有時頗窄，揸車又要費神D啦！
上去囉！屋前有隻狗，看似好老啦！
嘩！厘隻兔仔真係人見人愛，隨便養喺花園草地上，你睇，佢雙眼四周嘅毛，
係心形圖案黎架！店主話已經八歲，同佢位千金同年出世。
上樓LU！梯間掛左D雕塑同標本，好有大自然氣息。
厘個我鍾意呀！
厘層樓有三個房，我地租兩個，廚房客廳共用，因為係淡季，只有我地四人啫！爽！我地間房雖然細，幾有趣，有瞓炕床嘅感覺 , 窗外剛好對住小兔嘅花園。
小鄧住嘅房，足夠俾佢回到幼年時啦！
大內總管輝哥就委屈佢做廳長啦！（諗住check out先補影番，終於都係唔記得影添）洗手間同廚房
最無敵就係個露台，厘個景，值租啦卦！厘個要多謝小鄧識揀啦！
係喎！唔記得講，此行好多時會住山區，
部份Guesthouse要收現金嘅，所以點都要準備D現金先得。
搞掂哂，出發啦！當然近水樓台，就喺附近玩啦！
原來D牛都怕曬，有得遮蔭，就梗係企埋去啦！
）
整張全景
整個山谷舖滿野花，放眼四望，人影都無，有大地任我行之感。
前面唔係枯草，係大遍黃色小野花咋！
喺厘個山谷，無論你行去邊，都睇到Dolomites山脈嘅部份山峰。
再驅車遊走於山間
嘩！又係靚到無朋友。（梗係啦！人影都無，去邊搵朋友喎！
）
試張黑白照睇下！
影黎影去，都係唔捨得離開厘座山，佢唔算雄偉，勝在特色，無論線條同顏色都好靚。
）轉兩張啦！求祈影幾張，都絕對係靚景，唔係我影得靚，係景靚咋！
嗱！就算我影條馬路，都係離唔開座山做背景呢！
要影厘個角度，使乜車到黎厘度啫！喺露台影咪得囉！
見唔見左上的咁大粒、零零丁丁果間呀！咪係教堂囉！
我諗厘度嘅村民，享有四季大美嘅自然景觀，據店主話，厘度嘅秋色顏色豐富，
冬天嘅雪峰非常迷人，唉！我邊有福份睇哂四季喎！（蠢豬，喺網上睇咪得囉！）
唔好意思，又係厘座山呀！斜陽夕照，真係好靚嘛！
九點先日落（厘度睇唔到日落架），有排先天黑啦！煮野食囉！
因為小鄧約左店東一家聽晚一齊晚飯，試下我地D中國食物，今晚簡單D，食通粉算啦！
晚飯後，陽光漸漸從山腳至山峰隱去，哈哈！蓄意打燈都無咁準，
陽光只照耀Dolomites山脈啫！（都話佢先係主角架啦
）
今晚D雲燒唔起，只有少少霞光。
好快，山下嘅房屋都開始著燈啦！
天色已暗，曝光下，偶爾有車拖住長長嘅光尾經過。
深夜，只剩低明月山峰相輝映咋！早抖啦！
D8 完
又出發啦！
3/6 D9
Funes > museum ladin (46.680414,11.893222) >
Parconaturale Tre Cime (46.640398, 12.231796
LagoDi Landor Durrensee)
CampingLago Di Dobbiaco (46.706291,12.217527
Lagodi Dobbiaco Toblacher See) > Funes
住宿:Rieferhof(46.649899,11.699434)
今日主要都係沿途多角度欣賞阿爾卑斯山嘅其中一條山脈Dolomites嘅美麗山峰，
來回200公里，比較輕鬆。其實厘日行程，我都係靠D相片同google度番出黎，
小鄧，我係路盲黎架！如果有錯，請指示更正啦！謝謝！
是日路線圖：
清晨起黎，只見對面山峰薄霧籠罩。
食早餐
天氣好好，又出露台影下先，由厘度望落去，連馬路嘅線條都好優美。
另一邊嘅山谷一樣有唔少村落。
出發lu! 驅車繼續欣賞Dolomites山脈嘅美景 ,
經過一大片野黃菊，忍唔住要落車影下。
原來厘度有巴士入黎嘅，坐公車入黎住，山谷下有好多旅店，我諗夏天厘度好旺卦！
厘塊草坡十足地氈咁靚
D小野菊生命力極強，即是碎石地，一樣茁壯生長。
歐洲人好喜歡享受陽光，喺厘度嘅山間，我地見到最多人就係厘度啦！
厘D山峰，仍然屬於Dolomites山脈。
整張全景相
厘個山谷都唔少旅店
梗係啦！除左近距離睇到Dolomites山脈，周圍景觀又咁靚，環境非常舒服。
繼續前行
咦！落車睇下厘座係咩囉！
有架運馬匹嘅拖卡停喺度，厘度梗係有養馬場。
原來係Museumladin（€8／人），介紹本土文物文化，我地無入去參觀。
博物館側面嘅原樹木馬雕塑
博物館入口
博物館大堂（又係人影都無個）
喺博物館外圍轉個圈，後面有幾座金屬人像雕塑。
另外仲有個入口，屬本地地理自然博物館，門票買一送一，睇哂兩個博物館。
附近環境
影完相，繼續前行，途中景色。
又見靚景，落車囉！
無論山坡或平地，遍地野花，童話一樣，比起人工種植嘅花田，我更愛厘種，
咁先感受到咩係生命力嘛！嚮往左好耐 , 此行幾乎日日睇到，超爽！
繼續囉！又黎到Parconaturale Tre Cime，入口有停車場。
入口有地圖介紹
喺停車場已經睇到靚景
俾個全景位置啦！
沿路行入去，有關於Dolomites山脈其中兩座山峰嘅攀石介紹，仲放置左模型添！
模型上有好多條縱線，所示嘅係攀石路線，嘩！咁直，真係犀利。
講開攀石，歐洲人都好熱愛厘種活動。
厘度仲有個觀景台，望嘅唔係前面兩座大山峰喎！而係遠處中間果兩座。
俾個近鏡睇下啦！就係厘兩座，即係模型所示嘅！
另一面嘅雪峰亦都可觀
沿路入去LU！可以影雪峰倒影。
厘度屬於Lago Di Landor Durrensee
走LU！經過一停車場，又係高位，咪落車影下相囉！
環境唔錯，仍可眺望Dolomites山脈。
跟住，我地再向Camping Lago Di Dobbiaco進發，沿途都可欣賞到Dolomites山脈。
好快就到Camping Lago Di Dobbiaco
厘度係一個環Lagodi Dobbiaco Toblacher See而設嘅渡假勝地。
有各種水上同陸上活動，遊客頗多，似乎幾受歡迎。
環境真係唔錯
時間都差唔多啦！原路返回，好彩尋日影左座山峰，你睇，今日無咁好陽光啦！
記唔記得今晚約左店東一家晚餐呀！我地食材短缺，稱唔上請客，
只係交流一下飲食文化啫！當晚準備左菜乾紅蘿蔔豬肉蠔豉湯、蒸鴛鴦腸、
菜脯煎蛋＆青瓜炒肉片，仲有粗製濫做嘅壽司添！
好熱鬧，好開心！
D9 完
4/6 D10
Funes> (Austria) Innsbruck(47.269234,11.404158)
住宿：FerienparadiesNatterer See (47.237016, 11.339751)
今日會由意大利嘅Funes驅車到奧地利嘅Innsbruck，車程頗近，只係北走120公里左右，途經超市順便食埋午餐，之後整個下午都步行參觀，行程非常豐富；
今晚住嘅係個大型Camping兼渡假村，環境非常正。
是日路線圖：
尋晚食剩好多飯，唔好嘥，煲粥做早餐。
後園嘅花開得好靚，咪走雞，影番張。
出發LU！途經嘅梯田同教堂，梗係啦！始終係天主教國家，教堂隨處可見。
仲有山上嘅堡壘
又到收費公路啦！厘次係人手收費。
睇後邊部機，應該可以隨時轉為自助收費喎！
上山吊車橫跨公路
開始進入奧地利境內，過左隧道就到啦！
奧地利好似瑞士，需要買高速公路證（€8.7），喺入境後第一個油站度買。
厘張係奧地利嘅高速公路證
背面有說明貼喺擋風玻璃上嘅指定位置。
油站隔離有間超市，仲有熟食，於是喺度上糧兼食埋午餐啦！
繼續出發，途經所見。
經過厘個公路收費站，原來入奧地利境，就算買左高速公路證，
都要另外再俾€9路費，係基本消費卦！
即係一共係€17.7路費。
12：00到左 Innsbruck，架車泊喺厘個廣場嘅附近停車場。
跟住當然喺舊城區周圍騰啦！頗多旅行團到此。
霍夫堡宮，我地無入去，因為去主要嘅教堂同博物館都要花上相當時間。
繼續沿街溜覽
厘幾座房屋都好靚，尤其是單邊果座海爾布陵屋（Helblinghaus）
佢對面就係著名嘅黃金屋頂 , 如果冬天，黃金屋頂有雪峰做背景，應該更靚。
喺建築物前有位穿著華麗嘅賣藝銀色女仕，如果有陽光，
加埋背後嘅黃金屋頂，真係金銀相輝啦！（不過曬住又好辛苦啫）
厘位女仕雖然帶埋隻狗仔開工，但睇得出佢好錫隻狗，仲為佢準備左把遮添！狗仔真有福。
厘度嘅古老房屋，大多有突出嘅窗台。
舊城區嘅招牌，設計都別具心思。
厘座Sankt Jakob教堂，一陣會入，而家去買門票先。
部份街景
亞納柱（慶祝西班牙王位繼承戰中蒂羅爾趕走巴伐利亞軍隊），
下面四位聖人，剩係記得其中一位係聖母瑪利亞嘅媽媽。
行到咁上下，人有三急添！
咁啱有間水晶店，入去幫襯囉！嘩！睇怕厘隻係最可愛嘅大烏蠅啦！
返去我地泊車附近嘅皇宮廣場
售票處就喺最左邊門口入去，
咦！我喺網上睇嘅宮廷教堂，兩個小窗無眼淚個喎！做乜咁傷感呀！
套票€11，一共五個景點，門票上有哂建築物嘅相片。
每入一個，會喺後面蓋印，一年內有效。
先去Hofkirche（皇室教堂）
厘度最矚目嘅應數28尊哈布斯堡王朝嘅皇室銅鑄雕像啦！栩栩如生，非常精工，嘆為觀止。
整個教堂嘅坐椅同唱詩班席嘅設計，都係精工細啄。
對住祭壇嘅坐椅擋板，仲有皇室徵嘅嘅雕刻。
中間放嘅係Maximilian一世嘅石棺。
教堂頂嘅耶穌像下，仲有28尊細立像。
跟住到隔離嘅Tyrolean Folk Art Museum
經過有壁畫嘅走廊
館藏好豐富，好似共有三層，包括宗教、皇室生活、民生習俗與日用。。。等。
從蜂巢取蜂蜜
每一張都好靚
唔知點解，厘D木製儲物箱令我聯想到籠屋。
黎到頂樓，仲可以由橫跨教堂嘅長廊俯瞰整個教堂
教堂頂嘅雕花非常精細
石棺主人嘅介紹
繼續參觀展品
厘層應該係皇室嘅各種廚房飯廳之類。
飯廳有各款壁爐
天花牆壁都有精巧木刻
另外仲有宗教及民生嘅模型介紹，門口厘幅係巨型螢幕動畫。
厘個房全部都係皇室生活嘅素描畫，牆上仲掛左個好棧鬼嘅古老時鐘 ,
應該正點時會郁，不過我地唔等啦！
參觀完兩座博物館，又行返出去
經過耶穌會教堂，當然要影番張相兼入去參觀下啦！
上面有走廊可俯瞰教堂
教堂祭壇
你估下係咩？
其實係整排椅背，因為其中空嘅雕刻好靚，仲排得好整齊，
穿孔望去，好有立體感。
厘度係教堂地庫，亦係另一小教堂，同時葬有棺材同骨灰龕。（兩旁仲有）
跟住行去第三間博物館Ferdinandeum
厘座皇宮改建嘅博物館，館藏都好豐富，搜羅好多古老生活用品同藝術創作。
印像最深刻係有幾幅立體印像創作
厘個就唔識欣賞，有D似入左燈飾舖。
繼續參觀
喂！厘條梯係工人實用嘅
，仲用黎晾被添呀！我覺得佢好正，可以係展品喎！
厘座博物館，喺外邊睇都知有好多層啦！
厘層係遠古時代嘅石器、銅器同陶器之類。
行左成個下午，想飲番支凍野，幫襯厘度嘅售賣機啦！唔貴，仲幾好玩，有D似夾公仔。
走LU！之前經過Sankt Jakob教堂無入去，而家補番。
（仲有兩間博物館未去喎）唔夠時間啦！唯有等下次有機會先再睇啦！
厘座教堂嘅牆壁、天花同壁畫都好華麗。
諗住佢後面實有座可觀嘅管風琴啦！點知有D意外，原來個設計係咁嘅！
好欣賞對門把
時間已經差不多，去河邊影埋相就要走啦！
又係掛鎖
行番去攞車途中，發覺天主教地方，都喜歡喺房屋嘅角位裝上宗教性雕刻。
睇見厚重木窗，座建築應該有相當歷史啦卦！
我地16：30離開時，黃金屋頂前已經搭建緊舞台，今晚梗係有表演啦！
藝術劇院
落到停車場，繳費又係自助嘅，唔識字唔緊要，看圖識字，搞掂！
前往Guesthouse途中，在火車軌前等候火車經過。
途中經常欣賞到漂亮山峰
17：30終於到左住宿地方，厘度係集Camping同Guesthouse於一體嘅渡假村，
好正！仲好旺添！廚房客飯廳唔算大，但設備齊全。
厘間房唔算細，窗外仲有怡人景觀。
房外仲有張碌架床
洗手間OK啦！
早D食飯，今次我同輝哥帶左雙重臘腸，要食多幾餐清倉。
（咁早食飯，唔通又追光）
食完飯，開始黃昏嘅精彩活動啦！
頭先講左，厘度係集Camping、民宿與渡假村於一身架嘛！當然範圍大啦！
D Trailer泊到密密麻麻，好受歡迎，我大鄉里，未見過咁擠擁嘅場面。
西方人比較講求美感，睇下中間對老夫婦，自煮得黎，
仲要開枱舖好哂枱布先慢慢用餐。（睇唔到呀
）
俾張近D嘅
想搵個位都難呀！好在我地早check in 啫！
晚飯時間，湖畔餐廳梗係坐滿啦！
湖上有條路可通兩岸，見唔見左邊有個水上籃球場呀？右邊白色小山仲過癮呀！
剛好有對男女爬緊上去，就掉落水架啦！（睇到忘形，無影到添）
咁好環境，我都想住上十天半月啦！
有乒乓波枱
有儲物櫃、更衣室同淋浴室。
喺對面影過黎，成座建築係咁嘅。
怕成個湖深水，小朋友游得太遠，可以喺裝置範圍內游水，
同泳池無乜分別（哈！又幾周到喎）。
厘種花幾靚（唔識）
厘度真係好適合一家大小黎玩，睇見都開心。
仲有水上滑板，可以隨便玩。
我諗厘個一定受歡迎啫！（收左工LU）條滑水梯旁仲長滿野花。
厘邊有沙灘排球設備
小朋友撈魚仔
今日天氣好好，左邊白色嘅全部係遊客自駕嘅Trailer。
厘架拖卡，直情同個環境襯到絕呀！
厘座係Reception, 見唔見上面有層玻璃屋,我地而家就係要上去啦！
坐左一陣，就影到個咁靚嘅黃昏耶穌光。
下面空地周圍都泊滿拖卡
座山被光線照射，好似把摺扇咁。
睇完咁靚嘅耶穌光，俾你睇埋個觀景樓層，你會覺得直情係無敵大電影咁呀！
厘度好多凳，我地可以坐喺度欣賞。（咁都要有景先得架）
今晚嘅火燒雲真係靚到無得講
雖然彩霞滿天，落去周圍行下，睇下有無新發現囉！
你估厘D係咩？都係住宿嘅房間，咪睇佢咁細，房價仲貴過我地架！
（裏面點架）咪咁心急啦！而家無人嘛！聽朝有人先影到架！
厘架露營車又夠棧鬼啦！小朋友都唔知幾享受別人羨慕同好奇嘅眼光呀！（我都好羨慕啫）
黎到湖邊，落日霞彩倒影湖中。
斜陽餘輝直射天際
哈！仲有兩架飛機經過點綴下。
另一邊，雖然彩霞少D，但有風起雲勇之勢，捲成美圖。
天色漸黑
湖畔餐廳亮起燈，又係另一種情調。
厘D帳篷好似未有人喎！（實際暗好多）
我地都返入屋，食碗糖水，吹下水就早抖啦！
D10 完
5/6 D11
Innsbruck> Zell Am See (47.320827, 12.795970)>
Hallstat(47.562242,13.649457) >
Grundlsee(47.624789, 13.833813) >
Altaussee(47.624688,13.833840)
住宿：ApartmenthausHinterer(47.625650, 13.636216)
今日要走三百公里，第一個景點距離150公里，我地09：30先出發，
所以上午只係行車、逛超市同食午餐，景點都安排喺下午。
D11路線圖：
早餐後，因為好想睇下尋晚見嘅木桶型住宿，到底貴在邊度。
於是黎到木桶房所在草坪，見有四間打開哂門，住客坐哂喺涼亭。
厚住面皮埋去問下可唔可以影相啦！
佢地叫我隨便喎！Yeah！
勉強算係一廳一房，床下木門內放行理，連枱都無，只有一個插蘇座，
要用公眾洗手間同浴室，睇黎屬花巧設計較多。
Reception旁邊有間小商店，尋晚太多人，唔方便，今朝補影番。
出發LU！繼續靚山景。
厘個時候，我地沿途不時見農夫用剷草機剷草，之後就包裝成咁，
睇佢地剷草真係戥D花肉痛，原來佢地係連草連花一齊剷，一齊包裝，
我地好奇自問，乜D牛食花嘅咩？哈哈！咁咪鮮花始終都喺牛糞上囉！
地方大，機器代替人力，一人搞掂。
厘度嘅屋頂喜歡有咁嘅設計，尖端仲有隻風信雞添！
唔係呀！公路黎喎！危唔危險架？（唔好意思，我係少見多怪）
又黎一個？
沿途所見，小教堂幾可愛。
經過個鎮仔，入超市上糧兼食午餐。
繼續向Zell Am See進發
經過吊車站，好似係停駛嘅！
咦！有樓盤發售，唔知幾錢呢？
黎到觀景台，四圍都係崇山峻嶺，山谷中有唔少村落，環境超正。
觀景台俾埋地圖同相片，邊個打邊個峰，請自己對下啦！
周圍環境
走LU！
經過一迴旋處，見一男一女雕像幾得意。
女嘅好似好唔開心，認錯？沮喪？
前進中，見靚景又落車影下相。
此行經常見到牛，不過數量唔多，由一兩隻以至十隻八隻，有D好奇，
養一兩隻嘅，係咪要黎提供牛奶自家飲用呢？因為見多數係乳牛。
仲係好靚嘅山景
前面鐵騎士係咪好有型呢！其實係一男一女，仲要係長者喎！問你服未？
瞬間，兩位騎士已風馳而去，剩番我地跟住前面架拖卡，裏面應該有隻牛或細馬仔，因為只見到少少咋！上緊山，上斜又多灣，架拖卡有D左遙右擺，小鄧口痕話，千祈唔好甩拖呀！搞到大家都有D神經緊張 , 好彩！行左幾分鐘就分道揚鏢啦！
到達ZellAm See，估計厘度好受居民歡迎，唔少人喺度游水同曬太陽，
仲有裸泳嘅，當然唔能夠放上黎啦！
你咪睇見D人游水，其實D水好凍下架！
先返酒店攞房先 , 厘個Gueshouse好正，空間大而舒服，視野又好，唯一唔好係要上樓梯。
兩個睡房好大好舒服
洗手間
廚房好大，設備齊全。
客飯廳超大，仲有山景露台。
日落晏D有好處，食完晚飯都可以再出去 , 食完晚飯先六點，可以去Hastatt行下。
黎到Hallstatt，真係好失望，見到枝＜起樓天秤＞同另一枝吊機 , 就咩興趣都無哂，加上光線唔啱，影左幾張就走啦！
不如趁早去Grundlsee好過啦！火車軌前等火車過。
Grundlsee好大，當然無環湖啦！只係喺湖邊附近影下相就算。
雖然D水幾凍，發覺只要天晴，有水嘅地方就有人游水曬太陽，佢地真係好珍惜有陽光嘅日子。
厘張用原樹幹開成兩邊，就設計成既富藝術感，又實用嘅凳啦！
樹幹綁左個表情生動，且幾大嘅雕塑。
沿湖周圍行下
跟住再花15分鐘車程就到嘅Altaussee.
厘個巴士站設計得幾周到，天氣好可以坐露天張椅，天氣唔好亦有瓦遮頭擋風雪。
到達Altaussee，唔知車上寫咩，我估佢係載遊客去附近嘅Toplitzsee卦！
停車場有座古老教堂
厘個湖應該都係渡假勝地，可能太晏，只見有遊客正在收拾橡皮艇。
湖畔頗多民宿／酒店
厘D水上房屋，係俾船隻停泊嘅！
厘度環境清靜優美
雖然係渡假勝地，Grundlsee& Altaussee都好寧靜，唔太商業化。
影罷行完驅車返Guesthouse只需25分鐘，中午喺超市買左支白酒，雖然無海鮮，
餸燒雞同烤肉，閒聊吹水，一樂也，飲飽食醉，早抖啦！
D11 完
6/6 D12
Gosau Village (47.583537, 13.533786) >
Gosausee (47.525728, 13.515737)>
Traunsee(47.910413, 13.789749)
住宿: ApartmenthausHinterer(47.625650, 13.636216)
厘日車程短，上午去Gosau同Gosausee,來回Guesthouse只需一小時車程，
可以返去舒適咁食午餐，下午再輕鬆北走45分鐘，來回都係個半鐘車程啫！
大部分時間步行觀光，主要係遊山玩水。
是日路線圖：
一早起身，陽光明媚。
厘個時候仲係淡季，地下嘅兒童遊樂場，未有人。
厘間屋頂又係有隻特色木刻風信雞
食早餐LU！
沿166公路，途經Hallstattersee.
經過Gosau靚村落，當然唔放過啦！
黎張黑白照
終於見到隻黑白乳牛啦！
位於Gosau嘅村落環境好怡人，（此行邊條村落唔靚喎），咁又係。
厘度養咁多牛，當然唔係自家飲用啦！D牛奶桶掛哂喺屋外。
Gosausee嘅一部份
落車周圍行下
條溪水源充足，D水仲呈藍綠色，睇見都覺清爽。
嘩！停車場已泊滿車，唯有泊出面車位啦！
到吊車站望下
厘度可以只上Donnerkogelwest
亦可買四峰聯票，當然要相當時間先得啦！
好多熱愛攀石行山友，都由厘度上，當然唔少得售賣有關用品啦！
我地時間關係，只買Donnerkogel west票 , €13.9/人。
從吊車下望，可以俯覽整個Gosausee，大嘅係Vorderer Gosausee .
厘個細嘅湖係Gosaub
上到吊車站，亦係觀景台。
我地行左上山大半個鐘就返落去啦！
等車其間，無無聊咪周圍影下囉！
原來有各款嬰兒車出租架！
下行時架吊車得我地幾個，睇得好舒服。
落到去，當然遊下Gosausee啦！
我地沿左邊條棧道環湖
湖景秀麗，湖水清澈。
湖邊好多隱蔽地方，遠望好似渺無人跡。
睇真D其實唔少人喺度享受假期架！
其實出到湖邊，要穿過兩三米嘅樹林，而且湖岸線咁長，唔難搵個私人空間嘅！
你睇佢地男女照裸，幾悠然就知啦！
除左游水，厘度仲係攀石勝地。
攀石路線圖
其實D路線嘅設備幾完善，預先落哂釘，有哂位扣安全帶。
厘位青年喺度因攀石而不幸喪生，可惜！願你安息。
厘段棧道屬攀石路線範圍
棧道下嘅崖邊，正有隊人玩攀石。
再睇清，棧道上又有隊單車隊經過，可以話係個展現活力嘅地方，
行山、攀石、踩單車、游水。。。
厘條繩梯就係俾棧道下嘅攀山人仕沿梯而上，當然難度再高D啦！
無論遠近景緻，一樣可觀。
湖水清澈見底，好多遊客帶埋隻狗一齊落水。
咦！八爪魚呀？
唔係，原來係樹頭。
我見佢地以大石做跳水台，好似有D危險咁，
可能因為水清，睇落好似淺水，其實都水深嘅！
經過個絲絲瀑布
有乜搞作呀？
啊！咪就係咁囉！
又一個瀑布
唔知厘種算唔算係頁岩呢？
行行重行行，我地行到頭先有隊人攀石嘅棧道對面啦！
望過對面，條攀石路線睇得更清楚，有隻手指住果度，就係條繩梯所在啦！
再對下張圖吖嗱！
厘邊平地較多，且遍地野花，好多遊客喺度日光浴。
一家大小盡享家庭樂
厘喺樹蔭下，唔似歐洲人作風喎！無計啦！小朋友要休息嘛！
我地亦繼續享受湖光山色
偶爾仲有架吊車經過添！
厘個山頭嘅石色好豐富
環完湖，驅車返Guesthouse食午餐囉！
食完午餐，休息過後，我地又黎到Traunsee。
各類嘅水上活動都有人玩
厘兩隻好似係格力狗，好多遊客行過都對佢地行注目禮，不過狗狗就好cool，都唔理人嘅！
碼頭旁有兩座木刻
Traunsee導覽圖，仲有觀光小火車。
湖邊地上，有一系列嘅藝術品，陳列方式較特別，藏喺行人路邊，用玻璃罩住，並著名作者。
厘座應該係昔日皇宮嘅一部份，而家寫住係林業培訓中心。
牆上繪有類似皇家徽號嘅圖案
建築物前以橋連接湖中有900年歷史嘅堡壘
頭先厘度正舉行婚宴，橋上都屬慶典場所，D枱同酒杯都未趕得切執。
除左婚宴，厘度仲經常舉辦音樂會。
我地繼續環堡壘而行，路邊有D空間僻為茶座。
又係連心鎖，厘個好D，唔會影響建築結構。
由湖心堡壘通上岸嘅木橋
過番去LU！再向湖中遠處眺望，有一小島上，好似係座教堂。
環境真係一流
時間差不多，返去煮飯食囉！
D12 完
7/6 D13
Wolfgangsee > Salzburg《世遺》 (47.810291, 13.054588) >
Berchtesgaden
住宿: Villa Bello(47.651116, 13.073657)
今日去嘅主要景點，好多人都好熟識架啦！就係莫扎特嘅出生地＜薩爾斯堡＞。
上午車程輕鬆，出發大概一小時就到薩爾斯堡，剛好星期日，免費泊車，
可以輕鬆咁慢慢行。跟住半小時車程就去到Guesthouse。
是日路線圖：
食完早餐，今日又係天朗氣清，此行運氣唔錯，無乜落雨。
出發LU！經過Wolfgangsee，順便落車影下相行下。
D水好藍
到左薩爾斯堡，咁啱今日係星期日，停車場／街道停車位都係免費，喺舊城區外圍，求祈有位就泊低架車。
跟住朝舊城區行去
唔使識路，向住山上嘅薩爾斯城堡行就啱啦！
穿過Makartsteg橋 , 兩邊掛滿情人鎖（據講厘度D鎖經常清，又經常滿）。
薩爾察河
厘個鎖用英文字母，可能可以串成名字喎！幾有趣。（弊在可以開番，走得甩呢😆）
到左米拉貝爾花園，厘度無論遠景近景都無敵啦！
我多年前嘅九月黎過，當時D玫瑰開得好燦爛，而家六月，D花都係咁燦爛，
證明厘度花好多心機打理D花囉！
無論前後左右，每個花圃都係咁燦爛。
厘度旁邊有度門，咦！有條樓梯喎！上去睇下囉！
原來係米拉貝爾宮嘅邱比特階梯，上有雕刻精美生動嘅邱比特像22座，超可愛，傳說摸摸佢地嘅頭就會懷孕，嘩！好在無摸過啫。
唔止階梯上嘅雕塑好靚，牆壁上嘅雕像一樣咁靚，咦！全部都係男性嘅！
上到頂有度緊閉嘅門，裏面屬巴洛克宮廷裝飾，經常用作婚禮或音樂會嘅場所。
跟住行上個高D嘅花園，門口有對神話中嘅獨角獸。
望落黎，背景仍係大主教宮同霍夫薩爾斯堡。
整個花園置有好多細緻嘅雕像
離開時，剛巧有露天音樂會在舉行，獲得全場掌聲。
沿薩爾察河行去薩爾斯堡舊城區，歐洲人總係好珍惜陽光嘅日子。
厘條糧食大街（Getreidegasse）嘅商店招牌最矚目，咦！厘間海鮮餐廳同七、八年前一樣。
因為以前已細遊過舊城景點，所以今次只求祈經過影張相就算！
果D廣場同莫扎特故居之類就唔行啦！主要係上城堡部份。
大主教宮前廣場及大主教宮
大教堂
教堂前面代表信望愛嘅三度門，厘度係其中一度。
三度門上金色數字係年份，分別代表始建、落成儀式同擴建。
教堂內
莫扎特兒時受洗嘅盤亦存放喺厘度
唔嘥時間，補遊上次未去嘅先，上城堡前，先參觀聖彼得墓園，
厘度係好多藝術家，名人貴族安息之所。
有D墓地以鐵欄圍成私人墓園，設計精美
墓園內嘅教堂無開放
離開時，旁邊有間以古堡改建嘅餐廳
走LU！行向城堡，經過卡比第廣場，當年都有喺金球下影相架！
經過纜車站，喺纜車站旁沿山路石級登山。（可以買纜車+城堡聯票就唔使行）
沿路上山可眺望大主教宮旁嘅卡比第廣場
繼續前行
上可仰望城堡，下則俯瞰舊城區。
到城堡入口前我地先轉左行向另一觀景台
經過水廠
厘度除左可以俯瞰薩爾斯堡，仲可以影另一角度嘅霍夫薩爾斯城堡。
厘位仁兄真係好熱愛攀石喎！厘堵牆成90º角，仲要徒手攀石，勁呀！
行番去入城堡啦！
買左票先（€8）
城堡導覽圖（分成A、B區），如果坐纜車可直達A區，
但我地行上去，沿橙色線會經左邊嘅城堡防禦範圍。
進入城堡範圍，條斜路舖滿碎石，幾斜下，所以旁邊用木板舖設行人路。
穿過大門就進入城堡內
牆上嘅炮孔同箭孔
繼續穿過堡壘嘅防禦範圍
進入城堡上嘅廣場
廣場上可以眺望整個薩爾斯堡
我地先參觀A區
景點有提供中文導賞聆聽
中世紀時，統治者嘅介紹。
應該有排講
再上一層係刑具室
佢唔係聽電話，係聽緊導賞呀！
從窗口可以往外眺望
再上頂層有觀景台，可眺望薩爾斯堡及薩爾察河。
穿過長走廊，窗外仍係俯視薩市，落番去經過一個古老管風琴。
黎到B區前嘅廣場
有座教堂
黎個廣場一樣可以欣賞薩市
跟住進入博物館，厘邊館藏更豐富。
城堡解構
提線木偶博物館
紀念品商店
跟住進入不同嘅展覽室，有模型、生活日用、軍器、刑具同戰場用品。。。。等。
最豪華要算大主教款待貴賓同睇表演嘅黃金廳啦！
參觀完城堡，我地徒步落番去（約廿分鐘），
係喎！唔記得講添！如果只想影下薩爾斯堡嘅日落，冬天可在17：00後，
或夏天19：00後上黎，免費架！當然城堡裏面就唔入得啦！
落到聖彼得墓園時，經過岩石墓室，又入去睇下LU！
岩石墓室入口
登石室通道狹窄，只容一人通過。
除左走廊地板，全部原石雕刻。
石室教堂
相信當時有唔少墓葬（而家梗係無啦）
岩石墓室嘅陽台
走LU！又經過間教堂
教堂內鑲滿油畫
離開舊城區
薩爾察河遊覽船
又經過一座教堂，入去參觀下，無乜收獲。
半小時到達Guesthouse
竟然有個室內泳池
單位唔錯，其中一個房。
另一張床喺廳
單位內走廊
洗手間
因為得一個爐頭，簡單D食有味飯。
D13 完
8/6 D14
Berchtesgaden>Konigssee(47.588152,12.989890)> Munich
住宿:AppartementPensionZum Zacherl(48.147436, 11.730092)
今日行程簡單，住宿較近國王湖（Konigssee），只需廿分鐘左右，
遊罷國王湖驅車返慕尼克約兩小時到Guesthouse，放好行理，
我倆再坐地鐵到處瀏覽，直至23：00先返酒店。
是日路線圖：
今早想早D到國王湖，於是食完簡單早餐就上行理出發啦！
車行經過
竟然喺厘度見到象徵藏民嘅五色經幡，唔通厘度住有藏民？或者係藏傳佛教嘅信徒都唔定。
道路兩旁插滿旗幟
話咁快就到左國王湖景區嘅停車場
搞左泊車先，我地無guestcard，梗係睇左邊價錢啦！唔知會玩幾耐，
反正相差一蚊，按建議，俾夠€5，可泊一日啦！
最右邊看圖識字，1、先入錢，2、按綠色掣，3、取票，之後將票放到車頭當眼處，走得。
跟住當然向湖邊行去，見到牆角掛個巨型背囊，
唔使講，梗係賣運動用品啦！不過未開門。
厘條主要街道有好多酒店，可以提供大量住宿。
酒店前售賣嘅手工藝品
黎到碼頭都係08：00（08：30開售），都未夠鐘售船票，
睇黎今日天色馬馬，希望唔好落雨就好啦！
厘度有好幾張遊覽船班次同國王湖景點嘅廣告海報
碼頭廣場上聳立左巴伐利亞最後嘅國王Luitpold三世紀念碑
碼頭附近設有好多泊船用嘅木房屋
遊覽船售票處
遊覽船航站與票價
給船隻指示嘅交通燈
買左飛，上船囉！
喺船上影番上岸
Bob- und Schlittenverband für Deutschland（雪橇聯合會）
湖畔餐廳
島上石像
船上導遊兼小號手
遠山湖景
望番轉頭
厘個時候，導遊先生拎出個小號向湖中岩壁吹起黎，樂曲悠揚悅耳，每吹一小段就停，跟住山中迴響導遊剛吹嘅一段樂曲，同樣優美，如是者重複吹奏再反響。
曲終後，遊客嘅小費當然唔少得，不過都係隨意嘅！
今日天氣較陰，山中霧氣低降，另有美態。
我地先遠後近，所以到St Bartholomew's Church嘅站唔落住，下個站先落。
部份遊客上岸，船繼續開行，漸漸遠離St Bartholomew's Church .
到Salet，我地落船LU！
我地搭頭班船，所以係第一批遊客到此，周圍無人，晏D就有人到架啦！
沿路深入
雖然陽光欠奉，但倒影仍清晰，如果有光就正到痺啦！
最後，我地行到厘度，間中毛毛細雨，算啦！唔再上。
臨走影多幾張
原路反回，經過餐廳，當然未有生意啦！
我諗有陽光會好靚
水鴨，你地真係好優悠呀！
青山綠水，不缺野花，厘D環境，直情乜煩惱都話之佢啦！
陸續有船駛入，厘艘剛經過瀑布。
黎番到碼頭等船
上番船到St Bartholomew's Church .
厘度唔會查票，因為黎得嘅梗係全票。
好快就到左StBartholomew's Church ，離遠已望到好多人啦！
（有D人先玩厘度／只玩厘度）
碼頭餐廳部份售價（嘻！不過唔知係乜
）
D霧又黎啦！
黎厘度，當然要入教堂啦！
哈！參觀完教堂，個天好似開D囉喎！不過我地都遊覽完lu！搭船返停車場攞車啦！
遊覽船外型
厘度D水鴨好活潑
一蚊雞就有個紀念幣
玩完國王湖，驅車返慕尼克，準備第日晚上回程返港，（係呀！行程到尾聲啦！）
雖然已經準備左三文治做午餐，經過超市，橫掂厘度地方又肆正，又有熟食，
不如食埋先再起程囉！
食飽繼續往慕尼克 , 而家先黎藍天白雲，喺國王湖係咁嘅天咪好囉！
眨下眼就進入德國境啦！
咦！有好多水鳥，又可以泊車，休息下，
順便將原本嘅午餐請D雀食啦！（嘩！D火腿正呀！）
我都唔氣客啦！整番件先。
我地分住兩間Apartment，雖然無廚房，不過包早餐，而且房間好正。
小鄧同輝哥嘅單位
我地個單位要上樓梯
裏面大致差不多
小鄧同輝哥想休息下，食番個靚晚餐，但我倆比較爛玩，一於唔嘥，
求祈食個麵飽，跟住行去地鐵，出市中心玩LU！
首先當然要買飛啦！喺地鐵月台售票機選MVV，雖然我地只得兩個人
（一張邦票最多可供5人使用），但來回最少搭4次車，
仍然係買Group day ticket著數，只要在4環之內就無限次任搭。
票價可入厘個網址睇下:
[url=https://ticketshop.mvv-muenchen.de/index.php/tickets]https://ticketshop.mvv-muenchen.de/index.php/tickets[/url]
4環內嘅車站任搭
地鐵、火車、 輕鐵、巴士同電車都可以任你穿梭，
如果用盡張飛（5人共用），真係平過香港好多喎！
奇怪，列車關左門，咁耐都唔開車嘅？原來厘度地鐵門嘅開關同香港唔同，
完全交俾乘客控制，上落車唔該自己動手撳下中間個紅色掣。
地鐵車箱及瑪利恩廣場站月台
先到瑪利恩廣場站，市政廳、教堂等都喺厘度，唔係呀！落緊大雨？
左手邊三角形山牆嘅係舊市政廳，旁邊鐘樓係玩具博物館。
莫非我地先係貴人，仲諗住出黎影下夜景添！好彩聽朝會再黎啫！
無法啦！一場黎到，點都行下嘅！弊在無帶雨具（出黎時天色好好架嘛），
即刻買把遮，都要厘喺騎樓底先影到厘張相。
新市政廳
落大雨，最好係入教堂參觀啦！
慕尼克最古老嘅教堂----聖彼得教堂（太大雨，門面影唔到啦！）
教堂後方
教堂內安放住被封為聖人嘅SaintMunditia遺骸，玻璃棺頂係佢嘅頭骨。
跟住去到慕尼克聖神教堂(Heilig-Geist-Kirche)，當然都係影唔到門面啦！
聖神教堂外觀
經過個商場
入教堂避雨嘅如意算盤打唔響，因為聖母教堂關門啦！
聖彌額爾教堂一樣關左門
落住大雨，根本連地圖都無心睇，求祈見路就行。
跟住我地行到卡爾門Karlstor同卡爾廣場，厘附近好多好靚嘅古老建築，如果有打燈，應該有好靚嘅夜景嘅！可惜今晚仲落大雨添！掃興！
卡爾門＆卡爾廣場
無辦法，有瓦遮頭就只能影成咁，聽日一定再黎過。(地方法院)
附近有座巴伐利亞嘅政治家Maximillan Joseph 雕像
之前喺網上見寶馬世界夜景好靚，差唔多時間，於是搭地鐵去Olympiazentrum站。
好彩黎到停雨啦！
離遠就望到個OlympicTower，09:00-23:00可以俾€5.5上瞭望塔，
天氣咁差，慕尼克夜景又馬馬，上去都無用啦！
見網上圖片，厘座奇特建築外面著左藍燈，好靚！唔通未開？
入去探究下先，無人，真係有D失望。
厘兩座係博物館同辦公大樓
等左大半個鐘，天色都咁黑囉！睇怕都係無燈架啦！入去睇下野兼問下人先。
難得搵到位清潔工，講完一論，雞同鴨講，無符！
咁睇下D車啦！我對汽車無認識，亂咁噏，講錯莫怪喎！
厘架好Q呀！得三個轆。
厘架Mini都好靚
未見過咁嘅寶馬（不過我見唔到個寶馬標誌喎）
厘架係用電嘅環保設計，我喺香港都見過，不過唔知係咪用電嘅啫！
參觀完都差不多九點，要返去啦！(地鐵月台)
車箱已經無乜人
上落車仍然要自己開門，厘個門把係拉嘅！
我地住近Feldkirchen站，要喺Marienplatz轉車，反正係DAYPASS，又上地面行下，
十點唔夠，已經水靜鵝飛。
叫做影番張夜景
周圍都好靜
有D店舖關左門，不過廚窗仍著燈。
落地鐵搭車返酒店，早抖LU！
D14 完
Munich City >Nymphenburg palace(48.160330, 11.505638) >
19:00 Airport (LH730 22:15)
今日係行程嘅最後一日，全日都以公交代步，上午作市區遊，
下午遊寧芬宮，真係少D腳骨力都唔得呀！
因為我地分兩組各自按喜好遊市區，所以大家睇嘅可能有唔同，
例如小鄧同輝哥有上新市政廳鐘塔上欣賞慕尼克，厘D相片，我都期待睇小鄧放上黎啦！
先俾大家睇下我倆上午行左去邊啦！
以上兩幅地圖，除左阿桑教堂無時間去，基本上全去齊啦！
當日上午完全無入過博物館，始終行博物館要細遊先有意思，都係主力睇市容啦！
厘間酒店嘅早餐非常周到，check in時俾定張早餐紙我地，選好哂早餐，
依照我地要求嘅時間送到房間，所以每間房都有完備嘅餐枱椅。
食完早餐，上好行理，辦好check out，因為酒店方面容許我地泊架車喺度，咁就玩完先搭地鐵返黎攞車再去機場交車都未遲。
酒店方面有邦票預售，好方便！
上面果張係預售邦票，票面原本無日期，搭車前要先去蓋印機打印日期（票頂所示）,否則當逃票論，捉到重罰架！
下面果張係我倆尋晚出去時喺地鐵售票機即時買嘅，已經有日期，所以唔使蓋印。
地鐵入口同月台都有藍色嘅打印機，將票放入，會自動蓋上日期。
月台上嘅自動售票機
地鐵月台
又係黎到瑪麗恩廣場，同尋晚重複左D，希望大家唔好介意；
今日雖然天陰，但無落雨，唔錯啦！
新市政廳的確好靚，鐘塔中間綠色部份會喺11、12、15、17點正轉動。
整座建築佈滿精細嘅雕刻，包括國王、聖人，甚至傳說嘅人物雕像都有。
廣場中間嘅瑪利亞圓柱
圓柱基座上有四個小天使，佢地揸劍斬殺嘅妖獸，代表戰爭、瘟疫、飢餓同無信！
鐘樓底有入口進入新市政廳內廣場，內有露天餐廳。
內廣場建築同樣精細
尋晚太匆忙，今朝再黎，又係慕尼克聖神教堂(Heilig-Geist-Kirche)，今朝光線好D。
厘間服裝店有好多美女臨街打招呼
伊薩爾門（ISARTOR）
見有樓梯可上，不過關埋門嘅。
幾座城門中，我最鐘意厘座。
附近噴泉
仲有古城遺址
圖上紅圈嘅就係厘個位置
附近嘅雕塑
行到穀物市場
厘間海鮮食肆最矚目
一團遊客正品嘗外賣海鮮
集飲食、蔬果、紀念品、雜貨於一身嘅露天市場。
厘個渠蓋中間嘅人物唔知係咩意思
暫時行住咁多先，要預留十分鐘行返新市政廳睇時鐘表演，返到鐘樓已經企滿遊客。
表演由上層開始伴隨音樂轉動
最後係兩匹馬迎面揮戟對打
跟住到下層嘅舞者旋轉跳舞
睇完時鐘，去聖母教堂參觀
相比之前睇嘅教堂，厘度樑柱同頂部比較樸素，不過有其他可觀性架！
路易四世銅刻墓碑
華麗嘅彩色玻璃窗值得欣賞
教堂後的管風琴
亦有好多精細木雕藝術
以現代手法描繪聖經故事
旁邊另有小教堂
行埋地庫小教堂 , 走LU！哎呀！睇漏左魔鬼腳印添！
繼續北行 (望返轉頭新市政廳嘅背面)
經過Max-Joseph-Platz，兩支天秤真係大煞風景。
廣場中央係Max-Joseph國王銅像，銅像背後係巴伐利亞國家歌劇院。
繼續前行就係統帥堂
中間係普法戰爭中巴伐利亞軍隊紀念雕像
卡爾菲利普王子銅像
取得勝利嘅巴伐利亞統帥銅像
從統帥堂下望音樂廳廣場
統帥堂旁邊係鐵阿提納教堂
有D唔好彩，維修緊添！外牆用原有教堂嘅畫遮住，感覺好好多。
教堂內，無論係一樑一柱，或者天花穹頂都佈滿華麗嘅雕刻，馬克思二世及王后嘅墓都喺厘度。
連告解室嘅雕飾都咁華麗
厘座係錢幣博物館，應該都係皇宮嘅一部份。
巴伐利亞嘅一所大學
因為約定團友返瑪麗恩廣場集合，下午仲要去寧芬宮，只能喺皇宮花園附近走走就算。
跟住西行去Karolinenplatz，離遠就望到有座方尖碑。
佢係紀念巴伐利亞喺拿破崙時期與俄戰爭嘅陣亡戰士
因為計劃係繞個圈，所以南行返卡爾門，經過一座充滿神話幻想嘅噴泉。
卡爾廣場附近嘅建築物
仲有噴泉
尋晚無開噴泉，今朝補番。
厘三個小孩樂手銅像用鐵網保護，下面有字，不過唔知講乜。
尋晚經過伯格塞爾教堂（Burgersaalkirche）都係關左門，
外表較普通，諗住無咩睇，行過即管入去啦！
咦！都算意外驚喜喎！教堂內有地庫，兩邊置滿聖經故事嘅雕塑，中間係小教堂。
樓上大教堂華麗堂煌，無論壁畫或浮雕都十分精細。
繼續行返瑪麗恩廣場，途經聖彌額爾教堂，又入去行下囉！
兩門之間嘅雕像
教堂係豪華嘅羅馬式建築，好靚！
剛好準時同團友集合，齊齊出發去寧芬宮；我地先坐地鐵去到MünchenHbf站，再轉17路電車到SchlossNymphenburg，行幾分鐘就到，好方便。
黎到第一眼，就係標誌性嘅宮堡倒影喺湖面。
前行正中嘅係遊客中心
當然都係以前嘅皇宮啦！你睇條樓梯都咁靚。
喺樓梯頂眺望整個花園。
入去買飛囉！寧芬宮比施萊斯海姆宮大好多，門票€11.5，
每去一個宮，就會喺張飛後面打窿
當然啦！如果跟團，肯定唔會行哂，因為我地無停步咁行，都要兩個幾鐘先參觀完架！
首先，我地參觀SchlossNymphenburg，即係遊客中心果座建築，裏面分好多房間，部份係咁嘅。
當然唔少得皇室人員嘅掛畫同天花頂上嘅神話作壁畫啦！
之後我地參觀皇家馬車博物館（Marstallmuseum），厘度嘅馬車同馬飾，真係嘆為觀止，超讚！
厘隊係1:1模型馬隊拉嘅馬車
連馬車嘅後面，雕刻都係一絲不苟架！
我覺得厘架似兒童馬車囉！
厘度嘅馬車同雪橇，又多又靚，睇住些少先啦！
厘邊嘅馬車比較現代化，但手工仍然精細，肯定係藝術品！
厘幾架就平民化D
繼續樓上嘅博物館，陳列多套豪華嘅套馬皮具。
厘套十足童話裏嘅馬套飾呀！
馬匹禮服示範同馬具
出巡馬隊模型
原來瑪利亞皇后都坐轎嘅（嘻嘻！我以為中國皇室多用轎咋）
除左馬具，仲有皇室用嘅瓷具。
其實每個景點相隔點都要行十零廿分鐘，所以都要D體力嘅！
我地經過厘度係王子嘅休憩花園，只得一間屋，無入去睇，
留番俾厘位小王子同佢父母慢慢獨享景點啦！
沿路前行，去到Amalienburg。
厘座宮雖然細細地，不過幾有特色。
厘張床好細
厘個宮唔少地方富中國色彩
厘D瓷磚驟眼睇好有中東色彩
再睇真，都係中國嘅庭台樓閣。
廚房
厘棵樹老啦！要撐拐杖。
而家厘個宮殿主人係佢地囉！我地行埋些少咋！D成年鴨好惡咁保護仔女。
如果有時間閒遊，整個皇宮花園係免費嘅，所以唔少本地人黎散步。
又到左 Babenburg
入門己係豪華宮殿設計
房間又係用唔少中國牆畫粉飾
狩獵圖，有咩典故就唔知啦！
厘度係二樓向下望，你咪以為係天井喎！
查實係個豪華浴池（做泳池都得啦）
咪搞錯，唔係故宮，係Babenburg嘅房間黎架！
厘個壁爐嘅掩門，係皇室標誌。
參觀完，又去下一個囉！
停！停！停！睇唔睇到遠處嘅草地有隻動物呀？
係鹿呀！（梗係小鄧講我先睇到啦）
厘D係咪雁呢？周圍踱，唔怕人，鬼咁逍遙，羨慕死人。
厘座係Pagodenburg，小巧玲瓏，但都好豪華。
同樣地用左好多瓷磚同中西合璧嘅設計
跟住再按導覽圖到Magdalenenklause
厘座建築外形殘舊，從外貌可以睇到係座教堂。
見到厘個聖水盤就更加肯定啦！
不過入到去有意外驚喜，一D都唔殘破，而且好有創意添！
整個教堂採用天然而粗糙嘅物料，如貝殼、水泥、卵石等，顏色都係來自天然，好靚。
二樓牆上掛有聖經故事圖
參觀完教堂，算係完成整個寧芬宮嘅景點，我地行完整個寧芬宮上埋洗手間，已經係16：20，搭番公交返酒店攞車，再去機場交車，時間差唔多啦！
論自駕旅遊，四人組係新丁，好多情況都無經驗，
所以分享多D厘方面嘅資料，方便新手，請師兄們咪笑我班門弄斧喎！
話說之前遊北歐，都係邊度攞車，邊度還車，車匙掉落Drop Box 。
厘次攞車時，職員表示到Block 6還車，車匙放喺車箱裏面就走得；
原來慕尼克玩法唔同，還車另有停車場大樓，我地兜左幾次，都見唔到第六座，最後問人，原來所有租車公司都係集中一座停車場，大樓外只有Car Rental Return字樣，入到去先見Block 6，仲有厘個牌，下面標示所有公司都係厘度入，
雖然我地兜左廿幾分鐘，其實佢地還車手續仲簡單。
一入去 , 整個停車場塞滿車 , 有專人指揮泊位，我地嗱嗱淋落行理，
後面又黎緊好多車，哈哈！有D似走難。
環阿爾卑斯山脈15天行程順利、溫馨地完滿結束啦！